Xana U Ti Longisele A Kuya Xikoleni?

1. Malungelo muni mu ta ngava nawo a xikhati lexi mu to sangula kuya xikoleni?

¹ Kani ku tava lembe ga wena go sangula, kani ku tava lembe ginwani na uya xikoleni, nwina vaswa va maKristu mu ta yimisana ni zikarato ni mitshikelelo yiswa. Kanilezi mu tava ni malungelo maswa ya ku “kustumunya hi zinene.” (Joh. 18:37) Xana u ti longisele khwatsi lezaku u nyika wukustumunyu?

2. Xana u ti longisele hi tindlela muni lezaku uya xikoleni?

² Kasi a ku ku vuna lezaku u humelela matlhelweni wontlhe ya wutomi, u kumile a gonziselelo yinyingi hi ka Jehova, hi ka vapswali va wena, ni ka nanza gi tsumbekileko ni go tlhariha. (Mav. 1:8; 6:20; 23:23-25; Efe. 6:1-4; 2 Tim. 3:16, 17) Ka xikhati lexi, handle ko kanakana wa zi tiva a zikarato lezi u faneleko ku zi rinzela xikoleni xa wena. Hi gonziselelo ya Nungungulu zinwe ni wutivi u nga nago xungetano hi ziyimo lezi u to yimisana nazo, ti longisele lezaku u nyika wukustumunyu. (Mav. 22:3) Chela nguvu kota hi zileletelo ni mawonela ya lisima ya lomu ka Mitsalo ma kumekako ka tivolume timbiri ta Os Jovens Perguntam zinwe ni ka tinzima ti fambelanako ni lezo ti humeswako hi kukhanzakanya lomu ka Despertai!

3. U nga zi kotisa kuyini a ku nyika wukustumunyu?

³ A xipanze lexo xa wena xo hlawuleka xi ta ku nyika malungelo ya ku nyika wukustumunyu hi tindlela to tala. A xikhati lexi a vanwani va wonako a maambalela ni kutisasekisa ka wena ka ku nene, mahanyela ni mawulawulela, xichawo xa wena ka zigonzani-kuloni ni ka vagonzisi, hambu ni tinota ta wena, ni ku wona lezaku wena u na ni xiseketelo xo tiya wutomini, a vo kari va nga ha ku wutisa lezi, “Hikuyini u hambeneko nguvu ni vanwani?” (Mal. 3:18; Joh. 15:19) Lego gi nga hava lungelo gi ku vululekeleko lezaku u nyika wukustumunyu ni ku tlhamusela lezi u zi kholwako. (1 Tim. 2:9, 10) A xikhati lexi a lembe gi yako mahlweni, kuzilava u ta yimisana ni zikarato zi fambelanako ni zihena za wutiko kutani tiferiado. Loku u wutisiwa a ku hikuyini u nga ti patsiko navo, xana u ta hlamulisa lezi, “Hi lezaku lezo za lwisana ni wukhongeli ga mina; Mina nzi munwe wa Timboni ta Jehova,” kutani u ta lonzowota a lungelo lego lezaku u nyika wukustumunyu xungetano hi Dadani wa wena wa liranzo, Jehova? A kutilongisela khwatsi zinwe ni wurangeli ga Jehova zi ta ku maha u tshama na u longile kasi u nyika wukustumunyu gi nene ka vagonzisi, zigonzani-kuloni, ni vanwani. — 1 Ped. 3:15.

4. Xini xi ku tiyisako lezaku a zilo zi ta ku fambela khwati xikoleni a lembe legi?

⁴ Hambu lezi u nga ha chavako nguvu loku u alakanyela a kuya xikoleni, tiva lezaku u na ni xivuno xa vanhu vo tala lava va lavako lezaku a zilo zi ku fambela khwatsi xikoleni a lembe legi. A ku hunza lezo, hi tsaka zinwe na wena hi malungelo lawa u nga nawo ya ku nyika wukustumunyu le xikoleni, ku nga xipanze xa wena xo hlawuleka. Hikwalaho, tiya-hlana u tlhela u longa a kuya xikoleni!