‘U Nga Chavi’
1. A ku fana na Jeremia, hi zihi a zikarato lezi a munwe ni muwani wa hina kuzilava a yimisanako nazo?
1 A xikhati lexi Jeremia a nga nyikiwa ntiro wa kuva muprofeti, i lo tizwa na a nga ringanelwi. Kanilezi Jehova i lo mu tiyisa aku, ‘U nga chavi,’ a tlhela a mu nyika ntamu wa ku tatisa a xiavelo xakwe. (Jer. 1:6-10) Masikwini ya hina, a kuchava kutani ku nga ti tsumbi za zi kota ku khumba a matirela ya hina wutirelini. A ku chava lezi kuzilava a vanhu va to hlamulisa zona kutani lezi va to hi wonisa zona, zikhati zinwani zi nga hi maha hi tlhelela nzhako. Hi nga hlulisa kuyini a kuchava loko, niku hi wahi a makatekwa hi to ma kuma hi kota ya lezo?
2. Xana a ku ti longisela ku ta hi vunisa kuyini a ku mbheta kuchava wutirelini?
2 Longisela Na Ka Ha Hi Mahlweni: A ku ti longisela khwatsi ku nga vuna nguvu kasi ku mbheta kuchava ka hina. Hi xikombiso, loku hi vuxeta na ka ha hi mahlweni lezi a vanhu va talako ku wula kasi ku tsema bhulo, hi tava na hi longile a ku hlamula a ziwutiso lezi zi talako ku mahiwa. (Mav. 15:28) Hikuyini mu nga vuxetiko hi ku maha mikombiso yo kari xikhatini xa Wukhozeli ga Ngango lezaku mu ti longisela ka ziyimo zo tsalangana zo nonoha zi humelelako xikoleni ni wutirelini? — 1 Ped. 3:15.
3. Xana a ku tsumba Jehova ku hi vunisa kuyini a ku hlula kuchava?
3 Tsumba Jehova: A muri wa lisine wa ku mbheta kuchava ku tsumba a Nungungulu wa hina. Jehova i tiyisile lezaku i ta hi vuna. (Isa. 41:10-13) Xana ku na ni wuvikeli go tiya go hunza legi? Tlhatakumbiri, Jesu i hi tiyisile hlana aku hambu loku ku humelela nchumu hi xitshuketi, a moya wa ku basa wa Nungungulu wu ta hi nyika ntamu wa ku nyika wukustumunyu hi ndlela yi nene. (Mar. 13:11) Hikwalaho, kombela a moya wa ku basa ka Jehova xontlhe xikhati. — Luka 11:13.
4. Hi wahi a makatekwa ma kumiwako hi ku timisela wutirelini na ku nga khataliseki a zikarato?
4 Makatekwa: A xikhati lexi hi timiselako wutirelini na ku nga khataliseki a zikarato, ha nyikiwa ntamu wa ku yimisana khwatsi ni minzhingo yi tako. Hi kuma kutiya-hlana — gi nga tshamela ga lava va teleko hi moya wa ku basa. (Miti. 4:31) Ku nga hi lezo ntsena, a xikhati lexi hi hlulako a kuchava hi ku vuniwa hi Jehova, hi tiyisa a kukholwa ni kutsumba ka hina canjeni gakwe gi hanyisako. (Isa. 33:2) Hi kuma litsako ni kuxalala hi ku tiva lezaku hi tsakisa a Dadani wa hina wa le tilweni. (1 Ped. 4:13, 14) Makunu-ke, ngha hi nga chavi a ku huwelela a mahungu ya Mufumo hi kutiya-hlana, xontlhe xikhati na hi tiyiseka lezaku Jehova i ta hi vuna!