Hi Fanele Kuva Ni Kutimisela Wutirelini Ga Hina

1. Xana Jehova i kombisisa kuyini a kutimisela hi vanhu?

¹ Nungungulu wa timisela nguvu hi vanhu. (Ekso. 34:6; Tis. 106:41-45; 2 Ped. 3:9) A xinwe xa zikombiso za hombe za kutimisela kakwe ka liranzo xi nga woniwa ka ntiro wa ku xumayela Mufumo misaveni yontlhe. Jehova i tirisana ni vanhu hi xipimo xa 2.000 wa malembe, hambulezo yena wa ha simama a kokela vanhu va timbilu ti nene. (Joh. 6:44) Xana a wutireli ga hina gi nga kombisisa kuyini a kutimisela ka Jehova?

2. Hi nga kombisisa kuyini a kutimisela a xikhati hi tirako xipanzeni xa hina?

² Wutirelini Ga Muti-ni-Muti: Hi pimanyisa a kutimisela ka Jehova hi ku xumayela ‘hi nga tsiki’ ka zipanze lezi a vanhu va kalako va nga se kombisa kutsakela. (Miti. 5:42) Hi timisela a kungakhatali, kutseketselwa ni kukanetwa hi lihlaza-mbilu wutirelini ga hina. (Mar. 13:12, 13) Hi kombisa a kutimisela kambe hi ku simama mizanweni ya hina ya ku cheletela mati a mbewu ya zinene hambu loku zi karata ku kuma vanhu va kutsakela lomu mitini.

3. Hikuyini a kutimisela ku lavekako a xikhati hi mahako maenzo yo wuyela ni ku fambisa zigonzo za Biblia?

³ Zigonzweni Za Biblia: A ku kulisa sinya zi lava a kutimisela. Ha zi kota ku yi hlayisa, kanilezi a hi nge hatlisisi a kukula ka yona. (Jak. 5:7) Hi kufanana, a kukula hi tlhelo ga moya ku maheka hi kutsongwani-kutsongwani. (Mar. 4:28) Lava hi gonzako navo zi nga ha va karatela ku tsika a tigonzo ta wukhongeli ga mawunwa kutani mikhuwo yi lwisanako ni Mitsalo. A hi faneli ku zama ku hatlisisa a kukula ka zigonzani za hina hi ku zi kurumeta a ku hunzuluka. Ku laveka a kutimisela kasi ku nyika a moya wa Nungungulu a xikhati xo enela lezaku wu tira mbilwini ya xigonzani. — 1 Kor. 3:6, 7.

4. Xana a kutimisela ku nga hi vunisa kuyini a ku nyika wukustumunyu go tiya ka maxaka ma nga hiko makholwa?

⁴ Maxakeni Ma Nga Hiko Makholwa: Hambu lezi hi xuvako nguvu lezaku a maxaka ya hina ma nga hiko makholwa ma gonza a zinene, hi kombisa a kutimisela hi ku rinzela a xikhati xi faneleko kasi hi va bhulela hi kukholwa ka hina, na hi ti wonela lezaku hi nga va tateli timhaka. (Mutsh. 3:1, 7) Na zi nga se koteka lezo, hi tsika a xikombiso xa hina xi hi wulawulela hi tlhela hi tshama na hi longile a ku va xumayela hi kurula ni xichawo xo eta. (1 Ped. 3:1, 15) Hakunene, a kuva ni kutimisela wutirelini zi ta bhinzula nguvu zi tlhela zi xalalisa a Dadani wa hina wa le tilweni.