A kuhlamalisa ka zivangwa ku kombisa wudzunzo ga Nungungulu
A votala va zi ranza a ku hlamala-hlamala zivangwa. Kanilezi vatsongwani va zi tivako lezaku a zivangwa zi kombisa a maalakanyo ni kutizwa ka Muvangi wa hina wa Hombe. (Rom. 1:20) Kaleloko, Davida i tivile Jehova hi ku gonza a Mhaka Yakwe yi pimisilweko. Kanilezi i Mu “wonile” a tlhela a tshinela ka Yena hi ku cuwuka a zivangwa. (Tis. 8:3, 4) A vidiyu leyi yi nga ni hloko ya mhaka As Maravilhas da Criação Revelam a Glória de Deus (A kuhlamalisa ka zivangwa ku kombisa wudzunzo ga Nungungulu) yi vuna hina, vana va hina, ni zigonzani za hina za Biblia a ku hlamala-hlamala a zivangwa zo kari za Jehova, hi wona a matshamela ni wumunhu ga Muvangi wa hina wa Hombe, hi tlhela hi tshinela ka yena. Anzhako ka ku hlalela a vidiyu, zama ku hlamula a ziwutiso lezi zi lanzelako.
(1) Xana a wuhombe ni lezi a zivangwa zi xaxametisilweko zona wuakweni zi etisisa kuyini a ku mu hlamala ka hina Jehova? (Isa. 40:26) (2) Loku hi cuwuka khwatsi a mati, zini hi gonzako ka Loyi a ma wumbileko? (Kuv. 14:7) (3) Xana a wuhombe ga misava ni pfhuka lowu wu yi hambanisako ni gambo zi kombisisa kuyini a wutlhari ga Jehova? (4) Xana a hweti yi tirela yini? (Tis. 89:37) (5) Zini zi kombako ku ngalo Jehova i wumbile vanhu lezaku va ti buza hi wutomi? (6) Xini a DNA? (Tis. 139:16) (7) Xini xi hambanyisako vanhu ni zivangwa zontlhe za Jehova za laha misaveni? (Gen. 1:26) (8) Zini u xuvako ku zi wona kutani ku zi maha misaveni yiswa?
Zinwani zikombiso (Extras): (9) A mivala yita hi kwihi? (10) Xana a mati ma hlulisa kuyini a ntamu wa kukoka ka misava lezaku ma chikela hehla ka tisinya? (11) Hi wihi a ntiro wa mati mirini wa hina? (12) Nyika zikombiso za kuyelana ku nga kona xikari ka zivangwa zi hanyako. (13) Xana a zivangwa zi hanyako zi zi tivisa kuyini a ku maha wunghana ni zinwani? (14) Xini a “ângulo de ouro” (gwitsi ga nzalama), niku gi wonekisa kuyini ka zivangwa?
“Langutani” a zivangwa za Jehova: Jesu i hi kucile a ku ‘languta a tinyanyani ta tilo’ hi tlhela hi ‘languta a makhon’wa ya lomu khwatini.’ (Mat. 6:26, 28) A ku maha lezo zi nga etisa a kukholwa ka hina, zi tiyisa a kutsumba ka hina ka Muvangi, zi tlhela zi tiyisa a kuhlamala ka hina a wutlhari ga Jehova, ntamu wakwe wa ku hanyisa ni liranzo lakwe. Wutshanwini ga ku hungatelwa hi mitiro ya tiko legi, ti nyike xikhati u tlhela u ti karatela ku cuwuka a kuhlamalisa ka zivangwa za Jehova, u tlhela u ehleketa hi lezi zi ku gonzisako hi Nungungulu wa hina. — Tis. 19:1.