Kwadru Ga Ziwutiso

◼ Matshinya muni ya milayo ya Biblia ma tirako ka ku tirisa a selulari mitlhanganweni ya wuKristu ni xikhati hi nga wutirelini?

“A xilo xinwe ni xinwani xi na ni nguva ya xona.” (Mutsh. 3:1): A selulari yi vuna vanhu a ku tsala timesaje kutani ku wulawula ni vanwani ni ka xihi xikhati. Hambulezo, ku na ni zikhati lezi a maKristu ma kalako ma nga lavi ku colopetelwa hi fone. Hi xikombiso, a mitlhangano ya hina xikhati xa ku khozela Jehova, hi gonzisiwa hi tlhelo ga moya, ni ku tiyisana hlana. (Deut. 31:12; Tis. 22:22; Rom. 1:11, 12) Xana a hi chukwana a kuva hi tima a tifone ta hina a xikhati hi chikelako, hi guma hi ti vulula a xikhati yi mbhelileko a mitlhangano? Loku ku hi lezaku hi rinzela mahungo ya xihatla ma lavako ku hi nga timi fone, hi fanele ku yi tsika ka xiyimo xa ku yi nga colopeteli vanwani.

“Maha zontlhe lezo hi kota ya mahungu yo saseka.” (1 Kor. 9:23): Ka zikhati zinwani, ku na ni zigelo zo zwala kasi hi tirisa fone wutirelini. Hi xikombiso, a makabye loyi a rangelako simu a nga ha yi tirisa kasi ku bhula ni lava va nga ka matlhelo manwani ya xipanze. A vahuweleli va tshuka va tirisa a tifone tabye kasi ku fonela a munhu a kombisileko kutsakela kutani xigonzani xa Biblia na va nga se xi enzela, nguvunguvu loku a munhu loye a tshama kule. Loku hi hi ni fone, hi fanele ku ti wonela ku yi nga hi colopeteli a xikhati lexi hi wulawulako ni nwinyi wa muti. (2 Kor. 6:3) A xikhati lexi hi rinzelako vahuweleli vanwani, wutshanwini ga ku fonela munghana kutani ku mu tsalela a mesaje, xana a zi ngevi chukwana a ku khatalela a wutireli ga hina kutani lava hi tirako navo?

Alakanyela vanwani. (1 Kor. 10:24; Fil. 2:4): A hi lavi ku tsika ku ti karatela ku chikela hi xikhati mitlhanganweni ya ntiro wa simu hi ku alakanya lezaku hi ta fonela munhu kasi ku tiva lomu a ntlawa wu tirako kona. Loku hi chikela na hi celwe, a kutala ka zikhati a ntlawa wu kurumeteka ku cica zo kari. Lisine ku hi nga tshuka hi celwa hi kota ya zilo za xitshuketi. Hambulezo, loku hi tolovela ku chikela hi xikhati, hi kombisa xichawo hi lulamiselo ga Jehova, makabye loyi a rangelako simu ni vahuweleli-kulori.