Pimanyisa a xikombiso xa vaprofeti — Joeli
1. Hi nga xi pimanyisisa kuyini a xikombiso xa Joeli xa kutikoramisa a xikhati hi xumayelako?
1 I wa hi mani muprofeti Joeli? I wula ntsena lezaku i wa hi “n’wana Petueli.” (Joe. 1:1) A muprofeti loyi wo ti koramisa i wa rangisa mahungu ya Jehova ku hunza a ntiro wakwe kota muprofeti. Hinawu, wutshanwini ga ku ti lavela wudzunzo kutani nduma, hi rangisa Jehova ni Biblia wutirelini ga hina. (1 Kor. 9:16; 2 Kor. 3:5) Tlhatakumbiri, hi kuma ntamu ka mahungu lawa hi ma xumayelako. Ka xiprofeto xa Joeli, xini lexi xi nga hi mahako hi hiseka hi tlhela hiva ni kutsumba nyamutlha?
2. A ku tiva lezaku a siku ga Jehova gi laha kusuhani zi hi kuca ku maha yini?
2 “A siku ga Jehova gi tshinele.” (Joe. 1:15): Hambu lezi a magezu lawa ma tsalilweko kale nguvu, inyamutlha hi hanya masikwini ya kutatiseka ka wona ko gumesa. A xiyimo xo biha xa tiko, kurukatelwa ni kungakhatali ka vanhu loku hi ku kumako a xikhati hi xumayelako, zikombiso zo dlunyateka za lezaku a masiku yo gumesa ya tiko legi ma sangulile. (2 Tim. 3:1-5; 2 Ped. 3:3, 4) Kota lezi hi wonako ku a magumo ma laha kusuhani, hi na ni xigelo xo zwala xa ku rangisa wutireli wutomini ga hina. — 2 Ped. 3:11, 12.
3. Hikuyini a ku xumayela zi nga za lisima nguvu laha a kuxaniseka ka hombe ku yako ku tshinela?
3 “Jehova i tava wuchavelo ga vanhu vakwe.” (Joe. 3:16): A kutsekatseka loku ku kumbukiwako ka vesi legi a ku wuli ximaho xinwani ahandle ka kulamula ka Jehova xikhatini xa kuxaniseka ka hombe. Za hi tiyisa hlana a ku tiva lezaku Jehova i ta ponisa a malanza yakwe yo tsumbeka xikhatini lexo. (Kuv. 7:9, 14) A xikhati lexi hi xumayelako hi tlhela hi wona lezi Jehova a hi hlayisisako zona ni ku hi tiyisa, hi aka a kukholwa ni kutimisela loku ku to hi vuna xikhatini xa kuxaniseka ka hombe loku ku tako.
4. Xigelo muni hi nga naxo xa kuva hi tsaka ni ku rinzela lezi za ha tako hi kutsumba?
4 A vokari va wula lezaku a mahungu ya Joeli ma wulawula hi khombo. Hambulezo, a mahungu lawa ma tsumbisa a vanhu va Nungungulu lezaku va ta tlhatlhiswa. (Joe. 2:32) Hikwalaho, ngha hi rinzela lezi za ha tako hi kutsumba hi tlhela hi xumayela mahungu yo saseka ya Mufumo wa Nungungulu hi kuhiseka na hi kari hi ingisa magezu ya Joeli 2:23 yaku: ‘Tsakani, mu tsakela Jehova a Nungungulu wa nwina.’