Kwadru Ga Ziwutiso

◼ Kasi a muhuweleli a nga bapatizwangiko a ringanelwa hi ku bapatizwa, i fanele ku ngha a yi wonisa kuyini a mitlhangano ya bandla ni ntiro wa simu ke?

A kubapatizwa xiboho xa lisima nguvu lexi munhu a xi mahako wutomini gakwe. Hikwalaho, na a nga se vumelelwa, i fanele ku ngha a hi ni wutivi go nyawula xungetano hi lezi Nungungulu a zi lavako kakwe. Tlhatakumbiri, i fanela ku ngha makunu a kombisa lezaku i ti yimisele ku hanya hi milayo ya Nungungulu.

A maKristu ma kuciwa lezaku ma nga tsiki ku tlhangana, hikwalaho a muhuweleli a nga bapatizwangiko i fanele ku ngha ata mitlhanganweni ya bandla hi kukhanzakanya. (Maheb. 10:24, 25) Zi tolovela ku ngha na a nyikela mihlamulo kambe. Kuzilava a nga ngha na a ti tsalelisile Xikoleni xa Wutireli ga Nungungulu, hambu lezi zi nga hiko xikurumeta.

Tlhatakumbiri, kota lezi a maKristu ma nyikilweko a ntiro wa ku xumayela mahungu yo saseka ni ku maha vapizani, a muhuweleli a nga bapatizwangiko i fanele ku ngha aya wutirelini hi kukhanzakanya na a nga se bapatizwa. (Mat. 24:14; 28:19, 20) Xana i fanele ku ngha a hi ni tihweti tingani kota muhuweleli a nga bapatizwangiko? Za zwisiseka lezaku i fanele ku nyikwa xikhati xa ku kombisa lezaku hakunene i ti yimisele ku xumayela hi kuhiseka ni kukhanzakanya hweti ni hweti. (Tis. 78:37) Hambulezo, a zi lavi kuza a mbheta xikhati xo leha na a hi muhuweleli a nga bapatizwangiko. Kuzilava ku ngava tihweti ti tsongwani. I fanele ku ngha a bika tihora tingani? A ku na mpimo wa tihora. A madota ma fanele ku alakanyela a xiyimo xa muhuweleli munwe ni munwani ma tlhela mava vanhu vo zwisisa. — Luka 21:1-4.

A madota (kutani malanza ya wutireli ka mabandla lawa ma nga ni madota ma tsongwani nguvu) lawa ma tlhanganako ni muhuweleli loyi a lavako ku bapatizwa a ma faneli ku rivala lezaku a vanhu va hambene, niku va fanele ku hlola khwatsi lezaku wa ringanelwa niku a nga ringanelwi ke. Va fanele ku tiyiseka lezaku a muhuweleli loye hakunene wa xuva kuva Mboni ya Jehova niku wa gi nyika lisima a lungelo gakwe ga ku ti tlhanganyisa ni hlengeletano ya Jehova zinwe ni ku xumayela a mahungu yo saseka. A madota ma fanele ku zwisisa kambe lezaku a nga se buva hi tlhelo ga moya kutani kuva ni wutlhari go khwatsi ga muvangeli a bapatizilweko loyi a buvileko. Loku a madota ma wona lezaku a nga ringanelwi ku bapatizwa, ma fanele ku mu tlhamusela hi wunene a zigelo za xiboho xabye na ma tirisa Mitsalo ma tlhela ma maha malulamiselo ya lezaku a vuniwa hi tlhelo ga moya.