Pimanyisa a xikombiso xa vaprofeti — Zefania
1. Xana Zefania i tirile kota muprofeti nzeni ka ziyimo muni, niku yena xikombiso xi nene ka hina inyamutlha hi ndlela muni?
1 Ku wa hi xikari ka zana ga malembe ga wu 7 Mahlweni ka Nguva ya Hina, xikhatini lexi a vanhu vo tala le Juda va wa kari va khozela Baali. Amoni a Hosi yo biha i wa ha hi ku dawa, niku ka xikhati lexo Josia, a Hosi ya Jaha, yi wa sangulile ku fuma. (2 Kro. 33:21–34:1) Nzeni ka xikhati lexo, Jehova i lo yimisa Zefania lezaku a kanela a mahungu Yakwe ya kulamula. Hambu lezi Zefania kuzilava a nga hi xiro xa yindlu ya wuhosi ya Juda, a nga hungulangi a ntamu wa mahungu ya Jehova ya kulamula hehla ka wuhosi ga Juda. (Zef. 1:1; 3:1-4) Hi kufanana, hinawu hi ti karatela ku pimanyisa a kutiya-hlana ka Zefania, hi nga tsiki a maxaka ya hina ma hi colopetela ku khozela Jehova. (Mat. 10:34-37) Mahungu muni lawa Zefania a kaneleko, niku ku vile ni wuyelo muni ke?
2. Zini hi faneleko ku maha kasi hi fihliwa sikwini ga zanga ya Jehova?
2 Hlota Jehova: Hi Jehova ntsena a zi kotako ku ponisa vanhu sikwini ga zanga yakwe. Hikwalaho, Zefania i kucile vanhu va le Juda lezaku va hlota Jehova, va hlota kululama, va tlhela va hlota a kutitsongahata na xikhati xa ha vumela. (Zef. 2:2, 3) Zi tano ni masikwini ya hina. A ku fana na Zefania hi kuca vanwani lezaku va hlota Jehova, kanilezi hinawu hi fanele ku maha xokari, hi kuva hi ti yimisela a ku nga tshuki hi ‘tlhelela nzhako hi fularela Jehova.’ (Zef. 1:6) A handle ka lezo, hi hlota Jehova hi ku gonza Mhaka yakwe hi wukheta ni ku mu kombela lezaku a hi kongomisa. Hi hlota kululama hi kuva ni mahanyela ma basileko. Hi hlota a kutitsongahata hi ku hlakulela a moya wa ku ti koramisa ni ku tekela ku lanzela a zileletelo hi nyikiwako hi hlengeletano ya Jehova.
3. Hikuyini hi faneleko ku rinzela za zi nene wutirelini?
3 Mihanzu ya yi nene: A mahungu ya kulamula lawa Zefania a kaneleko ma kucile vokari le Juda hi wutsongwani ga kona, kanilezi kuzilava loyi a nga khumbiwa nguvu kuve jaha Josia, loyi a sangulileko ku hlota Jehova na a ha hi mufanyana. Hi nzhako ka xikhati, Josia i lo maha tsima go fuvisa wukhozeli ga zifananiso lomu tikweni. (2 Kro. 34:2-5) Inyamutlha, hambu lezi a timbewu to kari ta Mufumo ti welako laha ruweni, tinwani ka maribye, kutani xikari ka mizwa, a tinwani kambe ti wela lomu ka misava yo nona ti tlhela ti pswala mihanzu. (Mat. 13:18-23) Ha tsumba lezaku Jehova i ta simama ku katekisa a kutikarata ka hina laha hi tshamako na hi khomekile hi ku xwanya timbewu ta Mufumo. — Tis. 126:6.
4. Hikuyini hi faneleko ku ‘rinzela Jehova?’
4 A vokari le Juda va wa alakanya lezaku Jehova i wa nga ta tshuka a maha nchumu. Hambulezo, Jehova i wa tiyisekisile vontlhe lezaku a siku gakwe ga hombe gi wa hi laha kusuhani. (Zef. 1:12, 14) Ku wa ta hanyiswa ntsena lava va mu mahako wuchavelo gabye. (Zef. 3:12, 17) Laha ‘hi rinzelako Jehova,’ ngha hi kuma litsako hi ku tira zinwe hi kuzwanana ni vakhozeli-kulori va Nungungulu wa hina a tlakukileko! — Zef. 3:8, 9.