A longoloko wa 2015 wa Xikola xa Wutireli ga Nungungulu wu hi vuna ku chukwatisa a magonzisela ya hina
1 Muyimbeleli Davida i tsalile lezi: “A timhaka ta nomu wa mina, ni maalakanyo ya mbilu ya mina, a zi amukeleke mahlweni ka wena, Jehova, a Ribye ga mina ni Mutiruli wa mina.” (Tis. 19:14) Hinawu hi lava lezaku a magezu ya hina ma amukeleka ka Jehova hakuva ha nyika lisima a lungelo ga hina ga ku wulawula lisine lomu bandleni ni wutirelini. A Xikola xa Wutireli ga Nungungulu yinwe ya tindlela leti Jehova a hi gonzisako hi tona ku tatisa wutireli ga hina. A gonziselelo leyi yi mahiwa viki ni viki mabandleni yo hunza 111.000 misaveni yontlhe. Yi vuna vamakabye va midawuko yo hambanahambana misaveni yontlhe lezaku va ringanelwa hi ku va vatireli va mahungu yo saseka, lava va zi kotako ku gonzisa hi ndlela yo kholwisa, ya wutlhari, ni kutiya-hlana. — Miti. 19:8; Kol. 4:6.
2 A longoloko wa xikola wa 2015 wu tava ni timhaka ti susiwako ka xibhukwana Xingheniso ka Mhaka ya Nungungulu zinwe ni mabhuku A Biblia Gi Gonzisako ni Liranzo la Nungungulu. Tlhatakumbiri ku tava ni kucica ka xikhati xa timhaka-tshinya ta kugonza ka Biblia ni Xiavelo N.° 1. A kucica loko, zinwe ni zileletelo za lezi a zipanze zi to mahiswa zona hi lezi zi tlhamuselwako laha hasi.
3 Timhaka-tshinya ta kugonza ka Biblia: A vamakabye lava va avelwako xipanze lexi va tava ni timeneti timbiri ta ku tlhamusela mhaka yinwe ya Mitsalo yo tsakisa ni yi vunako va yi kumileko kugonzeni ka Biblia ka viki lego. A ku ti longisela khwatsi zi ta maha lezaku va tlhamusela mhaka yi vunako bandla na va nga hunzisi xikhati. Hi ku lanzela, a bandla gi tava ni ntlhanu wa timeneti ni yinwe ta kale ni kale kasi ku nyika mihlamulo ya 30 wa tisegundo kuya hasi xungetano hi timhaka to tsakisa va ti kumileko ka kugonza ka Biblia ka viki lego. Zi lava kutilongisela ni kutikhoma kasi ku nyika hlamulo wo zwala hi 30 wa tisegundo, kanilezi a ku maha lezo zi hi gonzisa nchumu wa lisima nguvu. Zi nyika xikhati kambe xa lezaku a vamakabye vanwani vo tala va wulawo lezi va zi gonzileko ka mikambisiso yabye.
4 Xiavelo N.° 1: A xikhati xa kulera ka Biblia xi hungulilwe xi maha timeneti tinharu kuya hasi niku ku tava ka timhaka titsongwani. Lava va nyikwako xiavelo xa ku lera va fanele ku vuxeta makhati yo hlaya hi ku lera hi gezu go zwala va tlhela va chela kota ka mawulela ya lisine ya magezu ni kuritimuka ka wona kasi ku lera hi ndlela yo zwisiseka. A vanhu vontlhe va Jehova va fanele ku ti karatela ku lera khwatsi, hakuva a kulera ka lisima wukhozelini ga hina. A ho ku tsaka hi lezi a kutala ka vanana va hina va lerako khwatsi! A vapswali va dzunziwa hi kota ya kutikarata kabye ka liranzo kasi ku vuna vana vabye lezaku vava valeri va va nene.
5 Xiavelo N.° 2: Wu tava mukombiso wa ntlhanu wa timeneti wu avelwako vamakabye va xisati. Va ta tirisa a hloko ya mhaka leyi va avelweko. Loku a xiavelo xo kari xi seketelwe ka mahungu ya xibhukwana Xingheniso ka Mhaka ya Nungungulu, xi fanele ku kombisa nchumu wo kari wa lisine wu nga vunako sinwini lomu xipanzeni xa nwina. Loku xi hi xiavelo xi seketelwako ka bhuku A Biblia Gi Gonzisako, xi fanele ku kombisa nchumu wu tolovelako ku humelela ntirweni wa simu xipanzeni xa nwina. Loku a xiavelo xi seketelwe ka bhuku Liranzo la Nungungulu, a xigonzani xi fanele ku tlhamusela a mhaka leyi xi nyikilweko, xi hlawula mitsalo yi faneleko leyi xi to yi tirisa, xi tlhela xi komba lezi a matshinya ya milayo ya Biblia ma tirisako zona wutomini ga wuKristu. Xi nga ha tirisa mitsalo yinwani yi yelanako ni mhaka leyo. A muwoneleli wa xikola i ta mu nyika muvuneteli.
6 Xiavelo N.° 3: Xi ta mahiwa hi ntlhanu wa timeneti hi makabye wa xinuna kutani wa xisati. Loku xi avelwa makabye wa xisati, a xiavelo lexi xi fanele ku mahiswa lezi zi tlhamuselwako ka xiavelo N.° 2. Loku xi avelwa makabye wa xinuna, xi fanele ku mahiwa kota kanelo yi kongomako vaingiseli. Loku a xiavelo lexi xi seketelwa ka mahungu ma kumekako ka bhuku A Biblia Gi Gonzisako, xi fanelwe ku tlhamuselwa hi ndlela ya ku xi zwananisa ni xiyimo xo kari xa le sinwini xipanzeni xa nwina. Loku xi seketelwa ka bhuku Liranzo La Nungungulu, a xigonzani xi fanele ku tlhamusela a hloko ya mhaka leyi xi avelweko, xi hlawula mitsalo yi faneleko leyi xi to yi tirisa xi tlhela xi komba lezi a matshinya ya milayo ya Biblia ma nga tirisiswako zona wutomini ga wuKristu.
7 Mahela giswa ga Xiavelo N.° 3 ka vamakabye wa xinuna: Loku a xiavelo lexi xi seketelwe ka mahungu ya xibhukwana Xingheniso ka Mhaka ya Nungungulu kutani Liranzo la Nungungulu, xi fanele ku mahiwa kota mukombiso wa wukhozeli ga ngango kutani wa ntiro wa simu. A kutala ka zikhati a muwoneleli wa xikola i ta mu nyika muvuneteli ni xiyimo. A muvuneteli i fanele kuva xiro xa ngango wakwe kutani makabye wa xinuna lomu bandleni. Ku nga ha tiriswa mitsalo yinwani yi dlunyatisako matshinya ya milayo ya Biblia leyi yi zwananako ni hloko ya mhaka leyo. A xipanze lexi xi ngata na xi avelwa madota. A madota ma nga ha hlawula a muvuneteli ni xiyimo ha woce. Handle ko kanakana, a bandla gi ta tiyisiwa hi ku wona madota na ma kombisa a wutlhari ga kugonzisa ni xiro xa ngango kutani makabye munwani wa xinuna.
8 Wusungukati: A muwoneleli wa xikola i ta tirisa timeneti timbiri anzhako ka xipanze xinwe ni xinwani xa xigonzani kasi ku dzunza ni ku nyika wusungukati gi akako gi seketelwako ka bhuku Beneficie-se da Escola do Ministério Teocrático. A xikhati lexi a muwoneleli wa xikola a vitanako xigonzani lezaku xi ta maha xipanze xa xona, a nga ta wula a mhaka leyi xi tirelako ka yona. Anzhako ka kuva a xigonzani xi mahile a xipanze xa xona, a muwoneleli wa xikola i ta xi dzunza hi laha ku faneleko, a gumesa a wula laha a xigonzani xi tirelako kona, a tlhela a wula ku hikuyini a xigonzani xi mahileko khwatsi kutani ku tlhamusela ku hikuyini zi nga wa ta vuna kuva a xigonzani lexo xi simama ku khatalela mhaka leyo.
9 A phepha ga wusungukati ga xigonzani gi kumeka ka maphajina 79 kala 81 ya bhuku ga xona ga Xikola. Anzhako ka kuva a xigonzani xi mahile xipanze xa xona, a muwoneleli wa xikola i ta tsalatsala lezi zi lavekako laha ka bhuku ga xona a tlhela a xi wutisa xihundleni lezaku xi mahile xitoloveto xi yelanako ni mhaka ya wusungukati leyi xi avelweko ke. A nga ha xi dzunza a tlhela a xi nyika mawonela yo engeteleka anzhako ka mutlhangano kutani ka xikhati xinwani. A kukhatala loko a xigonzani xinwe ni xinwani xi nyikwako xikoleni ku fanele ku woniwa kota lungelo ga ku xi vuna ku kula hi tlhelo ga moya. — 1 Tim. 4:15.
10 Loku a xigonzani xi hunzisa xikhati, a muwoneleli wa xikola kutani muvuneteli wakwe, i fanele ku tshama na a longile ku maha xo kari, xo kota kuba njele kutani ku gongonza ka wutshamu, kasi ku komba hi ndlela ya wutshiva lezaku a xikhati xakwe xi mbhelile. A xigonzani xi fanele ku tiva a xikombiso lexo zonake xi mbhetisa lezi xi wulako, xi tekela ku chika. — Wona a bhuku Escola do Ministério, p. 282, nzi. 4.
11 Vontlhe lava va tatisako lezi zi lavekako va fanele ku kuciwa ku ti tsalela ka Xikola xa Wutireli ga Nungungulu. (Wona a bhuku Escola do Ministério, p. 282, nzi. 6.) A gonziselelo ya xikola lexi yi vuna vanhu va Jehova lezaku va kanela ni ku gonzisa a mahungu yo saseka ya Mufumo hi kutiya, xichawo, ni liranzo. Handle ko kanakana, Jehova wa tsaka hi ku dumiswa hi vontlhe lava va vunekako nguvu hi gonziselelo leyi ya Mufumo! — Tis. 148:12, 13; Isa. 50:4.
[Tlhamuselo wa mifota ka phajina 5]
Kula hi tlhelo ga moya hi ku vumela wusungukati ni ku gi tirisa