Tirisa tivhidhyu kasi ku gondzisa a zvigondzani zva Bhibhiliya

A zvilo zva ku zvi wona zvi koka kupima zvi tlhela zvi vhuna ku zwisisa ni ku alakanya lezvi zvi gondzisiwako. A Mugondzisi wa hina wa Hombe Jehovha i tirisile a zvilo zvo woneka kasi ku gondzisa zvigondzo zva lisima. (Gen 15:5; Jer 18:1-6) Zvi tirisilwe kambe hi Jesu a Mugondzisi wa Hombe. (Mat 18:2-6; 22:19-21) Lezvi zvi tirisiwako nguvhu zvi tlhela zvi vhuna ka malembe lawa tivhidhyu. Xana wa ti tirisa khwatsi a tivhidhyu loku u gondzisa zvigondzani zva Bhibhiliya?

Ku longiselwe 10 wa tivhidhyu kasi ti hi vhuna ku fambisa zvigondzo zva Bhibhiliya hi ku tirisa broxura Mahungu yo Saseka ya Nungungulu! A vhidhyu yin’we ni yin’wani yi yimela a cin’we ca zviwutiso lezvi zvi timisilweko lomu ka broxura. Legi ga lomu ka internet, gi na ni tilink ti hi alakanyisako laha hi faneleko ku kombisa kona vhidhyu. Tlhatakumbiri, leti tin’wani tivhidhyu to tala ti seketelwa ka mahungu ma kumekako ka mabhuku ma nga ka Feramenta ya hina ya ku gondzisa hi yona.

Mu bhula hi hloko mhaka ya Bhibhiliya leyi kuzvilava zvi ci karatelako a cigondzani ca wena a ku yi zwisisa? Kutani a cigondzani ca wena ci kumana ni cikarato co kari? Hlota lomu ka jw.org® kutani ka JW Broadcasting® kasi u kuma a vhidhyu yo kari yi nga mu vhunako. Kuzvilava wena ni cigondzani ca wena mu nga tshama zvin’we mu yi wona mu tlhela mu bhula hi yona.

Hweti ni hweti ku humesiwa tivhidhyu ta tiswa. A cikhati leci u ti wonako, zama ku ehleketa hi lezvi u nga ti tirisisako zvona loku u gondzisa van’wani.