MAHANYELA YA WUKRISTU

Hlawula a zvihungato hi wutlhari

Hikuyini hi faneleko ku hlawula a zvihungato hi wutlhari? Hi lezvaku a cikhati hi hlawulako a filmi legi hi to gi sixtira, muzka hi to wu ingisela, saite hi to nghena, mabhuku hi to lera, kutani gemi hi to bela, ho hlawula lezvi zvi faneleko ku tata a maalakanyo ya hina. Lezvi hi zvi hlawulako zvi khumba a mahanyela ya hina. A co biha hiku a ku tala ka zvihungato zvi nga kona inyamutlha zvi na ni zvilo lezvi Jehovha a zvi nyenyako. (Lis 11:5; Gal 5:19-21) Hi cigelo leco, a Bhibhiliya gi hi kuca lezvaku hi simama hi maha lezvi zvi dzundzako Jehovha. — Flp 4:8.

WONA A VHIDHYU HI ZVIHI A ZVIHUNGATO NDZI FANELEKO KU ZVI HLAWULA? U GUMESA U HLAMULA A ZVIWUTISO LEZVI:

A mihlakano ya kulwa leyi yi nga mahiwa kale le Roma yi fana ni yokari yi mahiwako masikwini ya hina hi ndlela muni?
A zviro zva bandla zvi nga vhuna a vaswa lezvaku va hlawula hi wutlhari a zvihungato hi ndlela muni?
Hi nga gi tirisisa kuyini a bhuku ga Va Le Roma 12:9 a cikhati hi hlawulako a zvihungato?
Hi zvihi a zvihungato zvo kari zva zvinene zvi mahiwako lomu cipandzeni ca wena?

U TI MAHELA ZVA WENA KUTANI WO CUWUKISELA VAN’WANI?

A kutala ka zvihungato zvo toloveleka nguvhu inyamutlha zvi gondzisa vanhu a ku va cuwukisela kutani ku lera lezvi a van’wani va zvi mahako, wutshan’wini ga ku ti mahela zva vona. A mafilmi, mabhuku, ni milongoloko ya televhizawu zvi kombisa lezvi a van’wani va zvi alakanyako, na ku nga hi maalakanyo ya vona wutsumbu. Hambu lezvi a ku cuwukisela lezvi a van’wani va zvi mahako zvi vhunako, a ku ti mahela mihlakano ya wena zva vhuna nguvhu. Hi cikombiso, a vokari va tsakisiwa hi ku chaya vhiyola, kuba piyano kutani ku tsala zvithombe. A van’wani va randza mihlakano yi mahiwako lahandle ka muti, yo kota ku bela bhola, ku paseyara ni zvin’wani. Kova ni wihi hlakano hi wu hlawulako, hi fanele ku ‘maha zvontlhe zviva wudzundzo ka Nungungulu.’ — 1Ko 10:31.