Teka wuphayona

Hi tirisa khwatsi a ntamu wa hina loku hi ti vekela mixuvo ya lezvi hi nga mu mahelisako zvona zvotala Jehovha. (1 Kor. 9:26) A ku ti vekela mixuvo zvi hi vhuna a ku hi ci tirisa khwatsi a cikhati ca hina na ku nga se chikela a magumo ya tiko legi. (Efe. 5:15, 16) Ka wukhozeli ga n’wina ga ngango, mu nga bhula hi mixuvo leyi mu nga ti vekelako ka lembe giswa ga ntiro. Kasi ku mu vhuna, a cibhukwana leci ca mutlhangano ci na ni tindzima ti nyikako mawonela yo tala ya mixuvo leyi mu nga ehleketako mu tlhela mu khongela hi yona. — Jak. 1:5.

Hi cikombiso, vontlhe laha ngangweni va nga tira zvin’we kasi ku vhuna a ciro cin’we ca ngango lezvaku civa phayona ga cikhati contlhe. Loku u zvi wonisa ku khwatsi u nga ta zvi kota ku chiketa tihora leti ti lavekako, u nga bhula ni phayona go kari gi nga ka ciyimo co fana ni ca wena. (Mav. 15:22) Kuzvilava u nga bhula ni phayona lego ka wukhozeli ga n’wina ga ngango. Hi ku landzela, tsala a programa ya lezvi u to tirisa zvona. Loku ku hi ku u wa tekile wuphayona ka cikhati ci hundzileko, hlola ku a ciyimo ca wena ci nga ku vhumelela ku u teka kambe a wuphayona ke.

A ku a vokari laha ngangweni wa n’wina va nga teka wuphayona go vhunetela hi hweti yin’we kutani ku hundza? Loku ku hi ku a wu na ntamu nguvhu, u nga zvi kota ku teka wuphayona go vhunetela hi ku siku ni siku u chumayela cikhatana citsongwani basi. Loku u nga hi na cikhati co tala ca kuya kuchumayeleni cikari ka vhiki hi kota ya ntiro kutani cikola, kuzvilava u nga hlawula a hweti yi nga ni feriyadho kutani ntlhanu wa mavhiki. Tsala laha ka kalendariyo a masiku lawa u xuvako ku teka hi wona a wuphayona go vhunetela u tlhela u tsala a programa ya kona. — Mav. 21:5.

SIXTIRA VHIDHIO TIYA HLANA! — PHAYONA, U GUMESA U HLAMULA CIWUTISO LECI:

• A tshango ga makabye Aamand gi hi gondzisa yini xungetano hi lirandzo la Jehovha ni kukhatala kakwe hi lava va ti karatelako ku teka wuphayona?