Tindlela ta ku gondzisa munhu a ringanelwa hi ku bhabhatiswa — Cipandze 1

1. 2 Va Le Korinte 3:1-3 i hi vhunisa kuyini a ku wona lezvaku a ku gondzisa Bhibhiliya munhu aza a bhabhatiswa i thomo hi nyikilweko hi Jehovha? (Wona mufota wa kapa.)

U TI ZWISA kuyini loku u wona cigondzani ca Bhibhiliya ca lomu a bandla ga n’wina gi chumayelako kona na ci bhabhatiswa? Handle ko kanakana, zva ku tsakisa nguvhu. (Mat. 28:19) A ha ha wuli loku a mupizani loye wa muswa a gondzisilwe hi wena, u tsaka u khoma ni tilo hi ku mu wona na a bhabhatiswa! (1 Tes. 2:19, 20) A vapizani vaswa lava va bhabhatiswako, “mapapilo” ya wudzundzo. A ku dzundzeki lava va gondzileko navo Bhibhiliya basi, kanilezvi ku dzundzeka ni bandla gontlhe. — Lera 2 Va Le Korinte 3:1-3.

2. a) Zvilo muni zva lisima hi faneleko ku zvi tiva, niku hikuyini? b) Cini a cigondzo ca Bhibhiliya? (Wona tlhamuselo wa lahasi.)

² A zvo ku tsakisa a ku wona lezvaku ka 4 wa malembe ma hundzileko, ku fambisilwe cipimo ca 10 000 000 wa zvigondzo zva Bhibhiliyab misaveni yontlhe hweti ni hweti, niku ndzeni ka malembe lawo ya mune, lembe ni lembe ku wa bhabhatiswa cipimo ca 280 000 wa vanhu kota Vakustumunyu va Jehovha tlhelo vapizani vaswa va Jesu Kristu. Makunu, zva lisima a ku tiva ndlela ya ku vhuna a zvigondzani lezvo zva talela ga cima lezvaku zvi bhabhatiswa. Loku Jehovha a ha kombisako lihlazva-mbilu, a nyika vanhu a cikhati ni thomo ga kuva vapizani va Kristu, hina hi ta maha zvontlhe hi zvi kotako kasi hi va vhuna hi kuhatlisa hi laha zvi kotekako hi kona lezvaku va kula va ringanelwa hi ku bhabhatiswa. A cikhati a ci nyimeli munhu! — 1 Kor. 7:29a; 1 Ped. 4:7.

3. Zvini hi to wulawula hi zvona ka ndzima leyi xungetano hi ku fambisa zvigondzo zva Bhibhiliya?

³ Kota lezvi a ku maha vapizani zvi nga zva cihatla nguvhu zvezvi, a Hubye yi Fumako yi wutisile a tihofisa ta maravi a ku zvini hi nga mahako kasi hi vhuna a zvigondzani zvo tala zva Bhibhiliya lezvaku zvi ringanelwa hi ku bhabhatiswa. Ka ndzima leyi ni leyi yi landzelako, hi ta wona a ku zvini hi nga gondzako ka maphayona ma buvhileko, ka varumiwa, ni ka vawoneleli va zvipandze.c (Mav. 11:14; 15:22) Va tlhamusele lezvi a vagondzisi ni zvigondzani zvabye va nga mahako kasi a cigondzani ca Bhibhiliya ci kula. Ka ndzima leyi, hi ta wulawula hi 5 wa zvilo lezvi a cigondzani ci faneleko ku maha kasi ci kula ci ringanelwa hi ku bhabhatiswa.

CIGONDZANI — GONDZA VHIKI NI VHIKI

4. Zvini hi faneleko ku zvi tiva xungetano hi ku fambisa zvigondzo zva Bhibhiliya na hi nyimile laha nyangweni?

⁴ Ku na ni vamakabye vo tala va fambisako zvigondzo zva Bhibhiliya na va nyimile laha nyangweni. Hambu lezvi lawo ma nga masangulo ma nene kasi a munhu a tsakela ku gondza Bhibhiliya, a mabhulo lawo ma tolovela kuva yo koma ma tlhela ma ngavi ya vhiki ni vhiki. Kasi ku hlanganyeta timbilu ta lava va tsakelako, a vamakabye vo kari va kombela tinumero ta vanhu lavo kasi ku va fonela kutani ku va tsalela mesaji na va kumbuka zvokari zvi yelanako ni Bhibhiliya na ku kiyela masiku matsongwani kasi va tlhela vaya bhula navo kambe. Va tshuka va simama ku bhula navo hi ndlela leyo hi tihweti to kari na ci nga seva cigondzo ca Bhibhiliya ca ci nene khwatsi. Hambulezvo, a ciwutiso ku: Xana a cigondzani leco ci nga kula laha ka kuza ci ti nyikela ci tlhela ci bhabhatiswa na ci nga ti nyiki cikhati co enela ca ku gondza a Mhaka ya Nungungulu? Kuzvilava ahihi.

5. Zvini lezvi Jesu a nga zvi khanyisa ka Luka 14:27-33, lezvi zvi nga hi vhunako ntirweni wa ku maha vapizani?

⁵ Ka khati go kari, Jesu i hlawutele mufananiso wu kombako lezvi a munhu a faneleko ku maha loku a lava kuva mupizani wakwe. I wulawulile hi wokari a lavako ku aka yindlu, ni hosi yi lavako kulwa yimpi. Jesu i wulile lezvaku a muaki i fanele ku ‘ranga hi ku tshama hasi a hlayela ntsengo’ kasi ku wona ku i ta zvi kota ku mbheta ku aka ke; i tlhelile aku a hosi yi fanele ku ‘ranga hi ku tshama hasi yi lava wusungukati’ kasi ku wona ku yi ta hlula hi masochwa lawa yi nga nawo ke. (Lera Luka 14:27-33.) Hi kufanana, Jesu i wa zvi tiva ku loyi a lavako kuva mupizani wakwe i fanele ku hlola khwatsi a tiva lezvi zvi lavekako kasi ava mupizani wakwe. Hi cigelo leco, hi fanele ku kuca zvigondzani zva hina zva Bhibhiliya lezvaku hi gondza nazvo vhiki ni vhiki. Hi nga zvi mahisa kuyini?

6. Zvini hi nga zamako ku maha kasi a zvigondzani zvi kula hi tlhelo ga moya?

⁶ Kasi ku kuca loyi u gondzako naye laha nyangweni lezvaku mu gondza vhiki ni vhiki, sangula hi ku lehisanyana mabhulo lawo. Kuzvilava ka khati ni khati u mu endzelako u nga engetela a mitsalo yo kari leyi mu gondzako. Loku makunu a n’winyi wa muti a tlhatlheka a ku mu mbheta cikhati co lehana, u nga mu wutisa lezvaku ku ni ka ku mu nga tshama mu simama ku bhula ke. Lezvi a to hlamula zvi ta ku komba ku a ku gondza Bhibhiliya i zvi nyika lisima lo kota kwihi. Kasi a cigondzani ci kula hi kuhatlisa, hi kufamba ka cikhatini u nga ha ci wutisa ku zvi nga koteka ku mu gondza kumbiri hi vhiki ke. Hambulezvo, ku laveka zvo hundza ku gondza khati gin’we kutani kumbiri hi vhiki.

LONGISELANI A CIGONDZO CIN’WE NI CIN’WANI

7. Hi yihi ndlela ya ku a mugondzisi a longisela khwatsi a cigondzo cin’we ni cin’wani?

⁷ Wena mugondzisi, u fanele ku longisela khwatsi a cigondzo cin’we ni cin’wani. U nga ranga hi ku lera a mahungu mu to gondza ni mitsalo ya kona. Ti karatele ku ti tiva khwatsi a timhaka-tshinya ta kona. Ehleketa hi hloko ya mhaka ya cigondzo, zvihlokwana zva mhaka, zviwutiso zva cigondzo leco, mitsalo leyi yi nga tsaliwa ku “lera”, mifota, ni ni yihi vhidhio yi to ku vhuna ku tlhamusela mhaka. Andzhako ka lezvo, alakanyela a cigondzani ca wena, u guma u ehleketa hi lezvi u nga ci tlhamuselisako zvona a mahungu lawo hi ndlela yo olova ni yo dlunyateka kasi zvi olovela ku ci ma zwisisa khwatsi ni ku hanya hi wona. — Neh. 8:8; Mav. 15:28a.

8. A magezu ya mupostoli Pawule ma nga ka Va Le Kolosi 1:9, 10, ma hi gondzisa yini xungetano hi ku khongelela a zvigondzani zva hina?

⁸ A cikhati u longiselako, khongela na u alakanya cigondzani ca wena ni zvilaveko zva cona. Kombela Jehovha lezvaku a ku vhuna ku tirisa a Bhibhiliya kasi u gondzisa hi ndlela yi to khumba mbilu ya cigondzani leco. (Lera Va Le Kolosi 1:9, 10.) Zama ku pola ni wihi nchumu wu to karatela cigondzani a ku wu zwisisa kutani ku wu kholwa. U nga rivali lezvaku a kungo ga wena ku mu vhuna ku kula kasi a ringanelwa hi ku bhabhatiswa.

9. A mugondzisi a nga ci vhunisa kuyini cigondzani a ku longisela cigondzo? Tlhamusela.

⁹ Hi xuva ku a ku gondza ni munhu hi kukhandzakanya zvi mu vhuna ku a zvi nyika nguvhu lisima lezvi Jehovha na Jesu va zvi mahileko a tlhela a lava ku gondza zvin’wani. (Mat. 5:3, 6) Kasi a cigondzani ci vhuneka khwatsi ci fanele ku veka kupima ka lezvi ci gondzako. A ndlela ya ku ci vhuna ku maha lezvo, ku ci tlhamusela ku hikuyini zvi nga zva lisima a ku ranga ci longisela cigondzo cin’we ni cin’wani ci tlhela ci alakanyela lezvi ci nga zvi tirisisako zvona. A mugondzisi a nga ci vhunisa kuyini a cigondzani kasi ci tiva ku longisela? Longiselani zvin’we, a fela ku wona lezvi hi longiselisako zvona.d Mu tlhamusele lezvi a nga wu kumisako zvona a hlamulo wo kongoma wa zviwutiso, ni lezvi a ku penda magezu-tshinya zvi nga vhunisako zvona a ku alakanya hlamulo. Guma u mu kombela ku a hlamula hi magezu ya yena, a nga yi hi ku lera. Laha a to hlamula hi magezu yakwe, zvi ta ku vhuna ku tiva ku i zvi zwisisile ke. Hambulezvo, ku na ni zvin’wani u nga kucako a cigondzani ca wena a ku ci maha.

GONDZISA CIGONDZANI CA WENA A KU BHULA NA JEHOVHA SIKU NI SIKU

10. Hikuyini zvi nga zva lisima a ku a cigondzani ci lera Bhibhiliya siku ni siku? Zvini ci nga mahako kasi ci vhuneka khwatsi hi lezvi ci lerako?

¹⁰ Ahandle ka ku gondzo vhiki ni vhiki ni mugondzisi, a cigondzani ci nga vhuneka nguvhu loku ci tolovela ku ti mahela zvokari ha coce siku ni siku. Ci fanele ku bhula na Jehovha. Hi ndlela muni? Hi ku mu ingisela ni ku wulawula naye. A nga ingisela Jehovha hi ku lera a Bhibhiliya siku ni siku. (Jox. 1:8; Lis. 1:1-3) Mu kombe lezvi a nga yi tirisisako zvona a “Programa ya kulera ka Bhibhiliya” yi nga lomu ka jw.org.e Kasi a vhuneka khwatsi hi lezvi a lerako lomu Bhibhiliya, mu kuce ku a ti wutisa ku lezvi a lerako zvi mu gondzisa yini hi Jehovha a tlhela a alakanyela tindlela ta ku hanya hi zvona. — Miti. 17:11; Jak. 1:25.

11. Hi yihi ndlela ya ku a cigondzani ci tiva ku maha khwatsi a mukhongelo? Hikuyini zvi nga zva lisima a ku a khongela ka Jehovha siku ni siku?

¹¹ Kuca cigondzani ca wena a ku wulawula na Jehovha hi mukhongelo siku ni siku. Maha mukhongelo wo huma mbilwini loku mu sangula ni loku mu vhala a cigondzo cin’we ni cin’wani, u tlhela u mu khongelela yenawu. A cikhati a ku zwako na u khongela, i ta gondza lezvi a nga wu mahisako zvona mukhongelo wo huma mbilwini ni ku yisa mikhongelo yakwe ka Jehovha hi vito ga Jesu Kristu. (Mat. 6:9; Joh. 15:16) Phela a ku lera Bhibhiliya siku ni siku (ku nga ku ingisela Jehovha) ni ku khongela (ku nga ku wulawula na Jehovha) zvi ta mu vhuna ku maha wunghana go tiya na Jehovha! (Jak. 4:8) Loku a cigondzani ca wena ci tolovela ku maha lezvo siku ni siku, zvi ta ci vhuna ku kula hi kuhatlisa, ci ti nyikela ka Jehovha ci tlhela ci bhabhatiswa.

VHUNA A CIGONDZANI LEZVAKU CI MAHA WUNGHANA NA JEHOVHA

12. A mugondzisi a nga ci vhunisa kuyini a cigondzani lezvaku ci maha munghana wa Jehovha?

¹² Lezvi a cigondzani ca Bhibhiliya ci gondzako a zvi faneli ku tshama lomu maalakanyweni basi. Kanilezvi, zvi fanele ku khumba ni mbilu ya cona. Hikuyini? Hakuva a mbilu ya hina — leyi yi patsako lezvi hi zvi xuvako, lezvi hi zvi pimisako, ni lezvi hi ti zwisako zvona — hi yona yi hi kucako ku hanya hi lezvi hi gondzako. Jesu i va gondzisile a zvilo zvo tala vanhu niku va wa zvi randza a ku gondzisiwa hi yena. Kanilezvi, leci ci nga maha vanhu va mu landzela hi ku i wa khumba ni timbilu tabye. (Luka 24:15, 27, 32) A cigondzani ca wena ci fanele ku kholwa lezvaku Jehovha i kona futsi, ci tlhela ci zvi zwisisa ku ci nga maha wunghana naye. Laha mu gondzako, mu vhune a ku gi tiva khwatsi a wumunhu ga Jehovha; a mu wona kota Papayi, ni Nungungulu, ni munghana wakwe. (Lis. 25:4, 5) Mu vhune a ku tiva matshamela ya Nungungulu. (Ekso. 34:5, 6; 1 Ped. 5:6, 7) Ni ka ni yihi a mhaka mu gondzako, mu vhune ku wona matshamela ya Jehovha. Mu vhune a ku zwisisa lezvaku Jehovha i na ni lirandzo, wunene, ni ku wa zwela wusiwana. Jesu i wulile lezvaku “a nayo wa hombe ni wo ranga ka yontlhe” ku “randza Jehovha Nungungulu”. (Mat. 22:37, 38) Ti karatele ku vhuna a cigondzani ca wena lezvaku ci mu randza nguvhu Nungungulu.

13. Nyika cikombiso ca lezvi u nga vhunisako zvona a cigondzani a ku tiva a matshamela ya Jehovha.

¹³ A cikhati u bhulako ni cigondzani ca wena, ci mahe ci wona lezvi u mu randzisako zvona Jehovha. Lezvo zvi nga mu vhuna ku wona lezvaku i fanele ku maha munghana wa Jehovha a tlhela a mu randza. (Lis. 73:28) Hi cikombiso, lomu ka bhuku legi mu gondzako hi gona, xana ku ni magezu kutani mutsalo wu ku kombako zvokari xungetano hi lirandzo la Jehovha, wutlhari gakwe, kululama kakwe kutani ntamu wakwe ke, lezvi zvi khumbako mbilu ya wena? Loku ma hi kona, ma kumbuke ka cigondzani ca wena u tlhela u mu tlhamusela lezvaku leco cin’we ca zvigelo ci ku kucako ku randza Jehovha, a Papayi wa wena wa le tilweni. Ku na ni zvin’wani lezvi a cigondzani ca Bhibhiliya ci faneleko ku maha kasi ci kula ci ringanelwa hi ku bhabhatiswa.

KUCA A CIGONDZANI LEZVAKU CITA MITLHANGANWENI YA BANDLA

14. Zvini lezvi Mahebheru 10:24, 25 a hi byelako xungetano hi mitlhangano, lezvi zvi nga vhunako cigondzani lezvaku ci kula?

¹⁴ Hontlheni hi lava ku a zvigondzani zva hina zvi kula zvi bhabhatiswa. A yin’we ya tindlela ta lisima ta ku zvi vhuna, ku zvi kuca kuta mitlhanganweni ya bandla. A vahuweleli vo buvha va wula lezvaku a zvigondzani lezvi zvi tako mitlhanganweni neti mu sangula ku gondza zvi hatlisa kukula. (Lis. 111:1) A vahuweleli vo kari va byela zvigondzani lezvaku lezvi va gondzako navo a zvi eneli. A zvin’wani va nga zvi gondza mitlhanganweni. Lera Mahebheru 10:24, 25 ni cigondzani ca wena, u guma u ci tlhamusela lezvi ci to vhunekisa zvona loku cita mitlhanganweni. Ci kombe vhidhio leyi yaku: Zini zi mahiwako lomu ka Salawu ya Mufumo?f Vhuna cigondzani ca wena lezvaku ci ti yimisela a ku nga lovhi mitlhanganweni.

15. Hi nga maha yini kasi hi kuca cigondzani lezvaku cita mitlhanganweni vhiki ni vhiki?

¹⁵ Zvini u nga mahako loku a cigondzani ca wena ci ngati mitlhanganweni kutani loku ci ngati vhiki ni vhiki? Ci tlhamusele zvokari hi kutsaka u gondzileko ka mutlhangano wa ha hi ku hundzako. Lezvo zvi kuca nguvhu a ku hundza ku ci ramba basi. Mu nyike A Murindzeli kutani Cibhukwana ca Mutlhangano wa ntiro wa hina ni mahanyela ya wuKristu leci ci gondziwako mitlhanganweni ka cikhati leco. Mu kombe lezvi zvi to gondziwa ka mutlhangano wu landzelako, u tlhela u mu wutisa ku cipandze muni a wonako ku ci nga mu tsakisa nguvhu. Lezvi a cigondzani ci to zvi wona ni ku zvizwa ka mutlhangano wo sangula zvi tava zvi nene nguvhu a ku hundza ni zvihi ci zvi wonileko kutani ku zvizwa ka wukhongeli gin’wani. (1 Kor. 14:24, 25) I ta kuma vanhu va nga cikombiso ci nene, lava va to mu vhuna ku kula a ringanelwa hi ku bhabhatiswa.

16. Zvini zvi lavekako kasi ku gondzisa munhu a Bhibhiliya lezvaku a ringanelwa hi ku bhabhatiswa? Hi ta wulawula hi yini ka ndzima yi landzelako?

¹⁶ Hi yihi ndlela ya ku gondzisa munhu a Bhibhiliya a ringanelwa hi ku bhabhatiswa? Hi nga vhuna cigondzani a ku wona lisima la lezvi ci gondzako hi ku ci kuca ku gondza vhiki ni vhiki ni ku longisela cigondzo makhati wontlhe. Zvi lava ku hi tlhela hi mu kuca ku a wulawula na Jehovha siku ni siku ni ku maha wunghana Naye. Hi lava ku mu kuca ku ata mitlhanganweni ya bandla. (Wona kwadru: “Kasi u ringanelwa hi ku bhabhatiswa, u fanele ku . . . ” gi nga ka pajina 12.) Hambulezvo, kota lezvi zvi to tlhamuselwa ka ndzima yi landzelako, ku na ni zvilo zvin’wani zva 5 lezvi a vahuweleli va nga mahako kasi ku vhuna zvigondzani zvabye lezvaku zvi bhabhatiswa.