Jehovha i cuwukisela vanhu vakwe

1. Hikuyini Jesu a nga kombela Jehovha lezvaku a hlayisa valandzeli vakwe?

KA WUSIKU ga mahlweni ka ku afa, Jesu i no kombela nchumu wo hlawuleka ka Papayi wakwe wa le tilweni. I no mu kombela ku a hlayisa kutani ku cuwukisela valandzeli vakwe. (Joh. 17:15, 20) Lisine ku Jehovha contlhe cikhati wa zvi wona lezvi zvi humelelako vanhu vakwe, a va khatalela ni ku va vhikela. Hambulezvo, Jesu i wa zvi tiva lezvaku a valandzeli vakwe va wa ta vhukelwa hi Sathani hi ndlela ya ku i wa nga se tshuka a va vhukela hi yona. Jesu i wa zvi tiva kambe lezvaku va wa ta lava ku vhuniwa hi Jehovha kasi va ala a kuvhukela ka Sathani.

2. Hi kuya hi Lisimu 33:18-20, hikuyini hi nga hiko na cigelo ca ku chava zvikarato?

² A tiko legi gi rangelwako hi Sathani gi ma vangela zvikarato zvo tala a maKristu ya lisine nyamutlha. Hi kumana ni zvikarato zvi hi mbhetako ntamu hambu hi ku ringa kutsumbeka ka hina ka Jehovha. Kanilezvi kota lezvi hi to zvi wona ka ndzima leyi, a hi na cigelo ca ku chava. Jehovha wa hi cuwukisela — wa zvi wona a zvikarato lezvi hi kumanako nazvo niku i longile ku hi vhuna ku lwisana nazvo. A hi woneni a zvikombiso zvimbiri zva lomu ka Bhibhiliya zvi kombako lezvi Jehovha a ‘cuwukelisako zvona lava va mu chavako’. — Lera Lisimu 33:18-20.

A CIKHATI LECI HI ZWAKO CIWUNDZA

3. Hi ka zviyimo muni hi nga ti zwako hi hi hoce?

³ Hambu lezvi hi nga zviro zva ngango wa hombe wa vakhozeli va Jehovha hi nga tshuka hizwa ciwundza. Hi cikombiso, a muswa wo kari a nga tizwa na a hi yece a cikhati leci a tlhamuselako lezvi a zvi kholwako mahlweni ka zvigondzani-kuloni le cikoleni kutani a cikhati leci a rurako aya ka bandla gin’wani. A vokari va hina kuzvilava va swirekile kutani va lwisana ni maalakanyo ya hava, a maalakanyo zvi lavako ku valwa nawo vona wutsumbu. Kuzvilava zvi nga hi kanakanisa a ku bhulela van’wani lezvi hi ti zwisako zvona hi kota ya ku alakanya ku kuzvilava va nga ta hi zwisisa. Ka zvikhati zvin’wani kuzvilava hi ngaza hi ti wutisa ku: A ku i kona a khatalako hi hina futsi? A ku tizwa hi hi hoce — kani hi ni cihi cigelo — zvi nga maha ku hi tizwa na hi nga vhuni nchumu hi tlhela hi karateka. Jehovha a nga lavi ku hi ti zwisa lezvo. Hikuyini hi wulako lezvo?

4. Hikuyini muphrofeti Elija a nga wula ku: ‘Hi mina ndzoce ndzi seleko’?

⁴ Wona cikombiso ca Elija, a wanuna wo tsumbeka. Jezebheli i wa hlambanyile ku mu daya, hikwalaho i wa hi ni 40 wa masiku ni ku hundza na a tsutsuma kasi ku ponisa wutomi gakwe. (1 Tih. 19:1-9) Hi magumo, na a hi yece lomu mhakweni i no rila ka Jehovha, aku: ‘Hi mina ndzoce [muphrofeti] ndzi seleko’. (1 Tih. 19:10) Ku wa hi ni vaphrofeti van’wani lomu tikweni; Obhadhiya i wa ponisile a 100 wa vaphrofeti mandleni ya Jezebheli, a mudayi. (1 Tih. 18:7, 13) Makunu, hikuyini Elija a ti zwileko na a hi yena yece? Xana i wa alakanya lezvaku a vaphrofeti lava Obhadhiya a nga va ponisile makunu va wa delwe? A ku kuzvilava i wa tizwa a hi yena yece hi lezvi a van’wani va nga kala ku ti patsa naye va tirela Jehovha, a cikhati leci a nga kombisa ku i Nungungulu wa lisine Citsungeni ca Karmeli? Kutani i wa alakanya lezvaku i hava a nga tiva a mhango leyi a nga hi ka yona, hambu ku pimisa lezvaku i hava a nga khatala hi yena? A matimu a ma wuli zvotala hi lezvi Elija a nga ti zwisa zvona. Kanilezvi, leci hi ci tivako ku Jehovha i wa zvi zwisisa ku hikuyini Elija a nga tizwa a hi yena yece niku i wa yi tiva khwatsi a ndlela ya ku mu vhuna.

5. Jehovha i mu tiyisekisile kuyini Elija lezvaku i wa nga hi yece?

⁵ Jehovha i vhunile Elija hi tindlela to tala. I kucile Elija lezvaku a ti phofula. I no wutisa Elija makhati mambiri, aku: “Wo maha yini laha?” (1 Tih. 19:9, 13) Khati ni khati, Jehovha i no ingisela Elija laha a nga kari a chulula mbilu yakwe. Jehovha i no mu hlamula hi ku mu komba a kuva kona kakwe ni ntamu wakwe wa hombe. I no tlhela a tiyisekisa Elija lezvaku i wa ha hi ni vakhozeli van’wani vo tala. (1 Tih. 19:11, 12, 18) Handle ko kanakana Elija i zwile kupepa ka hombe andzhako ka ku chulula mbilu yakwe ka Jehovha ni kuzwa lezvi a nga mu hlamulisa zvona. Jehovha i no nyika Elija a zviavelo zvo tala zva lisima. I no mu ruma ku tota Hazayeli kasi ava hosi ya Siriya, na Jehu kasi ava hosi ya Izrayeli, na Elixa kasi ava muphrofeti. (1 Tih. 19:15, 16) Hi ku mu nyika zviavelo lezvo, Jehovha i mu vhunile ku veka kupima ka zvilo zva zvinene. Nungungulu i tlhelile a mu nyika munghana wa hombe, ku nga Elixa. U nga ci kumisa kuyini a civhuno ca Jehovha a cikhati leci u ti zwako u hi wece?

6. Zvini u nga zvi khongelelako loku uzwa ciwundza? (Lisimu 62:8)

⁶ Jehovha i ku kuca ku u khongela kakwe. Wa zvi wona lezvi u kumanako nazvo niku i ku tiyisekisa lezvaku i ta ingisela mikhongelo ya wena ni ka cihi cikhati. (1 Tes. 5:17) Zva mu tsakisa nguvhu a ku ingisela a vakhozeli vakwe. (Mav. 15:8) Zvini u nga zvi khongelelako a cikhati leci u zwako ciwundza? Chulula mbilu ya wena ka Jehovha a ku khwatsi hi lezvi Elija a nga maha. (Lera Lisimu 62:8.) Mu byele lezvi zvi ku karatako ni lezvi u ti zwisako zvona hi kota ya lezvo. Mu kombele lezvaku a ku vhuna ku lwisana ni kutizwa ka wena. Hi cikombiso, loku u tizwa u hi wece kutani zvi ku chavisa ku nyika wukustumunyu cikoleni, kombela Jehovha lezvaku a ku nyika kutiya-hlanha ku lavekako kasi u zvi kota. U nga tlhela u mu kombela lezvaku a ku nyika wutlhari kasi u tlhamusela hi ndlela ya cichavo lezvi u zvi kholwako. (Luka 21:14, 15) Loku u lwisana ni kukarateka ni ku mbhela ntamu, kombela Jehovha lezvaku a ku vhuna ku u wulawula ni muKristu wo buvha hi mhaka leyo. Kombela Jehovha lezvaku a vhuna loyi u lavako ku mu bhulela cihundla ca wena lezvaku a zwisisa cikarato ca wena. Chulula mbilu ya wena ka Jehovha, u wona lezvi a hlamulisako zvona a mikhongelo ya wena u tlhela u vhumela ku a van’wani va ku vhuna. Loku u maha lezvo u nga ta hazwa ciwundza ca hombe.

7. U gondza yini ka cikombiso ca Maurício?

⁷ Jehovha i hi nyikile ntiro wa lisima kasi hi wu maha. Tiyiseka lezvaku Jehovha wa zvi wona a tlhela a zvi nyika lisima zvontlhe lezvi u mahako kasi u tatisa zviavelo zva wena lomu bandleni ni ntirweni wa kuchumayela. (Lis. 110:3) A ku tshama na u khomekile ntirweni lowu zvi nga ku vhunisa kuyini laha u zwako ciwundza? Wona cikombiso ca makabye wo kari wa ku hi Maurício.b Cikhatanyana andzhako ka loku Maurício a bhabhatisilwe, a mun’we wa vanghana vakwe va hombe hi kutsongwani-kutsongwani i no sangula ku tsika lisine. Maurício i wulile lezvi: “A ku mu wona na a tsika Jehovha zvi ndzi mahile ku ndzi nga ha ti tsumbi. Ndzi wa ti wutisa ku: Xana ndzi ta zvi kota ku tatisa kutinyikela ka mina ndzi tlhela ndzi simama ngangweni wa Jehovha? Niku ndzi wa alakanya ku a nga kona a nga wa ta zwisisa lezvi ndzi nga ti zwisa zvona.” Zvini zvi vhunileko Maurício? I wula lezvi: “Ndzi no engetela ntiro wa mina wa kuchumayela. Lezvo zvi ndzi vhunile ku ndzi nga veki kupima ka mina wutsumbu ni ka maalakanyo ya mina ya hava. Ndzi wa tsaka ndzi tlhela ndzi ngazwi nguvhu ciwundza, a cikhati leci ndzi nga tira ni van’wani ntirweni wa kuchumayela.” Kunene, hambu loku hi nga zvi koti ku chumayela ni makholwa-kulori hi civiri ha tiyisiwa hi ku chumayela zvin’we navo hi ku tirisa mapapilo ni ku chumayela hi ku tirisa telefone. Zvini zvin’wani zvi vhunileko Maurício? I engeta aku: “Ndzi wa khomeka nguvhu kambe lomu bandleni. Ndzi wa ti karatela ku longisela ni ku veka zvipandze zva zvigondzani. A zviavelo lezvo zvi ndzi mahile ndzi tizwa na ndzi nyikiwa lisima hi Jehovha ni van’wani.”

JEHOVHA WA HI VHUNA A CIKHATI HI REREKILEKO

8. Hi nga ti zwisa kuyini loku hi kumana ni zvikarato zva hombe?

⁸ Ha zvi tiva lezvaku hi ta kumana ni zvikarato masikwini lawa yo gumesa. (2 Tim. 3:1) Hambulezvo, hi nga jumiwa hi cikarato co kari ni cikhati leci ci hi welako hi cona. Kuzvilava hi kutsopeta ka tihlo hi nga wela wusiwaneni ga hombe, hi khomiwa mababyi ya hombe kutani hi felwa hi munhu hi mu randzako. Ka zviyimo lezvo, hi nga tizwa na hi karatekile hi tlhela hi bindziwa, nguvhunguvhu loku zvi wonekisa ku khwatsi a zvikarato zva kona zvita hi ku landzelana kutani na zvi tele hi khati gin’we. Hambulezvo, alakanya lezvaku Jehovha wa zvi tiva lezvi hi kumanako nazvo niku hi ku vhuniwa hi yena hi nga zvi kota ku lwisana ni cihi cikarato hi kutsumba.

9. Hlawutela zvikarato zvo kari lezvi Joba a kumeneko nazvo.

⁹ Wona lezvi Jehovha a mu vhunisileko zvona Joba, a wanuna wo tsumbeka. Joba i kumene ni zvikarato zvo tala zvo bayisa hi cikhati citsongwani. Ka siku go kari, Joba i no byeliwa mahungu yo pandza mbilu ya lezvaku a mitlhambi yakwe a yin’wani yi wa yivilwe, a yin’wani yi dawa, ni lezvaku a malandza yakwe ni vana vakwe vo randzeka va file. (Joba 1:13-19) Andzhakunyana ka lezvo, Joba na a hazwa kubayisa ka hombe i no biwa hi wubabyi go bayisa nguvhu ga ku mu cica ni hlonge. (Joba 2:7) A ciyimo cakwe ci wa karatile nguvhu laha ka kuza aku: ‘Ndza swireka ha zvona, a ndzi randzi ku hanya contlhe cikhati’. — Joba 7:16.

10. Jehovha i mu nyikisile kuyini Joba lezvi zvi nga laveka kasi a timisela zvikarato zvakwe? (Wona mufota wa kapa)

¹⁰ Jehovha i wa ci wona a ciyimo ca Joba. Kota lezvi Jehovha a nga mu randza Joba, i mu nyikile lezvi a nga zvi lava kasi a timisela zvikarato zvakwe a tlhela a simama na a tsumbekile. Jehovha i no wulawula na Joba a mu alakanyisa hi wutlhari gakwe ga hombe ni lezvi a khatalelisako zvona a zvivangwa zvakwe hi lirandzo. I wulawulile hi zvihari zvo tala zvo chavisa. (Joba 38:1, 2; 39:9, 13, 19, 27; 40:15; 41:1, 2) Jehovha i tlhelile a tirisa a wanuna wo tsumbeka wa ku hi Elihu kasi ku tiyisa Joba ni ku mu chavelela. Elihu i tiyisekisile Joba lezvaku contlhe cikhati Jehovha wa chachazela a vakhozeli vakwe hi kutimisela kabye. Kanilezvi Jehovha i tlhelile a tirisa Elihu lezvaku a mu nyika a wusungukati go kari ga lirandzo Joba. Elihu i vhunile Joba lezvaku a tsika ku veka kupima ka yena wutsumbu hi ku mu alakanyisa lezvaku i wa hi mutsongwani nguvhu loku a ringanisiwa na Jehovha, a Muvangi wa wuako gontlhe. (Joba 37:14) Jehovha i tlhelile a mu nyika ciavelo Joba; i wa fanele ku khongelela a vanghana vakwe va vanharu va nga wonhile. (Joba 42:8-10) Jehovha i hi vhunisa kuyini nyamutlha a cikhati leci hi kumanako ni zvikarato zvo bindza?

11. A Bhibhiliya gi hi chavelelisa kuyini a cikhati leci hi kumanako ni zvikarato?

¹¹ Jehovha a nga wulawuli na hina hi kukongoma, a ku khwatsi hi lezvi a nga maha ka Joba, kanilezvi i wulawula na hina hi ku tirisa Mhaka yakwe, a Bhibhiliya. (Rom. 15:4) Wa hi chavelela hi ku hi nyika kutsumba ka cikhatini ci tako. Wona maalakanyo matsongwani ya lomu ka Bhibhiliya ma nga hi chavelelako a cikhati hi kumanako ni zvikarato. Lomu ka Mitsalo, Jehovha i hi tiyisekisa lezvaku a ku na nchumu — a ku patsa ni zvikarato zva hombe — ‘wu to zvi kota ku hi hambanisa ni lirandzo [lakwe]’. (Rom. 8:38, 39) I tlhela a hi tiyisekisa lezvaku ‘i kusuhani ni vontlhe lava va mu khongelako’. (Lis. 145:18) Jehovha i hi byela lezvaku loku hi mu tsumba hi nga timisela ni cihi cikarato hi tlhela hiva ni litsako a cikhati leci hi xanisekako. (1 Kor. 10:13; Jak. 1:2, 12) A Mhaka ya Nungungulu yi tlhela yi hi alakanyisa lezvaku a zvikarato lezvi hi kumanako nazvo zvezvi zva cikhatana basi loku hi zvi ecanisa ni nchachazelo wa pindzukelwa lowu a hi nyikako. (2 Kor. 4:16-18) Jehovha i hi nyika kutsumba ko tiya ka lezvaku i ta fuvisa a mutsu wa zvontlhe zvikarato zva hina, ku nga Sathani Dhiyabho ni lava va pimanyisako a tindlela takwe to biha. (Lis. 37:10) Xana u ma khomile hi hloko a mavhesi yo kari yo chavelela kasi ma ku vhuna ku timisela zvikarato cikhatini ci tako?

12. Zvini lezvi Jehovha a lavako ku hi maha loku hi lava ku vhuneka khwatsi hi Mhaka yakwe?

¹² Jehovha i lava lezvaku hi ti nyika cikhati ca ku gondza Bhibhiliya hi kukhandzakanya hi tlhela hi ehleketa khwatsi hi lezvi hi zvi gondzako. A cikhati leci hi tirisako lezvi hi zvi gondzako, a kukholwa ka hina ko kula hi tlhela hi tshinela kusuhani ni Papayi wa hina wa le tilweni. Kota wuyelo ga lezvo, ha tiya kasi ku timisela zvikarato. Jehovha i tlhela a va nyika moya wakwe wo basa lava va tsumbako Mhaka yakwe. Niku a moya lowo wu nga hi nyika a “ntamu wa hombe wo hundza wa munhu” kasi hi timisela ni cihi cikarato.— 2 Kor. 4:7-10.

13. A zvakuga zva moya lezvi hi nyikiwako hi “nandza go tsumbeka ni go tlhariha” zvi hi vhunisa kuyini a ku timisela zvikarato?

¹³ Hi ku vhuniwa hi Jehovha, a “nandza go tsumbeka ni go tlhariha” gi humesa tindzima to tala, ni tivhidhio ni mimuzka leyi yi hi vhunako ku aka kukholwa ko tiya hi tlhela hi tshama na hi khindlimukile hi tlhelo ga moya. (Mat. 24:45) Hi fanele ku londzowota zvontlhe lezvi Jehovha a hi nyikako. A makabye wo kari wa Estados Unidos zvezvanyana i wulile lezvi a zvi bongisako zvona zvontlhe a zvakuga zva moya. I wulile lezvi: “Ndzeni ka 40 wa malembe na ndzi tirela Jehovha a kutsumbeka ka mina ku ringilwe hi makhati yo tala.” A makabye loyi i kumene ni zvikarato zvo tala — a kokwani wakwe i no dawa hi mufambisi wa movha a nga popilwe, a vapswali vakwe va babya nguvhu va gumesa vafa, yena a khomiwa kankro makhati mambiri. Zvini zvi mu vhunileko ku timisela? I tlhamusele lezvi: “Jehovha contlhe cikhati wa ndzi khatalela. A zvakuga zva moya lezvi a hi nyikako hi ku tirisa a nandza go tsumbeka ni go tlhariha zva ndzi vhuna ku timisela. Hi kota ya lezvo, ndzi ti zwisa ku khwatsi hi Joba, loyi a ngaku: ‘Kala ndzifa ndzi ta ti wula loyi a nga hiko na nandzu.’”— Joba 27:5.

14. Jehovha i va tirisisa kuyini a vakhozeli-kuloni kasi ku hi vhuna a cikhati leci hi kumanako ni zvikarato? (1 Va Le Tesalonika 4:9)

¹⁴ Jehovha i gondzisa vanhu vakwe lezvaku va randzana ni ku chavelelana zvikhatini zva zvikarato. (2 Kor. 1:3, 4; lera 1 Va Le Tesalonika 4:9.) Na va pimanyisa Elihu, a vamakabye va zvi lava nguvhu a ku hi vhuna ku hi simama hi tsumbekile a cikhati leci hi kumanako ni zvikarato. (Miti. 14:22) Hi cikombiso, wona lezvi a bandla ga makabye Diana gi mu kucisileko zvona ni ku mu vhuna ku simama a tiyile hi tlhelo ga moya a cikhati leci a nuna wakwe a nga khomiwa wubabyi ga hombe. I wulile lezvi: “Zvi wa pandza mbilu. Kanilezvi ndzeni ka tihweti leto to bindza, hi wa zvizwa lezvaku Jehovha wa hi angarela hi mawoko yakwe ya ntamu ni ya lirandzo. A bandla ga hina gi mahile zvilo zvo tala kasi ku hi vhuna. A vamakabye va wa hi vhuxela, va hi fonela ni ku hi bharasara, ku nga zvalezvi hi nga zvi lava kasi hi simama ku timisela. Kota lezvi ka ku a ndzi zvi koti ku fambisa movha, a vamakabye va wa maha zvontlhe zvi nga koteka kasi ndziya mitlhanganweni ni ntirweni wa kuchumayela loku zvi koteka.” Kunene i thomo ga hombe a kuva ciro ca ngango lowu wa lirandzo wa moya!

HA BONGA A KUKHATALA KA JEHOVHA KA LIRANDZO

15. Hikuyini hi kholwako lezvaku hi nga zvi kota ku yimisana ni zvikarato?

¹⁵ Hontlheni hi ta kumana ni cikarato co kari. Hambulezvo, kota lezvi hi zvi gondzileko, hi nga ta tshuka hi lwisana ni zvikarato lezvo hoce. A ku fana ni papayi wa lirandzo, Jehovha contlhe cikhati wa zvi wona lezvi hi kumanako nazvo. I tlhelweni ga hina; i longile ku ingisela mikhongelo ya hina ya ku lava ku vhuniwa niku i zvi lava nguvhu a ku hi vhuna. (Isa. 43:2) Ha kholwa lezvaku hi nga zvi kota ku lwisana ni zvikarato hakuva Jehovha i hi nyika zvontlhe hi zvi lavako kasi hi timisela. I hi nyika cinyikiwo ca mukhongelo, ni Bhibhiliya, ni zvakuga zvo tala zva moya ni vamakabye va lirandzo kasi va hi vhuna loku zvi laveka.

16. Zvini hi faneleko ku maha kasi Jehovha a simama a hi khatalela hi lirandzo?

¹⁶ A ho ku bonga nguvhu hi lezvi hi nga ni Papayi wa le tilweni, loyi a zvi wonako zvontlhe zvi humelelako! “A timbilu ta hina ta mu tsakela”. (Lis. 33:21) Hi nga komba Jehovha lezvaku ha bonga a kukhatala kakwe ka lirandzo hi ku londzowota zvontlhe lezvi a mahako kasi ku hi vhuna. Hinawu hi fanele ku maha cipandze ca hina kasi Jehovha a simama a hi khatalela. Hi magezu man’wani, loku hi simama ku maha zvontlhe hi zvi kotako kasi ku ingisa Jehovha ni ku maha lezvi a zvi wonako na zvi hi zvinene, i ta hi hlayisa kala kupindzuka. — 1 Ped. 3:12.