“U tava na mina Paradhiseni”

1. Na a hi kusuhani ni kufa, zvini lezvi Jesu a nga byela a cin’we ca zvigevenga lezvi zvi nga hi tlhelweni gakwe? (Luka 23:39-43)

LAHA Jesu ni zvigevenga zvimbiri lezvi zvi nga hi matlhelweni yakwe va nga kari vafa hi kutsongwani-kutsongwani, va wazwa ku bayisa ka hombe. (Luka 23:32, 33) A zvigevenga lezvo zva zvimbiri zvi no poyilela Jesu. Makunu, zvi laha kubaseni ku va wa nga hi vapizani vakwe. (Mat. 27:44; Mar. 15:32) Kanilezvi, a mun’we wabye i no gumesa a cica mawonela yakwe. I no byela Jesu, aku: “Jesu, ndzi alakanye a cikhati leci u to nghena Mufun’weni wa wena.” Jesu i no mu hlamula, aku: “Ndza tiyisa ka wena nyamutlha ndziku: U tava na mina Paradhiseni.” (Lera Luka 23:39-43.) A ci kona ci kombako lezvaku a cigevenga leco ci wa vhumele a mahungu xungetano hi “Mufumo wa matilo”, lawa Jesu a nga ma chumayela ntirweni wakwe. Jesu yenawu a nga wulangi lezvaku a wanuna loye i wa ta nghena Mufun’weni. (Mat. 4:17) Jesu i wa wulawula hi Paradhise laha misaveni. Hikuyini hi wulako lezvo?

2. Zvini zvi kombako lezvaku a cigevenga leci ca ku ti sola ci wa hi muJudha?

² A cigevenga leci ca ku ti sola kuzvilava ci wa hi muJudha. Ci no byela leci cin’wani ciku: “A wu chavi Nungungulu hambu lezvi u tsayisilweko ku fana na yena ke?” (Luka 23:40) A vaJudha va wa khozela Nungungulu mun’we, kanilezvi a vanhu va matiko va wa kholwa ka vanungungulu vo tala. (Ekso. 20:2, 3; 1 Kor. 8:5, 6) Loku ku wa hi ku a zvigevenga lezvo va wa hi va matiko, kuzvilava a cigevenga leco na ci wutisisile lezvi: “A wu chavi vanungungulu ke?” A cin’wani kambe, Jesu i wa nga rumelwangi ka vamatiko, kanilezvi ka “tiyivhu ti lahlekileko ta yindlu ya ka Izrayeli”. (Mat. 15:24) Nungungulu i wa byelile a vaIzrayeli lezvaku Jesu i wa ta vhuka hi ka vafileko. A cigevenga leci ca ku ti sola kuzvilava ci wa zvi tiva lezvo niku a magezu yakwe ma komba lezvo. I wa alakanya ku Jehovha i ta vhuxa Jesu hi ka vafileko kasi a fuma Mufun’weni wa Nungungulu. Zvi wonekisa ku khwatsi a wanuna loye i wa rindzela ku Nungungulu i wa ta mu vhuxa yenawu.

3. Zvini lezvi kuzvilava a cigevenga leci ca ku ti sola ci zvi alakanyileko a cikhati leci Jesu a nga kumbuka Paradhise? Tlhamusela. (Genesisi 2:15)

³ A cigevenga leci ca ku ti sola kuzvilava ci wa tiva zvokari xungetano hi Adhamu na Evha ni Paradhise legi Jehovha a nga va vekile ka gona. Hikwalaho, a cigevenga leco kuzvilava ci wa alakanya lezvaku a Paradhise legi Jesu a gi kumbukileko gi wa tava wutshamu go saseka laha misaveni. — Lera Genesisi 2:15.

4. Lezvi Jesu a nga byela cigevenga zvi fanele ku hi kuca ku ehleketa hi yini?

⁴ Lezvi Jesu a nga byela cigevenga zvi fanele ku hi kuca ku ehleketa hi lezvi a wutomi gi to tshamisa zvona Paradhiseni. Lezvi zvi nga maheka ka mufumo wo rula wa Hosi Solomoni, zvi nga hi vhuna ku tiva zvokari xungetano hi Paradhise. A Bhibhiliya gi komba ku Jesu wa hombe ku hundza Solomoni. Hi rindzela ku Jesu kambe a tira zvin’we ni lava a to fuma navo kasi ku cica misava yiva Paradhise go saseka. (Mat. 12:42) Zvi laha kubaseni lezvaku lava va “tiyivhu tin’wani” va fanele ku zvi lava futsi a ku tiva lezvi va nga mahako kasi va ringanelwa hi ku hanya kala kupindzuka paradhiseni. — Joh. 10:16.

GI TA TSHAMISA KUYINI A WUTOMI PARADHISENI?

5. U alakanya ku a wutomi gi ta tshamisa kuyini Paradhiseni?

⁵ Zvini zvi tako maalakanyweni ya wena loku u pimisa hi wutomi Paradhiseni? Kuzvilava u alakanyela jardhim yo saseka, ya ku fana ni jardhim ya Edheni. (Gen. 2:7-9) Kuzvilava wa ci alakanya a ciphrofeto ci tsalilweko hi Mika ca lezvaku a vanhu va Nungungulu a ‘mun’we ni mun’wani i ta tshama lahasi ka vhina wakwe, ni lahasi ka kuwu wakwe’. (Mika 4:3, 4) Zvi nga maha na u alakanya kambe hi mavhesi yo kari ya Bhibhiliya ma wulako lezvaku ku tava ni zvakuga zvo tala Paradhiseni. (Lis. 72:16; Isa. 65:21, 22) Hikwalaho, kuzvilava wa ti alakanyela na u hi ka jardhim yo saseka, na u tshamile laha mezeni yi teleko hi zvakuga zvo nandziha. Kuzvilava wa ti alakanyela kambe na u kari uzwa masema yo nandziha ya tisinya ni zvitsangi. Niku zvi nga maha na u ti alakanyela na u hi ni maxaka ya wena ni vanghana, a ku patsa ni lava va to vhuxiwa hi ka vafileko, na mu tshamile zvin’we mu bhula mu hlekelela. A zvilo lezvo zvontlhe, a hi noro. Handle ko kanakana, a zvilo lezvo zvi ta maheka laha misaveni. Kanilezvi a hi lezvo basi, hi ta tlhela hiva ni ntiro wo tsakisa nguvhu Paradhiseni.

6. Zvini hi to maha Paradhiseni? (Wona mufota.)

⁶ Jehovha i hi vangile hi ndlela ya ku zvi koteka ku hi tsaka hi ntiro wa hina. (Mutsh. 2:24) Ndzeni ka 1000 wa malembe ya kufuma ka Kristu hi tava ni ntiro wa hombe. Lava va to pona kuxanisekeni ka hombe zvin’we ni vanhu vo tala nguvhu va to vhuxiwa hi ka vafileko, va ta lava tinguwo, ni zvakuga ni ka ku tshama kona. Kasi ku kuma zvilo lezvo, zvi ta lava ku hi tira, niku a ntiro lowo wu ta tsakisa nguvhu. A ku khwatsi hi lezvi Adhamu na Evha zvi nga lava ku va rima jardhim leyi va nga tshama ka yona, hinawu hi tava ni thomo ga ku cica misava yiva Paradhise. Hi nga alakanyela lezvi zvi to tsakisisa zvona a ku gondzisa vanhu va talela ga cima va to vhuxiwa hi ka vafileko, lava va tivako zvi tsongwani xungetano hi Jehovha ni kungo gakwe, ni ku vhuna vanhu vo tsumbeka va hanyileko Jesu na a nga seta misaveni lezvaku va tiva lezvi zvi mahekileko a cikhati leci va nga file!

7. Zvini hi nga tiyisekako ka zvona, niku hikuyini?

⁷ Hi nga tiyiseka lezvaku a wutomi Paradhesini gi tava go rula. Hi ta kuma zvontlhe hi to zvi lava hi tlhela hi xaxametiwa khwatsi. Hikuyini hi wulako lezvo? Hi ku Jehovha i sina a hi kombile kutsongwani lezvi a wutomi gi to tshamisa zvona Mufun’weni wa N’wana wakwe. Lezvo hi zvi wona ka matimu ya cikhati leci Hosi Solomoni a nga kari a fuma.

A MUFUMO WA HOSI SOLOMONI WU WA HI MASEMANYANA YA PARADHISE

8. Lezvi zvi wuliwako ka Lisimu 37:10, 11, 29, zvi tatisekisile kuyini andzhako ka loku Hosi Dhavhidha a tsalile? (Wona “Zviwutiso zva vagondzi” ka Murindzeli yaloyi.)

⁸ Hosi Dhavhidha i no pimiselwa ku tsala lezvi a wutomi gi nga wa ta tshamisa zvona a cikhati leci a hosi ya wutlhari ni yo tsumbeka yi nga wa ta fuma. (Lera Lisimu 37:10, 11, 29.) Loku hi kari hi bhula ni van’wani xungetano hi Paradhise legi gi tako, ha tolovela ku lera Lisimu 37:11. Hi na ni cigelo co zwala ca ku maha lezvo, hakuva Jesu i tshahile magezu lawo ka Kanelo yakwe ya le Citsungeni, na a komba lezvaku ma ta tatiseka cikhatini ci tako. (Mat. 5:5) Kanilezvi a magezu ya Dhavhidha ma kombile kambe lezvi a wutomi gi nga wa ta tshamisa zvona masikwini ya Hosi Solomoni. A cikhati leci Solomoni a nga fuma le Izrayeli, a vanhu va Nungungulu va wa ti buza hi kurula ka hombe ni kutshamiseka ka tiko “gi khulungako masi ni wulombe”. Nungungulu i wa wulile lezvi: ‘Loku mu famba hi milayo ya mina, . . . ndzi ta vanga kurula lomu tikweni ga n’wina; mu ta etlela khwatsi na mu nga dzukiswi hi munhu.’ (Levi 20:24; 26:3, 6) A zvitsumbiso lezvo zvi tatisekile a cikhati leci Solomoni a nga kari a fuma. (1 Kro. 22:9; 29:26-28) Jehovha kambe i wa tsumbisile lezvaku a vanhu va kubiha va wa ‘nga tava kona’. (Lis. 37:10) Hikwalaho, lezvi zvi wuliwako ka Lisimu 37:10, 11, 29 zvi tatisekile cikhatini ci nga hundza, niku zvi ta tatiseka kambe cikhatini ci tako.

9. Zvini lezvi a muzindza wa le Xebha a nga wula xungetano hi mufumo wa Hosi Solomoni?

⁹ A muzindza wa le Xebha i nozwa mahungu xungetano hi kurula ni kutshamiseka tikweni ga Izrayeli a cikhati leci ku nga fuma hosi Solomoni. A muzindza loye a nga hanya kule, i no famba pfhuka wa hombe nguvhu kasi a ya zvi wona hi yece. (1 Tih. 10:1) Loku a wonile mufumo wa Solomoni, i no wula lezvi: ‘A va ndzi byelangi a khihlanya ga zvona. . . . Va katekile a vanhu va wena, ma katekile malandza ya wena, lawa ma yimako wontlhe masiku mahlweni ka wena ma ingisa wutlhari ga wena!” (1 Tih. 10:6-8) Kanilezvi, lezvi zvi mahekileko mufun’weni wa Solomoni a mova masemanyana basi ya lezvi Jehovha a to mahela vanhu a cikhati leci a N’wana wakwe, Jesu Kristu, a to fuma.

10. Jesu wa hombe ka Solomoni hi tindlela muni?

¹⁰ Jesu wa hombe ka Solomoni hi tindlela tontlhe. Solomoni i wa hi munhu wo kala kumbhelela a mahileko zvihoxo zva hombe zvi nga guma zvi xanisa vanhu va Nungungulu. Kanilezvi Jesu i Hosi yo mbhelela, a nga mahi zvihoxo. (Luka 1:32; Mah. 4:14, 15) Jesu i hlulile zviringo zva hombe a vangelweko hi Sathani. Kristu i kombile lezvaku a nga ta tshuka a wonha kutani ku maha zvilo zvi to va vangela kubayisa a vanhu vo tsumbeka, lava a to va fumela. I thomo ga hombe a ku fumelwa hi Jesu.

11. Hi vamani va to vhuna Jesu?

¹¹ Jesu ni lava va 144 000 a to fuma navo, va ta tira zvin’we kasi ku khatalela ni ku tatisa kungo ga Nungungulu xungetano hi misava. (Kuv. 14:1-3) A cikhati leci va nga hanya laha misaveni va timisele zviringo zvo tala ni zvikarato zvo tala. Hikwalaho, va ta zvi zwisisa lezvi lava va hanyako laha misaveni va kumanako nazvo. Makunu, i ntiro muni khwatsi-khwatsi va to maha lava va to fuma na Jesu?

I NTIRO MUNI LOWU A VATOTILWEKO VA TO MAHA?

12. I ntiro muni lowu Jehovha a to nyika lava va 144 000?

¹² A ntiro lowu wu nyikilweko Jesu ni lava a to fuma navo wa hombe nguvhu a ku hundza lowu Solomoni a nga nyikilwe. Hosi Solomoni i wa fanele ku khatalela vanhu vo tala va nga hanya ka tiko gin’we basi. Hambulezvo, lava va to fuma Mufun’weni wa Nungungulu va ta khatalela vanhu va talela ga cima misaveni yontlhe. Lego i thomo ga hombe nguvhu, legi Jehovha a nyikako lava va 144 000!

13. A ntiro wa lava va to fuma na Jesu wu ta patsa ntiro muni wo hlawuleka?

¹³ A ku fana na Jesu, lava va 144 000 va ta tira kota tihosi ni vapristi. (Kuv. 5:10) A cikhati leci a vaIzrayeli va nga hi hasi ka Nayo wa Mosi, a ntiro wa hombe wa vapristi ku wa hi ku va vhuna ku vava ni lihanyo la linene va tlhela vava ni wunghana na Jehovha. A Nayo wa Mosi, wu wa hi “ndzhuti wa zvilo zva zvi nene lezvi zva ha tako”. Hikwalaho, zva zwisiseka a ku wula lezvaku lava va to fuma na Jesu va ta vhuna vanhu va Nungungulu lezvaku vava ni lihanyo li nene ni kuva ni wunghana na Jehovha. (Mah. 10:1) Zvi ta lava ku hi rindzela ni ku wona lezvi a tihosi leto ni vapristi va to wulawulisa zvona ni lava va to fumelwa hi Mufumo wa Nungungulu laha misaveni. Kani malulamiselo muni lawa Jehovha a to maha, hi nga tiyiseka lezvaku Paradhiseni legi gi tako, lava va to hanya laha misaveni va ta zvi kuma a zvileletelo lezvi zvi to laveka. — Kuv. 21:3, 4.

LAVA VA “TIYIVHU TIN’WANI” VA FANELE KU MAHA YINI KASI VA HANYA PARADHISENI?

14. Kuzwanana muni ku nga kona cikari ka “ntlhambi wu tsongwani” ni lava va “tiyivhu tin’wani”?

¹⁴ Jesu i wulawulile hi lava a to fuma navo, kota “ntlhambi wu tsongwani”. (Luka 12:32) I tlhelile a wulawula hi ntlawa wa wumbiri, lowu a ngaku “tiyivhu tin’wani”. A mitlawa leyo ya yimbiri, yi wumba ntlhambi wun’we. (Joh. 10:16) Zvezvi, a mitlawa leyi ya yimbiri yi kari yi tira zvin’we, niku yi ta simama ku tira zvin’we a cikhati leci a misava yi toya yi maha Paradhise. Lisine ku ka cikhati leco lava va “ntlhambi wu tsongwani” va ta ngha va hi le tilweni, lava va “tiyivhu tin’wani” na va hi laha misaveni, na va rindzela ku ti buza hi wutomi kala kupindzuka. Kanilezvi ku na ni lezvi lava va “tiyivhu tin’wani” va faneleko ku maha kasi va ringanelwa hi ku hanya Paradhiseni.

15. a) Lava va “tiyivhu tin’wani” ni vamakabye va Kristu va tirisana hi ndlela muni? b) U nga ci pimanyisisa kuyini a cikombiso ca makabye loyi a nga lomu farmácia? (Wona mufota.)

¹⁵ A cigevenga leci ci nga ti sola, ci nga hi tlhelweni ga Jesu, ci file na ci nga vangi ni cikhati ca ku kombisa kubonga hi lezvi Kristu a nga mu mahela. Kanilezvi, hina va “tiyivhu tin’wani” zvezvi hi na ni cikhati co tala ca ku kombisa lezvi hi ti zwisako zvona hi Jesu. Hi cikombiso, hi komba lezvaku ha mu randza hi lezvi hi va khomisako zvona a vamakabye vakwe va totilweko. Jesu i wulile lezvaku i ta lamula tiyivhu hi kuya hi lezvi ti mahelako vamakabye vakwe. (Mat. 25:31-40) Hi ga vhunetela a vamakabye va Kristu hi ku va vhuna hi kuhiseka ntirweni wa kuchumayela ni ku maha vapizani. (Mat. 28:18-20) Hikwalaho, hi fanele ku tirisa mabhuku ma seketelwako ka Bhibhiliya lawa va hi nyikako, yo kota bhuku Ti buze hi wutomi kala kupindzuka!. Loku ku hi ku a wu fambisi cigondzo ca Bhibhiliya ka wokari zvezvi, zvi ngo yini ku ti mahela makungo ya ku sangula zvigondzo zva Bhibhiliya ni vanhu vo tala hi laha u zvi kotako hi kona?

16. Zvini hi nga mahako zvezvi kasi hi ti longisela ku hanya Paradhiseni?

¹⁶ A zvi lavi ku hi rindzela kala hi nghena Paradhiseni hi kona hi tova vanhu lava Jehovha a va lavako ku va hanya seyo. Zvezvi, hi nga ti karatela kuva vanhu vo tsumbeka ka mawulawulela ni mahanyela ya hina hi tlhela hi tiva ku ti khoma ka lezvi hi mahako. Hi nga tsumbeka ka Jehovha kambe, ka nuna kutani sati wa hina ni ka maKristu-kulori. Loku hi hanya hi milayo ya Nungungulu zvezvi hi hanyako tikweni legi go biha, zvi ta hi olovela nguvhu ku hanya hi yona Paradhiseni. Hi nga tlhela hi gondza mitiro ni matshamela kasi ku komba lezvaku ha ti longisela ku hanya Paradhiseni. Wona ndzima “U longile ‘kuga tshomba ya misava’ ke?” yi nga ka Murindzeli yaloyi.

17. Xana hi fanele ku mbhela ntamu hi kota ya zviwonho lezvi hi zvi mahileko kale? Tlhamusela.

¹⁷ Hi fanele ku tlhela hi zama ku nga tizwi nandzu hi kota ya zviwonho zva hombe lezvi hi zvi mahileko ka cikhati ci hundzileko. Hi lisine, hi wa nga ta “wonha ha womu” hi ku ti byela ku ku na ni hakhelo ya kutlhatlhisa. (Mah. 10:26-31) Kanilezvi, loku ku hi ku hakunene hi ti solile hi ciwonho ca hombe hi ci mahileko, hi kombela Jehovha ku a hi vhuna hi tlhela hi cica mahanyela ya hina, hi nga tiyiseka lezvaku Jehovha i hi tsetselele a zvi tsika zvi hundza. (Isa. 55:7; Miti. 3:19) Alakanya lezvi Jesu a nga byela vafarisi. I te: “A ndzi telangi ku ta vitana valulamileko, kanilezvi ndzi tele vawonhi.” (Mat. 9:13) A hakhelo ya kutlhatlhisa yi na ni ntamu wa ku khubhunyeta zviwonho zva hina zvontlhe.

U NGA HANYA KALA KUPINDZUKA PARADHISENI

18. Zvini u nga wa ta lava ku bhula ni cigevenga leci ci ngafa tlhelweni ga Jesu?

¹⁸ Hi nga zama ku ti wona na u hi Paradhiseni, na u bhula ni cigevenga leci ci nga wulawula na Jesu! Handle ko kanakana, hi wumbiri ga n’wina mu wa ta bhula hi lezvi mu wu bongisako zvona a muphahlo wa Jesu. Kuzvilava u nga mu kombela ku a ku hlawutela zvin’wani zvi nga humelela ndzeni ka tihora to gumesa ta wutomi ga Jesu laha misaveni, ni lezvi a nga ti zwisa zvona a cikhati leci Jesu a nga vhumela lezvi a nga mu kombela. Kuzvilava yenawu a nga ku wutisa lezvi zvi nga karatisa zvona a ku hanya ka masiku yo gumesa ya tiko ga Sathani. Gi tava thomo ga hombe a ku gondza Mhaka ya Nungungulu ni vanhu vo fana ni wanuna loye!— Efe. 4:22-24.

19. Hikuyini a wutomi Paradhiseni gi to kala ku tshuka gi swira? (Wona mufota wa kapa.)

¹⁹ A wutomi Paradhiseni gi nga ta tshuka gi swira. Contlhe cikhati ku tava ni vanhu vo tsakisa kasi ku va tiva, ni ntiro wo tsakisa kasi ku wu maha. A ca cinene ka zvontlhe, hi ku siku ni siku hi ta mu tiva khwatsi a Papayi wa hina wa le tilweni hi tlhela hi ti buza hi zvontlhe lezvi a to hi nyika. A zvilo zva ku gondza xungetano hi yena zvi nga ta tshuka zvi mbhela niku ku tava ni zvotala zvaku hi gondza xungetano hi zvivangwa zvakwe. Laha hi toya hi hanya cikhati co leha, hi taya hi mu randza nguvhu Nungungulu. A ho ku mu bonga Jehovha na Jesu hi ku hi tsumbisa ku hi nga hanya kala kupindzuka Paradhiseni!