NDZIMA YA CIGONDZO N.° 26
LISIMU 123 Hi ta ti koramisa, hi tsumbeka ka nayo wa Nungungulu
Ti koramise, u vhumela lezvaku zvi kona u kalako u nga zvi tivi
“A hi nge zvi koti a ku zwisisa Loyi wa Ntamu Wontlhe”.— JOBA 37:23.
LEZVI HI TO GONDZA
Hi ta wona lezvaku hambu loku hi nga tivi zvontlhe lezvi zvi to humelela, hi nga zvi kota ku timisela zvikarato loku hi veka kupima ka lezvi hi zvi tivako hi tlhela hi tsumba Jehovha.
1. Jehovha i hi vangisile kuyini, niku hikuyini?
JEHOVHA i hi vangile hi ndlela ya ku hi zvi kota ku pimisa, ni kuva ni wutivi, ni kuzwisisa, ni ku maha zvilo hi wutlhari. Hikuyini a hi vangileko hi ndlela leyo? Hi ku i lava lezvaku hi “kuma a wutivi ga Nungungulu” ni ku mu tirela hi ntamu wa kupima ka hina. — Mav. 2:1-5; Rom. 12:1.
2. a) Zvini hi faneleko ku zvi zwisisa? (Joba 37:23, 24) (Wona ni mufota.) b) Hi vhunekisa kuyini hi ku ti koramisa hi vhumela lezvaku a hi zvontlhe hi zvi tivako?
2 Hambu lezvi hi zvi kotako ku gondza zvilo zvo tala, a hi zvontlhe hi zvi tivako. (Lera Joba 37:23, 24.) A hi woneni cikombiso ca Joba. Jehovha i no mu maha zviwutiso zvo tala Joba lezvi zvi mu vhunileko ku zwisisa lezvaku ku wa hi ni zvilo zvo tala a nga kala a nga zvi tivi. Lezvo zvi mahile ku Joba a ti koramisa zvi tlhela zvi mu vhuna a ku cica a maalakanyo yakwe. (Joba 42:3-6) Hinawu ha vhuneka a cikhati leci hi ti koramisako hi vhumela lezvaku a hi tivi zvontlhe. A kutikoramisa loko ku hi kuca ku hi tsumba lezvaku Jehovha i ta hi byela lezvi hakunene hi faneleko ku zvi tiva kasi hi maha zviboho zva zvinene. — Mav. 2:6.
A ku vhumela lezvaku zvi kona hi kalako hi nga zvi tivi zvi nga hi vhuna a ku fana ni lezvi zvi nga vhuna Joba (Wona paragrafo 2)
3. Zvini hi to bhula hi zvona ka ndzima leyi?
3 Ka ndzima leyi, hi ta bhula hi zvilo zvo kari hi kalako hi nga zvi tivi ni zvikarato lezvi hi nga kumanako nazvo hi kota ya lezvo. Hi ta wona kambe a ku hikuyini zvi nga zvinene a ku hi nga tivi a zvilo zvo kari. A ku bhula hi zvilo lezvo zvi ta tiyisa a kutsumba ka hina ka ku Jehovha “Loyi a mbheleleko kutiveni” i hi byela lezvi hakunene hi faneleko ku zvi tiva. — Joba 37:16.
A HI ZVI TIVI KU A MAGUMO MA TATA RINI
4. Hi kuya hi Matewu 24:36, zvini hi kalako hi nga zvi tivi?
4 Lera Matewu 24:36. A hi zvi tivi ku a tiko legi go biha gi ta gumesa rini. Hambu hi Jesu, a cikhati leci a nga hi laha misaveni, i wa nga gi tivi a ‘siku ni cikhati’.a Hi ndzhako ka cikhati, i no byela a vapostoli vakwe lezvaku Jehovha, a Muyimisi wa Hombe wa cikhati, hi yena a yimisako “hi ntamu wakwe” a cikhati co kongoma leci a zvilo zvo kari zvi to maheka hi cona. (Miti. 1:6, 7) Jehovha i sina a yimisile a cikhati ca kugumesa ka tiko legi, kanilezvi hina a hi zvi tivi ku hi rini.
5. A ku kala hi nga gi tivi a siku legi a kugumesa ku tota hi gona zvi nga hi khumbisa kuyini?
5 Hi kuya hi lezvi Jesu a nga wula, a hi zvi tivi ku hi ta rindzela kala rini na ku nga se chikela kugumesa. Hi kota ya lezvo, hi nga mbhelelwa hi lihlazva-mbilu kutani hi mbhela ntamu, nguvhunguvhu loku hi hi ni cikhati co leha na hi rindzela siku ga Jehovha. Zvi nga hi karatela kambe a ku timisela a kutseketselwa hi maxaka kutani vanhu van’wani. (2 Ped. 3:3, 4) Hi nga ha alakanya lezvaku loku hi wa gi tiva a siku legi a kugumesa ku tota hi gona hi wa tava ni lihlazva-mbilu nguvhu niku zvi wa ta hi olovela a ku timisela kutseketselwa.
6. Hikuyini zvi nga zvinene lezvi hi kalako hi nga zvi tivi ku a kugumesa ku ta chikela rini?
6 A lisine ku hi kota ya lezvi a nga kala ku hi byela a siku legi a kugumesa ku tota hi gona, Jehovha i hi nyika thomo ga ku hi komba lezvaku hi mu tirela hi ku mu randza futsi ni ku mu tsumba. A hi tireli Jehovha na hi veka kupima ka siku ga kugumesa ka tiko a ku khwatsi hi loku a kukholwa ka hina kova ni siku ga ku ku hundzelwa. Wutshan’wini ga ku veka nguvhu kupima ka ku a “siku ga Jehovha” gi tata rini, hi maha khwatsi hi ku veka kupima ka lezvi zvi to maheka hi siku lego. Lezvo zvi hi vhuna ku hi tshinela nguvhu ka Jehovha ni ku maha zvontlhe hi zvi kotako kasi ku mu tsakisa. — 2 Ped. 3:11, 12.
7. Zvini hi zvi tivako?
7 Hi maha khwatsi hi ku veka kupima ka lezvi hi zvi tivako zvaku a masiku yo gumesa ma sangulile hi 1914. Jehovha i hi nyikile zviphrofeto zva Bhibhiliya zvi nga tiyisa lezvaku a masiku yo gumesa ma wa ta sangula hi 1914 niku a zviphrofeto lezvo zvi tlhelile zvi hi tlhamusela khwatsi lezvi a tiko gi nga wa ta tshamisa zvona kusukela ka lembe lego. Hi kota ya lezvo, ha tiyiseka lezvaku a “siku ga hombe ga Jehovha gi laha kusuhani”. (Zef. 1:14) Ha wu tiva kambe a ntiro lowu Jehovha a lavako lezvaku hi maha ku nga ku byela vanhu vo tala hi laha zvi kotekako hi kona a ‘mahungu ya manene ya Mufumo’. (Mat. 24:14) A mahungu lawo ma kari ma chumayelwa ka 240 wa matiko hi 1000 wa tirimi ni ku hundza. A zvizi zvi lava ku hi tiva a ‘siku ni cikhati’ kasi hi hiseka ka ntiro lowu wa lisima.
A HI ZVI TIVI LEZVI JEHOVHA A TO MAHISA ZVONA
8. A “ntiro wa Nungungulu wa lisine” ku wuliwa yini? (Mutshawuteli 11:5)
8 A hi contlhe cikhati hi wu tivako a “ntiro wa Nungungulu wa lisine”. (Lera Mutshawuteli 11:5.) A magezu lawa ma wula lezvi Jehovha a mahako kutani ku zvi tsika zvi humelela kasi ku tatiseka kungo gakwe. Zvi nga maha hi nga zvi tivi a ku hikuyini Jehovha a tsikako zvilo zvo kari zvi humelela kutani ku hi nga zvi tivi khwatsi lezvaku i ta hi vhunisa kuyini. (Lis. 37:5) A Bhibhiliya gi fananisa a ku kala hi nga wu tivi a “ntiro wa Nungungulu wa lisine” ni kungativi lezvi a n’wanana a kulisako zvona lomu khwirini ga mamani wakwe, a zvilo zvaku hambu titlhari ta siensia a ti se zvi zwisisa khwatsi.
9. Zvikarato muni hi nga kumanako nazvo hi ku kala hi nga zvi tivi ku Jehovha i ta hi vhunisa kuyini?
9 A ku kala hi nga zvi tivi lezvi Jehovha a to hi vhunisa zvona zvi nga hi maha hi kanakana ku maha zviboho. Hi nga kanakana ku cica lezvi zvi lavekako kasi hi engetela a ntiro wa hina, zvo kota ku olovisa wutomi kutani ku rura hiya lomu ku nga ni cilaveko ca hombe ca vahuweleli va Mufumo. Loku hi nga zvi koti ku tatisa a mixuvo yo kari ya moya, ni loku hi nga woni mihandzu yo hlamalisa ya ntiro wa hina wa kutikarata kuchumayeleni kutani loku hi kumana ni zvikarato ntirweni wa Jehovha hi nga ti wutisa ku Nungungulu wa hi tsakela ke.
10. Matshamela muni ya lisima hi vako nawo hi ku kala hi nga zvi tivi lezvi Jehovha a to hi vhunisa zvona?
10 A ku kala ku tiva lezvi Jehovha a to hi vhunisa zvona zvi hi vhuna ku hiva ni matshamela yo kari ya lisima nguvhu yo kota kutikoramisa ni kutiva kugumelwa ka hina. Hi zwisisa lezvaku a maalakanyo ya Jehovha ni tindlela takwe zvi tlakukile nguvhu a ku hundza lezvi zva hina. (Isa. 55:8, 9) A cin’wani kambe, hi gondza ku mu tsumba nguvhu Jehovha kasi zvi hi fambela khwatsi. A cikhati leci hi kumako mihandzu ya yinene ntirweni wa kuchumayela kutani ka mitiro ya hlengeletano hi nyikela wudzundzo gontlhe ka Jehovha. (Lis. 127:1; 1 Kor. 3:7) Loku a zvilo zvi nga fambi hi ndlela leyi hina hi nga yi rindzele hi fanele ku alakanya lezvaku Jehovha wa zvi wona zvontlhe. (Isa. 26:12) Hi maha cipandze ca hina hi tlhela hi simama ku tsumba lezvaku Jehovha i ta maha cipandze cakwe. Hi tsumba lezvaku i ta hi nyika a wurangeli legi hi gi lavako hambu loku a nga zvi mahi hi ndlela ya cihlamaliso a ku khwatsi hi lezvi a nga maha ka makhati yo kari cikhatini ci hundzileko. — Miti. 16:6-10.
11. Zvilo muni zva lisima hi zvi tivako?
11 Ha zvi tiva lezvaku Jehovha contlhe cikhati i na ni lirandzo, i lulamile niku i na ni wutlhari. Ha zvi tiva lezvaku wa zvi nyika lisima lezvi hi mu mahelako ni lezvi hi mahelako vakhozeli-kuloni. Niku ha zvi tiva lezvaku contlhe cikhati Jehovha wa chachazela lava va tsumbekako kakwe. — Mah. 11:6.
A HI ZVI TIVI KU ZVINI ZVI TO HUMELELA MANDZIKO
12. Hi kuya hi Jakobe 4:13, 14, zvini hi kalako hi nga zvi tivi?
12 Lera Jakobe 4:13, 14. A lisine lo tiya ku a hi zvi tivi lezvi a wutomi ga hina gi to tshamisa zvona mandziko. Ka tiko legi go biha, “a cikhati ni zvilo zva citshuketi” zvi nga humelela hontlheni. (Mutsh. 9:11) Hi kota ya lezvo, a hi na ndlela ya ku tiva lezvaku a makungo ya hina ma ta famba khwatsi hambu ku hi ta hanya kala hi wona makungo ya hina na ma tatiseka.
13. A ku kala hi nga zvi tivi lezvi zvi to humelela zvi nga hi khumbisa kuyini?
13 Kuzvilava zvi nga hi karatela a ku timisela hi ku kala hi nga zvi tivi lezvi zvi to humelela mandziko. Hikuyini? Hi nga karateka nguvhu hi ku alakanyela lezvi kuzvilava zvi to hi humelela laha ka kuza zvi hi yivela litsako. A timhango ta citshuketi ni zvilo zva ku hi wa nga zvi rindzelangi zvi nga hi vangela kubayisa ka hombe ni kukarateka. A cin’wani kambe, loku lezvi hi nga zvi rindzele zvi nga maheki hi nga swireka hi tlhela hi mbhela ntamu. — Mav. 13:12.
14. Zvini hi faneleko ku maha ni ku zvi tiva kasi hi kuma litsako la lisine? (Wona ni mifota.)
14 A cikhati leci hi timiselako zvikarato, hi komba lezvaku hambu ko humelela yini, hina hi tirela a Papayi wa hina wa le tilweni hi ku mu randza na ku nga hi hi kota ya ku lava ku wuyelwa. A matimu ya Bhibhiliya ma komba lezvaku a hi faneli ku rindzela ku Jehovha a hi vhikela ka zvikarato zvontlhe, niku Jehovha a nga rangi a tsala na ka ha hi mahlweni lezvi zvi to hi humelela. Jehovha wa zvi tiva lezvaku a litsako la hina a liyi hi ku ha zvi tiva kutani a hi zvi tivi lezvi zvi to humelela mandziko. Wutshan’wini ga lezvo, a litsako la hina hi li kuma hi ku hlota wurangeli gakwe ni ku mu ingisa. (Jer. 10:23) Loku hi mu hlota a cikhati leci hi mahako zviboho, hi lisine ho wula ku: “Loku Jehovha a zvi randza, hi ta hanya, hi maha lezvi kutani lezviyani.” — Jak. 4:15.
A ku hlota a wurangeli ga Jehovha ni ku mu ingisa zvi hi maha hi vhikeleka (Wona maparagrafo 14-15)b
15. Zvini hi zvi tivako xungetano hi cikhati ci tako?
15 Hambu lezvi hi kalako hi nga zvi tivi lezvi zvi to humelela mandziko, ha zvi tiva lezvaku Jehovha i hi tsumbisa wutomi ga pindzukelwa, kani hi le tilweni kutani hi laha misaveni. Ha zvi tiva lezvaku Jehovha a nga hembi niku a ci kona ci nga mu vhalelako ku tatisa makungo yakwe. (Tit. 1:2) Jehovha hi yena yece ‘a rangako a wula magumo ya kona, [ni ku] hlawutela a zvilo zvi kalako zvi nga se maheka’. Lezvo zvi mahekile cikhatini ci hundzileko niku zvi ta maheka kambe cikhatini ci tako. (Isa. 46:10) Ha zvi tiva hi kumbhelela lezvaku ci hava ci nga vhalelako Jehovha lezvaku a hi randza. (Rom. 8:35-39) I ta hi nyika wutlhari, a hi chavelela, a tlhela a hi nyika ntamu wu lavekako kasi hi timisela ni cihi. Hi nga tiyiseka lezvaku Jehovha i ta hi vhuna a tlhela a hi katekisa. — Jer. 17:7, 8.
A HI NGE ZVI ZWISISI HI KUMBHELELA LEZVI JEHOVHA A HI TIVISAKO ZVONA
16. Kota lezvi zvi kombisiwako ka Lisimu 139:1-6, wutivi muni legi Jehovha a nga nago ga ku a hi nge gi zwisisi hi kumbhelela?
16 Lera Lisimu 139:1-6. A Muvangi wa hina wa zvi tiva lezvi hi nga vangisiwa zvona ni lezvi zvi mahileko ku hiva lezvi hi nga zvona, hi tlhelo ga miri, ga kutizwa ni ga maalakanyo. Jehovha a nga tshuki a nyima ku khatala hi hina. Wa zvi tiva lezvi hi wulako ni lezvi hi nga lava ku wula hi magezu lawo; wa zvi tiva lezvi hi mahako niku hikuyini hi mahako lezvo. A ku khwatsi hi lezvi Hosi Dhavhidha a zvi wonileko, contlhe cikhati Jehovha i longile niku i na ni ntamu wa ku hi vhuna. A zvo ku hlamalisa lezvi a Hosi ya Hombe ya wuako gontlhe, a Muvangi wa ntamu wontlhe le tilweni ni laha misaveni, a chelako kota hi hina! Dhavhidha i wulile lezvi: ‘A wutivi lego ga hombe a ku hundza a hloko ya hina. A hi zvi koti ni ku gi pima.’ — Lis. 139:6, nota.
17. Hikuyini zvi nga hi karatelako a ku vhumela lezvaku Jehovha wa hi tiva khwatsi?
17 Hi kota ya lezvi hi nga wundlisiwa zvona, ni lomu hi nga kulela kona kutani lezvi hi nga zvi kholwa kale, kuzvilava zvi nga hi karatela a ku wona Jehovha kota Papayi wa lirandzo a khatalako hi hina. Kutani hi nga alakanya ku a zviwonho lezvi hi zvi mahileko kale zva hombe nguvhu laha ka ku Jehovha a nge tshuki a lava ku maha wunghana na hina niku i kule nguvhu na hina. Hambu Dhavhidha ka zvikhati zvo kari i wa ti zwisa lezvo. (Lis. 38:18, 21) A cin’wani kambe, a munhu loyi a ti karatelako ku cica mahanyela yakwe a hanya hi milayo ya Nungungulu yo lulama, kuzvilava a nga ti wutisa ku: ‘Loku Nungungulu hakunene a ndzi zwisisa, hikuyini a lavako ku ndzi cica a mahanyela lawa ma ndzi tsakisako?’
18. Hi vhunekisa kuyini hi ku vhumela lezvaku Jehovha wa hi tiva khwatsi a ku hundza hina venyi? (Wona ni mufota.)
18 Hi nga gondza a ku vhumela lezvaku Jehovha wa hi tiva khwatsi a ku hundza hina venyi ni lezvaku wa wona zvazvinene ka hina zvaku hina venyi a hi zvi woni. Hambu lezvi Jehovha a wonako zvihoxo zva hina a tlhela a zvi zwisisa ku hikuyini hi ti zwako hi ndlela yo kari ni ku zwisisa lezvi zvi hi mahako hi maha zvilo hi ndlela yo kari, wa hi randza. (Rom. 7:15) A cikhati leci hi zvi zwisisako khwatsi lezvaku Jehovha wa zvi wona lezvi hi nga zvi kotako ku maha zvi hi nyika ntamu hi wu lavako kasi hi mu tirela hi kutsumbeka na hi tsakile.
Jehovha wa hi vhuna ku timisela a zviyimo zva ku hi wa nga zvi rindzelangi hi ku tiyisa a kukholwa ka hina ka wutomi go tsakisa hi to gi kuma misaveni yiswa (Wona maparagrafo 18-19)c
19. Zvini hi tiyisekako hi zvona xungetano hi Jehovha?
19 Ha zvi tiva lezvaku Jehovha lirandzo. Lezvo a hi kanakani ne ni kutsongwani. (1 Joh. 4:8) Ha zvi tiva lezvaku a milayo yakwe yo lulama yi komba ku wa hi randza niku contlhe cikhati i hi xuvela zvazvinene. Ha zvi tiva ku Jehovha i lava lezvaku hi kuma wutomi ga pindzukelwa. I nyikele hakhelo ya kutlhatlhisa kasi lezvo zvi koteka. A cinyikiwo ca hakhelo ya kutlhatlhisa ci hi tiyisekisa lezvaku hambu lezvi hi nga vanhu vo kala ku mbhelela hi nga tirela Jehovha hi ndlela leyi yi mu tsakisako. (Rom. 7:24, 25) A cin’wani kambe, ha zvi tiva lezvaku “Nungungulu wa hombe a ku hundza timbilu ta hina niku i tiva zvilo zvontlhe”. (1 Joh. 3:19, 20) Jehovha wa zvi wona zvontlhe xungetano hi hina niku wa tiyiseka lezvaku hi nga zvi kota ku maha kurandza kakwe.
20. Zvini zvi hi vhunako a ku potsa kukarateka ko hundza mpimo?
20 Jehovha a nga hi fihlelangi a mahungu lawa hakunene hi faneleko ku ma tiva. Loku hi ti koramisa hi vhumela a mhaka leyo hi potsa kukarateka ko hundza mpimo hi zvilo zva ku a zvi le ntan’wini wa hina hi tlhela hi veka kupima ka lezvi hakunene zvi nga zva lisima. Hi ndlela leyo, hi komba lezvaku hi tsumba Jehovha hi kumbhelela, “Loyi a mbheleleko kutiveni”. (Joba 36:4) Hambu lezvi ka cikhati leci hi kalako hi nga tivi zvontlhe, ha zvi tiva lezvaku Jehovha i ta simama ku hi gondzisa zvilo zva zviswa kala kupindzuka. Lezvo zva hi tsakisa nguvhu hakuva hi nga ta nyima ku gondza zvilo zva zviswa hi Nungungulu wa hina wa Hombe wo hlamalisa. — Mutsh. 3:11.
LISIMU 104 Cinyikiwo ca Nungungulu ca moya wo basa
b TLHAMUSELO WA MIFOTA: I papayi ni mufana wakwe va longiselako a pasta ya ku tsutsuma nayo kasi va tshama na va longile na ku nga se humelela mhango.
c TLHAMUSELO WA MIFOTA: Makabye a kumanako ni zvikarato a alakanyelako hi litsako leli a tova nalo misaveni yiswa.