Ziwutiso za vagonzi

Xini “mhaka ya Nungungulu” leyi a bhuku ga Maheberu 4:12 gi wulako lezaku “ya hanya, yi na ni ntamu”?

A mongo wa magezu lawa wu hi vuna ku zwisisa lezaku Paule i wa wulawula hi mahungu ya Nungungulu xungetano hi kungo gakwe, kota lezi hi ma wonako lomu ka Biblia.

Lomu ka mabhuku ya hina hi tolovela ku wulawula hi Maheberu 4:12 kasi ku komba lezaku a Biblia gi na ni ntamu wa ku cica wutomi, niku lezo lisine. Hambulezo, za vuna ku zwisisa lezi Paule a nga kari a wulawula hi zona a xikhati a nga tsala Maheberu 4:12. I wa kuca maKristu ya Maheberu lezaku ma longoloka ni makungo ya Nungungulu. A kutala ka makungo lawo ma wa kumeka lomu ka mitsalo yo basa. Paule i lo nyika xikombiso hi vaIsraeli lava Nungungulu a va tlhatlhisileko le Gipite. Va wa hi ni kutsumba ka ku ya nghena ka “tiko ga masi ni wulombe,” lomu va nga wa ta ti buza hi kuhumula ka lisine. — Eksodusi 3:8; Deuteronome 12:9, 10.

Lego gi wa hi kungo ga Nungungulu. Kanilezi a vaIsraeli va lo ala zileletelo za Nungungulu niku a va kombisangi kukholwa, hikwalaho a kutala kabye a va nghenangi kuhumuleni loko. (Mitsengo 14:30; Joxua 14:6-10) Hambulezo Paule i lo engeta a wula lezaku ku wa ha hi ni “xitsumbiso xa kuenghena kuhumuleni” ka Nungungulu. (Maheberu 3:16-19; 4:1) Zi te dlunya lezaku a “xitsumbiso” lexo xipanze xa lezi Nungungulu a zi kombisileko xungetano hi kungo gakwe. A ku fana ni maKristu ya Maheberu, hi nga lera mahungu ma wulawulako hi kungo lego hi tlhela hi longoloka nago. Kasi ku komba lezaku a xitsumbiso lexo xi seketelwa ka Mitsalo, Paule i lo tshaha mahungu yo kari ma nga ka Genesisi 2:2; Tisimu 95:11.

Za khumba nguvu timbilu ta hina a ku tiva lezaku “a xitsumbiso xa kuenghena kuhumuleni kakwe [Nungungulu] xa ha hi . . . kona.” Ha tsumba ku lezi a Biblia gi wulako xungetano hi ku nghena kuhumuleni ka Nungungulu za koteka futsi, niku hi sina hi bile mazambo yo nghena kuhumuleni loko. A hi mahi lezo hi ku zama ku lanzela Nayo wa Mosi kutani ku maha zilo za zi nene hi ku lava ku tsakelwa hi Jehova ntsena. Kanilezi, hi kukholwa ka hina ka Nungungulu, hi simama ku longoloka ni kungo gakwe hi kuziranza. A makume ya mazana ya vanhu misaveni yontlhe vonawu va sangulile ku gonza a Biblia ni ku tiva lezi Nungungulu a zi kombileko xungetano hi kungo gakwe. Lezo zi kuca vanhu vo tala lezaku va cica wutomi gabye, va kombisa kukholwa, va guma va bapatizwa. Lezi va khumbiswako zona xikombiso xo dlunyateka xa lezaku “a mhaka ya Nungungulu ya hanya, yi na ni ntamu.” Lezi Nungungulu a zi kombisileko lomu ka Biblia xungetano hi kungo gakwe zi khumbile wutomi ga hina, niku zi ta simama kuva ni ntamu wutomini ga hina.