Hi vanhu va Jehovha
‘Gi katekile a tiko legi Jehovha a nga Nungungulu wa gona, ni vanhu lava a va hlawulileko a kuva tshomba yakwe.’ — LISIMU 33:12.
1. Hikuyini hi nga wulako lezvaku a zvilo zvontlhe zvi lumba Jehovha? (Wona mufota kusanguleni ka ndzima.)
A ZVILO zvontlhe zvi lumba Jehovha! Hi yena n’winyi wa ‘matilo . . . zvin’we ni misava ni zvontlhe zvi nga ka yona’. (Dhewuteronome 10:14; Kuvhululelwa 4:11) Kota lezvi Jehovha a nga vanga vanhu, hontlheni hi tshomba yakwe. (Lisimu 100:3) Kanilezvi ka vanhu vontlhe lava va hanyako, Nungungulu i hlawulile vokari lezvaku va lumba yena hi ndlela yo hlawuleka.
2. Hi vamani va vileko vanhu va Jehovha hi ndlela yo hlawuleka?
2 Hi cikombiso, a Lisimu 135 li wulawula hi vakhozeli vo tsumbeka va Jehovha le Izrayeli wa kale kota “tshomba yakwe”. (Lisimu 135:4) A ku hundza lezvo, muphrofeti Hoseya i tlhamusele lezvaku a vanhu vo kala va nga hi vaIzrayeli va wa tava vanhu va Jehovha. (Hoseya 2:23) A ciphrofeto leco ci tatisekile a cikhati leci Jehovha a nga sangula ku hlawula vanhu vo kala va nga hi vaIzrayeli kasi va ya fuma na Kristu le tilweni. (Mitiro 10:45; Va Le Roma 9:23-26) A vanhu lavo va totilweko hi moya wa kubasa va vitaniwa ku i “tiko gi basileko” niku “vanhu va lumbako” Jehovha. (1 Pedro 2:9, 10) Kanilezvi, ahati maKristu man’wani yo tsumbeka lawa ma rindzelako ku hanya kala kupindzuka laha misaveni? Na wonawu, Jehovha i ma vitana ku vanhu vakwe ni ‘vahlawulilweko vakwe’. — Isaya 65:22.
3. a) Hi vamani va nga ni wuxaka go hlawuleka na Jehovha inyamutlha? b) Hi ta wulawula hi yini ka ndzima leyi?
3 Inyamutlha, a “ntlhambi wu tsongwani” lowu wu nga ni kutsumba ka ku hanya kala kupindzuka le tilweni ni ‘tiyivhu tin’wani’ leti ti nga ni kutsumba ka ku hanya kala kupindzuka laha misaveni, vontlhe va khozela Jehovha kota ‘ntlhambi wun’we’. (Luka 12:32; Johani 10:16) Hi lava ku komba Jehovha lezvi hi tsakisileko zvona hi kuva hi hi ni wuxaka go hlawuleka naye. Ka ndzima leyi, hi ta wulawula hi lezvi hi nga mu bongisako zvona Jehovha hi thomo lego go hlawuleka a hi nyikileko.
HI HENDLELETA WUTOMI GA HINA KA JEHOVHA
4. Hi nga mu bongisa kuyini Jehovha hi lezvi a hi vhumelelako kuva ni wuxaka naye, niku Jesu i mahile zvo fana ni lezvo hi ndlela muni?
4 Hi kombisa ku ha mu bonga Jehovha loku hi ti hendleleta kakwe hi tlhela hi bhabhatiswa. Loku hi maha lezvo a vanhu vontlhe va ta zvi wona ku hi vanhu va Jehovha niku hi ti yimisele ku mu ingisa. (Mahebheru 12:9) Jesu i mahile lezvo a cikhati a nga bhabhatiswa. Hambu lezvi a nga sina a lumba cipandze ca tiko gi ti hendleletileko ka Jehovha, i ti nyikele kakwe. Lezvo zvi wa fana ni loku aku: ‘Nungungulu wa mina, ndza nengela ku maha kurandza ka wena.’ — Lisimu 40:7, 8.
5, 6. a) Zvini lezvi Jehovha a nga wula a cikhati Jesu a nga bhabhatisiwa? b) Mufananiso muni wu nga hi vhunako ku zwisisa lezvi Jehovha a ti zwisako zvona loku hi ti hendleleta kakwe?
5 I ti zwisile kuyini Jehovha a cikhati Jesu nga bhabhatiswa? A Bhibhiliya gi ngalo: ‘Jesu laha na a bhabhatisilwe i no huma zvalezvo hi lomo matini, languta, a tilo gi no vhululeka, a wona moya wa Nungungulu wu relela kota tuva hehla kakwe. Zvonake ku no zwala a gezu gi huma matilweni, giku: Loyi hi N’wana wa mina a randzekako, ndzi xaleleko khwatsi ha yena.’ (Matewu 3:16, 17) Phela Jesu i wa sina a lumba Nungungulu. Hambulezvo Jehovha i tsakile a cikhati a nga wona Jesu na a ti yimisela ku tirisa wutomi gakwe kasi ku tirela yena basi. Jehovha wa tsaka kambe loku a hi wona na hi hendleleta wutomi ga hina kakwe niku i ta hi katekisa. — Lisimu 149:4.
6 A zvilo zvontlhe zvi lumba Jehovha! Makunu zvini hi nga mu nyikako? Hi nga ehleketa hi wanuna a nga ni zvitsangi zvo saseka ka jardim yakwe. Ka siku go kari a nhanyana wakwe a khaya cin’we a mu nyika. Hambu lezvi a zvitsangi zvi sinako zvi hi zvakwe, a wanuna loye wa tsaka loku a nyikiwa citsangi leco. Lezvo zvi komba ku a nhanyana wakwe wa mu randza. A citsangi leco a nga nyikiwa hi n’wana wakwe ca lisima nguvhu a ku hundza lezvi zvin’wani zvi nga lomu ka jardim. Hi ndlela yo fana, Jehovha wa tsaka nguvhu loku hi hendleleta wutomi ga hina hi kuzvirandza kakwe. — Eksodhusi 34:14.
7. Malaki i hi vhunisa kuyini ku zwisisa lezvi Jehovha a ti zwisako zvona hi lava va mu tirelako hi kuzvirandza?
7 Gondza Malaki 3:16. A ku hendleleta wutomi ga hina ka Jehovha hi tlhela hi bhabhatiswa zva lisima nguvhu. Hikuyini? Hi ku Jehovha wa va tiva lava va mu tirelako hi kuzvirandza niku wa tsala mavito yabye lomu ka ‘bhuku ga cialakanyiso’. Lisine ku kusukela siku galego hi pswaliwako hi lumba Jehovha, a Muvangi wa hina. Kanilezvi ehleketa hi lezvi a tsakisako zvona loku hi vhumela ku fumiwa hi yena ni ku hendleleta wutomi ga hina kakwe. — Mavingu 23:15.
8, 9. Zvini lezvi Jehovha a zvi lavako ka lava a mavito yabye ma tsalilweko ka ‘bhuku ga cialakanyiso’?
8 Loku hi lava ku a mavito ya hina ma tsaliwa lomu ka ‘bhuku ga cialakanyiso’ ga Jehovha, hi fanele ku maha cokari. Malaki i te hi fanele ku chava Jehovha hi tlhela hi ehleketa hi vito gakwe. Loku hi khozela munhu mun’wani kutani nchumu wo kari, a mavito ya hina ma ta vhinyiwa lomu ka bhuku ga Jehovha! — Eksodhusi 32:33; Lisimu 69:28.
Siku ni siku, hi fanele ku komba hi mitiro lezvaku ha mu ingisa Jehovha
9 Hikwalaho, a zvi eneli ku tsumbisa ku u ta maha kurandza ka Jehovha u tlhela u bhabhatiswa. Lezvo zvilo hi mahako khati gin’we, kanilezvi a ku khozela Jehovha zva wutomi ga hina gontlhe. Siku ni siku, hi fanele ku komba hi mitiro lezvaku ha mu ingisa. — 1 Pedro 4:1, 2.
HI POTSA KUNAVELA KA TIKO
10. Hi kwihi ku hambana ku nga kona cikari ka lava va tirelako Jehovha ni lava va nga mu tireliko?
10 Ka ndzima yi hundzileko hi gondzile lezvaku Kana, na Solomoni, ni vaIzrayeli va wa ti byela ku va khozela Jehovha kanilezvi va wa nga tsumbekangi kakwe. Lezvo zvi hi gondzisile lezvaku a zvi eneli a ku wula basi hiku hi khozela Jehovha. Hi fanele ku venga le’zvo biha hi randza zva zvi nene. (Va Le Roma 12:9) Jehovha i wula lezvaku ku tava ni kuhambana cikari ka ‘loyi lulamileko ni wakubiha, cikari ka loyi a tirelako Nungungulu ni loyi a nga mu tireliko’. — Malaki 3:18.
11. Hikuyini a van’wani va faneleko ku zvi wona lezvaku hi khozela Jehovha yece?
11 Ha mu bonga nguvhu Jehovha hi lezvi a hi hlawulileko kuva vanhu vakwe! A vanhu vontlhe zva va olovela ku wona lezvaku hi le tlhelweni ga Jehovha. (Matewu 5:16; 1 Timote 4:15) Ti wutise lezvi: ‘A van’wani va zvi wona ku ndzi yimile ndzi tiya tlhelweni ga Jehovha? Ndza tizwa matshandza hi ku byela vanhu a ku ndzi Mboni ya Jehovha?’ Hi nga ehleketa hi lezvi Jehovha a ti zwisako zvona loku hizwa tingana a ku byela van’wani lezvaku hi vanhu vakwe! — Lisimu 119:46; gondza Marku 8:38.
A mahanyela ya wena ma zvi veka kubaseni lezvaku u Mboni ya Jehovha ke? (Wona tindzimana 12, 13)
12, 13. Zvini lezvi a vokari va mahako kasi a van’wani zvi va karatela ku va tiva kota Timboni ta Jehovha?
12 A ya hava hi ku hambu Timboni to kari ti pimanyisa “a moya wa misava”. Kota wuyelo ga kona, a ku woneki khwatsi a ku hambana kabye ni lava va kalako va nga khozeli Jehovha. (1 Va Le Korinte 2:12) “A moya wa misava” wu maha vanhu va ti alakanyela ga vona basi. (Va Le Efesusi 2:3) Hi cikombiso, hambu lezvi hi kumako wusungukati, a vo kari va hlawula ku ambala hi ndlela yo soleka. Va boha tinguwo to manya ni to vangamela, hambu loku vaya mitlhanganweni ya wuKristu. Kutani ku hundzeleta matsemela ni malukela ya misisi. (1 Timote 2:9, 10) Lezvo zvi maha ku a van’wani zvi va karatela ku tiva ku Timboni ta Jehovha kutani ahihi. — Jakobe 4:4.
13 Ku na ni zvin’wani zvi mahako ku a Timboni to kari ti nga hambani ni tiko. Hi cikombiso, lomu tifesteni a van’wani va kina hi ndlela yo dhanisa va tlhela va maha zvilo hi ndlela yi kalako yi nga faneli maKristu. A van’wani va chela mifota yabye va tlhela va tsala timhaka ka Internet zvi kombako lezvi va zvi pimisako. Zvi nga ha maha na va nga kawukiwangi bandleni ga wuKristu hi kota ya ciwonho ca hombe va ci mahileko, kanilezvi va nga kucetela vamakabye lava va zamako ku ti hambanisa ni tiko. — Gondza 1 Pedro 2:11, 12.
U nga kalavelwi hi lava va kalako va nga yimangi tlhelweni ga Jehovha hi timbilu tabye tontlhe
14. Zvini hi faneleko ku maha kasi hi vhikela wuxaka ga hina na Jehovha?
14 Zvontlhe lezvi zvi nga kona lomu tikweni zvi mahelwe ku hi kuca ku hi rangisa ‘kunavela ka nyama, ni kunavela ka mahlo, ni kutikulisa hi kota ya zvilo zva loku kuhanya’. (1 Johani 2:16) Hina hi vanhu va Jehovha, hikwalaho hi hambene ni tiko. Hi ‘tsika lezvi zvi nga lulamangiko ni kunavela ka misava, hi hanya ka nguva leyi hi kutikhoma ni kululama hi chava Nungungulu’. (Titusi 2:12) Kova ni cihi hi mahako, ku ngava ku wulawula, kuga, kunwa, ku ambala, kutani ku tira zvi fanele ku nga siyi ku kanakana ka van’wani lezvaku hi vanhu va Jehovha. — Gondza 1 Va Le Korinte 10:31, 32.
HA RANDZANA NGUVHU
15. Hikuyini hi faneleko ku kombisa lirandzo ni wunene ka maKristu kuloni?
15 Hi komba ku ha gi nyika lisima a wuxaka ga hina na Jehovha loku hi khoma khwatsi vamakabye va hina. A ku fana na hina vonawu vanhu va Jehovha. Loku hi alakanya mhaka leyi, contlhe cikhati hi ta tirisana navo hi wunene ni lirandzo. (1 Va Le Tesalonika 5:15) Hikuyini zvi nga zva lisima? Jesu i byelile valandzeli vakwe aku: ‘Loku mu randzana, a vanhu vontlhe va ta zvi tiva lezvaku mu vapizani va mina.’ — Johani 13:35.
16. Hi gondza yini ka Nayo wa Mosi xungetano hi lezvi Jehovha a ma randzisako zvona malandza yakwe?
16 A Nayo wa Mosi wu nga hi vhuna ku zwisisa lezvi hi faneleko ku va khomisa zvona van’wani lomu bandleni. Lomu tempeleni ya Jehovha, ku wa hi ni zvibya zvi nga tirisiwa ntsena wukhozelini. A Nayo wu wa dlunyatisile lezvi a vaLevhi va nga fanele ku zvi tirisisa zvona. Ni wihi loyi a nga kala a nga landzeli zvileletelo i wa ta dawa. (Mitsengo 1:50, 51) Makunu, loku Jehovha a kombisile kukhatala hi lezvi a vanhu va nga fanele ku zvi tirisisa zvona zvibya lezvo wukhozelini, handle ko kanakana wa chela nguvhu kota hi lezvi a vanhu va ma khomisako zvona a malandza yakwe ma mu khozelako hi kutsumbeka! Jehovha i kombisile lezvaku hi va lisima a cikhati a ngaku: ‘Loyi a mu khumbako i khumba a ndzololwani ya tihlo ga [mina].’ — Zakariya 2:8.
Jehovha wa zvi wona loku hi rurela van’wani, hi hana, hi tsetselela ni kuva ni wunene
17. ‘Jehovha i dembile ndleve a ingisela’ yini?
17 Malaki i te ‘Jehovha i dembile ndleve a ingisela’ lezvi a mun’we ni mun’wani a khomisako zvona mun’wani. (Malaki 3:16) Jehovha wa va ‘tiva lava va nga vakwe’. (2 Timote 2:19) Jehovha wa zvi tiva zvontlhe lezvi hi mahako ni lezvi hi wulako. (Mahebheru 4:13) Loku hi nga kombisi wunene ka vamakabye va hina, Jehovha wa zvi wona. Kanilezvi hi nga tiyiseka lezvaku Jehovha wa zvi wona kambe loku hi rurela van’wani, hi hana, hi tsetselela ni kuva ni wunene. — Mahebheru 13:16; 1 Pedro 4:8, 9.
JEHOVHA A NGA TA TSIKA VANHU VAKWE
18. Hi nga mu bongisa kuyini Jehovha hi lezvi a nga hi hlawula kasi hiva vanhu vakwe?
18 Ha zvi tiva ku a cikhati hi nga hendleleta wutomi ga hina ka Jehovha, hi wo maha nchumu wa wu nene nguvhu. Hikwalaho, hi lava ku komba Jehovha lezvi hi tsakisileko zvona hi lezvi hi nga vanhu vakwe. Hambu lezvi hi hanyako ‘cikari ka cizukulwana ci gombonyekileko ni ci bihileko’ hi nga tshama na hi ‘nga hi na bala’ hi tlhela hi ‘woningela misava’. (Va Le Filipi 2:15) Hikwalaho hi ti yimisele ku nga mahi ni cihi leci Jehovha a ci vengako. (Jakobe 4:7) Hi lava ku randza vamakabye va hina hi tlhela hi va kombisa cichavo hakuva vanhu va Jehovha. — Va Le Roma 12:10.
19. Jehovha i chachazela vanhu vakwe hi ndlela muni?
19 A Bhibhiliya gi tsumbisa lezvaku ‘Jehovha a nga ta hoxa’ vanhu vakwe. (Lisimu 94:14) Kova ni cihi ci to humelela, Jehovha i tava na hina. Hambu loku hifa, Jehovha a nga ta hi rivala. (Va Le Roma 8:38, 39) ‘Kani ha hanya, hi hanyela Jehovha; kutani hafa, hi fela Jehovha; hikwalaho kani ha hanya, kani hafa, hi va Jehovha.’ (Va Le Roma 14:8) Hi ci donela mari a cikhati leci Jehovha a to vhuxa vanghana vakwe vo tsumbeka lava va fileko. (Matewu 22:32) Hambu ka cikhati leci hi ti buza hi zvinyikiwo zvotala nguvhu lezvi Jehovha a hi nyikako. Kota ku wula ka Bhibhiliya ‘gi katekile [kutani gi tsakile] a tiko legi Jehovha a nga Nungungulu wa gona, ni vanhu lava a va hlawulileko a kuva tshomba yakwe’. — Lisimu 33:12.