Kronekele wo sangula

14 Hiramu,+ a hosi ya Tire, i no rumela a zvirun’wa ka Dhavhidha ni mapulango ya sedhare, ni vaaki va mimuro, ni vavatli kasi va ya mu akela yindlu.*+ 2 Dhavhidha i no zvi tiva lezvaku Jehovha i mu yimisile a tiya kota hosi hehla ka Izrayeli,+ hakuva a mufumo wakwe wu wa tlakusilwe nguvhu hi kota ya vanhu Vakwe, a vaIzrayeli.+

3 Dhavhidha i no teka van’wani vasati+ le Jerusalema, a pswala van’wani vana va vafana ni va vanhanyana.+ 4 A mavito ya vana lava a nga pswalelwa Jerusalema hi lawa:+ Xamuwa, na Xobhabha, na Natani,+ na Solomoni,+ 5 na Ibhara, na Elixuwa, na Elpeleta, 6 na Noga, na Nefega, na Jafiya, 7 na Elixama, na Bheeliyadha, na Elifelete.

8 A cikhati leci a vaFilistiya va ngazwa lezvaku Dhavhidha i totilwe kota hosi ya Izrayeli yentlhe,+ a vaFilistiya vontlhe va noya va ya hlota Dhavhidha.+ Laha Dhavhidha a nga zvizwa, i no huma kasi a yalwa navo. 9 Makunu a vaFilistiya va nota va ta hlasela a Nkova wa Refayime.+ 10 Dhavhidha i no wutisa Nungungulu, aku: “Ndzi kandziha ndzi yalwa ni vaFilistiya ke? U ta va nyikela canjeni ga mina ke?” Jehovha aku kakwe: “Kandziha, hakuva hakunene ndzi ta va nyikela canjeni ga wena.”+ 11 Hikwalaho, Dhavhidha i no kandziha aya Bhaali-Perazimu+ a ya va hlasela seyo. Hi kota ya lezvo, Dhavhidha i te ngalo: “A Nungungulu wa lisine i hangalasile a valala va mina hi canja ga mina a ku khwatsi i mati ma vhululako musele.” Hikwalaho, va no chula a wutshamu lego ku Bhaali-Perazimu.* 12 A vaFilistiya va no siya vanungungulu vabye laho, niku a cikhati leci Dhavhidha a nga laya, va no hisiwa ndzilweni.+

13 Hi ndzhako ka cikhati, a vaFilistiya va no ya hlasela kambe le nkoveni.+ 14 Dhavhidha i no wutisa kambe ka Nungungulu, kanilezvi Nungungulu wa lisine i te ngalo kakwe: “U nga va dhumeli hi le mahlweni. Kanilezvi jika uya hi le ndzhako kabye u ya va dhumela hi le phambeni ka mibhalsameiro.+ 15 Laha u tozwa a guwa go khwatsi vanhu va fambako lomu ka mibhalsameiro, sangula ku va dhumela hakuva a Nungungulu wa lisine i tava a rangile mahlweni ka wena kasi a lovisa a butho ga vaFilistiya.”+ 16 Hikwalaho, Dhavhidha i no mahisa zvalezvi a Nungungulu wa lisine a nga mu layisile zvona.+ Va no hihirita a butho ga vaFilistiya kusukela Gibheyoni kala Gezera.+ 17 A nduma ya Dhavhidha yi no hangalaka matikweni wontlhe niku Jehovha i no maha lezvaku Dhavhidha a chaviwa hi matiko wontlhe.+