Jeremiya

41 Hi hweti ya wu 7, Ixmayeli,+ a n’wana wa Netaniya, a n’wana wa Elixama, loyi a nga hi wa laha lixakeni la wuhosi,* na a hi mun’we wa tihosana ta hombe ta hosi, i noya ka Gedhaliya, a n’wana wa Ahikamu, le Mizpa,+ na a hi ni 10 wa vavanuna. A cikhati leci va ngaga zvin’we le Mizpa, 2 Ixmayeli, a n’wana wa Netaniya, ni 10 wa vavanuna lava a nga hi navo va no suka va daya Gedhaliya, a n’wana wa Ahikamu, a n’wana wa Xafani hi cipadha. Hizvalezvo, i no daya loyi a hosi ya Bhabhuloni yi nga mu yimisile a ku fumela tiko. 3 Ixmayeli i no tlhela a daya a vaJudha vontlhe lava va nga hi na Gedhaliya le Mizpa, a daya kambe ni masochwa ya vaKaldheya lawa ma nga hi laho.

4 Hi siku ga wumbiri Gedhaliya na a delwe, na zvi nga se tiviwa hi munhu, 5 ku nota a 80 wa vavanuna hi le Xekemi,+ ni le Xilo,+ ni le Samariya.+ Va wa tsemile malevhu, niku a tinguwo tabye ti wa handzukele, na va ti tsemelele.+ Va wa hi ni minyikelo ya tindzhoho ni libani+ mandleni yabye kasi va zvi neha ndlwini ya Jehovha. 6 Hikwalaho, Ixmayeli, a n’wana wa Netaniya, i no suka le Mizpa a va khinga na a rila. Laha a nga kumana navo, i te ngalo kabye: “Ngonani ka Gedhaliya, a n’wana wa Ahikamu.” 7 Kanilezvi a cikhati va nga nghena lomu dhoropeni, Ixmayeli, a n’wana wa Netaniya, ni vavanuna vakwe va no va daya va va hoxela lomu thangini.

8 Kanilezvi a 10 wa vona va te ngalo ka Ixmayeli: “U nga hi dayi, hakuva hi na ni trigo, ni sevhadha, ni mafura, ni wulombe hi nga fihla le handle ka dhoropa.” Hikwalaho, i no va tsika a nga va dayi a ku fana ni lezvi a nga dele a vamakabye vabye. 9 Ixmayeli i no hoxa a zvirumbi zvontlhe zva vavanuna lava a nga dele lomu thangini ga hombe, legi hosi Asa a nga gi mahile hi kota ya Bhaaxa, a hosi ya Izrayeli.+ Hi gona a thangi legi Ixmayeli, a n’wana wa Netaniya, a gi tatileko hi zvirumbi zva vavanuna lava va delweko.

10 Ixmayeli i no khoma a vanhu lava van’wani va nga hi Mizpa+ a ku patsa ni vanhanyana va hosi ni vontlhe a vanhu lava va nga sele Mizpa, lava Nebhuzaradhani, a hosana ya vagadhi, a nga va nyikele mandleni ya Gedhaliya,+ a n’wana wa Ahikamu. Ixmayeli, a n’wana wa Netaniya, i no va khoma a famba navo hi tlhelo ga tiko ga vaAmoni.+

11 Laha Johanani,+ a n’wana wa Kareya, ni vontlhe a varangeli va butho, va ngazwa a kubiha kontlhe loku Ixmayeli, a n’wana wa Netaniya, a nga ku mahile, 12 va no teka vavanuna vontlhe va famba kasi va yalwa na Ixmayeli, a n’wana wa Netaniya; va no mu kuma le matini ya hombe* le Gibheyoni.

13 Vontlhe a vanhu lava va nga hi na Ixmayeli va no tsaka nguvhu a cikhati leci va nga wona Johanani, a n’wana wa Kareya, ni vontlhe a varangeli va butho lava a nga hi navo. 14 Makunu vontlhe a vanhu lava Ixmayeli a nga va khomile le Mizpa+ va no hundzuluka va tlhela na Johanani, a n’wana wa Kareya. 15 Kanilezvi Ixmayeli, a n’wana wa Netaniya, ni 8 wa vavanuna lava a nga hi navo, va no huluka ka Johanani vaya ka vaAmoni.

16 Johanani, a n’wana wa Kareya, ni vontlhe a varangeli va butho lava va nga hi zvin’we naye va no teka a vanhu lava va nga sele va le Mizpa, lava va nga va tlhatlhisa ka Ixmayeli, a n’wana wa Netaniya, andzhako ka loku a dele Gedhaliya,+ a n’wana wa Ahikamu. Va no wuya ni vavanuna, ni masochwa, ni vavasati, ni vanana, ni tihosana hi Gibheyoni. 17 Hikwalaho, va no famba va ya tshama ka wutshamu go amukela vapfhumba le Kimhame, kusuhani ni Bhetlehema,+ na va hi ni makungo ya kuya Gibhite+ 18 hi kota ya vaKaldheya. Hakuva va wa va chava hi lezvi Ixmayeli, a n’wana wa Netaniya, a nga daya Gedhaliya, a n’wana wa Ahikamu, loyi a hosi ya Bhabhuloni yi nga mu yimisile kasi a fumela tiko.+