A mbongola ya Bhalami yi wulawula

A vaIzrayeli va wa hi lomu ciwuleni hi cipimo ca 40 wa malembe. Va wa hlulile madhoropa yo tala ya ntamu. Ka cikhati leco, va wa gwimbile matenda yabye lomu mikoveni ya Mowabhi hi tlhelo ga mutsuwuka-gambo wa Congo wa Jordhani. Makunu ci wa chikela cikhati ca ku va nghena Tikweni ga Citsumbiso. Bhalake a hosi ya Mowabhi, i wa chava ku a vaIzrayeli va teka tiko gakwe. Hikwalaho, i no vitana wanuna wa ku hi Bhalami ata Mowabhi kasi a ta ruka vaIzrayeli, ku nga ku wulawula zvilo zva kubiha kasi zvi va humelela.

Kanilezvi, Jehovha i no byela Bhalami, aku: ‘U nga ruki a vaIzrayeli’. Hikwalaho, Bhalami i no ala kuya Mowabhi. Hosi Bhalake i no mu vitana hi khati ga wumbiri a tlhela a tsumbisa ku mu nyika ni cihi a nga ci lava. Ka khati legi kambe, Bhalami a nga vhumelangi. Nungungulu i no gumesa a mu byela lezvi: ‘U nga famba. Kanilezvi, famba u ya wula basi lezvi ndzi to ku byela’.

Bhalami i no khilela mbongola yakwe aya dzongeni, le Mowabhi. I wa lava kuya ruka vaIzrayeli, hambu lezvi Jehovha a nga mu byelile ku a nga va ruki. A cikhati leci a nga famba, ku no woneka a ngilozi ya Jehovha makhati manharu laha ndleleni. A mbongola ya Bhalami yi wa yi wona a ngilozi, kanilezvi Bhalami i wa nga yi woni. Ka khati go sangula, a mbongola yi no jika yi ya lomu masin’wini. Ka khati ga wumbiri, yi no ti manya laha ka muro wa maribye, Bhalami a manyiwa nenge. Hi kugumesa, a mbongola yi no barama laha cikari ka ndlela. Ka makhati wontlhe lawa ya manharu, Bhalami i waba mbongola yakwe hi nhonga.

Ka khati ga wunharu, Jehovha i no maha ku a mbongola yi wulawula. A mbongola yi no wutisa Bhalami, yiku: ‘Hikuyini u tshamako hi ku ndzi bungutela’? Bhalami aku: ‘U no ndzi maha ku khwatsi ndzi cipumbu. Loku ndzi wa hi ni cipadha, na ndzi ku dele’. A mbongola yiku: ‘U na ni malembe yo tala na u ndzi khilela. Ndza tshuka ndzi ku maha lezvi ke’?

Jehovha i no gumesa a maha lezvaku Bhalami a wona ngilozi. A ngilozi yiku: ‘Jehovha i ku byelile lezvaku u nga ruki vaIzrayeli’. Bhalami aku: ‘Ndzi phazamile. Ndza ha tlhela kaya’. Kanilezvi a ngilozi yi no mu byela lezvi: ‘U nga famba le Mowabhi. Kanilezvi, famba u ya wula basi lezvi Jehovha a to ku byela’.

Xana Bhalami i gondzile cokari? Ahihi. Loku a chikele, Bhalami i no zama ku ruka vaIzrayeli makhati manharu. Kanilezvi, ka makhati wontlhe lawo, Jehovha i no maha lezvaku a va katekisa. Hi kugumesa, a vaIzrayeli va no dhumela tiko ga Mowabhi, Bhalami a dawa. Na zvi nga vangi chukwana loku Bhalami i wa no tekela ku ingisa Jehovha?