Johani a wonisiwa zvilo zvi nga hata

A cikhati leci mupostoli Johani a nga vhalelwe paxweni le cihlaleni ca Patmosi, Jesu i no mu komba a 16 wa miwoniso kutani mifota ya zvilo zvi nga wa ta humelela cikhatini ci tako. A miwoniso leyo yi kombile lezvi a vito ga Nungungulu gi to basisiswa zvona, lezvi a Mufumo wakwe wu to tisa zvona, ni lezvi a kurandza kakwe ku to mahekisa zvona le tilweni ni laha misaveni.

Ka muwoniso wokari, Johani i wonile Jehovha na a hi citshan’wini cakwe ca wuhosi co ngangamela le tilweni, na a randzelwe hi 24 wa madhota ma bohileko tinguwo to basa ni tikorowa ta ouro. Laha citshan’wini ca wuhosi ku wa huma tihlahli to hatima ku tlhela ku zwala kudzindza. A madhota lawa ya 24 ma no korama mahlweni ka Jehovha ma mu khozela. Ka muwoniso wun’wani, Johani i no wona vanhu vo tala nguvhu va matiko wontlhe, ni mifumo yontlhe, ni tirimi tontlhe na va khozela Jehovha. Va wa risiwa hi Yivhana yi tlhela yi va yisa matini ya wutomi. A Yivhana leyo hi Jesu. Ka muwoniso mun’wani a wu wonileko hi ndzhako ka cikhati, i no wona Jesu na a sangula ku fuma kota Hosi le tilweni na a hi ni 24 wa madhota. Ka muwoniso wu nga landzela, Johani i no wona Jesu na alwa na dragawu ni madhimoni yakwe. Dragawu loye hi Sathani. Jesu i no va hoxa hi le tilweni vata misaveni.

Hi kulandzela, Johani i no wona mufota wun’wani wo saseka. Ka mufota lowo, i no wona Yivhana ni lava va 144 000 na va yimile Citsungeni ca Ziyoni. I no wona ni ngilozi kambe na yi puruma yi rendzelekela misava yi byela vanhu lezvaku va chava Nungungulu va tlhela va mu nyika wudzundzo.

Ka muwoniso wu nga landzela i no wona yimpi ya Har–Magedhoni. Ka yimpi leyo, Jesu ni butho gakwe va no hlula Sathani ni mifumo yakwe yontlhe. Ka muwoniso wo gumesa, Johani i no wona le tilweni ni laha misaveni na ku hi ni kuzwanana ko mbhelela. Sathani ni vontlhe va mu seketelako va lovisilwe. Vontlhe le tilweni ni laha misaveni a va hlakani hi vito ga Jehovha, va gi wona na gi basile va tlhela va khozela yena yece.