Lonzowota lungelo ga wena ga ku hangalasa a mahungu ya Mufumo!
1. Hi nga gonza yini ka xikombiso xa Davida?
1 Hosi Davida i vile munhu a nga kala ku tsika ziyimo zakwe zi mu mbheta ntamu. Hi xikombiso, Davida i wa lava ku mu akela yindlu Jehova. Laha a nga beletelwa, Davida i lo cica makungo yakwe zonake a longisela materiali lawa Solomoni a nga wa ta aka hi wona a tempeli. (1 Tih. 8:17-19; 1 Kron. 29:3-9) Wutshanwini ga ku tshama hi ku rila hi kota ya lezi a nga zi tsanzeka ku maha, Davida i lo veka kupima kakwe ka zilo lezi a nga zi kota ku maha. Hi nga mu pimanyisisa kuyini Davida laha hi hlotako tindlela ta ku hangalasa mahungu ya Mufumo?
2. Zini hi nga ha zi kambisisako wutomini ga hina?
2 Maha lezi u zi kotako: A vanhu vo tala va olovisile wutomi gabye lezaku va tira kota maphayona yo vunetela kutani ya xikhati xontlhe. (Mat. 6:22) Xana wenawu u nga maha zalezo? Laha u kambisisako a ziyimo za wena hi mukhongelo, u nga ha wona lezaku u “vululelwe a nyangwa ya hombe ya ntiro.” Loku zi hi tano, u nga gi tsiki a lungelo lego! — 1 Kor. 16:8, 9.
3. Malungelo muni hi nga ma lonzowotako hambu loku a ziyimo za hina zi nga hi vumeleli kuva maphayona?
3 Ahati loku a ziyimo za wena zi nga ku vumeleti a ku tira kota phayona ke? U nga vali mahlo ka malungelo manwani lawa u nga nawo. Hi xikombiso, loku ku hi lezaku u tira ni vangakholwiko, lonzowota a lungelo lego u va xumayela. Kutani loku u bhaxarili hi mababyi yo kari, lonzowota a lungelo u nga nago u xumayela lava va ku hlayisako. Alakanya a ku ku na ni lulamiselo ga lezaku lava va nga zi kotiko ku maha zotala ntirweni wa kuxumayela hi kota ya kukhosahala kutani mababyi va bika a 15 wa timeneti hi hweti. A xikhati lexi u tsalako a mubiko wa wena wa hweti, u nga rivali ku tsala a xikhati lexi u xi mbhetileko na u xumayela hi xitshuketi, mabhuku lawa u nyikeleko, ziphephana, zirambo za Xialakanyiso ni za gotsovanyano. U nga tshuka u hlamala hi lezi xi talisileko zona a xikhati lexi u xi mbhetileko na u xumayela ka malungelo lawa ma wonekisako ku khwatsi a hi ya nchumu!
4. Zini u ti yimiseleko ku maha?
4 Ni ka xihi xiyimo hi nga ka xona, ngha hi lonzowota malungelo wontlhe kasi ku hangalasa mahungu yo saseka. Loku hi maha lezo, hi tazwa litsako li tako hi ku tiva lezaku hi maha zontlhe zi nga ntanwini wa hina hi kota ya Mufumo. — Mar. 14:8; Luka 21:2-4.