Ziwutiso za vagonzi

Hikuyini a ku hlamba mandla yi nga hi mhaka ya hombe ka valala va Jesu?

A ku hlamba mandla xinwe xa zilo za talela ga cima lezi a valala va Jesu va nga zi sola ka yena ni vapizani vakwe. A Nayo wa Mosi wu wa tlhamusela lezi zi nyenyezisako munhu, zo kota ku huma nkhata kutani zilo zinwani hi lomu mirini, hlokonho, kutani ku khumba xirumbi xa munhu hambu xa xihari. A Nayo wu wa nyika zileletelo kambe xungetano hi lezi zi lavekako kasi a munhu a hlazeka. A munhu i wa basiswa hi muphahlo, ku hlamba, kutani ku nwatsekelwa. — Levi, zipimo 11-15; Mitsengo, xipimo 19.

A vagonzisi va vaJuda, va nga tiviwa kambe kota varabi, va lo tlhatekela milayo yabye. A bhuku go kari gi wula lezaku a varabi va yimisile milayo yinwani yo tala hi zo khoma xungetano hi lezi zi nyenyezisako munhu kutani lezi a nga nyenyezisisako zona vanwani. A varabi va wa yimisile milayo kambe xungetano hi tixaka ta zibya zi kotekako ku zi nyenyezisa ni lezi zi kalako zi nga koteki, zinwe ni zihena lezi a vanhu va nga fanele ku zi lanzela kasi va hlazeka.

A valala va Jesu va lo mu wutisa lezi: “Hi yini a vapizani va wena va nga fambiko hi mahanyela ya vakale, kanilezi vaga hi mandla ya chaka ke?” (Marku 7:5) A xiwutiso xa vaFarisi lavo xi wa nga yelani ni basiselelo, yo kota ku hlamba mandla loku u lava kuga. Va wa yimisile nayo waku loku a munhu a lava kuga, a mandla yakwe ma fanele ku cheletelwa mati kota xihena. A bhuku legi hi nga gi kumbuka laha hehla gi tlhela gi wula lezaku a varabi “va wa xuxa kambe xungetano hi zibya zi faneleko ku tiriswa kasi ku cheletela mati lawo, lixaka li faneleko la mati, munhu wo cheletela, niku a mati lawo ma fanele ku cheliwa kala kwihi lomu mandleni ke.”

Jesu i yi khomisile kuyini a milayo yontlhe leyo yo yimisiwa hi vanhu? I lo byela varangeli lavo va wukhongeli ga xiJuda aku: “I profetile khwatsi Isaya ha nwina, vaxengeteli, kota lezi ku tsalilweko: Lava vanhu va nzi dumisa hi milomu yabye, kanilezi a timbilu tabye ti le kule na mina. Kanilezi a ku nzi khozela kabye mahala, hakuva a tigonzo leti va ti gonzisako zileletelo za vanhu. Nwina mu tsika a nayo wa Nungungulu, mu khomisisa a mahanyela ya vanhu.”— Marku 7:6-8.