Lezi Nungungulu a ku mahelako

Lowu wunwe wa mitsalo yo tiveka nguvu, leyi yi tshahiwako nguvu ka Biblia gontlhe. Ku wuliwa lezaku a ku na ginwani vesi “gi songako khwatsi a kutirisana ka Nungungulu ni vanhu zinwe ni ndlela ya kuhanyiswa.” Hi xigelo lexo, matikweni yo kari a magezu ya mutsalo lowu, kutani ntsena ku “Johani 3:16,” za kombiswa nguvu lomu ka mitlhangano, mimova, makhurisi, ni ka zinwani.

Za koteka ku lava va kombisako mutsalo lowu va kholwa lezaku a liranzo la Nungungulu la tiyisa a kuhanyiswa kabye ka pinzukelwa. Wena ke? A liranzo la Nungungulu li wula yini ka wena? Zini zi mahilweko hi Nungungulu u zi wonako na zi hi xikombiso xa lezaku wa ku ranza?

“NUNGUNGULU I LO RANZA TIKO”

A vanhu vo tala va kholwa lezaku hi Nungungulu a nga vanga a wuako, ntumbuluko, ni vona vanhu. A zilo zi hanyako zi mahilwe khwatsi zi tlhela zi hi ni matshamela yo hlamalisa laha kaku a ku na ndlela ya ku wula ku zi no halahala zi humelela. A vanhu vo tala va bonga Nungungulu siku ni siku hi xinyikiwo xa wutomi. Va kholwa kambe lezaku va khegela ka Nungungulu ka zontlhe zi lavekako kasi ku hanya — zo kota moya, mati, zakuga ni zilo zinwani za ntumbuluko wa misava — lezaku va simama ku hanya va ti buza hi lezi va mahako.

Ngha hi bonga Nungungulu hi zontlhe lezo, hakuva hi lisine hi yena Mumahi wa hina ni Munyiki wa wutomi. (Tisimu 104:10-28; 145:15, 16; Mitiro 4:24) Hi nga wona ni ku zwisisa a liranzo la Nungungulu loku hi ehleketa hi zontlhe lezi a zi mahako kasi kuva ni wutomi. Mupostoli Paule i zi vekile hi ndlela leyi: “[Nungungulu] hi yena a va nyikako wutomi vontlhe [vanhu], ni kuhefemula, ni zilo zontlhe. Hakuva ka yena ha hanya, ha fambafamba, hi hi ni kuvakona ka hina.” — Mitiro 17:25, 28.

Hambulezo, a liranzo la Nungungulu li kombiswa hi tindlela to tala ku hunza ku hi khatalela hi tlhelo ga nyama ntsena. I hi tlakusile a tlhela a hi nyika wudzunzo hi ku hi nyika kuxuva ka moya a tlhela a hi vuna ku ku tatisa. (Mateu 5:3) Hi ndlela leyo, a vanhu va ingisako va na ni kutsumba ka kuva va wumba ngango wa Nungungulu, kota “vana” vakwe. — Va Le Roma 8:19-21.

Kota kuwula ka Johani 3:16, Nungungulu i kombisile liranzo lakwe ha hina hi ku rumela N’wana wakwe Jesu misaveni kasi ku ta hi gonzisa xungetano hi Nungungulu tlhelo Dadani wakwe ni ku hi fela. Hambulezo, a votala va vumela lezaku a va zi zwisisi ku hikuyini ku nga laveka lezaku Jesu a fela vanhu niku a kufa kakwe xikombiso xa liranzo la Nungungulu ka hina hi ndlela muni ke. A hi woneni lezi a Biblia gi tlhamuselisako zona a xigelo xa kufa ka Jesu ni lisima la kona.

I LO “NYIKELA A N’WANA WAKWE A BELEKILWEKO YECE”

A vanhu vontlhe va babya, va khosahala, ni kufa. Hambulezo, a kungo ga Jehova Nungungulu gi wa nga hi lego. A vanhu vo sangula i wa va mahele kuva va hanya kala kupinzuka paradiseni laha misaveni. Kanilezi ku wa laveka xo kari ka vona: Va wa fanele ku mu ingisa. Nungungulu i te loku va nga mu ingisi va wa tafa. (Genesisi 2:17) Kunene, a munhu wo sangula i lo kanyisa wuhosi ga Jehova, zonake a ti nehela kufa yena ni pswalo wakwe. Mupostoli Paule i tlhamusela lezi: “Khwatsi hi lezi a kuonha ku nga enghena misaveni hi kota ya munhu munwe, ni kufa ku tile hi kota ya kuonha; hizalezo a kufa ku lo thapela vanhu vontlhe, hakuva vontlhe va onhile.” — Va Le Roma 5:12.

Kanilezi, Nungungulu i “ranza kululama.” (Tisimu 37:28) Lisine ku a nga tsikangi ku tsayisa a munhu wo sangula hi xionho lexi a xi mahileko ha womu, hambulezo a nga konelangi vanhu vontlhe a kuva va xaniseka ni kuva va simama kufa kala kupinzuka hi kota ya munhu munwe a nga kala ku ingisa. Hi ku tirisa tshinya ga nayo ga “wutomi hi wutomi,” i lo ringanisa xikalo xa kululama zonake a maha lezaku zi koteka kambe a kuva a vanhu vo ingisa va kuma wutomi ga pinzukelwa. (Eksodusi 21:23) A xiwutiso hi lexi: Zi wa ta kotekisa kuyini ku a wutomi ga vanhu go mbhelela legi Adamu a gi luzileko gi tlhela gi wuya ke? Hlamulo: Zi lavile ku a wokari a maha muphahlelo hi wutomi go fana ni ga Adamu — gi nga wutomi go mbhelela ga munhu.

Zi te dlunya lezaku a ku na munhu a nga mbhelelangiko wa pswalo wa Adamu a nga zi kota ku nyikela muphahlelo lowo, kanilezi Jesu i wa zi kota. (Tisimu 49:6-9) Jesu i wa mbhelele ku fana na Adamu hakuva a nga thapelwangi hi xionho kupswalweni kakwe. Hikwalaho, hi ku nyikela wutomi gakwe, Jesu i lo tlhatlhisa vanhu wukhumbini ga xionho. Hi ku maha lezo, i lo vulula ndlela yaku a pswalo wa patswa wo sangula wa vanhu wuva ni lungelo ga ku ti buza hi wutomi go mbhelela legi Adamu na Eva va nga hi nago. (Va Le Roma 3:23, 24; 6:23) Xi kona hi faneleko ku maha kasi hi vuneka hi liranzo lelo la hombe ke?

“NI WIHI LOYI A KHOLWAKO KAKWE”

Loku hi tlhela ka Johani 3:16, hi wona magezu lawa: “Kasi ni wihi loyi a kholwako kakwe [Jesu] a nga lovi, kanilezi ave ni wutomi ga pinzukelwa.” Lezo zi komba lezaku kasi ku kuma wutomi ga pinzukelwa hi fanele ku maha xokari. Loku hi lava “wutomi ga pinzukelwa,” hi fanele ku kholwa ka Jesu hi tlhela hi mu ingisa.

U nga ha ti wutisa lezi: ‘Hikuyini zi lavako ku ingisa kambe? Kasi Jesu a nga te, “ni wihi loyi a kholwako kakwe” i ta kuma wutomi ga pinzukelwa?’ Hi zona, a kukholwa ka laveka. Kanilezi, za lisima ku alakanya lezaku lomu ka Biblia, a ku kholwa ntsena lezaku Jesu i kona a zi eneli. Hi kuwula ka Vine’s Expository Dictionary of Old and New Testament Words, a gezu gi tirisilweko hi Johani “a gi wuli ku vumela ntsena, gi wula ku tsumba.” Kasi a tsakelwa hi Nungungulu, a munhu i fanele ku maha zo hunza ku vumela ntsena lezaku Jesu hi yena Muhanyisi. I fanele ku tlhela a ti karatela ku hanya hi lezi Jesu a nga gonzisa. Loku a nga mahi lezo, ni kwihi kukholwa a nge i nako a ku vuni nchumu. A Biblia gi ngalo: A “kukholwa loku ku nga hava mitiro ku file.” (Jakobe 2:26) Hi mawulela manwani, a munhu i fanele ku kholwa ka Jesu hi ku hanya hi ndlela yi kombako ku wa kholwa.

Paule i tlhamusela mhaka leyi hi magezu lawa: “A liranzo la Kristu la hi kurumeta, kota lezi hi alakanyako ku ngalo: Munwe [Jesu] i lo fela vontlhe . . . Yena i lo fela vontlhe kasi lava va hanyako va nga ha ti hanyeli wutsumbu, kanilezi va hanyela loyi a ngafa a tlhela a vuka hi kota ya vona.” (2 Va Le Korinte 5:14, 15) A ku bonga muphahlelo wa Jesu hi mbilu yontlhe zi ta hi kuca ku cica a wutomi ga hina — hi tsika ku ti hanyela hi hanyela Jesu, loyi a nga hi fela. Lezo zi wula ku wutomini ga hina hi fanele ku rangisa lezi Jesu a nga gonzisa. Lezo zi ta khumba mahanyela ya hina, kuhlawula ka hina, ni zontlhe hi zi mahako. Wu tava wihi a nchachazelo ka lava va kholwako ka Jesu ke?

“KASI . . . A NGA LOVI, KANILEZI AVE NI WUTOMI GA PINZUKELWA”

A xipanze xo gumesa xa Johani 3:16 xi komba xitsumbiso xa Nungungulu ka lava va kholwako ka nzhiho va tlhela va hanya hi matshinya ya milayo ya Nungungulu. Nungungulu i lava lezaku a vanhu lavo vo tsumbeka ‘va nga lovi, kanilezi vava ni wutomi ga pinzukelwa.’ Hambulezo, a hi vontlhe lava va vunekako hi liranzo la Nungungulu va to kuma nchachazelo wo fana.

Ka wunwe wa mitlawa, Jesu i tsumbisile wutomi ga pinzukelwa le tilweni. I lo byela a vapizani vakwe lezaku i waya a ya va longisela wutshamu kasi va fuma zinwe naye kungangameleni kakwe. (Johani 14:2, 3; Va Le Filipi 3:20, 21) Lava va vuxelwako ku ya hanya le tilweni “va tava vapristi va Nungungulu ni va Kristu, va ta fuma naye 1000 wa malembe.” — Kuvululelwa 20:6.

A lungelo lego gi kumiwa hi ntsengo wutsongwani ntsena wa valanzeli va Jesu. Kunene, Jesu i te: “Nwina ntlhambi wu tsongwani, mu nga chavi; hakuva kuranza ka Raru wa nwina a ku mu nyika Mufumo.” (Luka 12:32) Wu wa tava wa vanhu vangani a ‘ntlhambi lowo wa wutsongwani’ ke? Kuvululelwa 14:1, 4 i ngalo: “Nzi lo cuwuka nzi wona Yivana [Jesu Kristu a vuxilweko hi ka vafileko] na yi yimile xitsungeni xa Zioni [le tilweni], na yi hi ni 144.000 lava va tsalilweko a vito ga yona ni vito ga Dadani wa yona laha zimombyeni zabye. . . . Va xabyilwe vanhwini a kuva mbhanzo wo ranga ka Nungungulu ni ka Yivana.” Loku u va ecanyisa ni vanhu va tibiliyoni ta tsanza-vahlayi lava va hanyileko misaveni, a 144.000 wa vanhu i “ntlhambi wu tsongwani” ntsena. A vanhu lavo va tlhamuselwa kota tihosi, makunu va ta fuma vamani?

Jesu i wulawulile hi ntlawa wa wumbiri wa vanhu vo tsumbeka va to kuma makatekwa ya Mufumo wa le tilweni. Hi laha hi zi wonako ka Johani 10:16, Jesu i te: “Nzi na ni tiyivu tinwani, leti ti nga hiko ta lowu ntlhambi; na tona kambe nzi fanele ku ti neha, ti ta ingisa a gezu ga mina. Zonake ku tava ni ntlhambi munwe ni murisi munwe.” A “tiyivu” leto ti rinzela ku kuma wutomi ga pinzukelwa laha misaveni — ku nga kutsumba loku Adamu na Eva va nga hi nako. Hi zi tivisa kuyini lezaku a nchachazelo wabye wu tava laha misaveni?

A Biblia gi wulawula makhati yo tala hi wutomi ga paradise misaveni. Kasi u zi wona ha wece, u nga ha vulula Biblia ga wena u wona mitsalo leyi: Tisimu 37:9-11; 46:8, 9; 72:7, 8, 16; Isaya 35:5, 6; 65:21-23; Mateu 5:5; Johani 5:28, 29; Kuvululelwa 21:4. A mavesi lawa ma komba kumbhela ka tiyimpi, tindlala, mababyi, ni kufa. Ma wulawula hi xikhati lexi a vanhu va va nene va to kuma litsako la ku ti akela tiyindlu, va ti rimela masimu, va tlhela va ti wundlela vana vabye kuruleni.a Xana a nchachazelo lowo wa ku tsakisa? Hi na ni xigelo xo zwala xa kukholwa lezaku a zitsumbiso lezo zi ta tatiseka lokuloku.

NUNGUNGULU I MAHILE ZOTALA

Loku u ehleketa hi zontlhe lezi Nungungulu a ku mahelako wena ni vanhu vontlhe, zi te dlunya lezaku i sina a mahile zotala. Hi na ni wutomi, wutlhari, lihanyo la li nenana, ni zontlhe zi lavekako kasi ku hanya. Tlhatakumbiri, a xinyikiwo xa Nungungulu xa nzhiho ha Jesu, loyi a nga hi fela, xi nga ha hi nehela makatekwa yo tala nguvu kota lezi hi zi wonako ka Johani 3:16.

Handle ko kanakana, a wutomi ga pinzukelwa ka wutshamu go rula ni go tsakisa, laha ku nga hava mababyi, tiyimpi, tindlala kutani kufa, gi wa ta hi vululela ndlela yo kuma litsako ni makatekwa yo tala nguvu. A ku kuma makatekwa lawo kutani ku nga ma kumi zi khegela ka wena wutsumbu. A xiwutiso xi salako hi lexi: Zini lezi wena u mu mahelako Nungungulu?