Christopher, Hannah, na Gina a hi vona voce va ti zwisako lezo. A vanhu vo tala misaveni yontlhe va kholwa hi kumbhelela lezaku Nungungulu wa va wona kota vanghana vakwe. Wena ke? Wa tizwa na u hi munghana wa Nungungulu? Kutani, wa tsakela kuva munghana wa hombe wa Nungungulu? Kuzilava wa ti wutisa a ku: ‘Hakunene za koteka ku a munhu wa nyalidede ava ni wunghana ni Nungungulu wa Ntamu-wontlhe ke? Niku loku zi koteka, hi ndlela muni?’

ZA KOTEKA KUVA MUNGHANA WA NUNGUNGULU

Hi kuya hi Biblia, za koteka a ku zwanana ni kuva ni wunghana ga hombe na Nungungulu. A Biblia gi wula lezaku Nungungulu i vitanile Abrahama, wa muHeberu a ku: “Munghana wa mina.” (Isaya 41:8, Tradução do Novo Mundo) Wona kambe a xirambo xo tsakisa xi tsalilweko ka Jakobe 4:8. Xi ngalo: “Tshinelani ka Nungungulu, na yena i ta tshinela ka nwina.” Hikwalaho, zi te dlunya lezaku za koteka kuva ni kuzwanana kutani wunghana ga hombe na Nungungulu. Kanilezi, kota lezi Nungungulu a nga wonekiko, u nga ‘tshinelisa’ kuyini kakwe u tlhela u ti buza hi kuva ni kuzwanana naye ke?

Kasi ku hlamula xiwutiso lexi, ehleketa hi lezi zi mahekako loku a vanhu vambiri va maha wunghana. Hi tolovelo gi sangula hi kuva va tivana mavito yabye. Hi kulanzela, laha va bhulako hi kukhanzakanya, va tlhela va phofulelana kutizwa kabye, a wunghana gabye giya gi kula. Niku a xikhati lexi va ti karatelako ku mahelana zilo, a wunghana gabye go tiya. Hi nga wula lezaku a wunghana na Nungungulu gonawu gi tshamisile zalezo. A hi woneni ku hi nga zi mahisa kuyini.

U na ni munghana wa hombe loyi u nga gi tiviko a vito gakwe? Kuzilava, ahihi. A wasati wo kari wa le Bulgária a vitwako Irina, ite: “A zi koteki a kuva munghana wa Nungungulu na u nga gi tivi a vito gakwe.” Kota lezi zi wulilweko ka nzima yi hunzileko, lexi xi tsakisako hi lezaku Nungungulu i lava ku uva munghana wakwe. Hi lisine, Nungungulu i ti tivekisa ka wena hi ku tirisa a Biblia hi magezu lawa: “Nzi Jehova, hi gona vito ga mina lego.” — Isaya 42:8.

Xana Jehova wa khatala hi ku wona lezaku ha gi tiva ni ku gi tirisa a vito gakwe kutani a nga na mhaka nazo ke? Ehleketa hi lezi: A vito ga Nungungulu, gi tsalilweko hi mune wa maletela ya xiHeberu, ma vitwako Tetragrama, gi kumeka lomu ka Mitsalo yo sangula ya xiHeberu hi xipimo xa 7.000 wa makhati. Legi hi gona vito gi kumbukiwako nguvu lomu ka Biblia a ku hunza manwani. Handle ko kanakana, lexo xikombiso xa lezaku Jehova i lava ku hi tiva a vito gakwe hi tlhela hi gi tirisa.a

Hambulezo, a vokari va nga ha alakanya lezaku kota lezi Nungungulu a basileko ni kuva a hi wa ntamuwontlhe, zi wa tava ku nga mu kombisi xichawo a ku tirisa vito gakwe. A lisine hi lezaku, zi wa tava zi bihile a ku tirisa vito ga Nungungulu hi ndlela ya hava, a ku fana ni lezi u nga wa ta kala u nga tirisi a vito ga munghana wa wena wa hombe hi ndlela ya hava. Hambulezo, a kuranza ka Jehova hi lezaku vontlhe lava va mu ranzako va dzunza vito gakwe va tlhela va gi tivekisa ka vanwani. (Tisimu 69:30, 31; 96:2, 8) Alakanya ku Jesu i gonzisile vapizani vakwe lezaku va khongela vaku: “Dadani wa hina wa le tilweni, a vito ga wena a gi basiswe.” Hinawu hi nga maha xokari kasi a vito ga Nungungulu gi basiswa hi kuva hi gi tivekisa ka vanwani. Lezo zi hi tshineta nguvu kakwe. — Mateu 6:9, Tradução do Novo Mundo.

A Biblia gi komba lezaku Nungungulu wa chela nguvu kota hi “lava va alakanyako [kutani kuzilava, va “nyikako lisima”] vito gakwe.” (Malaki 3:16) Xungetano hi munwe ni munwani wa vona, Jehova i tsumbisa lezi: ‘Nzi ta mu tlhatlhisa, nzi ta mu hlayisa hakuva i tivile a vito ga mina. I ta rila ka mina, nzi ta mu hlamula, nzi tava naye makhombyeni.’ (Tisimu 91:14, 15) Loku hi lava ku ti buza hi wunghana na Jehova, za lisima a kuva hi tiva vito gakwe hi tlhela hi gi tirisa.

Ku ngava ku ngha na va wonana, kutani hi telefone, hi e-mail, hi Internet, kutani hi papilo, a vanghana va hombe va bhula zinwe hi kukhanzakanya hi laha zi kotekako hi kona. Hikwalaho, kasi hiva vanghana va Nungungulu, hi fanele ku bhula naye hi kukhanzakanya. Hambulezo, hi nga zi mahisa kuyini?

Hi nga wulawula na Jehova hi mukhongelo. Kanilezi, a ku maha mukhongelo ka Nungungulu, a zi fani ni mabhulo lawa hi nga vako nawo ni munghana, lawa yaku a zi lavi ku ranga hi ku alakanyela nguvu hi wona. Hi fanele ku tiva lezaku a xikhati hi mahako mukhongelo, hi wulawula ni Muvangi wa hina, loyi a Hunzeleleko Kutlakuka misaveni yontlhe. Lezo zi fanele ku hi kuca ku khongela hi ku chela nguvu kota na hi kombisa xichawo xa hombe. Hambulezo, kasi a mikhongelo ya hina yi amukeleka, ku na ni zokari hi faneleko ku maha. Wona zinharu za zona.

Xo sangula, a mikhongelo ya hina yi fanele ku kongomisiwa ka Jehova Nungungulu ntsena — na ku nga hi ka Jesu, ka “wobasa,” kutani ka xifananiso xo kari. (Eksodusi 20:4, 5) A Biblia gi wula kubaseni giku: “A timhakeni tontlhe tivisani a mixuvo ya nwina ka Nungungulu hi kukombela ni kukhongotela, na mu kari mu bonga.” (Va Le Filipi 4:6) Xa wumbiri, hi fanele ku yisa mikhongelo ya hina ka Jehova hi vito ga N’wana wakwe, Jesu Kristu. Jesu wutsumbu ite: “A nga kona a tako ka Dadani, loku a ngati ha mina.” (Johani 14:6) Xa wunharu, a mikhongelo ya hina yi fanele ku yelana ni kuranza ka Nungungulu. A Biblia gi ngalo: “I ta hizwa loku hi kombela nchumu lowu wu yelanako ni kuranza kakwe.”a — 1 Johani 5:14.

Kunene, a wunghana a gi nge simami loku ku hi lezaku munwe a ti karatelako ku wulawula ni loyi munwani. Khwatsi hi lezi a vanghana vambiri va tsakako hi ku bhula zinwe, hinawu hi fanele ku tsika Nungungulu a wulawula na hina hi tlhela hi mu ingisela a xikhati lexi a wulawulako. Wa zi tiva ku Nungungulu i wulawulisa kuyini na hina?

Inyamutlha, Jehova Nungungulu i “wulawula” na hina hi ku tirisa Mhaka yakwe yi tsalilweko, a Biblia. (2 Timote 3:16, 17) Hikuyini hi wulako lezo? Kasi ku kombisa: Hi nga alakanyela ku ngha u amukele papilo gi tako hi ka munghana wa wena wa hombe. A xikhati u lerako a papilo lego za mahisa ku khwatsi hi loku u muzwa na a ku byela zokari, hambu lezi u nga mu woniko. Hambulezo, a magezu lawo a wu ma zwangi hi tindleve, ma no tsaliwa. Hi ku fanana, a xikhati lexi u lerako a Biblia, wo tsika Jehova a wulawula na wena. Hi xigelo lexo, Gina loyi a kumbukilweko ka nzima yo sangula ya revista legi, a nge ngalo: “Nzi alakanya lezaku loku nzi lava ku Nungungulu a nzi wona kota munghana [wakwe], nzi fanele ku kambisisa a ‘papilo’ gakwe gi tako ka hina — a Biblia.” I engeta aku: “A ku lera Biblia siku ni siku zi nzi tshineta nguvu ka Nungungulu.” Wa tsika Nungungulu a wulawula na wena siku ni siku hi kuva u lera a Mhaka yakwe, a Biblia, siku ni siku ke? Loku u maha lezo, zi ta ku vuna a kuva u tizwa na u hi munghana wa hombe wa Nungungulu.

“Ni xihi u xi lavako, nzi byele nzi ta maha.” Kuzilava u wa ta kanakana ku wula magezu yo fana ni lawa ka munhu u nga mu tiviko kutani u tivako ku mu wona ntsena. Hambulezo, kuzilava zi wa nga ta ku karatela a ku mu byela magezu yo khwatsi hi lawa a munghana wa wena u mu ranzako nguvu. Hi tolovelo, a vanghana va hombe va ranza ku mahelana lezi va kombelanako.

A Biblia gi komba lezaku Jehova i tolovela ku mahela a vakhozeli vakwe lezi a zi tivako ku zi ta va tsakisa. Hi xikombiso, Hosi Davida, loyi a nga ti buza hi wunghana ga hombe na Nungungulu, i te ngalo: “Jehova, Nungungulu wa mina, yi tele a mitiro yi hlamalisako leyi u yi mahileko, ni makungo ya wena ha hina. . . . A yi na ku hlayiwa”! (Tisimu 40:5) A xa hombe ka zontlhe hi lezaku Jehova i tlhela a maha za zi nene hambu ni ka lava va kalako va nga se mu tiva, a va ‘nyika zakuga, a tatisa timbilu tabye hi kutsaka.’ — Mitiro 14:17.

Kota lezi Jehova a va mahelako za zi nene vanwani hi matsenya, za zwisiseka a ku rinzela lezaku lava va lavako ku maha vanghana va Nungungulu vonawu va maha zilo zi to maha “a mbilu” yakwe “yi tsaka.” (Mavingu 27:11) Kanilezi zilo muni zo kongoma u nga mahako kasi ku tsakisa Nungungulu? A Biblia gi hlamula giku: “Mu nga rivali a ku maha kusasa ni kuha zisiwana; hakuva Nungungulu wa tsaka khwatsi hi miphahlelo ya kunghaho.” (Maheberu 13:16) Xana lezo zi lava ku wula lezaku a ku maha zo saseka ni ku nyika vanwani a zilo hi zona zontlhe zi lavekako kasi ku tsakisa Jehova?

A Biblia gi ngalo: “Ahandle ka kukholwa a zi koteki ku mu tsakisa” Nungungulu. (Maheberu 11:6) Mhakeni ya kukholwa, za lisima nguvu a ku wona lezaku ntsena anzhako ka kuva Abrahama a kombisile ‘kukholwa ka Nungungulu,’ hi kona a nga “vitanwa lezaku i xaka ga Nungungulu” kutani munghana. (Jakobe 2:23) Jesu Kristu yenawu i kombile lezaku za lisima a kuva hi ‘kholwa ka Nungungulu’ loku hi lava ku katekiswa hi Nungungulu. (Johani 14:1) Makunu u nga ku kumisa kuyini a kukholwa loku Nungungulu a rinzelako ku ku wona ka lava a mahako wunghana navo? U nga sangula hi kuva u gonza a Biblia hi kukhanzakanya. Hi ku maha lezo, u ta “tiva a kuranza kakwe.” Lezo zi ta ku vuna ku tiva ndlela ya ku mu “xalalisa ka zontlhe.” Laha u yako mahlweni hi ku kuma wutivi ga lisine ga Jehova u tlhela u maha lezi u zi gonzako xungetano hi zileletelo zakwe zo lulama, a kukholwa ka wena ku ta kula niku Jehova i tava munghana wa wena wa hombe nguvu. — Va Le Kolosi 1:9, 10.

Zini u nga mahako kasi uva munghana wa Nungungulu? Hi wulawulile hi zilo lezi u nga mahako kasi ku sangula ku wumba wunghana ga hombe naye. Zi nga lezi:

1. Ku tiva ni ku tirisa a vito ga Nungungulu, Jehova.

2. Ku wulawula naye hi kukhanzakanya hi mukhongelo ni ku gonza a Biblia.

3. Ku ti karatela ku maha lezi zi tsakisako Jehova.

Hi kuya hi lezi zi tlhamuselweko laha, u nga wula lezaku wa maha lezi zi lavekako kasi uva munghana wa Nungungulu ke? Ku kona laha u wonako lezaku u fanele ku chukwatisa zo kari? Lisine lezaku zi lava ku ti karata; hambulezo, wona mabhinzu ya kona:

Jennifer wa le Estados Unidos i ngalo: “A kutikarata kontlhe u nga ku mahako kasi uva munghana wa hombe wa Nungungulu ku na ni mabhinzu ya ma nene. A kuzwanana loku ku neha makatekwa yo tala. Ma nga lawa: Ku mu tsumba nguvu Nungungulu, ni ku gi tiva khwatsi a wumunhu gakwe. A xa hombe ka zontlhe, ku mu ranza nguvu. A ku na mahanyela manwani ya ma nene ku hunza lawa!”

Loku u lava kuva munghana wa hombe wa Nungungulu, a Timboni ta Jehova ti ta tsakela ku ku vuna. Ti nga maha malulamiselo ya ku gonza Biblia na wena mahala. Wa rambiwa kambe hi matsenya lezaku u ya wona mitlhangano ya tona lomu Salawini ya Mufumo ya lomu xipanzeni xa nwina, lomu u to ya ti buza hi wunghana ni lava va nyikako nguvu lisima a kuzwanana kabye na Nungungulu.a Laha u mahako lezo, wenawu u ta ti zwisa ku khwatsi hi mutsali wa tisimu loyi a ngaku: “Zi nzi sasekele a ku tshama kusuhi ni Nungungulu.” — Tisimu 73:28.