Zi wa zwisiseka a ku Davida a rinzela lezaku Nungungulu a khatala hi yena? Xana Nungungulu wa khatala hi wena? A vanhu vo tala za va karatela a ku kholwa lezaku a Nungungulu wa ntamu-wontlhe wa khatala hi vona. Hikuyini?

A xinwe xa zigelo hi lezaku Nungungulu i tlakukile nguvu a ku hunza vanhu. Hi kota ya xiyimeko xakwe xi hunzeleleko kutlakuka, a matiko wontlhe “me khwatsi i dona ga mati gi donelako fukweni, ma ku khwatsi i tshuri wa lomu xikalwini.” (Isaya 40:15) A mutsali wo kari wa masikwini ya hina a nga kholwiko lezaku Nungungulu i kona, i zile a hunzeleta laha ka kuza a wula lezaku “a maalakanyo yaku ku na ni Nungungulu loyi a khatalako hi munhu ni lezi a zi mahako a hi lisine ne ni kutsongwani.”

Hi tlhelo ginwani, a vanhu vo kari va alakanya lezaku a mahanyela yabye ma maha lezaku va nga fanelwi hi ku khatalelwa hi Nungungulu. Hi xikombiso, a wanuna wa kwalomo ka 50 wa malembe a vitwako Jim i ngalo: “Nzi wa khongela hi kukhanzakanya na nzi kombela lezaku nziva ni kurula ni kutikhoma, kanilezi a zanga ya mina xontlhe xikhati yi wa gumesa hi ku tlhela yi wuya. Hi kugumesa, nzi lo alakanya lezaku nzi wa bihile kala laha xinyeni ni lezaku Nungungulu i wa nga ta tshuka a nzi vuna.”

Xana Nungungulu i le kule ni vanhu laha ka kuza a nga zi koti ku hi wona? Xana i ti zwisa kuyini hakunene hi zivangwa zakwe zi nga mbhelelangiko? Ahandle ka ku yena nwinyi Nungungulu a hi vululela a wutivi lego, a ku na munhu a nga vako muwulawuli wo mbhelela wa Nungungulu a tlhela a hi hlamula a ziwutiso lezo. Hambulezo, a mhaka yi pimiselweko vanhu hi Nungungulu — ku nga Biblia — yi hi tiyisekisa lezaku Nungungulu a nga le kule niku wa khatala hi munwe ni munwani wa hina. A Biblia gi wula lezi: ‘A nga kule ka munwe ni munwani wa hina.’ (Mitiro 17:27) Ka mune wa tinzima ti lanzelako, hi ta kambisisa lezi Nungungulu a hi byelako xungetano hi lezi a khatalisako zona hi vanhu ni lezi a ku kombisisako zona a kukhatala loko ka vanhu vo fana na wena.

LE’XI MAHAKO VOKARI VA KANAKANA: A kambisiso wu mahilweko zezanyana wu komba lezaku, a galaxia ga hina goce za koteka ku ngha gi hi ni 100 wa tibiliyoni ta maplaneta hi wutsongwani ga kona. Loku va alakanyela hi kukula ka wuako, a vanhu vo tala va ti wutisa lezi: ‘Xana a Muvangi wa ntamu wontlhe i wa taza a cuwuka lezi a vanhu va nyalidede vo kota hina va mahako laha ka xirenzelekwani xa xitsongwani hikuyini?’

LEZI A MHAKA YA NUNGUNGULU YI ZI GONZISAKO: Nungungulu a nga hi nyikangi Biblia a gumesa a nga ha khatali hi hina. Wutshanwini ga lezo, Jehova wa hi tiyisa aku: “Nzi ta ku luleka, a mahlo ya mina na ma ku langutile.” — Tisimu 32:8.

Ehleketa hi Hagari, a wasati wa muGipite, a hanyileko kwalomo ka va 1900 Mahlweni ka Nguva ya Hina. Hagari i wa nga hi na xichawo ka muzinza wakwe, Sarai, hikwalaho Sarai i lo mu wisa tingana, zonake Hagari a tsutsuma aya xiwuleni. Lezi makunu Hagari a nga onhile, xana Nungungulu i tsikile ku mu khatalela? A Biblia gi ngalo: “A ngelosi ya Jehova yi lo mu kuma.” Yi lo tiyisa Hagari yiku: “Jehova i zwile a kuxaniseka ka wena.” Zonake Hagari aku ka Jehova: “Nungungulu loyi a wonako.” — Genesisi 16:4-13.

A “Nungungulu loyi a wonako” wa ku cuwuka na wenawu. Kasi ku kombisa: A mamani wa liranzo i khatalela nguvunguvu a vana vakwe va va tsongwani, hakuva loku a nwanana a hi mutsongwani nguvu, hi kona a lavako ku khatalelwa nguvu hi vapswali vakwe. Hi kufanana, Nungungulu i hi cuwuka nguvunguvu kasi a hi vikela loku hi ti koramisa ni loku hi nga hi na muvikeli. Jehova i wula lezi: “Nzi tshama wutshanwini gi tlakukileko, ga kubasa, nzi tshama kambe zinwe ni loyi a ti solisako, a nga ni moya wa ku ti koramisa; kasi ku vuxa a mimoya ya lava va ti koramisako, nzi vuxa timbilu ta lava va ti solisako.” — Isaya 57:15.

Hambulezo, u nga ha ti wutisa lezi: ‘Xana Nungungulu i nzi cuwuka hi ndlela muni? O cuwuka a tshamela ga mina, kutani i cuwuka a mbilu ya mina zonake a nzi zwisisa lezi nzi nga zona?’

LE’XI MAHAKO VOKARI VA KANAKANA: A vanhu vo tala va alakanya lezaku Nungungulu i wona vanhu ntsena kota vaonhi — va nga hlazekangiko ni vo kala va nga ringanelwi hi ku khatalelwa hi yena. Kendra, loyi a nga hi ni mababyi ya kukarateka nguvu, i lo ti wona na a hi muonhi wa hombe hakuva i wa nga zi koti a ku lanzela zileletelo za Nungungulu hi kumbhelela. Hi kota ya lezo, i te ngalo: “Nzi lo nyima ku maha mukhongelo.”

LEZI A MHAKA YA NUNGUNGULU YI ZI GONZISAKO: Nungungulu a nga cuwuki a zihoxo za wena, niku wa ku zwisisa khwatsi lezi u nga zona. A Biblia gi wula lezi: “Yena wa tiva lezi hi nga wumbiswa zona, wa alakanya lezaku hina hi ntshuri.” Ahandle ka lezo, a nga tirisani na hina “maringano ni zigoho za hina,” kanilezi i hi tsetselela hi matsenya loku hi ti sola. — Tisimu 103:10, 14.

Ehleketa hi Davida a hosi ya muIsraeli yi kumbukilweko ka nzima yo sangula ya revista legi. Na a maha mukhongelo ka Nungungulu, i te ngalo: “A mahlo ya wena ma nzi wonile na nza ha wumbiwa, . . . Nungungulu, nzi hlole, u tiva mbilu ya mina.” (Tisimu 139:16, 23) Kunene, Davida i wa kholwa hi kumbhelela lezaku hambu lezi a nga mahile zionho — za hombe ka zikhati zo kari — ​Jehova i wa ta zi wona lezaku wa ti sola hi mbilu yontlhe.

Jehova wa ku tiva khwatsi a ku hunza vanhu vontlhe. A Biblia gi ngalo: “A vanhu va cuwuka a nghohe, kasike Jehova i cuwuka mbilu.” (1 Samueli 16:7) Loku u maha nchumu wo kari, Nungungulu wa zi tiva a ku hikuyini u wu mahileko hi ndlela leyo. Wa zi tiva kambe lezi a mawundlelwa ya wena, wutshamu legi u hanyako ka gona, ni lezi u zi tekeleleko ka vapswali va wena, zi wumbisileko zona a wumunhu ga wena. Hambu lezi u mahako zihoxo, Nungungulu wa zi wona lezi u ti karatelako a kuva zona.

Hambulezo, loku Nungungulu a ku zwisisile lezi ‘wena hakunene u nga zona’ i ku chavelelisa kuyini?

LE’XI MAHAKO VOKARI VA KANAKANA: Hambu loku va lava nguvu a ku chavelelwa, a vanhu vo kari va alakanya lezaku makangwa a ku kombela Nungungulu lezaku a va vuna loku va lwisana ni zikarato. A wasati wo kari a vitwako Raquel, i ngalo: “Loku nzi wona a zikarato za hombe nguvu lezi a vanhu vo tala laha misaveni va lwisanako nazo, lezi za mina zi wonekisa ku khwatsi a hi za nchumu laha ka kuza nzi gingima ku kombela xivuno ka Nungungulu.”

LEZI A MHAKA YA NUNGUNGULU YI ZI GONZISAKO: Nungungulu i sina a mahile nchumu wa hombe nguvu kasi ku vuna ni ku chavelela vanhu. Hontlheni laha misaveni inyamutlha hi na ni xionho — lexi xi mahako lezaku hi nga zi koti a ku lanzela zileletelo za Nungungulu hi kumbhelela. Hambulezo, Nungungulu i ‘hi ranzile, a rumela N’wana wakwe [Jesu Kristu] a kuva nzhiho wa zionho za hina.’ (1 Johani 4:10) Hi kutirisa muphahlo wa kufa ka Jesu, Nungungulu i maha lezaku zi koteka a kuva hi tsetselelwa zionho, kuva ni livalo li basileko, ni ku rinzela ku kuma wutomi ga pinzukelwa misaveni yiswa yo rula.a Kanilezi, xana a muphahlo lowu wu mahelwa a vanhu vontlhe ntsena kota ntlawa, kutani wu komba lezaku Nungungulu wa khatala hi wena wutsumbu?

Ehleketa hi mupostoli Paule. I lo khumbiwa nguvu hi muphahlo wa Jesu laha ka kuza a tsala lezi: “Nzi hanya hi kukholwa ka N’wana wa Nungungulu, loyi a nga nzi ranza, a ti nyikela hi kota ya mina.” (Va Le Galatia 2:20) Lisine lezaku Jesu i file Paule na a nga se maha muKristu. Hambulezo, Paule i lo wona a muphahlo wa Jesu kota xinyikiwo xa Nungungulu wutsumbu kakwe.

A muphahlo wa kufa ka Jesu xinyikiwo xa Nungungulu wutsumbu ka wenawu. A xinyikiwo lexi xi komba lezaku wena u wa lisima nguvu ka Nungungulu. Xi nga ku nyika “a kutangaliswa ka pinzukelwa, ni kutsumba ko saseka,” hi ndlela leyo, xi ku “tiyisa mitirweni yontlhe yo saseka ni kuwulawula ku lulamileko.” — 2 Va Le Tesalonika 2:16, 17.

Hambulezo, Jesu i nyikele a wutomi gakwe kota muphahlo kwalomo ka 2.000 wa malembe ma hunzileko. Makunu, xini xi kombako lezaku Nungungulu wa ku ramba lezaku u tshinela kakwe inyamutlha?

LE’XI MAHAKO VOKARI VA KANAKANA: A votala va kholwako ka Nungungulu va tizwa na va hi kule naye. Christina, wasati wa le Irlanda a ngaya chechini viki ni viki, i wula lezi: “Ka xikhati lexo nzi wa mu wona kota Nungungulu loyi a vangileko zilo zontlhe ntsena. Kanilezi, nzi wa nga mu tivi. Ne khati ginwe a nzi zangi nzi tizwa na nzi hi kusuhani naye.”

LEZI A MHAKA YA NUNGUNGULU YI ZI GONZISAKO: Loku hi tizwa na hi nga hi na muvuni, Jehova a nga tshuki a tsika ku hi vuna. Jesu i fananisile a kukhatala ka Nungungulu hi ndlela leyi: “Loku munhu a hi ni zana ga tiyivu, zonake ku penga yinwe ya tona, xana a nga siyi leti ta 99 le zitsungeni, a famba a ya lava leyi yi pengileko ke?” I wa lava ku hi gonzisa lezi: “Hizalezo a hi kuranza ka Raru wa nwina loyi a nga le tilweni, lezaku ku lahleka ni munwe wa lava va tsongwanyani.” — Mateu 18:12-14.

Vontlhe la’va “va tsongwanyani ” va lisima ka Nungungulu. Xana Nungungulu i fambisa kuyini a “lava leyi yi pengileko ke?” Maringano ni mutsalo lowu wu tshahilweko laha hehlana, Jehova i koka vanhu vata kakwe.

Wona lezi Nungungulu a nga ranga hi yena a maha kasi ku koka vanhu va timbilu ti nene. Ka zana ga malembe go sangula Nguveni ya Hina, Nungungulu i rumele Filipu, a mupizani wa muKristu, lezaku a ya tlhangana ni nduna ya Etiopia kasi a bhulisana nayo hi tlhamuselo wa xiprofeto xa Biblia lexi a nduna leyo yi nga kari yi lera. (Mitiro 8:26-39) Hi nzhako ka xikhati, Nungungulu i lo byela mupostoli Pedro lezaku a enzela muti wa nduna ya muRoma yi vitwako Korneliu, leyi yi nga kari yi maha mukhongelo yi tlhela yi ti karatela ku khozela Nungungulu. (Mitiro 10:1-48) Nungungulu i tlhelile a kongomisa mupostoli Paule ni vanghana vakwe lezaku vaya ka congo wo kari le handle ka doropeni ga Filipi. Loku va chikele, va lo tlhangana ni wasati a “chavako Nungungulu” a vitwako Lidia, zonake Jehova a “mu vulula mbilu lezaku a ingisa lezi zi nga kanelwa.” — Mitiro 16:9-15.

Ka makhati wontlhe, Jehova i mahile malulamiselo ya lezaku vontlhe lava va nga kari va mu hlota vava ni lungelo ga ku mu tiva. Hi vamani lava inyamutlha va enzelako vanhu mitini yabye ni ka matshamu ya laha kubaseni lezaku va va xumayela mahungu ya Biblia xungetano hi Nungungulu? A vanhu vo tala va wa taku, “Timboni ta Jehova.” Ti wutise lezi: ‘Ku ngava lezaku Nungungulu o va tirisa kasi a nzi ramba lezaku nzi tshinela kakwe?’ Hi ku kuca lezaku u kombela Jehova hi mukhongelo kasi a ku vuna a kuva wenawu u maha xokari ka mizamo yakwe ya kuva u tshinela kakwe.a