Nzi lo kuma nchumu wa lisima ku hunza kuva ni ndhuma

Ka lembe gi nga lanzela, nzi lo sangula ku maha mafilmi, a kutala ka zikhati nzi wa huma kota wa lisima ku hunza vontlhe. A vahaxi va mahungu va wa lava matimu ya mina, a vasusi va mifota va wa lava mifota ya mina, niku a vanhu va wa nzi ramba ka siku go sangula va nga kombisa mafilmi yabye, va wa nzi ramba kambe loku ku khanguliwa yindlu kutani xitolo, ni kuga zinwe na mina. Xontlhe xikhati nzi wa woniwa kota wa lisima.

Hi kutsongwani-tsongwani, nzi lo pola lezaku zontlhe lezo zi wa nga hi za lisima a ku fana ni lezi nzi nga zi alakanyisa zona. Lomu ka mafilmi lawo nzi wa tolovela ku maha zilo zo koka nguvu kupima, niku lezo zi wa hi ni mhango. A vahlakani va mafilmi le Hong Kong a va mahi zilo zo koka nguvu kupima a ku fana ni lezi va mahako a vahlakani va le Hollywood, hikwalaho, nzi lo ti mahela za mina, zo kota ku tlula mova hi mota. Nzi wa patseka ka mafilmi yo tala ma nga hlazekangiko ni ya tihanyi. Niku a yokari ma wa kombisa wudimoni.

Hi 1995, nzi lo chada ni mumahi wa mafilmi. Hambu lezi zi nga wonekisa ku khwatsi nzi wa hi ni zontlhe zi nga ringana ku nzi nehela litsako — ndhuma, lihanyo li nene, ni nuna wa liranzo — nzi wa tshama nzi karatekile niku nzi wa nga hi na litsako. Hikwalaho, nzi lo nyima ku maha mafilmi.

KUKHOLWA LOKU NZI NGA HI NAKO NA NZA HA HI NWANANA

Nzi lo sangula ku alakanyela a kukholwa loku nzi nga hi nako na nza ha hi nwanana. Xikhatini lexo, a Mulongiso wunwe ni wunwani, mina ni makabye wa mina wa nhanyana hi wa enzela a ngango wo kari wa Timboni ta Jehova. A papai wo kari waku hi Joe McGrath, i wa gonza a Biblia na hina ni vanhanyana vakwe va vanharu. A ngango wabye, wu wa hi wu nene ni wa liranzo, niku “tio Joe” i wa khoma a sati ni vana vakwe hi xichawo. Zi wa nzi tsakisa kambe a ku famba navo mitlhanganweni yabye ya wuKristu. Ka zikhati zo kari hi waya ka mitlhangano ya hombe. Lezo zi wa hi zikhati zo tsakisa nguvu. Nzi wa tizwa khwatsi loku nzi hi zinwe ni Timboni.

Kanilezi, nzi lo humelelwa hi zilo zo biha nguvu laha kaya. A mahanyela ya papai ma lo mu vangela hlomulo wa hombe mamani, niku lezo zi lo mu vangela kukarateka ka hombe. Laha nzi nga hi ni khume ga malembe, mamani i lo nyima ku hlengela ni Timboni ta Jehova. Mina nzi lo simama, zonake nzi bapatizwa na nzi hi ni 17 wa malembe, kanilezi nzi wa nga hiseki. Xikhatanyana nzhako ka lezo, nzi lo sangula mahanyela ma nga hiko ya wuKristu, zonake nzi nga ha mahi xiro xa bandla.

NZI LO BOHA KU TLHELELA

Xikhatanyana nzhako ka muchado wa mina, a vawoneleli vambiri va bandla ga laha kusuhani ga Timboni ta Jehova va lo nzi enzela. Va lo nzi tlhamusela lezi nzi nga fanele ku maha kasi nzi tlhela nzi maha nanza ga Jehova Nungungulu, niku va lo lava a murumiwa wo kari waku hi Cindy kasi a ta nzi vuna. Ka xikhati lexo nzi wa lahlekelwe hi kukholwa ka mina, hikwalaho nzi lo mu kombela lezaku a nzi komba kubaseni a ku hakunene a Biblia i Mhaka ya Nungungulu ke. I lo nzi komba a ziprofeto zo kari za Biblia zi nga tatisekile. Hi kufamba ka xikhati hi lo maha vanghana va hombe, niku i lo nzi kombela ku gonza naye a tigonzo-tshinya ta Biblia. Nzi si vumela. Hi khati go sangula, nzi lo tiva lezaku Jehova i Nungungulu wa liranzo, loyi a lavako lezaku nzi tsaka.

Laha nzi nga tlhela nzi sangula kuya mitlhanganweni ya wuKristu, nzi lo wona lezaku nzi wa tsakiswa nguvu hi kuva zinwe ni Timboni, ku hunza kuva ni vanhu lava hi nga maha zinwe a mabhinzu ya mafilmi. Kanilezi, lezi nzi nga zi hanyile wunwananeni ga mina zi nzi mahile nzi alakanya lezaku a nzi nge tsumbi munhu, niku nzi wa ti wona na nzi nga hi wa nchumu. A xiro xo kari xa bandla xi lo nzi vuna nguvu laha xi nga nzi komba lomu ka Biblia lezi nzi nga wa ta lwisanisa zona ni zikarato lezo, nzi tlhela nzi gonza ku maha vanghana va lisine.

NCHUMU WA LISIMA KU HUNZA KUVA NI NDHUMA

Hi 1997, mina ni nuna wa mina hi lo rura hiya Hollywood, le Califórnia, Estados Unidos. Na nzi hi kwaseyo nzi lo vuna nguvu vanhu lezaku va vuneka hi wutlhari ga Mhaka ya Nungungulu. A ku gonzisa Biblia zi nzi nyika litsako la hombe nguvu, ku hunza ndhuma yontlhe leyi nzi nga yi kuma hi ku maha mafilmi yo tsakisa. Hi xikombiso, hi 2002, nzi lo tlhangana na Cheri, nzi nga tivana naye le Hong Kong. Lezi mina na yena hi zi hanyileko wutomini ga hina, zi wa fana hi tindlela to tsalangana. Cheri, i wa hi munwe wa vavasati va ndhuma le Hong Kong, niku ka lembe gi ga lanzela ku lova mina. A xikhati lexi nzi nga ganya xikhundla, Cheri i wa hi munwe wa lava va nga nzi nyika xidlodlo. I lo tlhela a maha mafilmi niku hi nzhako ka xikhati i lova muhumesi wa wona, na a tirisana ni varangeli va ndhuma. Yenawu i lo rura aya Hollywood.

A xikhati nzi nga tiva lezaku Cheri i wa felwe hi munghana wakwe loyi a nga lava ku tekana naye, hi kota ya kuba ka mbilu ka xitshuketi; nzi lo pola lezaku i wa nga kumi kuchavelelwa le chechini yakwe ya xiBuda. A ku fana na mina, yenawu i wa kumile ndhuma leyi a vanwani va nga yi navela nguvu, hambulezo i wa nga hi na litsako niku i wa nga zi koti ku tsumba munhu. Nzi lo sangula ku mu bhulela lezi nzi nga zi gonzile lomu ka Biblia, hambulezo kota lezi a nga nwele xiBuda zi mu karatele nguvu a ku zi nyika lisima.

Ka siku go kari hi 2003, Cheri i lo nzi vitana le Vancouver, a Canadá, a xikhati lexi a nga kari a maha a filmi gakwe. Na a karatekile nguvu, Cheri i lo nzi byela lezaku na a famba a wona kusaseka ka nkova, hi xitshuketi i lo sangula ku khongela hi gezu ga hombe aku: “Hi nga nzi byela, kasi himani a Nungungulu wa lisine? Hi gihi a vito ga wena?” Ka xikhati xalexo i lo hunza hi laha kusuhani ni Salawu ya Mufumo zonake a wona a vito ga Jehova. Lezo i zi wonile kota hlamulo wa Nungungulu, niku i wa lava ku tlhangana ni Timboni ta Jehova hi kuhatlisa. Nzi lo maha malulamiselo, niku nzeni ka masiku matsongwani i loya mitlhanganweni ya bandla ga lirimi la xiChina le Vancouver.

Anzhako ka xikhati xo kari Cheri i lo nzi byela lezi: “A vanhu lava va khatala nguvu hi mina. Nza zi kota ku va byela lezi nzi ti zwisako zona.” Nzi lo tsaka nguvu hi kuzwa lezo hakuva a xikhati lexi a nga maha mabhinzu ya mafilmi, a nga zangi ava ni vanghana. Cheri i lo simama kuya mitlhanganweni. Kanilezi hi 2005, i lo tholiwa lezaku a ya humesa mafilmi mambiri ya ku leha le China. Lezo zi lo mu maha a tlhela le Hong Kong. Lexi xi tsakisako hi ku hi 2006, Cheri i lo hendleleta wutomi gakwe ka Jehova a tlhela a bapatizwa kota Mboni ya Jehova ka mutlhangano wa hombe le Hong Kong. Hambu lezi a nga lava ku tirela Jehova xikhati xontlhe, a ntiro wakwe wa mabhinzu ya mafilmi, wu mahile zi mu karatela nguvu niku i wa nga tsakangi.

LITSAKO NZI LI KUMAKO HI KU VUNA VANWANI

Hi 2009, a wutomi ga Cheri gi lo cica. I lo maha xiboho xo tsika koponi ya ku maha mafilmi kasi a tirela Jehova hi kumbhelela. I lo maha vanghana votala va vaswa bandleni ga wuKristu. I lo maha muxumayeli wa xikhati xontlhe wa mahungu yo saseka ya Mufumo niku i lo ti buza hi ku vuna vanhu lezaku va tiva mahanyela ma nene. — Mateu 24:14.

Zonake, Cheri i lo maha xiboho xa ku gonza a xiNepali, kasi a vuna a ntlawa wo kari wa Timboni wu nga kari wu kula. A ntlawa lowo wu wa wulawula xiNepali le Hong Kong. A vanhu vo tala va wulawulako xiNepali le Hong Kong va tolovela ku chepetwa hi kota ya lezi va nga xi tiviko khwatsi a xiNgiza ni xiChina, ni lezi a mahanyela yabye ma hambeneko ni ya vona. Cheri i lo nzi byela lezi a nga ti buzisa zona hi ku vuna vanhu lavo lezaku va zwisisa a Biblia. Hi xikombiso, ka siku go kari na a xumayela hi muti ni muti, i lo kuma wasati a wulawulako xiNepali, loyi a nga tiva zitsongwani hi Jesu, kanilezi i wa nga tivi nchumu hi Nungungulu wa lisine, Jehova. Cheri i lo tirisa a Biblia kasi a mu komba lezaku Jesu i khongele ka Dadani wakwe wa le tilweni. A xikhati lexi a wasati loye a nga tiva lezaku a nga khongela ka Nungungulu wa lisine, loyi a vito gakwe ku nga Jehova, i lo vulula a mbilu yakwe kasi a vumela mahungu yo saseka. Na zi nga seya kwihi a nuna wakwe ni nhanyana wakwe vonawu va lo gonza Biblia. — Tisimu 83:18; Luka 22:41, 42.

A xikhati nzi nga wona lezi Cheri a nga ti buzisa zona hi ntiro wa kuxumayela wa xikhati xontlhe, nzi lo ti wutisa lezi: ‘Kasi xini xi nzi valelako ku maha lezi a mahako?’ Ka xikhati xalexo, minawu nzi wa tlhelele Hong Kong. Nzi lo boha ku lulamisa wutomi ga mina kasi nzi byela vanwani a lisine la Biblia hi kumbhelela. Nzi lo wona lezaku a ku ingisela vanhu nzi tlhela nzi va vuna ku zwisisa a Mhaka ya Nungungulu, zi nzi maha nzi kuma litsako lo mbhelela.

Hi xikombiso, nzi gonzile a Biblia ni wasati wo kari wa le Vietname loyi xontlhe xikhati u nga mu kuma na a nga tsakangi niku i wa tshama hi ku rila. Zalezi i na ni mawonela ma nene hi wutomi niku i zi tsakela nguvu a ku ti tlhanganyisa ni bandla.

Mina na Cheri hi na ni nchumu wa lisima ku hunza kuva ni ndhuma. Hambu lezi zi nga tsakisa a kuva ka koponi ya ku maha mafilmi, a ku gonzisa vanhu xungetano hi Jehova Nungungulu za tsakisa nguvu, hakuva zi neha wudzunzo ka yena. Ha wona a kutatiseka ka magezu ya Jesu yaku: “Ku katekile ku nyika ku hunza ku nyikiwa.” — Mitiro 20:35.