Xana Wa Hlengela Ka Xiprofeto Xa Lisima Xa Biblia?

A Biblia gi wulawula hi xikhati lexi a vanhu “va tirimi ti tsalangeneko ta matiko” va nga wa tazwa a mahungu yo saseka ya Mufumo wa Nungungulu. (Zak. 8:23) A xiprofeto lexo xa lisima xa tatiseka inyamutlha. Lomu Moçambique, a to kari ta tirimi leto hi leti: xiChuabo, xiLomwe, xiMacua, xiNdau, xiSena, xiShona, ni Xitshwa. Ina, a vo tala va wulawulako tirimi leto va kuma mahungu yo saseka ya Mufumo wa Nungungulu ka mabhuku ma seketelweko ka Biblia ma tsalilweko hi tirimi tabye.

Ha zi kota ku hlengela nguvu kutatisekeni ka Zakaria 8:23 hi ku tirisa mabhuku ya lirimi la lomu xipanzeni xa hina. A xikhati lexi hi xumayelako a mahungu yo saseka, hi fanele ku nyikela ni ku tirisa a mabhuku ma seketelweko ka Biblia ya tirimi leti ti wulawulwako nguvu lomu xipanzeni xa hina. Mitlhanganwini ya bandla, hi fanele ku tirisa a mabhuku ya lirimi la lomu xipanzeni loku ma hi kona. Hi ku maha lezo hi hlengela kutatisekeni ka Zakaria 8:23.

Hambulezo, ku na ni vo tala va nga zi kotiko ku lera hi lirimi la lomu xipanzeni xabye. Xana hi nga va vunisa kuyini a vanhu lavo? Loku u nga zi koti ku lera hi lirimi la wena, hikuyini u nga lonzowotiko a xikola xa kugonzisa ku lera ni ku tsala lexi xi longiselweko hi hlengeletano, xa mahala, laha bandleni ga wena? Kasi ku kuma manwani mahungu xungetano hi magonzisela ka zikola lezo, gonza a Nosso Ministério do Reino ga Janeiro wa 2002, phajina 7.

Hlengela hi kumbhelela kuvuneni ka vanhu lava va wulawulako lirimi la lomu xipanzeni. Va xumayele a mahungu yo saseka hi lirimi labye. Gonza a mabhuku ma seketelweko ka Biblia hi lirimi leli va tekelako ku li zwisisa. Hi ndlela leyo, u tava u hlengela ka xiprofeto xa lisima xa Biblia xi tatisekako nyamutlha.