Papilo Ga Hubye yi Fumako

Timboni-kulori ta Jehova ti Ranzekako:

A hi kutsakisa ka zona a ku mu tsalela vamakabye va ranzekako! Hi tizwa a ku fana na mupostoli Johani, loyi a nga wula lezaku ‘i wa va ranza hi zinene’ a vakhozeli-kulobye, a nengela hi lezi va nga “famba hi zinene.” (2 Joh. 1, 4) Hakunene, a zinene makatekwa ya hombe ka hina hontlhe! A zinene zi hi tlhatlhisile ka Babuloni loyi wa Hombe ni ka tigonzo takwe ni mikhuwo leyi yi onhako a wudzunzo ga Nungungulu. A ku ingisa a zinene ka hi vuna a ku hunzuluka hiva vanhu va liranzo, va va nene, ni va wuxinji. Niku a zinene za hi vululela ndlela kasi hiva ni xiyimeko xi basileko mahlweni ka Nungungulu zinwe ni kuva ni kutsumba ka wutomi ga pinzukelwa.

A hi kubonga hi nga nako kambe, hi moya wa Jehova, lowu wu hi rangelako ni ku hi tiyisa siku ni siku! Ha tiyiseka lezaku mu tsakile hi ku kambisisa a matshamela yo hambanahambana ya xinyikiwo lexi xi tako hi ka Jehova ka Migotsovanyano ya Muganga “Hi Rangelwa Hi Moya Wa Nungungulu,” leyi ya ha hi ku hunzako. Kota lezi a matshamela ya tiko ma yako ma biha nguvu, za lisima a kuva hi khegela ka moya wa Jehova wa ntamu kasi wu hi rangela nzeni ka masiku lawa yo nonoha ma nga mahlweni ka hina.

Ha tiyiseka lezaku a timbilu ta nwina ta khumbeka a xikhati lexi mu gonzako a mitlhatlhambutelo yi khumbako mbilu yi nga lomu ka Anuário xungetano hi vamakabye va hina lava va timiseleko a kuxaniseka ka hombe hi kota ya kukholwa kabye. Niku za hlamalisa a ku alakanya lezaku a vanhu lava va tsumbekileko va wa ha hi ku bapatizwa a xikhati lexi a zikarato zi nga sangula kutani va wa nga se bapatizwa. A hi lona liranzo leli hi nga nalo hi vona hi kota ya kutsumbeka kabye ni kuseketela kabye a kululama! Hakunene, a xikombiso xabye xa xi nene nguvu xi tiyisa a kutiyimisela ka hina a ku simama hi tsumbeka ka Mufumo na ku nga khataliseki a zikarato lezi zi nga ha hi welako. — 1 Tes. 1:6-8.

Ha zi tiva vamakabye va ranzekako lezaku ku na ni zikarato zo tala zi fambelanako ni timali ni zinwani, lezi mu faneleko ku yimisana nazo kasi a mingango ya nwina yi simama ku bohana hi liranzo. A ka vo kari va nwina, za karata hambu a ku seketela a ntiro wa kuxumayela Mufumo ni mitiro yinwani yi lavekako ya bandla hi kukhanzakanya ni kutsumbeka. Lexo hi xona xigelo xi mahileko lezaku anzhako ka kubhulisana kunyingi ni mikhongelo, hi cica zo kari mitlhanganweni ya bandla kusukela 1 ka Janeiro wa 2009. Ha tsumba lezaku mu ta lonzowota nguvu a malulamiselo lawa kasi muva ni xikhati xo tala xa xigonzo xa munhu wutsumbu ni xa ngango.

Ka mitlhangano ya hombe ni migotsovanyano yo hambanahambana ka lembe legi, zi tsakisile nguvu a ku wona vanhu vo tala nguvu lava va ringanelweko hi kubapatizwa. Xikari kabye ku vile ni vo kari va ha hiko va tsongwani. Nwina vapswali mu fanele ku dzunziwa hi ku wundla a vana va nwina vava ni kutsakela a zinene ni ku va kuca lezaku va ti hendleleta kasi ku tirela Jehova na va ha hi vaswa. Lezi a vanhu vaswa lavo vo ranzeka va yimisanako ni zikarato zo tala xikoleni hambulezo va ringanelwa hi kubapatizwa, zi nyika wukustumunyu go saseka ga gonziselelo leyi va yi kumako laha mutini. — Tis. 128:1-6.

A xinwani xi nga faneliko ku rivaliwa kuengetela ko tsakisa ntirweni wa ku fambisa zigonzo za Biblia​ — ⁠niku a varumiwa va hina va ti karatako nguvu zinwe ni maphayona yo hlawuleka va vile ni kuhlengela ka hombe kuengeteleni loko. Hina hontlhe Hubyeni yi Fumako ha nyika nguvu lisima a ntiro wa hombe lowu a vamakabye misaveni yontlhe va wu mahako hi ku wula vaku “Tana!” ka vanhu va timbilu ti nene, na va ramba vontlhe va nga ni tora kasi ‘vakha mati ya wutomi mahala.’ (Kuv. 22:​17) Hi hoyozela hi matsenya lava va 289.678 va nghenileko ka wumakabye ga misava yontlhe hi ku kombisa a kutihendleleta kabye hi ku bapatizwa hi mati a lembe legi gi hunzileko!

Zi nga ta tshuka ziva kuhunzeleta a ku tshama na hi alakanya a magezu ya mupostoli Johani, loyi a nga tsala aku: “A tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka.” (1 Joh. 2:17) Niku hi hanya kusuhani nguvu ni xikhati lexi a tiko gi to “hunza”! Wutlhari nguvu a kuva a wutomi ga hina gi khegela kumaheni ka kuranza ka Nungungulu hi tlhela hi tshama na hi rinzele. (Mat. 24:42) Cima hi nga ta ti laya loku hi maha lezo, niku hi ta tshovela a mihanzu ya wuxinji ga Jehova. — Isa. 63:7.

Hi xuva lezaku a mitlhatlhambutelo yi kucako yi tako hi ka matiko yo tala, leyi yi nga lomu ka Anuário yi kuca nwina nwentlhe lezaku mu rangisa a zilaveko za Mufumo wutomini ga nwina. Hi lava ku mu tiyisa lezaku hi tshama hi ku mu alakanya ni ku mu kumbuka lomu mikhongelweni ya hina niku ha mu ranza nguvu. Ngha Jehova a mu chululela a makatekwa yakwe yo tala.

Vamakabye va nwina,

Hubye yi Fumako ya Timboni ta Jehova