Xana Lezi Hi Zona Zi Nga Khungo Ga Nungungulu?

GONZA a phepha ginwe ni ginwani legi gi haxako mahungu. Wona a televizawu, kutani ku ingisela a radiyu. Ku na ni mahungu yo tala ya wugevenga, yimpi, ni terrorismo! Alakanyela a zikarato za wena. Kuzilava wa karateka nguvu hi kota ya wubabyi kutani kufa ka a ranzekako wa wena. U nga hazwa lezi a wanuna wa mu nene Joba a zi zwileko, a tlhela a ku ngalo i wa ‘tele hi kubayiseka.’ — Joba 10:15, Tradução do Novo Mundo.

Ti wutise:

• Xana lezi hi zona zi nga khungo ga Nungungulu ka mina ni ka vanhu vontlhe?

• Nzi nga xi kuma kwihi a xivuno xa ku lwisana ni zikarato za mina?

• Xana ku kona kutsumba ka lezaku hi ta tshuka hi wona kurula misaveni?

A Biblia ga nyika mihlamulo yi tsakisako ya ziwutiso lezo.

A BIBLIA GI GONZISA LEZAKU NUNGUNGULU I TA NEHA A MATSHAMELA LAWA LAHA MISAVENI.

“I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa.” — Kuvululelwa 21:4

“A zilema zi ta tlula khwatsi i hlangu.” — Isaya 35:6

“A mahlo ya zikhumu ma ta vululiwa.” — Isaya 35:5

‘Xikhati xa hata, laha vontlhe va nga le zilahleni va ta nga . . . huma.’ — Johani 5:28, 29

“A ku na muaki ni munwe a ta ngaku: Nza babya!” — Isaya 33:24

“A mavele ma ta pfuna nguvu tikweni.” — Tisimu 72:16

VUNEKA HI LEZI A BIBLIA GI ZI GONZISAKO

U nga tekeli ku ala lezi zi kombilweko ka maphajina yo sangula na u alakanya lezaku miehleketo ya zilo hi zi navelako ntsena. Nungungulu i tsumbisile ku neha zilo lezo, niku a Biblia ga tlhamusela lezi a to zi mahisa zona.

Kanilezi a Biblia ga vuna hi tindlela tinwani. Gi nyika ndlela ya kuva wena u kuma a wutomi go tsakisa hambu ni zalezi. Nyimanyana u alakanyela a zikarato ni kuxaniseka ka wena wutsumbu. Zi nga ha patsa a ku vumala mali, zikarato za ngango, kubabya, kutani a ku felwa hi xaka. A Biblia ga zi kota ku ku vuna a ku lwisana ni zikarato inyamutlha, niku ga zi kota ku neha kutlhatlheka hi ku hlamula a ziwutiso zo khwatsi hi lezi:

• Hikuyini hi xanisekako?

• Hi nga zi kotisa kuyini a ku lwisana ni zikarato za wutomi?

• Hi nga zi kotisa kuyini kuva ni wutomi ga ngango legi gi tsakisako?

• Zini zi hi humelelako loku hifa?

• Xana ha ha ta wona a varanzekako va hina va fileko?

• Hi nga tiyisekisa kuyini lezaku Nungungulu futsi i ta tatisa a zitsumbiso zakwe za xikhati xa ha tako?

Zalezi u gonzako a bhuku legi wo komba lezaku wa ranza ku tiva lezi a Biblia gi zi gonzisako. A bhuku legi gi ta ku vuna. Wona lezaku a tinzimana ta gona ti na ni ziwutiso zi yelanako nato lahasi ka phajina. Makume ya mazana ya vanhu va tsaka hi ku tirisa a longoloko lowu wa ziwutiso ni mihlamulo a xikhati lexi va bhulako hi timhaka ta Biblia ni Timboni ta Jehova. Hi alakanya lezaku wenawu u ta tsaka. Ngha Nungungulu a ku katekisa hi lezi makunu u gonzako hi kutsaka ka hombe lezi hakunene a Biblia gi zi gonzisako!