Xigonzo 1

Nungungulu I Ku Ramba A Kuva Munghana Wakwe

Nungungulu i lava lezaku wena uva munghana wakwe. U tshuka u alakanya xinwani xikhati lezaku wa zi kota kuva munghana wa Munhu wo tlakuka Xirenzelekwanini xa tiko ke? Abrahama, loyi a hanyileko xikhatini xa kale nguvu, i lo vitanwa aku munghana wa Nungungulu. (Jakobe 2:23) Vanwanewo va wuliwako lomu ka Biblia va wa hi ni wunghana na Nungungulu niku va katekisilwe nguvu. Nyamutlha wa siku, a vanhu lomu matlhelweni wontlhe ya Misava va ti mahile vanghana va Nungungulu. Wenawo wa zi kota kuva munghana wa Nungungulu.

Kuva munghana wa Nungungulu i chukwana ku hunza kuva munghana wa munhu wo kari. Nungungulu cima a nga khunguvanyisi vanghana vakwe votsumbeka. (Tisimu 18:25) Kuva munghana wa Nungungulu i chukwana ku hunza kuva ni titshomba. Loku munhu wo fuma afa, a mali yakwe yi salela vanwani. Kanilezi lava va nga ni wunghana na Nungungulu va na ni tshomba leyi ni munwe a nga zi kotiko a ku va wutlela. — Mateu 6:19.

Kuzilava vanwani va nga lava ku ku beletela ku gonza hi Nungungulu. Kuzilava hambu vanghana ni maxaka ya wena va nga maha lezo. (Mateu 10:36, 37) Loku vanwani va ku tseketsela kutani ku ku chavisela, ti wutise: ‘Hi mani loyi nzi lavako a ku mu xalalisa, vanhu kutani Nungungulu?’ Alakanyela lezi: Loku wo kari a ku tsikisa kuga, u wa ta mu ingisa? Ahihi! U lava zakuga kasi wa hanya. Kanilezi Nungungulu wa zi kota ku ku hanyisa kala kupinzuka! Hi kota ya lezo, cima u nga vumeli lezaku wo kari a ku beletela a ku gonza lezi u ta nga mahisa zona munghana wa Nungungulu. — Johani 17:3.