Xi kona xi ku mahako u sola Nungungulu?

“HIKUYINI ZI HUMELELAKO MINA? Hikuyini Nungungulu a tsikako zilo zo khwatsi hi lezi zi humelela mina?” Lezo ziwutiso zi karatileko Sidnei wa 24 wa malembe, a hanyako le Brasil. Anzhako ka mhango yi mu humeleleko hi ku hlakana hi ku tlula a wela lomu tiveni, i lo bayisiwa nguvu laha ka kuza zi lava ku xontlhe xikhati a tshama laha ka xitulo xa maroda.

A kuxaniseka loku ku vangiwako hi timhango, mababyi, ku felwa hi munhu hi mu ranzako, timhango ta ntumbuluko, kutani tiyimpi zi nga maha vanhu va sola Nungungulu. Lezo a hi zilo za ziswa. Joba wa xikhatini xa kale i lo welwa hi makhombo yo lanzelana. Hi xihoxo i lo mu nyika nanzu Nungungulu, aku: “Nza rila ka wena, kanilezi wena a ku nzi hlamuli; nza suka nzi yima, kanilezi wa nzi cuwuka ntsena. A ka mina u hunzukile u maha wa lunya; hi canja ga wena ga ntamu wa nzi vukela.” — Joba 30:20, 21.

Joba i wa nga ku tivi lomu zi ngata hi kona a zikarato zakwe niku hikuyini zi nga mu humelela. Lexi xi tsakisako hi ku a Biblia gi hi tlhamusela a xigelo xaku hikuyini a zilo lezo zi humelelako niku hi nga lwisanisa kuyini nazo.

XANA HI NUNGUNGULU A VANGAKO KUXANISEKA KA VANHU?

Xungetano hi Nungungulu, a Biblia gi hi byela lezi: A “mitiro yakwe yi mbhelele; hakuva tontlhe tindlela takwe ti lulamile; i Nungungulu wa kutsumbeka, loyi a nga hiko na kukanganyisa; i na ni wunene, i lulamile.” (Deuteronome 32:4) Makunu loku zi tshamisile lezo, za zwisiseka a ku alakanya lezaku Nungungulu loyi a nga ‘ni wunene ni wa kululama’ i wa ta maha vanhu va xaniseka kutani ku tirisa makhombo kasi ku va tsayisa kutani ku va basisa?

A kuhambana ni lezo, a Biblia gi hi byela lezi: “Loku munhu a ringwa ngha a nga wuli, aku: Nzi ringwa hi Nungungulu; hakuva Nungungulu a nga zi koti ku ringwa hi kubiha, yena wutsumbu a nga na ku ringa munhu.” (Jakobe 1:13) Lomu ka Biblia hi gonza hi tiva lezaku Nungungulu i nyikile vanhu a masangulo yo mbhelela. I nyikile a vanhu vo sangula, Adamu na Eva, a muti wo saseka, ni zontlhe zi lavekako wutomini, ni ntiro wo tsakisa. Nungungulu i lo va byela lezi: “Pswalani, mu anza, mu tata misava, mu yi fumela.” Hi lisine, Adamu na Eva va wa nga hi na xigelo xa ku sola Nungungulu. — Genesisi 1:28.

Kanilezi inyamutlha, hi hanya ka matshamela ya le kule nguvu ni kumbhelela. Kusukela matinwini ya vanhu a kuxaniseka kuya ku engeteleka. A magezu lawa ma wula lisine: “A zivangwa zontlhe za keta ni ku xaniseka hi kulunwa kala makunu.” (Va Le Roma 8:22) Zini zi humeleleko?

HIKUYINI KU NGA NI KUXANISEKA?

Kasi hi zwisisa lezaku hikuyini ku nga ni kuxaniseka, hi fanele ku alakanya xikhati lexi ku nga sangula hi xona. Na va kucetelwa hi ngelosi ya muhluwuki, leyi yi nga gumesa yi maha Satani Diabolus, Adamu na Eva va lo ala matshinya ya milayo ya Nungungulu ya za zi nene ni zo biha, lawa ma nga yimelwa hi xileletelo xa lezaku va ngagi “sinya ya ku tiva kusaseka ni kubiha.” Diabolus i lo byela Eva lezaku i wa nga tafa loku a tsika ku ingisa Nungungulu. Hi ndlela leyo, i lo lumbeta Nungungulu aku muhembi. Satani i lo tlhela a lumbeta Nungungulu lezaku i wa tsona a vafumelwi vakwe a fanelo ya ku hlawula za zi nene ni za kubiha. (Genesisi 2:17; 3:1-6) Satani i lo nyika mawonela ya lezaku a vanhu zi wa ta va fambela khwatsi loku va nga fumelwi hi Nungungulu. Zontlhe lezo zi lo vuxa mhaka ya lisima — Xana Nungungulu i wa ringanelwa hi ku fuma?

Diabolus i lo vuxa mhaka yinwani kambe. I lo lumbeta vanhu lezaku va tirela Nungungulu hi ku lava ku vuneka. Xungetano hi wanuna wo tsumbeka Joba, Diabolus, i lo byela Nungungulu aku: “A hi lezi u mu vikelako, yena ni yindlu yakwe, ni zilo zontlhe zakwe ke? . . . Kanilezi hi nga nawuluta a canja ga wena, u khumba zontlhe lezi a nga nazo, na yena i ta ku rukatela kuwoneni ka wena.” (Joba 1:10, 11) Hambu lezi a magezu ya Satani ma ngaya ka Joba, lezi a nga zi wula zi wa komba lezaku a vanhu vontlhe va tirela Nungungulu hi ku lava ku wuyelwa.

LEZI NUNGUNGULU A LULAMISISAKO ZONA A TIMHAKA LETO

Yi wa tava yihi ndlela ya yi nene ya ku lulamisa timhaka leto hi khati ginwe ti mbhelela kwalaho? Nungungulu loyi a nga ni wutlhari gontlhe, i na ni ndlela ya yi nene ya ku lulamisa a timhaka leto — yi to kala yi nga hi khunguvanyisi. (Va Le Roma 11:33) I bohile ku tsika vanhu va ti fuma ha voce hi xikhati xo kari, a tsika wuyelo ga kona gi komba lezaku himani a ringanelwako hi ku fuma.

Lexi xi nga tsakisiko, hi lezaku a matshamela ya tiko legi inyamutlha ma komba kubaseni lezaku a wufumeli ga vanhu gi tsanzekile. A hi lezaku a mifumo ya vanhu yi lo tsanzeka ku neha kurula, wuvikeli, ni litsako ntsena, kanilezi yi tlhelile yi maha misava yiva kusuhani ni kulova. Lezo zi tiyisa khwatsi a lisine li nga lomu ka Biblia li nge: “A ndlela ya munhu a yi le ntanwini wakwe, kambe a munhu a nga zi koti ku lulamisa a mazambo yakwe.” (Jeremia 10:23) Ntsena a mafumela ya Nungungulu hi wona ma to zi kota ku neha kurula, litsako, ni kutshamiseka ka vanhu, hakuva lezo hi zona zi nga kungo ga Nungungulu. — Isaya 45:18.

Makunu, Nungungulu i ta gi tatisisa kuyini a kungo gakwe xungetano hi vanhu? Alakanya lezaku Jesu i gonzisile a valanzeli vakwe a ku khongela vaku: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mateu 6:10) Ina, hi xikhati xi faneleko xa Nungungulu, hi ku tirisa a Mufumo wakwe, i ta susa zontlhe zi vangako kuxaniseka. (Danieli 2:44) A wusiwana, mababyi, ni kufa zi tava zi hunzile. Xungetano hi wusiwana a Biblia gi komba lezaku Nungungulu “i ta hlanguta a muvumali loyi a rilako” (Tisimu 72:12-14) Xungetano hi mababyi, a Biblia gi tsumbisa lezi: “A ku na muaki ni munwe a ta ngaku: Nza babya!” (Isaya 33:24) Hambu hi varanzekako va hina vafileko lava nga maalakanyweni ya Nungungulu, Jesu ite: A “xikhati xa hata, laha vontlhe va nga le zilahleni va ta ngazwa a gezu gakwe, va huma.” (Johani 5:28, 29) Hi nga wona a zitsumbiso lezi za tsakisela ga cima!

HLULA ZIKHUNGUVANYISO

Kwalomo ka 17 wa malembe na ku humelele mhango yakwe, Sidnei, a kumbukilweko kusanguleni ka nzima leyi i lo wula lezi: “A nzi mu nyiki nanzu Nungungulu hi kota ya mhango, kanilezi kasi ku wula lisine, nzi wa mu sola nguvu Nungungulu. Ku na ni masiku yo kari nzi tako nzi swireka, nzi tlhela nzi rila a xikhati nzi alakanyako wulima ga mina. Hambulezo, hi ku gonza Biblia nzi zwisisile lezaku a mhango leyo ku wa nga hi kutsayisa ku tako hi ka Nungungulu. Kota lezi a Biblia gi wulako, a vanhu ‘vontlhe va chikelelwa hi xikhati, zi dzuka zi va humela.’ A ku khongela ka Jehova zinwe ni ku gonza mitsalo yo kari yo kongoma zi nzi maha nzi tiya hi tlhelo ga moya nzi tlhela nziva ni mawonela ma nene. — Mutshawuteli 9:11; Tisimu 145:18; 2 Va Le Korinte 4:8, 9, 16.

A ku tiva zigelo lezi zi mahako Nungungulu a vumelela kuxaniseka ni lezi a wuyelo ga kona gi to fuvisiswa zona lokuloku, zi hi vuna ku hlula ni xihi xi nga hi mahako hi sola Nungungulu. Ha tiyiseka lezaku Nungungulu “wa chachazela lava va mu lavako.” I hava ni munwe a kholwako kakwe ni ka N’wana wakwe a tova ni xigelo xa ku mu sola. — Maheberu 11:6; Va Le Roma 10:11.