Kusukela hi Setembro, a Xibhukwana xa Mutlhangano wa Ntiro wa hina ni mahanyela xi tava ni xingheniso xiswa xa xikombiso xi nge ngalo “Gonzisa a lisine.” A kungo ga hina ku tava ku dlunyatisa a lisine la Biblia hi ku tirisa a xiwutiso ni vesi legi gi xi hlamulako.

Loku hi pola lezaku a munhu loye wa tsakela, hi nga mu vuxela manyawunyawu ya lezi hi to bhula hi zona ka lienzo li lanzelako hi ku mu siyela bhuku ginwani kutani ku mu komba vidiyu ka saite ya jw.org. Hi fanele ku ti karatela ku tlhela nzeni ka masiku ma tsongwani kasi hi ya tlhavinyeta bhulo ga hina go sangula. A zingheniso lezi za ziswa ni ziavelo za zigonzani zi ta seketelwa ka mahungu lawa ma songako xipimo ni xipimo ka bhuku Zini lezi a Biblia gi hi gonzisako? Ka mahungu lawo, hi ta kuma zinwani ziwutiso ni mitsalo zi to hi vuna ku fambisa bhulo ka lienzo lo wuyela kutani ku fambisa xigonzo na hi tirisa Biblia ntsena.

Kova ni ndlela yinwe ntsena yi yako wutomini. (Mt 7:13, 14) Kota lezi hi wulawulako ni vanhu va wukhongeli zinwe ni midawuko yo tsalangana, hi fanele ku va bhulela a lisine la Biblia leli li to koka kupima ka munwe ni munwani wabye. (1 Ti 2:4) Laha hi toya hi tolovela nguvu ku bhula hi timhaka ta lomu ka Biblia ni ku buvisisa wutlhari ga hina ga ku ‘tirisa a mhaka ya lisine hi kululama,’ a litsako la hina li ta anza hi tlhela hi bhinzula laha hi gonzisako lisine ka vanwani. — 2 Ti 2:15.

A vanhu misaveni yontlhe va lava ku chavelelwa. (Mutsh 4:1) Ka hweti yontlhe ya Setembro, hi ta maha zontlhe hi zi kotako kasi ku nyikela A Sentinela, gi to wulawula hi mhaka ya ku chavelela. Ti karatele ku nyika vanhu vo tala nguvu hi laha zi kotekako hi kona. Kanilezi, kota lezi hi lavako ku bhula ni vanhu hi kukongoma kasi hi va chavelela, hi nga ta siya revista legi mitini leyi ku nga hava vanhu.

LEZI U TO WULA

“Hontlheni ha tshuka hi lava ku chavelelwa ka zikhati zo kari. Kanilezi hi ta ku kuma kwihi? [Gonza 2 Va Le Korinte 1:3, 4.] A revista legi ga A Sentinela gi tlhamusela lezi Nungungulu a hi chavelelisako zona.”

Loku a munhu loye a kombisa kukhatala a tlhela a vumela ku amukela a revista, . . .

MU KOMBE A VIDIYU HIKUYINI U FANELEKO KU GONZA A BIBLIA?

Zonake u mu byela ku wa xuva ku gonza naye Biblia.

MU SIYELE MHAKA YO TA BHULA HI YONA KA KHATI GI LANZELAKO

Maha xiwutiso u to hlamula loku u tlhela, xo kota lexi, “Hikuyini Nungungulu a tsikako vanhu va xaniseka?”