A ku nyika wukustumunyu hi kumbhelela zi pswala mihanzu — A timhaka leti ti susilwe ka Anuário das Testemunhas de Jeová de 2015
Amerika
A zisiwana ziya mitlhanganweni
Phajina 54, nzimana 1
Angela, a hanyako le Suriname, i lo enzela muti wa ku hlayisa zisiwana wu nga kusuhani ni kaya kakwe. A murangeli wa wona i wa hi makabye wa xisati a holileko, hikwalaho i lo tekela ku tsika Angela a xumayela vanana lavo. Angela i lo bhula ni 85 wa vanana, a va komba tividiyu ta lomu ka jw.org. Hi kulanzela, i lo sangula ku gonza ni vanana vo tala kwalaho. Ku lota maphayona mambiri ma ta patsana naye, munwe ni munwe ni ntlawa wakwe.
A makabye loye wa xisati a holileko i lo wula lezaku i wa gonzisa vanana lavo a ku yimbelela tisimu ta ginwe ga mabhuku ya hina ya tisimu a tlhela a va lerela matimu ya Biblia ni wusiku. I lo wula lezaku i wa xuva kuya mitlhanganweni, kanilezi zi wa nga ringani ku famba a siya vanana lavo va 85 voce. Hikwalaho, ku lo mahiwa malulamiselo ya lezaku vontlhe vaya Salawini ya Mufumo. Kota lezi a kuya leyo wu nga hi pfhuka wo ringana ku famba hi milenge, a vamakabye va lo mu vuna ku wonelela vanana lavo kala Salawini ya Mufumo. Zalezi a makabye loye ni vanana vontlhe va 85 vata mitlhanganweni hi kukhanzakanya.
Brasil
“A kuta ka wena ku wa nga hi kukotlana”
Phajina 56, nzimana 2 kala phajina 57, nzimana 1
Le Brazil, laha Jennifer a nga kari a nyikela a xiphephana Xana a vafileko va zi kota ku tlhela va hanya hakunene? i lo gongonza livati la wasati a ngaya marilweni ya munghana wakwe wo ranzeka. Jennifer i lo mu byela lezaku zi kotlene ni kuva yenawu na a lava ku mu nyika xiphephana xi wulawulako hi kutsumba ka ku tlhela hi wona a varanzekako va hina va fileko na va hanya. A wasati loye i lo hlamalanyana hi ku wona a hloko ya mhaka ya xiphephana lexo, hambulezo i lo xi amukela. Laha a nga wutisiwa lezaku a nga teka zinwani ziphephana kasi ku ya nyika ngango lowo wu felweko, a wasati i lo zi wona kota mawonela ma nene zonake a kombela ntlhanu wa ziphephana ni mune.
Laha Jennifer a nga maha lienzo lo wuyela, a wasati loye i lo wula lezi: “A siku lego hi nga tivana hi gona, nzi gumile nzi zi wona lezaku a kuta ka wena ku wa nga hi kukotlana. Nungungulu i no ku rumela ni mahungu yo chavelela lawa nzi nga ma vilela nguvu.” I wa avele ziphephana zontlhe. A xiro xo kari xa ngango xi vekileko a kanelo ya marilo, xi lo lera xiphephana xontlhe hi gezu go tlakuka. Vontlhe va lo xi tsakela va tlhela va mu bonga hi mahungu lawo yo chavelela. A wasati loye i lo vumela xigonzo xa Biblia.
Filipinas
“Va rumela mahungu ka nguva ya tivula”
Phajina 63, nzimana 2 kala phajina 64, nzimana 1
Greg na Alma va lo rura vaya xihlaleni xa Catanduanes le Filipinas kasi ku ya tira lomu ku nga ni xilaveko xa hombe xa vahuweleli va Mufumo. A matshamu yo kari xihlaleni lexo ma na ni zitsunga, hikwalaho kasi ku chikela ka zipanze zo kari, Greg na Alma va fanele ku famba 19 wa tikilometro. Ka zikhati zinwani, va famba tihora timbiri hi ngalava kasi ku ya xumayela ka zihlale zinwani. Loku yi hi nguva ya tivula, zi va karatela nguvu ku maha maenzo lawo. Kanilezi, wutshanwini ga ku tshama kaya va nga xumayeli, va lo boha ku lonzowota mabhonasi ya koponi leyi va yi tirisako ya titelefone ma va vumelelako ku rumela timesaje ta talela ga cima hi mali ya lahasi.
Greg i wula lezaku i sangula mahungu yakwe hi ku wula a vito gakwe. Hi kulanzela, i ngalo: “Nzi lava ku ku bhulela mahungu yo kari ya Biblia.” A wunwe wa mitsalo a yi wonileko lezaku ya bhinzula i Johani 17:3. Anzhako ka ku tshaha mutsalo lowo, i maha ziwutiso zimbiri: Himani Nungungulu wa lisine? niku Himani Jesu Kristu? Hi kulanzela, i kombela a munhu loye lezaku a hlamula. Loku a hlamula, Greg i mu komba mutsalo wunwani, wo kota Tisimu 83:18. Loku a munhu loye a simama ku hlamula a mahungu yakwe, i mu wutisa lezaku va nga simama ku bhula hi telefone ke. Greg na Alma va wula lezaku a vanyingi va hlamula.
A wasati wo kari loyi Greg na Alma va mu tsaleleko mahungu i wa hi ni ziwutiso zo tala xungetano hi Biblia, hikwalaho va lo tsalelana timesaje to tala. Hi magumo, a kutsalelana loko ku lo va yisa ka xigonzo xa Biblia. A wasati loye i lo bhulela hlazana yakwe ni mutiri-kulobye lezi a nga kari a gonza. Kota wuyelo ga kona vontlhe va vanharu va lo bapatizwa.