Timhaka ta mabhuku ma tako ka Cibhukwana ca Mutlhangano
1-7 KA MARÇO
TITSHOMBA TI NGA KA MHAKA YA NUNGUNGULU | MITSENGO 7-8
“Zvigondzo hi zvi kumako ka wugovelo ga vaIzrayeli”
it-1-T 540 ¶7
Bandla
Le Izrayeli, a vavanuna va yimisilweko va wa maha mitiro yi vhunako vanhu. (Ezra 10:14) Hi ndlela leyo, a “tihosana ta tiyindlu” ti no maha a minyikelo andzhako ka kuyimiswa ka tabhernakeli. (Mitse. 7:1-11) Niku lava va nga yimela a kutiyiswa ka ‘civhumelwano ci tiyileko’ hi cifungo masikwini ya Nehemiya kuve vapristi, ni vaLevhi ni ‘tihosana ta vanhu’. (Neh. 9:38–10:27) Cikhatini leci a vaIzrayeli va nga ndzulandzula lomu ciwuleni, ku wa hi ni ‘tihosana ta tlhangano, a zviro zva hubye, na va hi madhota ma dhumileko’, lava a 250 wa vona va nga ti patsa na Kora, na Dhatani, na Oni va vhukela Mosi na Aroni. (Mitse. 16:1-3) Hi ku landza cileletelo ca Nungungulu, Mosi i no hlawula a 70 wa madhota ya ka Izrayeli ma nga hi tihosana kasi ma mu vhuna a ku rwala ‘a ndzhwalo wa vanhu’, lowu a nga tsandzeka ku rwala yece. (Mitse. 11:16, 17, 24, 25) Levi 4:15 i kumbuka “a masingalakati ya ntlhangano”, niku zvi wonekisa ku khwatsi a vavanuna lava va nga yimela vanhu va wa hi masingalakati yabye, ni tihloko ta tixaka tabye, ni madhota yabye, ni valamuli vabye ni tihosana tabye. — Mitse 1:4, 16; Jox. 23:2; 24:1.
it-3-T 467 ¶4
Rubheni
Wugovelweni ga ka Izrayeli, a va ka Rubheni va wa gova hi le Dzongeni wa tabhernakeli va gamelwa hi va ka Simeyoni ni va ka Gadhi. Loku va hi kufambeni, a ntlawa lowu wa tixaka tinharu wu nga rangelwa hi Rubheni wu wa landzela a ntlawa wa tixaka tinharu, ku nga Judha, na Isakari, na Zebhuloni. (Mitse. 2:10-16; 10:14-20) Kuve xaxamelo lowu kambe va nga wu landzela ka siku legi a tixaka ti nga nyikela a munyikelo wa kukanguliwa ka tabhernakeli.— Mitse. 7:1, 2, 10-47.
w04-T 1/8 25 ¶1
Timhaka-tshinya ta bhuku ga Mitsengo
8:25, 26. Kasi ku khatalela a mitiro ya vaLevhi hi ndlela yi nene, na ku alakanyelwa kambe a tanga yabye, ku no nyikwa cileletelo ca lezvaku a vavanuna va kulileko va tlhatlhiwa mitirweni yabye ya cikurumeta. Hambulezvo, va wa ha ta vhunetela a vaLevhi lava van’wani hi kuzvirandza kabye. Hambu lezvi a vahuweleli va Mufumo va kalako va nga reformari nyamutlha, a tshinya ga nayo lowu gi nyika zvigondzo zva lisima. Loku a muKristu a nga ha zvi koti ku maha mitiro yokari hi kota ya tanga, a nga maha mitiro leyi yi nga ntan’wini wakwe.
Kela titshomba ta moya
it-3-T 327
Matewula
Kota lezvi a matewula ya cinuna ya vaIzrayeli ku nga lava va nga wa ta maha tihloko ta mingango yo tala, ka tlhatamano wabye, va wa yimela tiko gontlhe. Hi kota ya lezvo, Jehovha i wa wona tiko kota “matewula” yakwe, a tiko gakwe ga matewula hi kota ya civhumelwano leci a mahileko na Abrahama. (Ekso. 4:22) Kota lezvi a ponisileko wutomi gabye, Jehovha i layile lezvaku ‘zvontlhe zva matewula cikari ka vanana va ka Izrayeli, a vanhu hambu zvifuyo’, zvi basiselwa yena. (Ekso. 13:2) Hikwalaho, a matewula ya cinuna ma wa nyikelwe ka Nungungulu.
8-14 KA MARÇO
TITSHOMBA TI NGA KA MHAKA YA NUNGUNGULU | MITSENGO 9-10
“Lezvi Jehovha a rangelisako zvona a vanhu vakwe”
it-1-T 39 ¶6
Wugovelo
A kufambafamba ka wugovelo legi ga hombe gi suka hi ka wutshamu gin’we giya ka gin’wani (cipimo ca 40 wa matshamu va govileko ka wona ma hlawutelwako hi Mosi ka Mitsengo 33) conawu cive cikombiso co hlamalisa ca kuxaxameta. Contlhe cikhati leci a refu gi nga simama hehla ka tabhernakeli, a wugovelo gi wa nga suki ka wutshamu lego. Neti a refu gi suka, a wugovelo gonawu gi wo suka. ‘A vanana va ka Izrayeli va wo andlamuka hi ku leletelwa hi Jehovha, va tlhela va gova hi kuleletela kakwe’. (Mitse. 9:15-23) Ku wa hi ni mimpundzu yimbiri ya prata yo bethiwa yi nga nyika zvileletelo zva Jehovha ka wugovelo gontlhe. (Mitse. 10:2, 5, 6) Loku ku zwala kuvhuma ka mpundzu ko cicacica ku wa hi sinali ya ku a wugovelo gi wa suke. A kuvhuma loko ku zwele hi khati go sangula hi ‘lembe ga wumbiri [1512 A.E.C.], ka hweti ya wumbiri, hi siku ga wu 20’. Na ku rangile a arke ga civhumelwano, a ntlawa wo sangula lowu a hloko ya wona ku nga hi Judha wu no suka, ku gamela Isakari na Zebhuloni. Va wa landzelwa hi va ka Gerxoni ni va ka Merari na va rwele a zvibya zva tabhernakeli, kota ntiro wabye. Hi kulandzela, ku wa suka a ntlawa wa tixaka tinharu lowu a hloko ya wona ku nga hi Rubheni, ku gamela Simeyoni na Gadhi. Le ndzhako kabye ku wata a va ka Kohate na va rwele a zvibya zvo basa, zvonake ku landzela ntlawa wa tixaka tinharu, ku nga Efrayime ku gamela Manase na Bhenjamini. Hi kugumesa, le ndzhako ku wata a ntlawa lowu a hlolo ya wona ku nga hi Dhani na a pangalatiwa hi Axeri na Naftali. Hi ndlela leyo, a mitlawa yimbiri leyi yi nga hi ni vanhu vo tala ni va ntamu, a wun’we wu wa ranga phambeni lowu wun’wani wuta hi lendzhako. — Mitse. 10:11-28.
w11-T 15/4 4-5
Wa zvi wona a zvikombiso zva ku hi rangelwa hi Nungungulu ke?
Hi nga kombisa kuyini lezvaku ha zvi nyika lisima a ku rangelwa hi Nungungulu? Mupostoli Pawule i te ngalo: “Ingisani lava va mu rangelako, mu ti koramisa ka vona.” (Mah. 13:17) A hi contlhe cikhati zvi olovako a ku maha lezvo. Kasi ku kombisa: Ti wone na u hi muIzrayeli masikwini ya Mosi. Alakanyela ku andzhako ka ku ngha u fambile cikhati co kari a mhinga yi nyima. Yi ta tshama cikhati muni ka wutshamu lego? Yi ta tshama siku? Vhiki? Tihweti to tala? Wa ti wutisa ku: ‘Ndzi tlhatlhelela zvijumba zva mina zvontlhe ke?’ Kusanguleni, kuzvilava u nga tlhatlha lezvi zvi lavekako nguvhu. Hambulezvo, andzhako ka masiku yo kari, na u karele hi ku hangunuzela a zvilo zva wena, u sangula ku tlhatlhelela zvontlhe. Kanilezvi, zvalezvo u nga kusuhani ni ku mbheta ku tlhatlhelela u wona mhinga na yi ku tlaku — zvi lava ku u bohela kambe! Zvi wa nga ta olova kutani kunandziha. Hambulezvo, zvi wa lava ku a vaIzrayeli va tekela ku “andlamuka”. — Mitse. 9:17-22.
Hina ke, hi yini loku hi kuma zvileletelo zva Nungungulu? Ha tekela ku zvi tirisa ke? Kutani hi simama ku maha zvilo kota lezvi hi zvi tolovelesileko zvona? Ha zvi tiva a zvileletelo lezvi zva zviswa, zvo kota lezvi zva mafambisela ya zvigondzo zva Bhibhiliya, ku chumayela lava va wulawulako lirimi limbe, ku maha wukhozeli ga ngango hi kukhandzakanya, ku tirisana ni Tikometi ti Tirisanako ni Zvipitali, ni ku ti khoma khwatsi migotsovanyanweni ke? Hi komba kambe lezvaku ha bonga a wurangeli ga Nungungulu hi ku vhumela wusungukati. Loku hi lava ku maha zviboho zvo bindza, a hi tsumbi a wutlhari ga hina, kanilezvi hi hlota a wurangeli ga Jehovha ni hlengeletano yakwe. A ku fana ni n’wanana loyi a tsutsumelako ka vapswali vakwe kasi va mu vhikela loku kuba cingulo, hinawu hi tsutsumela hlengeletanweni ya Jehovha a cikhati leci hi biwako hi zvikarato zva tiko legi zvo khwatsi cingulo.
Kela titshomba ta moya
it-1-T 253 ¶5
Mutlhangano
Lisima la ku tlhangana. A lisima la ku londzowota hi kumbhelela a lulamiselo ga Jehovha ga ku tlhangana kasi hi vhuneka hi ka moya, li dlunyatiswa ka mubuzo wa Phasika wa lembe ni lembe. Ni wihi wanuna a nga hlazvekile ni ku ngha a nga hi lipfhumbeni kanilezvi a tsika ku maha Phasika ha womu, i wa fanele ku dawa. (Mitse. 9:9-14) A cikhati leci hosi Hezekiya a nga vitanisa a vaaki va Judha ni va Izrayeli lezvaku vaya Jerusalema va ya maha Phasika, a cipandzana ca mahungu yakwe, ci waku: ‘Va ka Izrayeli, tlhelelani ka Jehovha . . . Mu nga nonohisi tinhamu ta n’wina, khwatsi hi vadhadhani va n’wina; khomani a canja ga Jehovha, muta ndlwini yakwe yo basa a yi basisileko kala kupindzuka, mu ta khozela Jehovha Nungungulu wa n’wina, kasi a zanga yakwe yo tshisa yi fela ku suka ka n’wina . . . Jehovha Nungungulu wa n’wina i tele hi tipswalo ni wuxinji; cima a nga ta mu fularela loku mu tlhelela ka yena.’ (2 Kro. 30:6-9) Loku munhu i wa no kala kuya ha womu i wa ta komba lezvaku i ala Nungungulu. Hambu lezvi a tifesta leto, to kota Phasika, ti kalako ti nga mahiwi hi maKristu, Pawule i ma kucile a ku nga tsiki a ku hlengeletana hi kukhandzakanya ni vanhu va Nungungulu, aku: “A hi khatalelaneni kasi hi susumetana lirandzweni ni mitirweni yo saseka, na hi nga tsiki ku tlhangana, a ku khwatsi hi lezvi a van’wani va tolovelako ku maha, kanilezvi hi tiyisana, nguvhunguvhu kota lezvi mu wonako lezvaku a siku ga tshinela kusuhani.” — Mah. 10:24, 25; wona laha kaku CONGREGAÇÃO.
15-21 KA MARÇO
TITSHOMBA TI NGA KA MHAKA YA NUNGUNGULU | MITSENGO 11-12
“Hikuyini hi faneleko ku potsa a moya wa kukhala?”
w01-T 15/6 17 ¶20
Mu ngavi vazwi va rivalako
20 A maKristu hi kutala ka wona a mazi ma wela wubhayini. Hambulezvo, hi fanele ku ti wonela kasi hi nga weli ndleleni yi nga wa ta hi maha hiva vanhu vo tshamela ku khala, lezvi zvi nga wa ta hi maha hi nga tsakelwi hi Nungungulu. Pawule wa hi tlharihisa, aku: “Hi nga ringeni Jehovha, a ku khwatsi hi vokari [va vaIzrayeli] va nga mu ringa va gumesa va dawa hi tinyoka. Ne mu nga nguranguri, a ku khwatsi hi vokari vabye va nga ngurangura va gumesa va dawa hi mulovisi.” (1 Va Le Korinte 10:9, 10) A vaIzrayeli va ngurangurele Mosi na Aroni — hambu Nungungulu ha yece— va khala hi kota ya mana lawa va nga nyikwa hi cihlamaliso. (Mitsengo 16:41; 21:5) Xana Jehovha i khunguvanyisilwe kutsongwani hi kungurangura kabye a ku hundza wubhayi gabye ke? A matimu ya Bhibhiliya ma komba lezvaku ku delwe vanhu vo tala hi tinyoka hi kota ya ku ngurangura. (Mitsengo 21:6) Ka khati go kari mahlweni ka lezvo, ku delwe a 14 700 ni ku hundza wa vahluwuki va kungurangura. (Mitsengo 16:49) Hikwalaho, hi nga ringi a lihlazva-mbilu la Jehovha hi ku chepeta lezvi a hi nyikako.
w06-T 15/7 15 ¶7
‘U nga nguranguri’
7 A vaIzrayeli va wa nga no ku cica! A kubonga loku va nga hi nako kusanguleni hi kota ya lezvi va nga humesiwa Gibhite ni ku tlhatlhisiwa bimbini go Pswhuka ku wa va kucile a ku yimbelela tisimu va dhumisa Jehovha. (Eksodusi 15:1-21) Hambulezvo, a cikhati leci va nga hi ka ciyimo co kala kunandziha lomu ciwuleni ni ku chava vaKhanani, a kubonga ka vanhu va Nungungulu ku no vhaletwa hi moya wa kukhala. Wutshan’wini ga ku bonga Nungungulu hi lezvi va nga tlhatlhekile, va no mu nyika nandzu hi kota ya lezvi va nga zvi wonisa ku khwatsi vo tsoniwa. Hikwalaho, a kungurangura ku wa hi cikombiso ca ku nga bongi lezvi Jehovha a nga va nyika. A zvi hlamalisi lezvi a nga wutisa, aku: ‘Ku ta kala rini ndzi timisela hi tlhangano lowu wo biha, va ta maha gujeguje kala rini?’ — Mitsengo 14:27; 21:5.
it-1-T 100 ¶3
Kuholova
Kungurangura. A kungurangura ka mbheta ntamu ku tlhela ku hohlota. Na va ha hi ku huma hi Gibhite, a vaIzrayeli va no ngurangurela Jehovha, va sola a wurangeli legi Jehovha a nga va nyika hi ku tirisa a malandza yakwe Mosi na Aroni. (Ekso. 16:2, 7) Hi ndzhako ka cikhati, a zvikhalo zvabye zvi no mu mbheta ntamu Mosi laha ka kuza a kombela kufa. (Mitse. 11:13-15) A kungurangura ku nga daya loyi a ngurangurako. Jehovha i no wona a zvilo lezvi zvi nga wuliwa hi lava va nga ngurangurela Mosi kota kukhala ka wuhluwuki ga ku vhukela a wurangeli Gakwe wutsumbu. (Mitse. 14:26-30) A votala va no luza wutomi hi kota ya kusolasola.
Kela titshomba ta moya
it-2-T 748
Mana
Tshamela ga wona. A mana ma wa hi yo basa yo “fanana ni timbewu ta korianderi” niku ma wa ‘wonekisa’ ku khwatsi i bhedhelima ni ku khwatsi i sera na ma wonekela, ya tshamela go khwatsi i perola. Ma wa nandzihisa ku khwatsi ‘zvibabana zvi patsilweko ni wulombe’. Andzhako ka ku gayiwa hi cigayo ca mandla kutani ku ma dula, a mana ma wa bhikiwa kutani ku maha hi wona tibholu va woca. — Ekso. 16:23, 31; Mitse. 11:7, 8.
22-28 KA MARÇO
TITSHOMBA TI NGA KA MHAKA YA NUNGUNGULU | MITSENGO 13-14
“Lezvi a kukholwa ku hi tiyisisako zvona hlanha”
w06-T 1/10 16-17 ¶5-6
Va tiyiswa hlanha hi kukholwa ni kuchava Nungungulu
5 Hambulezvo, a tihloli timbiri, ku nga Joxuwa na Kalebhi va wa zvi lambele nguvhu a ku nghena Tikweni gi Tsumbisilweko. Va te ngalo: A vaKhanani “kuga ka hina”. ‘A va na wuponelo, hilezvi Jehovha i na hina; mu nga va chavi.’ (Mitsengo 14:9) Xana Kalebhi na Joxuwa va wova zvipumbu hi ku alakanya ku va ta nghena ke? Ahihi. Vona zvin’we ni tiko gontlhe va wa wonile Jehovha na a tsongahata Gibhite wa ntamu ni vanungungulu vakwe hi 10 wa makhombo. Hi kulandzela, va no wona Jehovha na a mbombomelisa Faro ni butho gakwe bimbini go Pswhuka. (Lisimu 136:15) Zva dlunyateka lezvaku a tihloli leti ta 10 ni lava va kucetelweko hi tona va wa nga hi na razawu ya ku chava. Jehovha i no kombisa a kupandza ka mbilu yakwe, aku: ‘A vanhu lava va ta ndzi kanyisa kala rini ke? Kala rini na va nga ndzi tsumbi, hambu loku ndzi mahile a zvihlamaliso zvontlhe lezvi cikari kabye?’ — Mitsengo 14:11.
6 Jehovha i no tekela kuya cinyeni ca cikarato — a wutoya legi a vanhu va nga hi nago gi wa komba ku a va kholwi. Ina, a kukholwa ni kutiya-hlanha i tapa ni kandarinya laha ka kuza mupostoli Johani a tsala xungetano hi bandla ga wuKristu ni yimpi ya gona ya moya, aku: “A kukholwa ka hina ku hlulile tiko.” (1 Johani 5:4) Inyamutlha, a kukholwa ko fana ni loku ka Joxuwa na Kalebhi ku mahile lezvaku a mahungu ya ma nene ya Mufumo ma chumayelwa misaveni yontlhe hi 6 wa timiliyoni ni ku hundza ta Vakustumunyu va Jehovha, a vaswa ni vahombe, lava va ntamu ni lava vo kala ntamu. A ku na nala a zvi kotileko a ku miyeta a butho legi ga ntamu ni go tiya hlanha.— Va Le Roma 8:31.
Kela titshomba ta moya
it-1-T 644
A tiko legi Nungungulu a nga nyika Izrayeli
A TIKO legi Nungungulu a nga nyika Izrayeli gi wa hi gi nene nguvhu. A cikhati leci Mosi a nga rumela a tihloli lezvaku ti ranga ti ya hlola a Tiko gi Tsumbisilweko ni ku khaya a mihandzu ya gona kota zvikombiso, ti no wuya ni makuwu, ni mapomegranadha, ni citata ca mauvha ci nga hi ca hombe nguvhu laha ka kuza ci lava ku pingiwa hi vavanuna vambiri! Hambu lezvi va nga hlehla hi kuchava, va bikile lezvi: “Hakunene i tiko gi khulungako masi ni wulombe.” — Mitse. 13:23, 27.
29 KA MARÇO-4 KA ABRIL
TITSHOMBA TI NGA KA MHAKA YA NUNGUNGULU | MITSENGO 15-16
“Ti wonele ka matshandza ni ku ti tsumba ku hundza mpimo”
w11 1/9 30 ¶12
Xana wa tiviwa hi Jehovha ke?
12 Hambulezvo, laha a tiko ga Izrayeli gi nga kongoma Tikweni gi Tsumbisilweko, Kora i lo sangula ku wona a malulamiselo ya Nungungulu hi mahlo man’wani. Hi kulandzela, ku lo humelela a 250 wa vavanuna va nga hi tihosana ta ntlhangano va ti patsa na Kora, va zama ku maha zvilo hi mawonela yabye. Kora ni vanghana vakwe va wa alakanya lezvaku Jehovha wa va tiva. Va te ngalo ka Mosi: ‘Zvi ringene, hakuva wontlhe tlhangano wu basile, na Jehovha i kona cikari ka wona!’ (Mitse. 16:1-3) Hi nga wona a kutitsumba ni matshandza ya vavanuna lava! Mosi i te ngalo kabye: “Jehovha i ta kombisa lava va nga vakwe.” (Gondza Mitsengo 16:5.) Hi mandziko wa kona ni gambo, Kora zvin’we ni vanghana vakwe vontlhe vo biha va wa delwe. — Mitse. 16:31-35.
w11 1/9 30 ¶11
Xana wa tiviwa hi Jehovha ke?
11 Mosi na Kora va hambana nguvhu mhakeni ya ku chava a malulamiselo ya Jehovha ni zviboho zvakwe. A matshamela yabye ma mahile lezvaku Jehovha a va wona hi ndlela yo hambana. Kora i wa hi muLevhi wa yindlu ya ka Kohate, niku i wa hi ni malungelo yo tala. I wa wonile a kutlhatlhisiwa ka Izrayeli Bimbini go Pswhuka, i wa seketele a kulamula ka Jehovha hehla ka vaIzrayeli va nga ingisiko Citsungeni ca Sinayi, a tlhela ava zvin’we ni lava va rweleko a arke ga civhumelwano. (Ekso. 32:26-29; Mitse. 3:30, 31) Handle ko kanakana, i tirele Jehovha hi kutsumbeka hi malembe yo tala, niku hi kota ya lezvo, a vaIzrayeli vo tala va wa mu komba cichavo.
Kela titshomba ta moya
w98-T 1/9 20 ¶1-2
Rangisa zvilo zva lisima!
Jehovha i wa nga woni mhaka leyo na yi hi mhaka yo hlakana. A Bhibhiliya gi wula lezvaku hi kufamba ka cikhati, ‘Jehovha i te ngalo ka Mosi: Loyi munhu i ta dawa.’ (Mitsengo 15:35) Hikuyini Jehovha a nga zangarisa lezvo hi kota ya lezvi a munhu loye a nga mahile?
A vanhu va wa hi ni 6 wa masiku kasi ku tshova tihunyi zvin’we ni ku khatalela zvilaveko zvabye mhakeni ya zvakuga, tinguwo, ni ka ku etlela kona. A siku ga wu 7 gi wa yimiselwe ku va khatalela zvilaveko zvabye zva moya. Hambu lezvi zvi nga kala zvi nga bihangi a ku tshova tihunyi, zvi wa bihile a ku tshova hi cikhati leci ci nga yimiselwe a ku khozela Jehovha. Hambu lezvi a maKristu ma nga hiko hasi ka Nayo wa Mosi, a cimaho leci ci hi gondzisa a ku tiva lezvi hi faneleko ku zvi rangisa inyamutlha. — Va Le Filipi 1:10.
5-11 KA ABRIL
TITSHOMBA TI NGA KA MHAKA YA NUNGUNGULU | MITSENGO 17-19
‘Hi mina tshomba ya wena’
w11 1/9 16 ¶9
Xana wa vhumela lezvaku Jehovha ava ciavelo ca wena?
9 Alakanya lezvaku a vaLevhi va wa nga nyikiwangi tshomba. Kota lezvi va nga rangisa a wukhozeli gi basileko, va wa fanele ku rindzela lezvaku Jehova a va hlayisa, hakuva i te ngalo kabye: ‘Mina ndzi ciavelo ca n’wina.’ (Mitse. 18:20) Hambu lezvi hi nga tiriko tempeleni ya civiri a ku fana ni vapristi ni vaLevhi, hi nga va pimanyisa hi ku tsumba lezvaku Jehovha i ta hi hlayisa. Laha a masiku yo gumesa ma yako ma mbhela, zva lisima nguvhu a ku tsumba lezvaku Nungungulu i ta hi hlayisa hakunene.— Kuv. 13:17.
w11 1/9 11 ¶4
Jehovha ciavelo ca mina
4 Xana lezvo zvi wa wula yini ka vaLevhi ke? Jehovha i wulile lezvaku i wa tava ciavelo cabye hakuva va wa nga ta kuma tshomba tikweni, kanilezvi va wa ta nyikiwa a ntiro wo hlawuleka. A tshomba yabye ku wa hi “wupristi ga Jehovha.” (Jox. 18:7) A bhuku ga Mitsengo xipimo 18 gi komba lezvaku Jehovha a nga va tsikangi va maha zvisiwana. (Gondza Mitsengo 18:19, 21, 24.) A vaLevhi va wa fanele ku nyikiwa ‘a minyikelo ya zvontlhe zva wukhume, lezvi zvi humeswako hi vanana va ka Izrayeli, kota tshomba yabye, hi kota ya ntiro wabye.’ Va wa fanele ku nyikiwa a zva wukhume zva mavele ni zva zvihari lezvi zvi pswaliwako. Hi tlhelo gabye, a vaLevhi va wa fanele ku humesa a cipandze ca wukhume ka lezvi va amukelako, a “cipandze ca kusaseka,” kasi va seketela a ntiro wa wupristi. (Mitse. 18:25-29) A ku hundza lezvo, a vapristi va wa nyikiwa “a minyikelo yontlhe leyi yi basileko” leyi a vanana va ka Izrayeli va nga yi nyikela ka Nungungulu. Hikwalaho, a vapristi va wa hi ni cigelo co zwala ca ku tiyiseka lezvaku Jehovha i wa ta va hlayisa.
Kela titshomba ta moya
g02-T 8/6 14 ¶2
A munyu i nchumu wa lisima
A munyu kambe wuve cikombiso ca kutiya ni kupindzuka. Hikwalaho, lomu ka Bhibhiliya a civhumelwano ca simasima ci wa vitanwa ku ‘civhumelwano ca munyu’. Lava va patsekako ka cona va wa tala kuga zvin’we, ni munyu, kasi ku ci tiyisa. (Mitsengo 18:19) A Nayo wa Mosi wu wa leletela lezvaku a miphahlo leyi yi nga nyikelwa laha alatini yi cheliwa munyu. Lezvo zvi wa hi cikombiso ca lezvaku a yi gohekangi kutani ku bola.
12-18 KA ABRIL
TITSHOMBA TI NGA KA MHAKA YA NUNGUNGULU | MITSENGO 20-21
“Simama kuva munhu wo rula hambu loku u karatiwa”
Ti karatele kuva munhu wo rula u tsakisa Jehovha
19 Hi ta potsa ku maha zvihoxo. Hi nga ehleketa kambe hi Mosi. I hanyile malembe yo tala na a hi munhu wo rula a tlhela a tsakisa Jehovha. Makunu, kumbheleni ka 40 wa malembe lawa va nga famba lomu ciwuleni, i no guma a tsandzeka kuva munhu wo rula. A makabye wakwe Miriyamu, loyi zvi wonekisako ku hi yena a nga ponisa wutomi gakwe le Gibhite, i wa ha hi kufa a lahliwa le Kadhexe. Ka khati lego, a vaIzrayeli va no ngurangura kambe va ku a va hlayisiwi khwatsi. Va wo “zangarela Mosi” va ku a va na mati. Hambu lezvi va nga wonile a zvihlamaliso zvontlhe zva Jehovha, ni lezvi Mosi a nga ti karatile a va rangela hi malembe yo hlaya, va no ngurangura. A va ngurangurangi hi ku vhumala mati basi, va ngurangurele na Mosi, a ku khwatsi hi yena a nga hi ni nandzu wa lezvi va ngazwa tora. — Mitse. 20:1-5, 9-11.
Ti karatele kuva munhu wo rula u tsakisa Jehovha
20 Laha Mosi a nga zangarile ku ku phum, i no tsika kuva munhu wo rula. Wutshan’wini ga ku wulawula laha ka ribye, a ingisa lezvi Jehovha a nga mu byelisile zvona, i no wulawula na a zangarele vanhu a tlhela a ku hi yena a nga wa ta maha cihlamaliso. I no guma aba ribye makhati mambiri, gi sangula ku huma mati yo tala. A matshandza ni zanga zvi mu mahile a wonha. (Lis. 106:32, 33) Mosi i tsandzekile ku nghena Tikweni ga Citsumbiso hi lezvi a nga tsika kuva munhu wo rula hi cikhatanyana basi. — Mitse. 20:12.
21 Ka matimu lawa, hi gondza zvilo zva lisima. Co sangula, hi fanele ku ti karatela ku simama hiva vanhu vo rula. Loku ho tshuka hi ku tsope hi cikhatanyana, hi nga tshuka hi tlhela ndzhako, hiva ni matshandza, hi wulawula hi tlhela hi maha zvilo zva wupumbu. Ca wumbiri, loku hi karatekile nguvhu, zvi nga tshuka zvi hi karatela ku simama hiva vo rula. Hikwalaho, hi fanele kulwa kasi hi simama kuva vanhu vo rula, hambu loku hi karatekile nguvhu.
w09-T 1/9 19 ¶5
Mulamuli a yimelako zvakululama
Co sangula, Nungungulu i wa nga leletelangi Mosi lezvaku a wulawula ni vanhu hi kukongoma, a ha ha wuli hi ku va lamula kota vahluwuki. Ca wumbiri, Mosi na Aroni va tsandzekile ku dhumisa Nungungulu. Nungungulu i te: ‘A mu ndzi basisangi.’ (Vhesi 12) Hi ku wula ku: “Hina hi ta mu humesela mati”, Mosi i wulawulisile ku khwatsi yena na Aroni— na ku nga hi Nungungulu — hi vona va nga wa ta humesa mati hi cihlamaliso. Ca wunharu, a tsayiselelo yi wa yelana ni kulamula ka Nungungulu zvikhatini zvi hundzileko. Nungungulu i wa sina a alele a cizukulwana ca vahluwuki mahlweni ka lezvo a ku nghena Khanani, hikwalaho i no maha zvalezvo ka Mosi na Aroni. (Mitsengo 14:22, 23) Ca wumune, Mosi na Aroni va wa hi varangeli va Izrayeli. Lava va nyikilweko zvotala va ta londziwa zvotala hi Nungungulu. — Luka 12:48.
Kela titshomba ta moya
Xana wa wona lava va nga ni gome kota lezi Jehova a va wonisako zona?
12 Ka makhati wontlhe lawo, Jehova na a tekele ku tsayisa Aroni kwalaho. Kanilezi i lo zi zwisisa lezaku Aroni i wa nga hi munhu wo biha. Zi wonekisa ku khwatsi Aroni i no vumela ku a ziyimo kutani kucetelo wa vanwani zi mu hambukisa ndleleni yi lulamileko. Hambulezo, a xikhati a nga kombiwa zihoxo zakwe, i lo tekela ku vumela a tlhela a vumela ku kawukiwa hi Jehova. (Ekso. 32:26; Mitse. 12:11; 20:23-27) Jehova i lo hlawula ku veka kupima kakwe ka kukholwa loku Aroni a nga hi nako ni kutisola kakwe. Anzhako ka zana ga malembe, Aroni ni vana vakwe va wa ha alakanyiwa kota vanhu va nga chava Jehova. — Tis. 115:10-12; 135:19, 20.
19-25 KA ABRIL
TITSHOMBA TI NGA KA MHAKA YA NUNGUNGULU | MITSENGO 22-24
“Jehovha i hundzula ciruko civa makatekwa”
bt-T 53 ¶5
Kanela a “mahungu ya ma nene xungetano hi Jesu”
5 Inyamutlha, a ku fana ni zaneni ga malembe go sangula, a kuxanisiwa ka vanhu va Nungungulu a ku zvi koti a ku nyimisa a ntiro wa kuchumayela. A ku kurumeta a maKristu lezvaku ma rura ka wutshamu gin’we maya ka gin’wani— kutani ku ma vhalela paxweni — zvo vhunetela a ku phandlusa a mahungu ya Mufumo ka vanhu matshan’wini lawo. Hi cikombiso, ka Yimpi ya Wumbiri ya Misava, a Vakustumunyu va Jehovha va zvi kotile ku nyika wukustumunyu ga ntamu tivaleni ta xanisa ta vaNazi. A muJudha wo kari a kumeneko ni Vakustumunyu seyo, i bika lawa: “A ntamu wa kutimisela wa zvibochwa lezvi zvi nga hi Vakustumunyu va Jehovha wu ndzi kholwisile lezvaku a kukholwa kabye ku seketelwa Mitsalweni — minawu ndzi seva Kustumunyu.”
it-2-T 717
Lihlanyi
A ku vhukela Jehovha wupumbu. Muphrofeti Bhalami hi wupumbu i wa lava ku phrofeta a vhukela Izrayeli hi ku fela ku amukela mali hi ka Bhalaki, a hosi ya vaMowabhi, kanilezvi Jehovha i no chela mati a tsandzekisa cikungo cakwe. Mupostoli Pedro i no tsala xungetano hi Bhalami, aku: “A mbongola, yi nga cihari co kala ku wulawula, yi no wulawula hi gezu ga munhu yi betela muphrofeti a ku simama ndleleni yakwe ya wupumbu.” Na a wulawula hi wupumbu ga Bhalami, a mupostoli i tirisile a gezu ga ciGreki, gaku: pa·ra·fro·ní·a, gi nga ni mongo wa ku khwatsi ku hlanya. — 2 Ped. 2:15, 16; Mitse. 22:26-31.
Kela titshomba ta moya
w04-T 1/8 27 ¶2
Timhaka-tshinya ta bhuku ga Mitsengo
22:20-22 — Hikuyini a zanga ya Jehovha yi nga vhurela Bhalami? Jehovha i wa byelile muphrofeti Bhalami lezvaku a nga rukateli a vaIzrayeli. (Mitsengo 22:12) Hambulezvo, a muphrofeti loyi i no famba ni vavanuna va Bhalaki hi kungo ga ku ya rukatela Izrayeli. Bhalami i wa lava ku tsakisa a hosi ya muMowabhi ni ku amukela nchachazelo hi kakwe. (2 Pedro 2:15, 16; Judha 11) Hambu a cikhati leci Bhalami a nga kurumetwa ku katekisa Izrayeli, a nga mu rukateli, i no lava ku dzundziwa hi hosi hi ku nyika a maalakanyo ya lezvaku ku tirisiwa a vavasati va nga khozela Bhaali kasi ku xenga a vavanuna va ka Izrayeli. (Mitsengo 31:15, 16) Hikwalaho, a zanga ya Nungungulu yi no vhura yi vhurela Bhalami hi kota ya wunavenave gakwe.
26 KA ABRIL–2 KA MAIO
TITSHOMBA TI NGA KA MHAKA YA NUNGUNGULU | MITSENGO 25-26
“A mitiro ya munhu mun’we yi nga vhuna votala ke?”
“Chavani wubhayi!”
A MUPHASI wa tinjhanjhi iya a ya ringela kutani ku veja lomu ku nga ni tinjhanjhi leti a ti lavako. Loku a chikela i vekela a xukwa yi randziwako hi tinjhanjhi leto laha ka cimemba (civejo) a gumesa a hoxela mika (lixinda) wakwe lomu matini. I tshama a rindzela kala a njhanjhi yi phasiwa a gumesa a yi kokela handle.
2 A vanhu vonawu va nga phasiwa. Hi cikombiso, a cikhati leci a vaIzrayeli va nga hi Mikoveni ya le Mowabhi, kusuhani nguvhu ni Tiko gi Tsumbisilweko, a hosi ya Mowabhi yi no tsumbisa Bhalami lezvaku yi ta mu nyika mali yo tala loku a zvi kota ku maha zvilo zvi to neha khombo ka vaIzrayeli. Hi kugumesa, Bhalami i no kuma ndlela ya ku a vaIzrayeli va ti nehela khombo ha voce. I no lava xukwa a nga wona ku yi ta phasa khwatsi. A xukwa ya kona vanhanyana va le Mowabhi. I no va rumela lomu a vaIzrayeli va nga hi kona kasi va ya kalavela a vavanuna va ka Izrayeli va wonha. — Mitsengo 22:1-7; 31:15, 16; Kuvhululelwa 2:14.
“Chavani wubhayi!”
4 Hikuyini a vaIzrayeli vo tala nguvhu va nga phasiwa hi ntlhamu wa Bhalami? Hi lezvi va nga kari va alakanyela ku ti tsakisa basi va rivakelwa zvontlhe lezvi Jehovha a nga va mahele. A vaIzrayeli va wa hi ni zvigelo zvo tala zva kuva va tsumbeka ka Nungungulu. Hi cikombiso, i wa va tlhatlhisile ka wukhumbi ga le Gibhite, a va hlayisa lomu ciwuleni kala va chikela khwatsi mbhinganweni wa Tiko gi Tsumbisilweko. (Mahebheru 3:12) Hambulezvo, va no vhumela ku kalavelwa va maha wubhayi. Mupostoli Pawule i tsalile lezvi: “Hi nga maheni wubhayi a ku khwatsi hi vokari vabye va nga maha wubhayi.” — 1 Va Le Korinte 10:8.
Kela titshomba ta moya
it-3-T 695 ¶8-9
Mbhingano
Hikwalaho, zvi wonekisa ku khwatsi ku wa hi ni zvilo zvimbiri zva tshinya zvi nga rangela a kuavelwa ka tiko: a hlamulo wa hlolo ni kukula ka lixaka lelo. Zvi wa koteka ku a tihlolo ti komba ntsena a wutshamu ga laha kusuhani ni legi a lixaka lin’we ni lin’wani li nga wa ta nyikwa kota tshomba, lezvi zvi nga wa ta maha ku a munhu a kuma tshomba ka wutshamu legi kutani legiya ga tiko, zvo kota tlhelweni ga n’walungu kutani dzongeni, mutsuwuka-gambo kutani mupela-gambo, mbhirini ya bimbi kutani tikweni ga zvitsunga. Lezvi a tihlolo ti nga wula, zvi wata hi ka Jehovha. Hikwalaho, zvi wa vhalela ciluse kutani kuholovisana cikari ka tixaka. (Mav. 16:33)
Andzhako ka loku a tihlolo ti kombile ku a lixaka lo kari li ta kuma tlhelo legi, zvi wa ha lava ku va gema a kukula ka cipandze leco na va landza a mhaka ya wumbiri: kukula ka lixaka lelo. ‘N’wina mu ta avela a tiko hi ku hlahluveta hi tinyangwa ta n’wina; ka lava votala mu ta va nyika a tshomba ya hombe; mu nyika a tshomba yi tsongwani ka lava va nga va tsongwani. Loyi ni loyi i ta kuma a ciavelo cakwe hi ku komba ka tihlolo’. (Mitse. 33:54) Lezvi a hlolo yi nga wula xungetano hi tlhelo legi a lixaka lo kari li nga wa ta kuma gona zvi wa simamisa zvezvo, kanilezvi zvi wa koteka ku a cipandze leco ci hungulwa kutani ku engetelwa. Hikwalaho, a cikhati leci ku nga poleka lezvaku a cipandze ca Judha ci wa hi ca hombe nguvhu, a cipandze ca tshomba yakwe ci no hunguliwa ci avelwa a lixaka la ka Simeyoni. — Jox. 19:9.