3-9 KA MAIO

Murindzeli 15/6/13 paj. 10 par. 14

¹⁴ A vanhanyana lava va ntlhanu va loya ka Mosi va yaku kakwe: “Xana a vito ga raru wa hina gi ta fuva lomu ka yindlu yakwe hi kota ya lezvi a nga kala ku siya a [mufana] ke?” Va no kombela vaku: “Hi nyikeniwo a tshomba cikari ka vamakabye va raru wa hina.” Xana Mosi i va hlamulile ku: ‘A ndzi nge mahi zvin’wani zvo hambana ni lezvi a nayo wu wulako’ ke? Ahihi. ‘Mosi i lo yisa a mhaka yabye mahlweni ka Jehovha.’ (Mitse. 27:2-5) I kumile yini? Jehovha i te ngalo ka Mosi: ‘A vanhanyana va Zelofehadhe va wula zvona. U ta va nyika tshomba cikari ka vamakabye va raru wabye, u va avela a tshomba ya raru wabye.’ Jehovha a nga nyimangi laho. I lo byela Mosi lezvaku a tsala magezu lawa kasi mava nayo, aku: “Loku munhu afa a nga siyangi [mufana], a tshomba yakwe mu ta nyika a nhanyana wakwe.” (Mitse. 27:6-8; Jox. 17:1-6) Kusukela kwalaho, a vavasati vontlhe va vaIzrayeli lava va nga tshuka vava ka ciyimo leci va wa ta vhikelwa hi Nayo.

Murindzeli 15/6/13 paj. 10 par. 15

¹⁵ Kunene, a ciboho leci ci kombile lezvaku Nungungulu mu nene niku a nga na cihlawulela! Jehovha i va nyikile wudzundzo a vavasati lava va nga hi hava munhu wo va vhikela a ku fana ni vaIzrayeli lava va nga hi ka matshamela ma nene. (Tis. 68:5) A matimu lawa mova cikombiso ntsena ca matimu yo tala ya Bhibhiliya lawa ma dlunyatisako a lisine leli lo khumba mbilu: Jehovha a nga na cihlawulela cikari ka malandza yakwe.— 1 Sam. 16:1-13; Miti. 10:30-35, 44-48.

Murindzeli 15/6/13 paj. 10 par. 16

¹⁶ Hi nga mu pimanyisisa kuyini Jehovha mhakeni ya ku nga hi na cihlawulela ke? Tiva lezvaku a ku nga hi na cihlawulela ku patsa zvilo zvimbiri. Ntsena loku hi nga hi na cihlawulela hi kona hi to tirisana ni vanhu na hi nga hlawuli nghohe. Hi lisine, hontlheni hi randza ku ti byela lezvaku a hi na cihlawulela. Hambulezvo, wa zvi tiva khwatsi lezvaku a hi cikhati contlhe zvi olovako ku ti hlola lezvi hi ti zwisako zvona na hi hi ni kungo ga ku chukwatisa laha zvi lavekako. Makunu, cini hi faneleko ku maha kasi hi tiva a tshamela ga hina? A cikhati leci Jesu a nga lava ku tiva lezvaku a vanhu ve hi yena mani, i lo wutisa a vanghana vakwe lava a nga va tsumba, aku: “A vanhu ve ngalo, hi yena mani a N’wana wa munhu?” (Mat. 16:13, 14) Hikuyini u nga pimanyisiko Jesu mhakeni leyi? U nga ha wutisa munghana wa wena loyi u zvi tivako ku i ta ku byela lisine laku u na ni cihlawulela ni ku a wu naco. Loku a ku byela lezvaku zvi wonekisa ku khwatsi u na ni ndzhohwana ya cihlawulela, ni ku wa cuwuka tinghohe ta vanhu, zvini u faneleko ku maha? Khongela ka Jehovha hi mbilu yontlhe xungetano hi tshamela legi ga hava, u mu kombela lezvaku a ku vhuna ku gi fuvisa kasi u mu pimanyisa hi kumbhelela mhakeni ya ku ngavi na cihlawulela. — Mat. 7:7; Kol. 3:10, 11.

Kela titshomba ta moya

Perspicaz vhol. 3 paj. 123 par. 7

Minyikelo

Minyikelo ya zvakunwa. A minyikelo ya zvakunwa yi wa mahiwa zvin’we ni minyikelo yin’wani, nguvhunguvhu andzhako ka loku a vaIzrayeli va chikele ka Tikweni ga Citsumbiso. (Mitse. 15:2, 5, 8-10) A minyikelo leyo yi wa patsa a vhinyo (“byala go kala ku dhakwisa”) niku gi wa chululiwa laha alatini. (Mitse. 28:7, 14; wona ni mongo wa Ekso. 30:9; ni Mitse. 15:10.) Mupostoli Pawule i tsalele maKristu ya le Filipu aku: “Loku ndzi chululiwa a ku khwatsi ndzi munyikelo wa vhinyo hehla ka muphahlo wa ntiro wo basa, ku nga ntiro lowu a kukholwa ka n’wina ku mu kucako ku maha, ndza tsaka.” Laha Pawule i tirisile a tshengo wa minyikelo ya zvakunwa kasi ku tlhamusela a ku ti nyiketela kakwe ka ku tirela maKristu. (Filp. 2:17) Na a hi kusuhani ni kufa i tsalele Timote aku: “Ndzi sina ndzi chululiwa a ku khwatsi ndzi munyikelo wa vhinyo, niku a cikhati ca lezvaku ndzi tlhatlhiswa ci chikele.” — 2 Tim. 4:6.

10-16 KA MAIO

“Maha lezvi u tsumbisako”

Perspicaz vhol. 3 paj. 801

Cifungo

A cifungo u maha hi ku zvi randza, kanilezvi loku uza u tsumbisa zvo boha a ku zvi maha. A zvifungo zvi wa mahiwa hi ku zvi randza hi ku mbhelela. Hambulezvo, a nayo wu komba lezvaku loku ci mahiwa hi wanuna zvo boha ku a tatisa lezvi a nga tsumbisa. Hikwalaho, a ku funga loko ku wa wula a ku ‘ti boha a muhefemulo wakwe’ lezvi zvi kombako ku a wutomi gakwe gi lahasi ka cifungo cakwe kasi ku tiyisekisa lezvaku lezvi a nga zvi tsumbisa i ta zvi tatisa. (Mitse. 30:2; wona ni Rom. 1:31, 32.) Kota lezvi a wutomi gi nga mhangweni zva zwisiseka a ku hikuyini a mitsalo yi hi kucako a ku hi ti wonela nguvhu na hi nga se maha a cifungo co kari, hi ku kambisisa khwatsi hi zvontlhe zvi lavekako kasi ku tatisa a cifungo leco. A nayo wu waku: ‘Loku u hlambanya cifungo ka Jehovha . . . Nungungulu wa wena i ta ci lavisisa ka wena zvonake u ta kumeka na u hi ni nandzu. Kanilezvi loku u nga hlambanyangi ku maha leco cilo, cima u nga ta kuva ni nandzu.’ — Deut. 23:21, 22.

Perspicaz vhol. 3 paj. 801

Cifungo

A cifungo citsumbiso co tiya leci a munhu a ci mahako mahlweni ka Nungungulu kasi ku maha nchumu wo kari, ku maha munyikelo wo kari, ku nghenela ntiro wo kari wa moya, kutani ku ti tsona a zvilo zvo kari zva ku ne a zvi bihangi. A cifungo ci wa hi citsumbiso co tiya ci nga mahiwa hi ku zvi randza na zvi sukela mbilwini. Kota citsumbiso co tiya, loku munhu a maha cifungo i wa fanele ku hlambanya niku ka zvikhati zvo kari a magezu cifungo ni ku hlambanya ma kumbukiwa zvin’we lomu ka Bhibhiliya. (Mitse. 30:2; Mat. 5:33) A “cifungo” kuwula ka kona basi; loku a munhu aku ndzi lava ku maha le’co kari. Kanilezvi, a “kuhlambanya” zvi komba ku a munhu loye i ti yimisele ku hambu loku zvi lava ku a ti hlamulela mahlweni ka wokari a nga ni wuhosi hehla ka yena loku a lava ku tiva lisine la lezvi a nga zvi wula ni lezvaku zvo boha ku a zvi maha. A kutala ka zvikhati a cihlambanyo ci wa longoloka ni civhumelwano. — Gen. 26:28; 31:44, 53.

Sentinela 1/8/04 paj. 27 par. 2

Timhaka-tshinya ta Bhuku ga Mitsengo

30:6-8 — A muKristu a nga betela a sati wakwe ku a tatisa cifungo cakwe ke? Xungetano hi zvifungo, zvezvi Jehovha i cuwuka munhu ni munhu lezvi a zvi fungileko. Hi cikombiso, a ku ti nyikela ka Jehovha cifungo leci a munhu a ti mahelako. (Va Le Galatiya 6:5) A nuna a nga na fanelo ya ku vhalela a sati wakwe a ku a maha cifungo leco kutani ku mu betela ku ci tatisa loku a mahile. Hambulezvo, a sati a nga faneli ku maha zvifungo zvi lwisanako ni Mhaka ya Nungungulu kutani zvi lwisanako ni lezvi zvi nga ntiro wakwe kota sati.

Kela titshomba ta moya

Perspicaz vhol. 2 paj. 482 par. 2

Jefta

Cikhatini leco, zvi wo mahiwa ku a munhu a nyikelwa kasi a ya hanyela ku tirela Jehovha basi le wutshan’wini go basa. A vapswali va wa hi ni fanelo ya ku va nga zvi maha lezvo. Samuweli mun’we wa lava va nga nyikelwa kasi va ya hanyela ku tirela Jehovha basi le tabhernakelini, hi cifungo leci a nga ci maha mamani wakwe Hana ne Samuweli na a nga se pswaliwa. Makunu, Elkana i zvi wonile na zvi ringana ku Hana a maha cifungo leco futsi. Neti Samuweli a nga tsika ku an’wa, Hana i no ya mu nyikela le wutshan’wini go basa. A cikhati a nga mu heleketa, i fambile ni cihari kasi va ya maha hi cona muphahlo. (1 Sam. 1:11, 22-28; 2:11) Samsoni ive ­n’wana mun’wani a nga nyikelwa kasi a hanyela ku tirela Nungungulu kota muNazira.— Vala. 13:2-5, 11-14; wona mongo lowo kambe wa fanelo leyi a papayi a nga hi nayo ka n’wana wakwe, lomu ka Mitse. 30:3-5, 16.

17-23 KA MAIO

Sentinela 1/8/10 paj. 23

U wa zvi tiva?

Kasi a “matshamu ma tlakukileko” lawa ma kumbukiwako nguvhu ka Mitsalo ya ciHebheru ku wuliwa yini?

Laha a vaIzrayeli va nga lava ku nghena Tikweni ga Citsumbiso, Jehovha i va byelile ku va fanele u khungumulela a matshamu wontlhe lawa a vaKhanani va nga khozela ka wona. I te: ‘Mu ta hlongola . . . zvontlhe zvifananiso zvabye, mu lovisa zvontlhe zvifananiso zvabye zvi nyekisilweko; mu khungumulela wontlhe matshamu yabye ma tlakukileko.’ (Mitsengo 33:52) A matshamu lawo va nga khozela kona zvifananiso kuzvilava ma wa kumeka laha kubaseni lomu hehla ka zvitsunga kutani ka matshamu man’wani yo kota lomu hasi ka tisinya ni lomu madhoropeni (1 Tihosi 14:23; 2 Tihosi 17:29; Ezekieli 6:3) Ka matshamu lawo ku wa hi ni maalati, zvifananiso zva Axtarte, mifananiso ya gambo ni zvin’wani zvi nga tirisiwa kasi ku khozela.

Sentinela 15/2/08 paj. 27 par. 5-6

Gondza ka zvihoxo zva vaIzrayeli

Inyamutlha hi kumana ni zvikarato tala zvo fana ni lezvi a vaIzrayeli va nga kumana nazvo. Lomu tikweni nyamutlha ku tele hi zvilo ni vanhu va ku va nga dzundziwa laha ka ku tlhela va khozelwa, vo kota: Vachayi, vabeli va bhola, varangeli va politika, mali, varangeli va wukhongeli, hambu hi maxaka ya hina. Phela hi nga tshuka hi wona a mun’we wa vanhu lavo kota wo ranga wutomini ga hina. Hikwalaho a ku hlakulela wunghana ga laha kusuhani ni vanhu va nga randziko Jehovha zvi nga wonha a wumoya ga hina.

A wubhayi go nyenyeza, legi gi nga hi cipandze ca lisima ka wukhozeli ga Bhaali gi kokile ni ku khohlisa vaIzrayeli vo tala. A mitlhamu yo fana ni leyo ya ha simama ku phasa a vanhu va Nungungulu nyamutlha. Hi cikombiso loku a wokari a vhulula a muchini na a hi yece lomu ndlwini loku a nga ti woneli a nga tshuka a ringeka ku sixtira zvilo lezvi zvi to wonha a livhalo lakwe la li nene. A zvo bayisa loku a muKristu a pela hi hloko ka ku sixtira a pornografia!

Perspicaz vhol. 1 paj. 417 par. 2

Khanani

Hi wutlhari Joxuwa ‘a nga siyangi ni nchumu ca lezvi Jehovha a leleteleko Mosi’ xungetano hi ku lovisa a vakhanani. (Jox. 11:15) Kanilezvi, a tiko ga Izrayeli gi no tsika ku landzela a wurangeli ga gi nene ka lezvo niku lovisa hi kumbhelela a cinya ca wukhozeli ga zvifananiso tikweni ga Khanani. A ku hanya ni vaKhanani zvi khumbile nguvhu a vaIzrayeli laha ka ku hi famba ka cikhati kufa a vanhu vo tala nguvhu (na ku nga patsiwi ni lava va ngafa hi tihanyi, wubhayi ni ku khozela a zvifananiso) a ku hundza loku va wa no ingisa cileletelo ca ku hlongola vontlhe a vaKhanani. (Mitse. 33:55, 56; Vala. 2:1-3, 11-23; Lis. 106:34-43) Jehovha i byelile a vaIzrayeli lezvaku a kululama kakwe ni ku lamula kakwe ku wa nga hi ka cihlawulela, niku loku a vaIzrayeli va sangula ku ti tlhanganisa ni vaKhanani hi ku tekana navo, ku hlengela navo wukhozelini, ku tekelela mikhuwo yabye ya wukhongeli ni mahanyela yabye yo biha, lezvo zvi wa ta va nehela a khombo go fana ni legi gi nga wa ta wela vaKhanani niku tlhela vava mhangweni ya ku ‘hlatiwa hi tiko.’— Ekso. 23:32, 33; 34:12-17; Levi 18:26-30; Deut. 7:2-5, 25, 26.

Kela titshomba ta moya

Perspicaz vhol. 3 paj. 695 par. 1

Mimbhingano

Andzhako ka loku va hlahluvile tihlolo va tiva cipandze ca lixaka lo kari, zvi wa lava ku va tsema mimbhingano ya cipandze leco, hi kuya hi nchumu wa wumbiri: Ku nga kukula kutani wutsongwani ga lixaka lelo. A Bhibhiliya gi wula lezvi: ‘Mu ta avela a tiko hi ku hlahluva hi tinyangwa ta n’wina; ka lava vo tala mu ta va nyika a tshomba ya hombe; mu nyika a tshomba yi tsongwani ka lava va nga va tsongwani. Loyi ni loyi i ta kuma a ciavelo cakwe hi ku komba ka tihlolo.’ (Mitse. 33:54) Hambu loku a tihlolo ti kombile ku a tiko go kari gi ta lumba a lixaka lo kari, zvi wa koteka ku tlhela va cica loku a cipandze leco ci hi ca hombe kutani ci hi ci tsongwani ka lixaka leli li hlawulilweko. Hikwalaho, a cikhati leci va nga wona ku a cipandze ca lixaka la ka Judha ci wa hi ca hombe nguvhu va no hungula va ci nyikela ka lixaka la ka Simeyoni. — Jox. 19:9.

24-30 KA MAIO

Murindzeli 11.17 paj. 10 par. 4

Wa tsutsumela ka Jehovha ke?

⁴ Kanilezvi ahati loku a muIzrayeli a daya munhu hi kuphazama ke? Ni kwalaho kambe, i wa hi ni nandzu hi kuva a dele munhu wo kala nandzu. (Gen. 9:5) Hambulezvo, ka zviyimo lezvo, Jehovha i te a munhu loye a nga mahelwa wuxinji. Ku wa hi ni 6 wa mimiti ya wuponelo leyi a muIzrayeli loye a nga daya mun’wani hi kuphazama a nga fanele ku tsutsumela ka yona kasi a nga dawi hi muphoteli. Loku a kala a chikela ka wun’we wa mimiti leyo, i wa vhikelwe. Kanilezvi i wa fanele ku tshama kwaseyo kala a mupristi wa hombe afa. — Mitse. 35:15, 28.

Murindzeli 11.17 paj. 11 par. 6

Wa tsutsumela ka Jehovha ke?

⁶ Loku a muIzrayeli a daya mun’wani hi kuphazama, i wa fanele ku tsutsuma aya mutini wa wuponelo a ya ‘tlhatlhambutela a nandzu wakwe’ ka madhota ma nga tshama laha nyangweni. A madhota ma wa fanele ku mu amukela. (Jox. 20:4) Andzhako ka cikhati co kari, ma wa ta mu tlhelisa a ya lamuliwa hi madhota ya muti lowu a nga daya ka wona munhu. (Gondza Mitsengo 35:24, 25.) Loku a madhota lawo ma wona ku hakunene i no phazama, ma wa fanele ku mu tlhelisa mutini wa wuponelo.

Murindzeli 11.17 paj. 12 par. 13

Wa tsutsumela ka Jehovha ke?

¹³ Loku a kala a nghena mutini wa wuponelo, a mudayi i wa vhikelwe. Jehovha i wa wulile lezvi xungetano hi mimiti leyo: ‘Yi tava wuponelo ga n’wina.’ (Jox. 20:2, 3) Jehovha i wa nga lavi ku a muwonhi loye a xuxisiwa kambe hi ciwonho caleci ca cin’we. A muphoteli yenawu i wa nga vhumelelwi kuya mutini wa wuponelo kasi ku ya mu daya. A mudayi i wa vhikelwe hi Jehovha mutini wa wuponelo. I wa nga hi paxweni. I wa zvi kota ku tira, a vhuna van’wani, a tlhela a tirela Jehovha kuruleni. Hi lisine i wa hanya na a tsakile!

Kela titshomba ta moya

Sentinela 15/2/91 paj. 13 par. 13

¹³ Hambulezvo, Adhamu na Evha va nga ta vhuneka hi hakhelo ya ku tlhatlhisa. A nayo wa Mosi wu wa hi ni tshinya legi ga nayo: ‘Mu nga dzuki mu amukela a ndzhiho wo tirula a wutomi ga munhu loyi a fanelako ku dawa.’ (Mitsengo 35:31) Adhamu a nga kalavelwangi. I wonhile ha womu; kutani ku i no zvi lava ku wonha. (1 Timote 2:14) Lezvi a nga zvi maha zvi fana ni ku daya pswalo wakwe, hakuva vontlhe va nga pswaliwa andzhako ka ciwonho cakwe, a va mbhelelangi, lezvi zvi mahako ku va guma vafa. Zva dlunyateka ku Adhamu i ringanelwa hi kufa futsi. Kota lezvi a nga hi munhu wo mbhelela, i no ti hlawulela ha homu a ku nga ingisi nayo wa Nungungulu. Loku Jehovha i wo tirisa a hakhelo ya kutlhatlhisa kasi ku ponisa Adhamu, zvi wa ta lwisana ni matshinya yakwe ya milayo yo lulama. Hikwalaho, a ku humesa hakhelo kasi ku tlhatlhisa Adhamu ciwonhweni cakwe, zvi wa ta maha ku a nga tsayisiswi kota lezvi zvi nga fanele — ku nga ku afa a lova! (Va Le Roma 5:16) Hi kuya hi nayo, a hakhelo ya kutlhatlhisa yi fuvisa ciwonho hi laha cinyeni ca kona, ci nga ha hi na ntamu wa ku daya. A mutlhatlhisi i “fela vanhu vontlhe” a tshovela wuyelo go bava ga ciwonho ca Adhamu — a ponisa vanhu vontlhe. — Mahebheru 2:9; 2 Va Le Korinte 5:21; 1 Pedro 2:24.

31 KA MAIO – 6 KA JUNHO

“Nungungulu hi yena a lamulako”

Sentinela 15/3/96 paj. 23 par. 1

Jehovha i randza kululama

A madhota ma yimisilweko lomu bandleni ma na ni wutihlamuleli ga ku lamula lava va nga maha zviwonho zvo tshisa. (1 Va Le Korinte 5:12, 13) Laha ma mahako lezvo ma zvi alakanya lezvaku a ku lulama ka Nungungulu ku ti karateka ku kombisa kuzwela wusiwana ni kwihi zvi lavekako. Loku ku nga hina cigelo ca lezvo — zvo kota loku a mu wonhi a nga ti soli ka ciwonho cakwe — a ku faneli ku zwela wusiwana. Kanilezvi a madhota a ma hlongoli muwonhi loye lomu bandleni kota ndlela ya ku mu tshovelisa lezvi a nga byela. Ma rindzela lezvaku a ku susiwa loko lomu bandleni zvi mu vhuna ku a ti sola. (Wona ni mongo wa Ezekieli 18:23.) Na ma hi lahasi ka wurangeli ga Kristu, a madhota ma tira kasi ku hlota ku lulama, lezvi zvi patsako ku mava ‘wuchavelo loku a moya wu bhubhutsa.’ (Isaya 32:1, 2) Ma fanele ku komba lezvaku a ma na cihlawulela niku ma na ni wunene. — Deuteronome 1:16, 17.

Sentinela 1/8/02 paj. 9 par. 4

⁴ Hambulezvo, kasi a munhu ava mulamuli, ku wa patseka zvotala zvo hundza ku tiva nayo. Lezvi hi nga kala ku mbhelela, a madhota le Izrayeli ma wa fanele ku ti wonela kasi a kungambheleli kabye ku nga va mahi va lamula hi ndlela ya hava. Ma wa nga faneli ku lamula hi ku landza lezvi a mbilu yabye yi zvi lavako, kuva ni cihlawulela, kutani hi ku fela ku wuyelwa. Mosi i ma byelile lezvi: ‘Mu nga lamuli hi ku cuwuka nghohe ya munhu; kanilezvi n’wina mu tazwa a timhaka ta ntsongwani kota timhaka ta wahombe; mu nga chavi ciyimo ca munhu, hakuva a kulamula kuta hi ka Nungungulu.’ Hi zvezvo, a valamuli le Izrayeli va wo tirisiwa hi Nungungulu kasi ku lamula. Lego gi wa hi thomo ga hombe nguvhu! — Deuteronome 1:16, 17.

Kela titshomba ta moya

Murindzeli 15/9/13 paj. 9 par. 9

⁹ A cikhati leci a vaIzrayeli va nga sangula lipfhumba labye la 40 wa malembe la ku tsemakanya ‘ciwula ca hombe co tshisa,’ Jehovha a nga va tlhamuselangi na ka ha hi mahlweni lezvi a nga wa ta va rangelisa zvona, ku va vhikela, ni lezvi a nga wa ta va hlayisisa zvona. Hambulezvo, i va mahele zvilo hi kuphindaphinda lezvi zvi nga komba lezvaku va wa fanele ku mu tsumba ni ku ingisa zvileletelo zvakwe. Hi ku tirisa mhinga ya refu ni mumu ni ya ndzilo ni wusiku, Jehovha i wa komba vaIzrayeli lezvaku i wa hi zvin’we navo a cikhati leci va nga tsemakanya a tiko lego ga ciwula ni ligwangwa. (Deut. 1:​19; Ekso. 40:36-38) I wa va nyika kambe a zvilo lezvi va nga zvi lava zva siku ni siku. “A tinguwo tabye a ti hlakalangi, ni mikondzo yabye cima a yi vhimbangi.” Hakunene, a “va nga vhumali nchumu.” — Neh. 9:19-21.

7-13 KA JUNHO

Perspicaz vhol. 1 paj. 817 par. 3

Kupima ku nene

Loku a munhu a ti karata a gondza Mhaka ya Nungungulu ni milayo yakwe a tlhela a yi tirisa, zvi nga maha ku ava ni wutlhari ga ku hundza lava va nge vagondzisi a tlhela a va ni wutivi a ku hundza vanhu va kulileko. (Lis. 119:99, 100, 130; wona mongo wa Luka 2:46, 47.) Lezvo zvi tano hakuva kasi a munhu ava ni wutlhari ni kupima ku nene, zvi yelana ni ku tiva zvileletelo zva Jehovha zvi basileko ni milayo yakwe yo lulama. Hikwalaho, loku a vaIzrayeli va tsumbeka va ingisa zvileletelo ni milayo leyo ya Nungungulu, zvi wa ta maha ku a vamatiko va va wona kota vanhu va “wutlhari ni kupima” ku nene. (Deut. 4:5-8; Lis. 111:7, 8, 10; wona mongo wa 1 Tih. 2:3.) A munhu a nga ni kupima ku nene wa zvi tiva ku a ku nga ingisi a milayo ya Nungungulu zvi neha khombo. Makunu leci a ci mahako i zama ku landzela milayo leyo, a tlhela a kombela Nungungulu kasi a mu vhuna. (Lis. 119:169) I tsika a mhaka ya Nungungulu yi khumba mbilu yakwe (Mat. 13:19-23), a yi tsala lomu mbilwini yakwe yo fananisa (Mav. 3:3-6; 7:1-4), a guma a sangula ku “venga tontlhe tindlela ta mawunwa” (Lis. 119:104). A cikhati leci a N’wana wa Nungungulu a nga hi laha misaveni, i kombisile kupima loko ka ku nene, laha a kuza a vhumela kufa laha mhandzeni ya hlomulo, hi lezvi a nga zvi tiva ku kasi a Mitsalo yi tatiseka i wa fanele ku fisa lezvo futsi. — Mat. 26:51-54.

Sentinela 1/11/99 paj. 20 par. 6-7

Loku ku haniwa nguvhu

Laha a muzindza a nga zvi wona a tlhela a zvizwa, i no hlamala aku: ‘Va katekile a vanhu va wena, ma katekile malandza ya wena, lawa ma yimako wontlhe masiku mahlweni ka wena ma ingisa wutlhari ga wena!’ (1 Tihosi 10:4-8) Hambu lezvi a malandza ya Solomoni ma nga hanya lomu ka titshomba to tala, a hi zvona zvi nga maha ku a muzindza aku ma katekile. Kanilezvi, i te ma katekile hi lezvi ma nga hi ni thomo go tshama hi kuzwa wutlhari ga Solomoni legi a nga nyikilwe hi Nungungulu. A muzindza loyi wa le Xebha, i va vekele cikombiso a vanhu va Jehovha inyamutlha lava va ti buzako hi wutlhari ga Muvangi wa hina ni ga N’wana wakwe Jesu Kristu!

A magezu man’wani ya lisima hi lawa muzindza a nga byela Solomoni hi kulandzela, aku: ‘A ku khesiwe Jehovha Nungungulu wa wena.’ (1 Tihosi 10:9) Ma komba ku i wa zvi wona ku hi Jehovha a nga mu nyika wutlhari ni titshomba Solomoni. Lezvo zvi yelana ni lezvi Jehovha a nga sina a tsumbisile vaIzrayeli, aku: A ku ingisa zvileletelo zva mina, zvi ‘tava wutlhari ni kupima ka n’wina le kuwoneni ka matiko lawa ma ta ngazwa hi milayo leyi yontlhe, va taku ngalo: Kunene, legi i tiko ga hombe, gi nga ni wutlhari ni kupima!’— Deut. 4:5-7.

Sentinela 1/8/07 paj. 29 par. 13

U ‘ganyile mahlweni ka Nungungulu’ ke?

¹³ Loku Jehovha a katekisa vanhu vakwe, contlhe cikhati i va nyika zva zvi nene ka zvontlhe. (Jakobe 1:17) Hi cikombiso, a cikhati leci a nga va nyika tiko a vaIzrayeli, i va nyikile tiko gi “khulungako a masi ni wulombe”. Hambu lezvi a tiko ga Gibhite gonawu ku nga wulilwe ku gi tshamisile zvezvo, legi Jehovha a nga nyika vaIzrayeli gi wa hambene ni legi ga vaGibhite hi ndlela yin’we hi wutsongwani ga kona. Mosi i byelile vaIzrayeli aku: ‘I tiko legi gi hlayiswako hi Jehovha Nungungulu wa wena.’ Lezvo zvi komba ku zvi wa ta va fambela khwatsi hakuva Jehovha i wa ta va hlayisa. Ka cikhati contlhe leci a vaIzrayeli va nga kari va tsumbeka ka Jehovha, i wa va katekisa zva cima va tlhela va hanya wutomi ga gi nene nguvhu a ku hundza vanhu va matiko wontlhe lawa ma nga va randzele. Hakunene, loyi a katekisiwako hi Jehovha hi yena a ganyileko! — Mitsengo 16:13; Deuteronome 4:5-8; 11:8-15.

Kela titshomba ta moya

Sentinela 15/9/04 paj. 25 par. 3

4:15-20, 23, 24 — A nawo wu betelako ku maha cifananiso ci vatlilweko wu betela ni ku maha zviphaphiwa zvo sasekisa hi zvona? Ahihi. Leci ci nga betelwa laha, ku maha cifananiso kasi ku ci khozela — a ku ‘khizama mahlweni ka zvona u zvi khozela.’ A Mitsalo a yi beteli ku vatla nchumu kutani ku maha dhezenyu wokari kasi ku sasekisa hi wona. — 1 Tihosi 7:18, 25.

14-20 KA JUNHO

Sentinela 15/6/05 paj. 20 par. 11

Vapswali, gondzisani vana va n’wina

¹¹ Mhakeni leyi, kuzvilava a ku na Mitsalo yin’wani yi tshahilweko nguvhu a ku pala Deuteronome 6:5-7. Hi kombela ku u vhulula Bhibhiliya ga wena u lera mavhesi lawa. Wona lezvaku a vapswali va kuciwa lezvaku va ranga hi vona va randza Jehovha, va randza a Mhaka yakwe va tlhela va yi chela timbilwini tabye. Hi zvezvo, n’wina vapswali, mu fanele ku ti karata mu lera a Mhaka ya Nungungulu, mu yi lera hi kukhandzakanya, mu ehleketa hi yona kasi mu yi zwisisa khwatsi mu tlhela mu randza tindlela ta Jehovha, matshinya yakwe ya milayo ni milayo yakwe. Lezvo zvi ta maha ku a timbilu ta n’wina ti tala hi lisine la Bhibhiliya lo nandziha leli li to mu nyika litsako, mu dzundza Jehovha mu tlhela mu mu randza. Loku mu maha lezvo, mu tava ni zvilo zvo tala va ku gondzisa vana va n’wana. — Luka 6:45.

Sentinela 15/5/07 paj. 15-16

Lezvi u zvi lavako, mawonela ya wena, mahanyela u ma nyikako lisima, ni lezvi zvi ku tsakisako, a zvi gumelwi laha ka lezvi u zvi wulako basi zvi woneka ni ka lezvi u zvi mahako. (Va Le Roma 2:21, 22) Kusukela wuhlangini, a vanana va gondza hi ku cuwukela a vapswali vabye. A vana va zvi wona lezvi zvi nga zva lisima ka vapswali vabye, ni ku lezvo zvi guma zviva zva lisima ka vonawu. Loku hakunene u mu randza Jehovha, a vana va wena va ta zvi wona. Loku u zvi nyika lisima a ku lera ni ku gondza Bhibhiliya, a vana va wena va ta zvi wona. Loku u rangisa ntiro wa Jehovha wutomini ga wena va ta zvi wona kambe. (Matewu 6:33) Loku u khandzakanya kuya mitlhanganweni ni kuchumayeleni, va ta zvi wona ku a ku khozela Jehovha hi wona nchumu wa lisima nguvhu ka wena. — Matewu 28:19, 20; Mahebheru 10:24, 25.

Sentinela 15/6/05 paj. 21 par.14

Vapswali, gondzisani vana va n’wina

¹⁴ Kota lezvi hi zvi wonako ka Deuteronome 6:7, ku ni zviyimo zvo tala lezvi n’wina vapswali mu nga bhulako hi zvilo zva moya ni vana va n’wina. A vapswali va nga kuma a tindlela ta ku khatalela a zvilaveko va vana vabye hi tlhelo ga moya loku va hi lomu kuendzeni, va maha mitiro ya laha kaya kutani loku va hi lomu ka ku humula zvin’we. U ngazi u ya hi ku tshamela ku va vekela tikanelo a vana va wena. Kanilezvi, zama ku a mabhulo ya n’wina kota ngango mava yo aka hi tlhelo ga moya. Hi cikombiso, a Khindlimuka! wu na ni tindzima to tala ti wulawulako hi timhaka to hambanahambana. A tindzima leto ti nga ku vhululela ndlela ya ku wulawula hi zvihari ku nga zvivangwa zva Jehovha, ku saseka ka ntumbuluko, niku ku saseka ka midhawuko ni zvilo zvi mahiwako hi vanhu va matiko yo hambanahambana. A mabhulo lawo ma nga maha ku a vaswa va zvi lava nguvhu a ku lera mabhuku ma humesiwako hi nandza go tsumbeka ni go tlhariha. — Matewu 24:45-47.

Kela titshomba ta moya

Murindzeli 02.19 paj. 22 par. 11

¹¹ Lezvi hi gondzako: Jehovha i wona zvo hundza lezvi a vanhu va zvi wonako. I wona lezvi hi nga zvona futsi hi le ndzeni — i wona mbilu ya hina. (1 Sam. 16:7) A ku na maalakanyo, kutizwa, ne mitiro a kalako a nga yi woni. I lava zva zvi nene ka hina a tlhela a hi kuca ku maha lezvo. Hambulezvo, i lava ku hi pola maalakanyo yo biha hi tlhela hi ma hlongola na hi nga se maha zva kubiha.— 2 Kro. 16:9; Mat. 5:27-30.

21-27 KA JUNHO

“Mu nga tekani navo”

Sentinela 1/7/12 paj. 29 par. 2

Hikuyini Nungungulu a nga laya lezvaku a malandza yakwe ma chadha ntsena ni lava va khozelako yena?

Jehovha i wa zvi tiva ku Sathani i lava ku chakisa vanhu va Jehovha hi ku va jikisa va khozela vanungungulu va mawunwa. Hi cigelo leco, i no va tlharihisa aku a vahedheni ‘va ta hambukisa a vana va wena va ndzi fularela, zvonake va ya khozela van’wani vanungungulu’. Ka mhaka leyi, zvi tele zvi nga hi mhangweni. Loku a tiko ga Izrayeli gi wo sangula ku khozela vanungungulu van’wani, Jehovha i wa nga ta ha va tsakela ne ku va vhikela. Makunu, zvi wa ta olova ku a valala vabye va va hlula. Loku lezvo zvi wa no maheka, Mesiya na a humele hi kwihi? Makunu, zva dlunyateka ku Sathani i wa hi ni cigelo ca ku kalavela vaIzrayeli va tekana ni vakhozeli va zvifananiso.

Murindzeli 15/03/15 paj. 30-31

A ku tekana ‘Hosini ntsena’ zva ha tira ke?

Hambulezvo, Jehovha i yimisile Mhakeni yakwe a cileletelo ca ku tekana Hosini ntsena. Hikuyini? Hakuva wa zvi tiva lezvi zvi nga zvi nene ka vanhu vakwe. A hi ku khwatsi o lava ku vhikela malandza yakwe ka mihandzu yo bayisa ya ku maha ciboho ca wupumbu ntsena kanilezvi i lava kambe lezvaku ma tsaka. Masikwini ya Nehemiya, laha a vaJudha vo tala va nga kari va tekana ni vamatiko lava va nga kala va nga khozeli Nungungulu, Nehemiya i kumbuka a cikombiso co biha ca Solomoni. Hambu lezvi Solomoni a nga ‘randziwa hi Nungungulu, . . . a vavasati va matiko va no mu wonhisa.’ (Neh. 13:23-26) Hikwalaho, hi ku randza malandza yakwe nyamutlha, Nungungulu i hi leletela ku tekana ni vakhozeli va lisine ntsena. (Lis. 19:7-10; Isa. 48:17, 18) A maKristu ya lisine ma bonga hi kukhatala ka lirandzo ka Nungungulu ma tlhela ma tsumba wurangeli gakwe ga wutlhari. Hi ku ti koramisa ma mu ingisa kota Hosi, ma komba lezvaku ma mu wona kota yena a nga Hosi ya Wuako gontlhe. — Mav. 1:5.

Murindzeli 15/8/15 paj. 26 par. 12

¹² A ku ti wonela ku tolovelana ni vakubiha zva lisima nguvhunguvhu ka maKristu ya magwendza lawa ma lavako ku chadha. A Mhaka ya Nungungulu yi nyika wusungukati legi go dlunyateka: ‘Mu nga bohelwi ntsungwa mun’we ni va nga kholwiko; hakuva kuhlengela muni cikari ka kululama ni kubiha ke? Kutani hi kwihi a kutlhangana ka kuwonekela ni munyama ke?’ (2 Kor. 6:14) A Bhibhiliya gi kuca a malandza ya Nungungulu lawa ma lavako ku chadha lezvaku ma tekana ‘hosini ntsena,’ lezvi zvi wulako ku tekana ntsena ni mukhozeli wa Jehovha a ti hendleletileko a tlhela a bhabhatiswa, loyi a hanyako hi lezvi a Mitsalo yi zvi gondzisako. (1 Kor. 7:39) Hi ku tekana ni vakhozeli-kulobye, a maKristu ma kuma vapangalati va ti hendleletileko ka Jehovha lava va to va vhuna ku simama va tsumbekile ka yena.

Kela titshomba ta moya

Sentinela 1/2/04 paj. 13 par. 4

⁴ Hi tolovela ku kombela Jehovha lezvaku a hi nyika ca kuga siku ni siku. Lezvo zvi fanele ku hi alakanyisa a zvilaveko zva hina zva moya kambe. Hambu lezvi Jesu a ngazwa a ndlala ya hombe andzhako ka loku a tshamile masiku yo tala na a ngagi nchumu i alile a ciringo ca Sathani ca ku cica a ribye gi maha pawa, hi ku wula lezvi: “Ku tsalilwe ku ngalo: ‘A munhu a nga hanyi hi zvakuga basi, kanilezvi i hanya hi timhaka tontlhe ti humako hi ka nomu wa Jehovha.’ ” (Matewu 4:4) Laha Jesu i tshahile a magezu ya muphrofeti Mosi, loyi a nga byela vaIzrayeli aku: ‘[Jehovha] i ku koramisile, i ku tsikile na u hi ni ndlala, i ku gisile manna, lawa u nga kala u nga ma tivi, lawa hambu vararu va wena na vona va wa nga ma tivi; aku kasi ku ku gondzisa lezvaku a munhu a nga hanyi hi cibaba coce, kanilezvi hi timhaka tontlhelele ti humako non’wini wa [Jehovha].’ (Deuteronome 8:3) Lezvi Jehovha a nga va hlayisisa zvona a vaIzrayeli hi manna, zvi va hanyisile hi tlhelo ga nyama zvi tlhela zvi va gondzisa cokari hi Jehovha. Co sangula, a vanhu va wa fanele ku huma ‘va rolela lezvi zvi ringanako ka siku ni siku’. Loku va rolela zvo hundza lezvi zvi nga laveka, lezvi zvi nga kari zvi sala zvi wo sangula ku nuha zvi huma zviwungwani. (Eksodusi 16:4, 20) Kanilezvi, lezvo zvi wa nga maheki ka siku ga wu 6, legi va nga fanele ku rolela zva siku lego ni zva mandziko wa kona, kasi vaga hi Sabhadho. (Eksodusi 16:5, 23, 24) Makunu a manna ma va gondzisile ku va fanele ku ingisa niku kasi va hanya ku wa nga laveki a zvakuga basi; kanilezvi, ku wa laveka ni ‘timhaka tontlhe ti humako non’wini wa [Jehovha].’

28 KA JUNHO–4 KA JULHO

Sentinela 1/10/09 paj. 10 par. 3-4

Jehovha i lava yini ka hina?

Cini ci nga hi kucako ku ingisa Nungungulu hi ku zvi randza? Mosi i wulile a cin’we ca zvona, aku: ‘Chava Jehovha Nungungulu wa wena.’ (Vhesi 12) A kuchava loko a hi loku ko tlhela u rurumela hi ku chava ku tsayisiwa; kanilezvi, kuchava ka ku nene — a cichavo hi Nungungulu ni tindlela takwe. Loku hi hi ni cichavo ca hombe hi Nungungulu, hi ta maha zvontlhe hi zvi kotako kasi hi nga mu khunguvanyisi.

Hambulezvo, cini nguvhunguvhu ci faneleko ku hi kuca ku ingisa Nungungulu? Mosi i te: ‘Randza Jehovha Nungungulu wa wena u tlhela u mu tirela hi mbilu yontlhe ya wena, ni muhefemulo wontlhe wa wena.’ (Vhesi 12) A ku randza Nungungulu zvi hundza lirandzo leli hi li zwako. A bhuku go kari gi tlhamusela lezvi: “A mavherbho ya ciHebheru ya kutizwa ko kari, ma patsa ni lezvi a munhu a zvi mahako hi kota ya kutizwa loko.” A bhuku galegi ga gin’we gi tlhela giku a ku randza Nungungulu zvi wula “ku kombisa lirandzo lelo hi mitiro.” Hi magezu man’wani, loku hakunene hi mu randza Nungungulu, hi ta maha lezvi hi tivako ku zva mu tsakisa. — Mavingu 27:11.

Sentinela 1/10/09 paj. 10 par. 6

Jehovha i lava yini ka hina?

A ku ingisa hi ku zvi randza, zvi hi nehela makatekwa. Mosi i tsalile lezvi: ‘Hlayisa zvileletelo. . . lezvi ndzi ku leletelako zvona nyamutlha, kasi u fela ku tshameka.’ (Vhesi 13) Lisine, zvontlhe a zvileletelo zva Jehovha — zvontlhe lezvi a hi rumako ku maha — i mahela ku zvi hi fambela khwatsi. A zvi koteki a ku a hi kombela ku maha nchumu wu to kala ku hi vhuna. Phela a Bhibhiliya gi li “Nungungulu lirandzo”. (1 Johani 4:8) Hikwalaho, i hi nyika zvileletelo lezvi zvi engetelako a ku tshamiseka ka hina kala rini. (Isaya 48:17) A ku maha zvontlhe lezvi Jehovha a zvi lavako zvi ta hi vhikela ka zvilo zvo tala zvo biha zvezvi niku zvi hi vhuna ku hi kuma makatekwa ya pindzukelwa cikhatini ci tako na hi rangelwa hi Mufumo wakwe.

Achegue-se a Jeová cip. 2 par. 2

² Abrahama mun’we wa lava va nga ti buza hi wunghana lego ga hombe. Jehovha i zile a vitana Abrahama a ku “munghana wa mina”. (Isaya 41:8, NM) Lisine, Jehovha i wa wona Abrahama kota munghana wakwe. Zvi kotekile ku Abrahama ava ni wunghana lego hi lezvi a nga “kholwa ka Jehovha”. (Jakobe 2:23) Ni nyamutlha kambe, Jehovha i hlota tindlela ta ku ‘randza’ lava va mu tirelako hi ku mu randza. (Deuteronome 10:15) A Mhaka yakwe yi hi kuca lezvi: “Tshinelani ka Nungungulu, yenawu i ta tshinela ka n’wina.” (Jakobe 4:8) Ka magezu lawa, ho rambiwa hi tlhela hi tsumbisiwa.

Kela titshomba ta moya

Perspicaz vhol. 1 paj. 127

VaAnake

Vanhu vo kari va lehela ga cima va nga hanya zvitsungeni zva Khanani ni le mbhirini ya bimbi, nguvhunguvhu hi le Sul. Ka nguva yo kari, le Hebroni ku wa hanya vavanuna vanharu va nduma va vaAnake vaku hi Ahimani, na Xexai, na Talmai. (Mitse. 13:22) Hi kwalomo a zvipiyawu zva 12 zva vaHebheru zvi nga sangula ku wona vaAnake, lezvi zva 10 zvi no guma zvi ya hlawutela zvilo zvo dzukisa, na va ti byela ku a vavanuna lava va wa hi vana va Zvihotlovila lezvi zvi nga hi kona na ku nga seva ni Ndambi ya Nowa. Va no wula lezvaku mahlweni ka zvihotlovila lezvo, a vaHebheru va wa ku khwatsi zvidodwani. (Mitse. 13:28-33; Deut. 1:28) Lezvi va nga kulisile zvona zvi zile zvi chikela laha ka ku loku va lava ku fananisa a kukula ka vavanuna vo zimuka vo khwatsi zvihotlovila va vaRefayime ni vaEmima va va fananisa ni vaAnake lavo. A ntamu wa vavanuna lavo kuzvilava hi wona wu nga maha lezvaku kuva ni vingu legi gaku “himani a ta nga tiya mahlweni ka vanana va ka Anake ke?” — Deut. 2:10, 11, 20, 21; 9:1-3.