Timhaka ta mabhuku ma tako ka Cibhukwana ca Mutlhangano

3-9 KA JANEIRO

TITSHOMBA TI NGA KA MHAKA YA NUNGUNGULU | VALAMULI 15-16

“A ku nga tsumbeki i tshamela go biha nguvhu!”

Murindzeli 15/04/12 paj. 14 par. 4

A kungatsumbeki cikombiso ca masiku yo gumesa!

⁴ A kusangula hi ta wulawula hi Dhelila loyi a khohlisileko a nuna wakwe Samsoni loyi a nga mu randza nguvhu. Samsoni i wa hi ni makungo ya ku yalwa ni maFilistia kasi ku vhuna a vanhu va Nungungulu. Kuzvilava, hi ku tiva lezvaku Dhelila i wa nga randzi Samsoni hi mbilu yontlhe, a ntlhanu wa tihosana ta maFilistia ti no mu xava hi mali yo tala lezvaku a xengetela Samsoni kala a mu byela a fihlakalo wa ntamu wa hombe lowu a nga hi nawo kasi va kuma ndlela ya ku mu daya. Dhelila i no vhumela, kanilezvi ka makhati manharu yo sangula a nga zvi kotangi a ku khohlisa Samsoni. Zvonake i no simama ku “mu karata wontlhe masiku hi timhaka takwe, a mu kurumeta.” Hi kugumesa, ‘a mbilu yakwe yi no karateka ga kufa.’ Hikwalaho i no mu byela lezvaku i wa nga se tshuka a tsema misisi yakwe, niku loku yi wo tsemiwa, a ntamu wakwe wu ta mbhela. Laha Dhelila a nga tiva lezvo, i no mu etlelisa madzolweni yakwe, a mu tsema misisi zvonake a mu nyikela mandleni ya valala vakwe lezvaku va maha ku randza ha yena. (Vala. 16:4, 5, 15-21) A hi kubiha ka lezvi a zvi mahileko! Hi kota ya makangwa, Dhelila i no tokometa a wanuna loyi a nga mu randza nguvhu.

Sentinela 15/01/05 paj. 27 par. 3

Timhaka-tshinya ta bhuku ga Valamuli

14:16, 17; 16:16. A ku rila ni ku ngurangura hi ku lava zvilo zvo kari zvi nga tshuka zvi wonha kuzwanana. — Mavingu 19:13; 21:19.

Murindzeli 15/04/12 paj. 17-18 par. 15-16

A kungatsumbeki cikombiso ca masiku yo gumesa!

¹⁵ Xana lava va chadhileko va nga zvi kotisa kuyini ku simama va tsumbekile ka vanghana vabye va wukati? A Mhaka ya Nungungulu yi ngalo: ‘Nengela ni sati [kutani nuna] wa wuswa ga wena. Hanya hi kutsaka ni sati [kutani nuna] loyi u mu randzako.’ (Mav. 5:18; Mutsh. 9:9) A cikhati leci a nuna ni sati va yako va khosahala, va fanele ku randzana contlhe cikhati hi tindlela tontlhe. Lezvo zvi wula ku chela kota mun’we ka mun’wani, ku mbheta cikhati na va hi zvin’we, ni ku tlhela vava vanghana vona vambiri. A vatekani va fanele ku ti karatela ku hlayisa a wukati gabye ni kuzwanana kabye na Jehovha. Kasi va zvi kota ku maha lezvo, va fanele ku gondza zvin’we a Bhibhiliya, va tira zvin’we sin’wini hi kukhandzakanya, va tlhela va khongela zvin’we lezvaku Jehovha a va katekisa.

SIMAMA KU TSUMBEKA KA JEHOVHA

¹⁶ Ku na ni vanhu lomu bandleni va mahileko zviwonho zva hombe va tlhela va ‘kawukiwa hi ntamu, kasi vava ni wutomi kukholweni.’ (Tit. 1:13) A van’wani zvi zile zvi lava ku va susiwa lomu bandleni. ‘Lava va wundlilweko hi kutsayiswa,’ va tshovele mihandzu yi nene hakuva va tlhelile va tiya hi tlhelo ga moya. (Mah. 12:11) Ahati loku hi hi ni xaka kutani munghana a susilweko bandleni ke? Mhakeni leyi kambe, hi fanele ku kombisa lezvaku hi vanhu vo tsumbeka ka Jehovha, na ku nga hi ka munhu loye. Jehovha i yimile a ku pswhe, a hi cuwukela lezvaku hi ta ingisa kutani hi nga ta ingisa a nayo wakwe waku hi nga wulawuli ni wihi loyi a susilweko bandleni. — Lera 1 Va Le Korinte 5:11-13.

Kela titshomba ta moya

Sentinela 15/03/05 paj. 27 par. 6

Samsoni i wa hi ni ntamu a nga nyikiwa hi Jehovha

Samsoni i wa ti yimisele ku tatisa kungo gakwe — a kulwa ni vaFilistiya, a valala va Nungungulu. Hi cigelo leco a nga ya etlela kaya ka wasati wa cibhayi le Gaza. Samsoni i wa nga hi na kungo ga ku maha wubhayi, kanilezvi i wo lava ka ku etlela kona ka tiko legiyani ga valala. I no vhuka cikari ka wusiku, a khoma a tivati ta nyangwa ya muti ni timhandze ta kona ta timbiri, a ti simula, a pinga makatleni yakwe a ti yisa le hehla ka citsunga leci ci cuwukeneko ni Hebroni, ci nga hi kwalomo ka 60 wa tikilometro. Zvi kotekile ku a maha lezvo hi ku vhumelelwa hi Nungungulu ni lezvi a nga mu nyika ntamu. — Valamuli 16:1-3.

10-16 KA JANEIRO

TITSHOMBA TI NGA KA MHAKA YA NUNGUNGULU | VALAMULI 17–19

“A ku nga ingisi milayo ya Jehovha zvi vanga zvikarato”

Perspicaz vhol. 2 paj. 385

Mika

1. Wanuna wa ka Efrayime. Mika i no yiva a 1100 wa zvingerengere zva prata zva mamani wakwe, a kanyisa nayo wa wu 8 ka leyi ya 10. (Ekso. 20:15) A cikhati a nga ya wula a ciwonho cakwe a tlhela a tlhelisa a zvingerengere lezvo, a mamani wakwe i te: ‘Hizvinene ndza nyikela ka Jehovha a silivha leyo, kasi a n’wana wa mina a fela ku mu vatlela a cifananiso cin’we, a wumbelwa cin’wani. Hikwalaho ndza yi tlhelisa ka wena.’ Andzhako ka loku Mika a tlhelisile a mali leyo, a mamani wakwe i no teka 200 wa zvingerengere a nyika munhu wokari a nga tira ku maha zvilo hi silivha kasi a mu mahela ‘cifananiso cin’we; a tlhela a wumba cin’wani’ kasi zvi vekiwa lomu ndlwini ya Mika. Mika, loyi a nga hi ni “yindlu ya vanungungulu”, i no ti mahela a efodhe ni terafime, a guma a hlawula a mun’we wa vafana vakwe kasi a maha mupristi wakwe. Hambu lezvi lezvo zvi nga wonekisa ku khwatsi zvi ta mu nyika wudzundzo Jehovha, hi lisine, zvi wa hi zvilo zvo biha, hakuva zvi wa lwisana ni nayo lowu wu nga betela ku khozela zvifananiso (Ekso. 20: 4-6) niku i wa kanyisile a nayo wa tempele ya Jehovha ni wupristi gakwe. (Vala. 17: 1-6; Deut. 12:1-14) Andzhako ka lezvo, Mika i no teka Jonatani, wa lixaka la Gerexome, a n’wana wa Mosi, a famba naye kaya kakwe. A teka Mulevhi loye a mu maha a mupristi wakwe! (Vala. 18:4, 30) Laha a nga tsaka hi ku maha zvilo lezvo zva hava i te ngalo: ‘Ndza zvi tiva makunu lezvaku Jehovha i ta ndzi katekisa.’ (Vala. 17:7-13) Kanilezvi Jonatani i wa nga hi wa lixaka la ka Aroni niku lezvo zvi wa maha ku a nga ringanelwi hi ku tira kota mupristi, makunu lezvo zvi mahile ku a zviwonho zva Mika zvi engeteleka. — Mitse. 3:10.

Perspicaz vhol. 2 paj. 385

Mika

Andzhako ka cikhatana, Mika ni grupo yakwe ya vavanuna vo no tsombana va landza a vanana va ka Dhani. Laha va nga va kuma va tlhela va va wutisa ku zvini zvi mu bayisako, Mika i te ngalo: ‘Hi lezvi mu tekileko vanungungulu va mina lava ndzi va mahileko, ni mupristi wa mina, mu famba navo.’ A tlhela aku: ‘Cini ndzi seleko naco?’ Hikwalaho, a vanana va ka Dhani va no tlharihisa Mika va ku loku o simama ku va landza na a va vangela guwa, va ta mu maha zva hava. Laha Mika a nga wona lezvaku a vanhu lavo va wa hi ni ntamu ku hundza yena, i no tlhela kaya kakwe. (Vala. 18:22-26) Andzhako ka lezvo, a vanana va ka Dhani va no hlasela va tlhela va hisa dhoropa ga Laixa, va guma va aka dhoropa ga Dhani laha tlhelweni. Jonatani ni vanana vakwe va no maha vapristi va va ka Dhani, lava va ‘ti yimiseleko a cifananiso ci vatlilweko, leci ci nga wa mahilwe hi Mika, contlhe cikhati leci a yindlu ya Nungungulu yi nga wa hi le Xilo.’— Vala. 18:27-31.

Kela titshomba ta moya

Murindzeli 15/12/15 paj. 10 par. 6

Wuhundzuluseli gi hanyako ga Mhaka ya Nungungulu

⁶ A zvigelo zva kuva a vito ga Nungungulu gi nga susiwi lomu ka Bhibhiliya a zvi hungulekangi, kanilezvi zvi no engeteleka. A Tradução do Novo Mundo gi chukwatisilweko ga 2013 hi ciNgiza gi chelile a vito ga Nungungulu 7216 wa zvikhati, lezvi zvi kombako kuengeteleka hi ntlhanu wa zvikhati ni cin’we ka wuhundzuluseli ga 1984. A ntlhanu wa zvikhati zvo engeteleka zvi kumeka ka 1 Samueli 2:25; 6:3; 10:26; 23:14, 16. A vito ga Nungungulu gi tlhelisilwe ka mavhesi lawo hi kota ya lezvi gi nga kona ka Mabhuku yo Songiwa ya Bimbi Gofa, lawa ma tsalilweko 1000 wa malembe mahlweni ka mitsalo ya Masoreta ya ciHebheru. Gi tlhelisilwe kambe ka Valamuli 19:18 hi kota ya zvigondzo zvo engeteleka zvi mahilweko ka mitsalo ya kale.

17-23 KA JANEIRO

TITSHOMBA TI NGA KA MHAKA YA NUNGUNGULU | VALAMULI 20-21

“Lava wusungukati ga Jehovha contlhe cikhati”

Sentinela 15/09/11 paj. 32 par. 2

U nga pimanyisa Finiyasi loku u kumana ni zvikarato?

Andzhako ka loku a vavanuna va le Gibheya, va lixaka la ka Bhenjamini, va dele sati wa mulevhi wo kari, a tixaka leti tin’wani ti no ti longisela kasi kulwa ni va ka Bhenjamini. (Vala. 20:1-11) Na va nga seya va yalwa navo va no sangula hi ku kombela civhuno ka Jehovha, kanilezvi va no hluliwa makhati mambiri, va tlhela va luza zvotala. (Vala. 20:14-25) A ku va alakanyile ku Jehovha i wa nga ingiseli mikhongelo yabye? A ku Jehovha i wa zvi lava futsi a ku va ti photela ka lezvi a vavanuna va le Gibheya va nga va mahele?

Sentinela 15/01/05 paj. 27 par. 7

Timhaka-tshinya ta bhuku ga Valamuli

20:17-48 — Hikuyini Jehovha a nga tsika va ka Bhenjamini va hlula tixaka leti tin’wani makhati mambiri, kuveni vona va wa fanele ku tsayisiwa? A kuva Jehovha a vhumele ku a tixaka to tsumbeka kusanguleni ti kuxaniseka hi ku luza zvotala, zvi mahile ku a hlola a wona ku va ti yimisele ku fuvisa zvobiha lomu Izrayeli ke.

Sentinela 15/09/11 paj. 32 par. 4

U nga pimanyisa Finiyasi loku u kumana ni zvikarato ke?

Hi gondza yini ka lezvo? A zvikarato zvo kari hi kumanako nazvo lomu bandleni zvi simama kuva kona hambu lezvi a madhota ma ti karatako ni ku maha mikhongelo na ma kombela civhuno ca Nungungulu. Ka mhaka leyi zva lisima ku a madhota ma alakanya magezu ya Jesu, yaku: “Simamani ku kombela [kutani ku khongela], mu ta nyikiwa; simamani ku lava, mu ta zvi kuma; simamani ku gongondza, mu ta vhululelwa.” (Luka 11:9) Hambu loku a hlamulo wa mukhongelo wu wonekisa ku khwatsi wo hlwela, a madhota ma nga tiyiseka lezvaku Jehovha i ta hlamula hi cikhati ca kona.

Kela titshomba ta moya

Murindzeli 1/05/14 paj. 11 par. 4-6

U WA ZVI TIVA?

Ti wa tirisiswa kuyini a tingoti ta wundandi tiyimpini ta kale?

A lingoti la wundandi i tlhari legi Dhavhidha a nga gi tirisa kasi ku daya Goliyate. Ko khwatsi Dhavhidha i gondzile ku tirisa tlhari lego ka malembe lawa a nga hi murisi.— 1 Samueli 17:40-50.

A lingoti la wundandi li kona ka zvithombe zva vaGibhite ni vaAsiriya va cikhatini ca kutsaliwa ka Bhibhiliya. Li wa wumbiwa hi bhebhe kutani nguwo yi nga ni khelana laha cikari na yi bohilwe tingoti timbiri. Lomu ka cikhelana leco, a munhu i wa chela ribye go ringana ni cidin’wana na gi bindza cipimo ca 250 wa magrama. I wa ndziwilitela a lingoti lelo a gumesa a tsika choka yin’we kasi a ribye gi famba hi ntamu wa hombe gi tlhela gi nga phukwi.

Le Oriente Médio ku vhevhulelwe zvilo zvo tala zvi kombako ku a tingoti ta wundandi ti wa tiriswa nguvhu tiyimpini ta kale. Kuzvilava a masochwa lawa ma nga zvi tiva khwatsi ku tirisa tingoti leto ma wa hoxela maribye ma famba cipimo ca 160 kuya ka 240 wa tikilometro hi hora. A titlhari a ti vhumelelani lezvaku a lingoti la wundandi li ngaza li fana ni wura, kanilezvi lonawu la daya. — Valamuli 20:16.

24-30 KA JANEIRO

TITSHOMBA TI NGA KA MHAKA YA NUNGUNGULU | RUTE 1-2

“Ti karatele kuva ni lirandzo li nga mbheliko”

Murindzeli 02.16 paj. 14 par. 5

Pimanyisa a vanghana va Jehovha

⁵ Zvi wa olova ku Rute a ti byela lezvaku a maxaka yakwe ma le Mowabhi. Ku wa hi ni mamani wakwe ni maxaka man’wani lawa ma nga wa ta mu amukela ma tlhela ma mu hlayisa. Mowabhi gi wa hi tiko gakwe ga mabeleko. A mahanyela ya Mowabhi, ni lirimi, ni vanhu va kona i wa zvi tolovele. Nawomi i wa nga hi na ku mu tsumbisa lezvaku i ta ya kuma zvilo lezvo le Bhetlehema. Hikwalaho, i no khongotela Rute lezvaku a sala Mowabhi. Nawomi i wa chava ku kala a nga zvi koti ku mu lavela nuna kutani ku mu lavela muti a katamwane wakwe. I wa ta maha yini Rute? Wona a kuhambana ku nga hi kona cikari ka Rute na Orpa, loyi a tlhelileko kaya “kabye ni ka nungungulu wa ka kabye”. (Rute 1:9-15) Xana Rute i wa zvi lava ku tlhela ka vanungungulu va ka kabye? Ahihi.

Murindzeli 02.16 paj. 14 par. 6

Pimanyisa a vanghana va Jehovha

⁶ Zvi wonekisa ku Rute i wa gondzile zvokari ha Jehovha Nungungulu, kuzvilava ka nuna wakwe kutani ka Nawomi. Jehovha i wa nga fani ni vanungungulu va Mowabhi. Rute i wa zvi tiva lezvaku Jehovha wa faneleka hi ku randziwa ni ku khozelwa. Hambulezvo, a ku tiva lezvo basi zvi wa nga eneli. I wa fanele ku maha ciboho. I wa ta hlawula Jehovha kota Nungungulu wakwe ke? Rute i hlawulile hi wutlhari. I te ngalo: ‘A vanhu va wena vanhu va minawu; a Nungungulu wa wena i Nungungulu wa minawu.’ (Rute 1:16) A ku ehleketa hi lirandzo leli Rute a nga hi nalo hi Nawomi zva khumba mbilu, kanilezvi a lirandzo lakwe ka Jehovha hi lona li nga la lisima nguvhu. Hi ndzhako ka cikhati, Bhowazi i lo mu dzundza hi lezvi a lavileko wuponelo hasi ka tipapa ta Jehovha. (Lera Rute 2:12.) Lezvo zvi nga hi alakanyisa a vhinyani gi fihlalako hasi ka tipapa ta mupswali wa gona. (Lis. 36:7; 91:1-4) Jehovha i nova mupswali wo kota loye ka Rute. I no mu chachazela hi kukholwa kakwe, niku a nga tshukangi a vile ni cigelo ca ku ti sola hi ciboho cakwe.

Kela titshomba ta moya

Sentinela 1/03/05 paj. 27 par. 2

Timhaka-tshinya ta bhuku ga Rute

1:13, 21 — Xana hi Jehovha a nga mu vangela hlomulo Nawomi ni ku mu tlulisa mihumbo? Ne ni kutsongwani, Nawomi kambe a nga tshukangi a lumbeta Nungungulu a ku i mu mahele zvo biha. Hambulezvo, hi kota ya zvontlhe lezvi zvi nga mu humelele i wa alakanya ku Jehovha i wo mu vhukela. I wa tizwa na a karatekile nguvhu a tlhela a mbhela ntamu. A cin’wani kambe, cikhatini leco a kuva ni vana zvi wa woniwa kota makatekwa ya Nungungulu niku a kuva ngon’wa zvi wa hi khombo. Kota lezvi a nga kala a nga hi na vazukulu ni lezvi a nga felwe hi vana vakwe va vambiri, kuzvilava Nawomi i alakanyile ku Jehovha i mu tsikile.

31 KA JANEIRO–6 KA FEVEREIRO

TITSHOMBA TI NGA KA MHAKA YA NUNGUNGULU | RUTE 3-4

“Ti mahele vito gi nene”

Sentinela 1/10/12 paj. 22 par. 5

“Wasati wa mu nene nguvhu”

Handle ko kanakana, a ma wulawulela ya manene ya Bhowazi ma mu chavelele Rute. I wulile lezvi: ‘Jehovha a ku katekise. U kombisile wunene ka mina ku hundza kusanguleni, hakuva a wu landzelangi majaha yo fuma hambu ya zvisiwana.’ (Rute 3:10) A gezu “kusanguleni” gi komba lirandzo li nga mbheliko la Rute hi lezvi a nga tlhela zvin’we na Nawomi le Izrayeli a tlhela a mu khatalela. Bhowazi i wa zvi tiva lezvaku a wasati wa muswa wo kota Rute zvi wa mu olovela ku hlawula nuna a nga jaha, ku nga hava wa cisiwana kutani wa ciganyi. Rute i wa nga lavi ku mahela Nawomi yece a zva zvi nene kanilezvi i wa lava ku mahela kambe ni nuna wa Nawomi a nga file. I wa lava ku simamisa a vito ga matsuva Elimeleki tikweni gakwe. Zva olova ku wona a ku hikuyini Bhowazi a nga tsakisiwa hi wasati loyi wo kala makangwa.

Sentinela 1/10/12 paj. 23 par. 1

“Wasati wa mu nene nguvhu”

Zva koteka ku ngha Rute a tsakile nguvhu a cikhati leci a nga alakanyela a magezu ya Bhowazi yaku — i wa tiviwa hi vontlhe vanhu kota wasati wa mu nene nguvhu. Handle ko kanakana a kutiyimisela kakwe a ku gondza xungetano hi Jehovha ni ku mu tirela zvi mu vhunile a kuva ni nduma yi nene. A cin’wani kambe hi lezvaku i wa kombisile wunene ga hombe ni kukhatala hi Nawomi ni vanhu vakwe, a ti yimisela ku gondza tindlela ni mikhuwo leyi a nga kala a nga yi tolovelangi. Loku hi pimanyisa a kukholwa ka Rute, hi ta kombisa cichavo ca hombe nguvhu hi vanhu ni mikhuwo yabye. Loku hi maha lezvo, hinawu hi ta tiveka kota vanhu va va nene nguvhu.

Sentinela 1/10/12 paj. 24 par. 3

“Wasati wa mu nene nguvhu”

Bhowazi i no chadha na Rute. Zvini zvi nga guma zvi maheka? Hi lera lezvi: ‘Jehovha i no mu nyika rumbu, a pswala mufana.’ A vavasati va Bhetlehema va no tsaka zvin’we na Nawomi va tlhela va dzundza Rute hi lezvi a nga khatala nguvhu hi Nawomi ku hundza ntlhanu wa vafana ni vambiri. Andzhako ka cikhati, a n’wana wa Rute i nova kokwani wa Hosi ya hombe Dhavhidha. (Rute 4:11-22) Dhavhidha yenawu i nova kokwani wa Jesu Kristu. — Matewu 1:1.

Kela titshomba ta moya

Sentinela 1/03/05 paj. 29 par. 3

Timhaka-tshinya ta bhuku ga Rute

4:6 — Loyi a nga lava ku tirula tshomba ya xaka gakwe i wa ta “lahlekelwa” hi tshomba yakwe hi ndlela muni? Co sangula, loku a wokari a xavisile petso wakwe hi kota ya wusiwana, a mutirule i wa fanele ku xava petso lowo hi ntsengo wu yelanako ni malembe ma nga kiyela kasi ku chikela a Jubhilewu yi nga landzela. (Levi 25:25-27) Lezvo zvi wa ta hungula ntsengo wa titshomba takwe. A handle ka lezvo, loku Rute i wova ni n’wana, hi yena a nga wa ta tirula petso lowo wu xavilweko, na ku nga hi ni gihi xaka ga laha kusuhani ga mutirule.

7-13 KA FEVEREIRO

TITSHOMBA TI NGA KA MHAKA YA NUNGUNGULU | 1 SAMUELI 1-2

“Chulula mbilu ya wena ka Jehovha hi mukhongelo”

Pimanyisa a kukholwa kabye paj. 55 par. 12

I no chulula a mbilu yakwe ka Nungungulu hi mukhongelo

¹² Hana i ma vekele cikombiso ci nene a malandza wontlhe ya Nungungulu loku zvita mhakeni ya ku khongela. Jehovha i ramba vanhu vakwe hi wunene lezvaku va chulula timbilu tabye kakwe na va nga chavi nchumu, va mu byela lezvi zvi va karatako a ku fana ni lezvi a n’wanana a mahako ka papayi wakwe wo randzeka. (Lera Lisimu 62:8; 1 Va Le Tesalonika 5:17.) Mupostoli Pedro i pimiselwe ku tsala magezu lawa yo chavelela xungetano hi ku khongela ka Jehovha. I te: “Vekani a kukarateka ka n’wina kontlhe hehla kakwe hakuva wa mu khatalela.” — 1 Ped. 5:7.

Sentinela 15/03/07 paj. 18 par. 4

Hana i ku kumisile kuyini kurula?

Hi gondza yini ka zvontlhe lezvo? Laha hi khongelako ka Jehovha xungetano hi zvikarato zva hina, hi nga mu byela lezvi hi ti zwisako zvona hi tlhela hi khongela na zvi huma mbilwini. Loku hi nga ha tivi co maha kasi ku lulamisa cikarato, a ku na ca chukwana caku hi nga maha; hi fanele ku ci tsika mandleni ya Jehovha. — Mavingu 3:5, 6.

Kela titshomba ta moya

Sentinela 15/03/05 paj. 21 par. 5

Timhaka-tshinya ta bhuku ga Samuweli wo sangula

2:10 — Hikuyini Hana a nga kombela Jehovha lezvaku a yi ‘nyika ntamu a hosi yakwe’ kuveni le Izrayeli ku wa nga hi na munhu a nga hi hosi ka cikhati leco? A mhaka leyi ya ku a vaIzrayeli va wa tava ni hosi ya munhu wa nyama yi wa phrofetilwe ka Nayo wa Mosi. (Deuteronome 17:14-18) Ka ciphrofeto leci a ci mahileko na a hi kusuhani ni kufa, Jakobe i te ngalo: ‘A wuhosi [a cikombekiso ca wurangeli ga lisine] cima gi nga ta suka ka Judha.’ (Genesisi 49:10) A handle ka lezvo, Jehovha i wulile lezvi xungetano hi Sara — a mamani wa vaIzrayeli: “A tihosi ta vanhu ti ta huma hi ka yena.” (Genesisi 17:16) Hikwalaho, Hana i wa khongela xungetano hi hosi leyi yi nga hata.

14-20 KA FEVEREIRO

TITSHOMBA TI NGA KA MHAKA YA NUNGUNGULU | 1 SAMUELI 3-5

“Jehovha wa khatala hi hina”

Murindzeli 09.18 paj. 24 par. 3

Jehovha i Nyamintamu, hambulezvo wa khatala hi vanhu

³ Samuweli i sangulile ku tira tabhernakelini na a ha hi cifanyana. (1 Sam. 3:1) Ka wusiku go kari, ku humelele zvilo zvo kala ku toloveleka na a etlele. (Lera 1 Samueli 3:2-10.) Samuweli i zwile wokari na a mu vitana, a pimisa ku i wo vitaniwa hi Mupristi wa Hombe, Eli, loyi ka cikhati leco a nga kulile hi tanga. Hikwalaho i no ingisa, a vhuka a tsutsuma aya ka Eli a yaku: ‘Ndzi tile, kota u ndzi vitanileko.’ Kanilezvi Eli i te: ‘A ndzi ku vitanangi.’ Andzhako ka loku a vitanilwe kambe aya ka Eli hi makhati mambiri, Eli i no zvi tiva ku hi Nungungulu a nga kari a vitana Samuweli. Hikwalaho Eli i no byela Samuweli lezvi a nga fanele ku wula loku a vitaniwa kambe, niku Samuweli i no ingisa. Hikuyini Jehovha a nga kala ku tekela ku byela Samuweli ku hi Yena a nga kari a mu vitana? A Bhibhiliya a gi hi byeli. Kanilezvi zva koteka ku Jehovha a zvi mahisile lezvo hi kota ya lezvi a nga khatala hi lezvi Samuweli a nga ti zwisa zvona.

Murindzeli 09.18 paj. 24 par. 4

Jehovha i Nyamintamu, hambulezvo wa khatala hi vanhu

⁴ Lera 1 Samueli 3:11-18. A Nayo wa Jehovha wu wa laya vanana lezvaku va kombisa cichavo hi vanhu va hombe, nguvhunguvhu lava va rangelako. (Ekso. 22:28; Levi 19:32) Hikwalaho zva dlunyateka ku Samuweli kota n’wanana zvi mu karatele nguvhu a kuya ka Eli, a ya tiya hlanha a mu byela mahungu yo bindza ya kulamula ka Nungungulu. A Bhibhiliya gi hi byela lezvaku Samuweli “i wa chava ku ya hlawutela Eli a muwoniso lowo”. Hambulezvo, Nungungulu i dlunyatisele Eli lezvaku hi Yena a nga kari a vitana Samuweli. Kota wuyelo ga kona, Eli i no kurumeta Samuweli lezvaku a nga mu fihleli nchumu. Samuweli i no ingisa, a mu ‘hlawutela zvontlhe’ a nga wulile Nungungulu.

Kela titshomba ta moya

Sentinela 15/03/05 paj. 21 par. 6

Timhaka-tshinya ta bhuku ga Samuweli wo sangula

3:3 — Samuweli i wa etlela lomu Wutshan’wini go Basabasa ke? Ahihi, i wa nga etleli lomo. Samuweli i wa hi muLevhi wa lixaka la ka Kohate li nga kala li nga hi vapristi. (1 Kro. 6:33-38) Hikwalaho i wa nga vhumelelwi ku ‘nghena a cuwuka a zvilo lezvi zvi basileko.’ (Mitse. 4:17-20) A wutshamu go basa legi Samuweli a nga vhumelelwa ku nghena ku wa hi laha handle ka tabhernakeli basi. Zvi wonekisa ku khwatsi hi kwalomo a nga etlela kona. Eli yenawu zvi wonekisa ku khwatsi i wa etlela ka wutshamu go kari kwalaha handle ka tabhernakeli. A magezu lawa yaku “laha ku nga wa hi ni arke ga Nungungulu” handle ko kanakana ma komba wutshamu ga tabhernakeli.

21-27 KA FEVEREIRO

TITSHOMBA TI NGA KA MHAKA YA NUNGUNGULU | 1 SAMUELI 6-8

“Himani hosi ya wena?”

Perspicaz vhol. 2 paj. 813 par. 1

Mufumo wa Nungungulu

Va kombela munhu wa ku va fumela. Kwalomu ka 400 wa malembe kusukela cikhatini leci a vaIzrayeli va nga huma Gibhite, ni 800 wa malembe ni ku hundza ndzhako ka civhumelwano ca Nungungulu na Abrahama, a vaIzrayeli va no kombela munhu wa ku a va fumela kota lezvi ka ku a matiko man’wani ma wa hi ni vanhu lava va nga kari va ma fumela. Lezvi va ngaza va kombela munhu wa ku va fumela, zvi wa komba ku va wa nga zvi tsakeli lezvi Nungungulu a nga va rangelisa zvona. (1 Sam. 8:4-8) Lisine ku a vanhu va wa rindzela ku Nungungulu a yimisa mufumo kasi ku tatisa a citsumbiso leci a ci mahileko ka Abrahama na Jakobe, leci makunu hi ci kumbukileko. Va wa hi ni zvigelo zvo zwala zva ku rindzela a mufumo lowo, zvo kota: Ciphrofeto ca Jakobe xungetano hi Judha leci a ci mahileko na a hi kusuhani ni kufa (Gen. 49:8-10), lezvi Jehovha a nga byela vaIzrayeli andzhako ka loku va humile Gibhite (Ekso. 19:3-6), timhaka ta civhumelwano ca Nayo (Deut. 17:14, 15), hambu hi lezvi Nungungulu a nga byelile muphrofeti Bhalami kasi a wula. (Mitse. 24:2-7, 17) Hana, a mamani wo tsumbeka wa Samuweli, i zvi kumbukile hi mukhongelo lezvi va nga kari va zvi rindzela. (1 Sam. 2:7-10) Hambulezvo, Jehovha i wa nga bhoxangi hi kumbhelela a ‘cihundla cakwe co basa’ xungetano hi mufumo, ne i wa nga kombangi ku a Mufumo lowo wu wa ta yimisiwa cikhati muni, ne ku wu wa ta yimisiwa kwihi — tilweni kutani laha misaveni. Hikwalaho, a kuza va lava munhu wa ku va fumela ka cikhati leco, zvi wa komba ku va wa hi ni matloti, va maha zvilo va nga kala va nga hi na fanelo yo zvi maha.

Sentinela 1/01/11 paj. 27 par. 2

I no timisela a zvikhunguvanyiso

Wona lezvi Jehovha a nga hlamulisa zvona a cikhati leci Samuweli a nga mu bikela a mhaka leyo hi mukhongelo: ‘Ingisa timhaka tontlhe leto a vanhu va ku byelako, hakuva a va tsiki wena, kanilezvi hi mina va ndzi tsikileko, va nga randzi lezvaku ndzi maha hosi yabye.’ A magezu lawa ma mu chavelele nguvhu Samuweli, hambulezvo, leco ci wa hi ciruko ca hombe nguvhu ka Nungungulu Nyamintamu! Jehovha i rumile muphrofeti wakwe a ya tlharihisa vaIzrayeli lezvaku va wa ta hakhela kudhura hi kuva ni hosi ya nyama. Laha Samuweli a nga va byela, vona va no simama vaku: A hi na mhaka, ‘hina ho lava hosi ya ku hi fumela.’ Kota lezvi contlhe cikhati a nga ingisa a Nungungulu wakwe, Samuweli i no ya tota a hosi leyi Jehovha a nga yi hlawulile. — 1 Samueli 8:7-19

Sentinela 15/01/10 paj. 30 par. 9

Va tseketsela mafumela ya Jehovha!

⁹ A matimu ma kombile ku a citlharihiso ca Jehovha ci wa hi lisine. A ku fumelwa hi munhu wa nyama zvi wa ta va vangela a zvikarato zvo tshisa a vaIzrayeli, nguvhunguvhu loku a hosi ya kona yi nga tsumbeki. Loku hi wona lezvi zvi nga humelela vaIzrayeli, a zvi hlamalisi lezvi ka malembe wontlhe ma hundzileko a mifumo ya lava va nga mu tiviko Jehovha yi zvi tsandzekako ku mbheta zvikarato zva vanhu. Lisine ku a varangeli vo kari va politika va kombela makatekwa ya Nungungulu ka mizamo yabye ya ku lava kurula ni ku tshamiseka; kanilezvi, a ku na ndlela ya ku Nungungulu a katekisa vanhu va vhukelako mafumela yakwe. — Lis. 2:10-12.

Kela titshomba ta moya

Sentinela 1/04/02 paj. 12 par. 13

Hikuyini hi faneleko ku bhabhatiswa?

¹³ A munhu i fanele ku ranga hi ku hundzuluka na a nga se bhabhatiswa kota Kustumunyu wa Jehovha. A kuhundzuluka i nchumu wa kuzvirandza lowu wu mahiwako hi munhu loyi a mahileko ciboho ca ku landzela Jesu na zvi sukela mbilwini. A munhu a mahako lezvo i tsika mahanyela yakwe ya kale yo biha a tlhela a maha ciboho ca ku hanya hi lezvi zvi tsakisako Nungungulu. Lomu ka Mitsalo, a magezu ya ciHebheru ni ya ciGreki ma yelanako ni kuhundzuluka, ma nyika mongo wa ku tsika ku maha zvokari. A mongo lowo wu komba ku tsika ku maha zvilo zvo biha u tlhela u lavetela Nungungulu. (1 Tihosi 8:33, 34) A kuhundzuluka zvi lava ku maha ‘mitiro yi kombako lezvaku wa ti sola.’ (Mitiro 26:20) Zvi lava ku hi tsika wukhongeli ga mawunwa, hi maha zvilo zvi yelanako ni milayo ya Nungungulu hi tlhela hi khozela Jehovha yece. (Deuteronome 30:2, 8-10; 1 Samueli 7:3) A kuhundzuluka zvi maha ku hi cica ndlela leyi hi pimisako hi yona, makungo ya hina ni mahanyela ya hina. (Ezekieli 18:31) Hi “hundzuluka” loku hi tlhatlha munhu wa kale hi ambala munhu muswa. — Mitiro 3:19; Va Le Efesusi 4:20-24; Va Le Kolosi 3:5-14.

28 KA FEVEREIRO–6 KA MARÇO

TITSHOMBA TI NGA KA MHAKA YA NUNGUNGULU | 1 SAMUELI 9-11

“Kusanguleni Sawule i wa hi munhu wo ti koramisa”

Murindzeli 08.20 paj. 10 par. 11

¹¹ Ehleketa hi lezvi zvi nga humelela Hosi Sawule. Kusanguleni i wa hi jaha ga ku ti koramisa. A cikhati leci a nga hi Mufana, i wa ku tiva kugumelwa kakwe niku ka khati go kari i alile wutihlamuleli. (1 Sam. 9:21; 10:20-22) Hambulezvo, hi ku famba ka cikhati Sawule i nova ni matshandza a tlhela a maha a zvilo a nga kala a nga hi na fanelo ya ku zvi maha. I sangulile kuva ni matshandza na ko hundza cikhati citsongwani na a yimisilwe kota hosi. Ka khati go kari i no mbhelelwa hi lihlazva-mbilu a cikhati leci a nga rindzela muprofeti Samuweli. Wutshan’wini ga ku tsumba ku Jehovha i wa ta vhikela vanhu vakwe, Sawule i no hisa miphahlo hambu lezvi a nga zvi tiva lezvaku i wa nga hi na fanelo ya ku zvi maha. Kota wuyelo ga kona, Sawule a nga ha tsakelwangi hi Jehovha, niku Jehovha i wa nga ha tsakisiwi hi wuhosi gakwe. (1 Sam. 13:8-14) Hi maha khwatsi loku hi gondza cokari ka cikombiso leci co biha ca Sawule hi tlhela hi potsa ku maha zvilo hi nga hiko ni fanelo ya ku zvi maha.

Murindzeli 15/03/14 paj. 9 par. 8

Ndlela yo hlayisa a moya wa kutitsona

⁸ Hosi Sawule wa le Izrayeli citlharihiso ka hina xungetano hi lezvi a makangwa ma nga gisako zvona a moya wa hina wa kutitsona. Sawule i sangulile ku fuma na a hi munhu wo ti koramisa ni wo tiva kugumelwa. (1 Sam. 9:21) I no ala ku tsayisa vaIzrayeli lava va nga wulawula zva hava xungetano hi wuhosi gakwe, hambu lezvi a nga wa ta ngha a kumile cigelo ca ku lwela cikhundla cakwe a nyikilweko hi Nungungulu. (1 Sam. 10:27) Hosi Sawule i vhumelile ku rangelwa hi moya wa Nungungulu hi ku rangela Izrayeli a yalwa ni vaAmoni kala a va hlula. Andzhako ka lezvo, i no ti koramisa a dzundza Jehovha hi kota ya kuhlula loko. — 1 Sam. 11:6, 11-13.

Sentinela 15/12/95 paj. 10 par. 1

Vaamoni — A vanhu va nga tlhelisela wunene hi tihanyi

Ka khati legi kambe a vaAmoni va tlhelisele a wunene ga Jehovha hi tihanyi. Jehovha a nga zvi bangi hi makatla zvilo lezvo zva hava. ‘Laha a nga wa zwile timhaka leto [ka Nahaxi], a moya wa Nungungulu wu no ta nghena ka yena hi ntamu, a zanga yakwe yi vhindlukiswa nguvhu.’ Sawule i no rangelwa hi moya wo basa wa Nungungulu, a longisela butho ga 330 000 wa masochwa, lawa ma hlulileko a vaAmoni laha ka kuza ‘ku nga sali ne vambiri’ vabye. — 1 Samueli 11:6, 11.

Kela titshomba ta moya

Sentinela 15/03/05 paj. 22 par. 8

Timhaka-tshinya ta bhuku ga Samuweli wo sangula

9:9 — Ma wula yini a magezu lawa yaku: ‘Loyi inyamutlha hi nge ngalo muphrofeti, a kale va waku, muvhumbi’ ke? Laha a vaphrofeti va ngaya va tiveka nguvhu masikwini ya Samuweli ni cikhatini ca tihosi ta Izrayeli, kuzvilava a gezu “muvhumbi” gi vhaletilwe hi gezu “muphrofeti.” Samuweli hi yena wo sangula ku vitaniwa ku muphrofeti. — Miti. 3:24.