Timhaka ta mabhuku ma tako ka Cibhukwana ca Mutlhangano
7-13 KA MARÇO
TITSHOMBA TI NGA KA MHAKA YA NUNGUNGULU | 1 SAMUELI 12-13
“A munhu wa matshandza i guma hi kuwa tingana”
Sentinela 01/08/00 paj. 13 par. 17
A munhu wa matshandza i guma hi kuwa tingana
17 Loku u zvi wonela kule, lezvi a nga maha Sawule u nga tshuka u zvi wonisa ku khwatsi zvi ni hloko. Phela a vanhu va Nungungulu va wa hi “mhangweni ya hombe,” va wa ‘karateka nguvhu’ niku va wa chava hi kota ya ciyimo leco co tshisa va nga hi ka cona. (1 Samueli 13:6, 7) Hi lisine, ka zviyimo zvin’wani a zvi bihangi ku maha co kari loku ku hi ni zvigelo zvo zwala. Kanilezvi, hi fanele ku alakanya lezvaku Jehovha wa lera timbilu niku wa zvi tiva ku hikuyini hi mahako zvilo zvo kari. (1 Samueli 16:7) Hikwalaho, zva koteka ku ngha Jehovha na a wonile zvo kari ka Sawule zvi nga kala ku tlhamuselwa hi ku kongoma lomu ka Bhibhiliya. Hi cikombiso, zva koteka ku ngha na a wonile ku Sawule a nga zvi kotangi ku rindzela hi kota ya matshandza. Kuzvilava Sawule i swirekile nguvhu — hi lezvi yena kota hosi ya tiko gontlhe ga Izrayeli — a nga fanele ku rindzela munhu a nga mu wona kota madhala ni muphrofeti wa mihoni! Kani cive cihi cigelo ca kona, Sawule i alakanyile lezvaku a ku hlwela ka Samuweli ci wa hi cigelo ca ku a maha muphahlo hi yece ni ku chipisa a zvileletelo zvo kongoma lezvi a nga nyikilwe. Give gihi a wuyelo ga kona? Samuweli a nga mu dzundzangi Sawule hi kota ya lezvi a nga maha. A kuhambana ni lezvo, i no kawuka Sawule aku: ‘A mufumo wa wena cima wu nga ta simamisa . . . hakuva wena a wu hlayisangi lezvi Jehovha a ku leleteleko zvona.’ (1 Samueli 13:13, 14) Ka khati legi kambe, a matshandza ma wisile tingana.
Sentinela 15/06/07 paj. 27 par. 8
A ku ingisa ka hina ka lisima ka Jehovha
8 A matimu ma nga lomu ka Bhibhiliya ma wulawulako hi hosi Sawule ma komba lisima la ku ingisa. Sawule i sangulile ku fuma na a hi munhu wo ti koramisa ni wo tiva ku gumelwa kakwe, i wa ti wona na a hi mutsongwani. Hambulezvo, hi kufamba ka cikhati, i no sangula ku maha zviboho na a tirisa maalakanyo ya hava ni matshandza. (1 Samueli 10:21, 22; 15:17) Ka khati go kari, Sawule i wa lava kulwa ni butho ga vaFilistiya. Samuweli i no mu byela ku a mu rindzela hakuva i wa lava ku maha miphahlo ka Jehovha ni ku mu nyika zvileletelo zvo engeteleka. Hambulezvo, Samuweli a nga chikelangi hi cikhati leci va nga ci rindzele niku a citshungu ci no sangula ku hangalaka. Hi kota ya lezvo, Sawule ‘i no nyikela munyikelo wa kuhiswa’. Lezvo a zvi mu tsakisangi Jehovha. Laha makunu Samuweli a nga chikela, Sawule i no ti yimelela hi lezvi a nga kala ku ingisa, aku a ku hlwela ka Samuweli ku mu mahile a nyikela munyikelo wa kuhiswa na a alakanya ku zvi wa ta mu tsakisa Jehovha. Hosi Sawule i wa alakanya ku a ku maha munyikelo lowo zvi wa hi zva lisima a ku hundza ku ingisa cileletelo ca ku rindzela Samuweli kasi a ta maha munyikelo lowo. Samuweli i no mu byela lezvi: ‘U mahile wupumbu; a wu hlayisangi zvileletelo zva Jehovha Nungungulu wa wena, lezvi a nga ku leletele zvona.’ A ku nga ingisi Jehovha zvi mahile ku a wuhosi ga Sawule gi nga fambi khwatsi. — 1 Samueli 10:8; 13:5-13.
Kela titshomba ta moya
Murindzeli 01/07/11 paj. 14 par. 15
Xana u ta landzela a zvileletelo zva Jehovha zva lirandzo?
15 Xana a vaIzrayeli va wa alakanya lezvaku a hosi ya nyama yi wa tava ya lisine ni yo tsumbeka a ku hundza Jehovha? Loku ku hi lezvaku va wa alakanya lezvo, a vo landzela a khulemuletwani! Niku lezvo zvi wa va veka mhangweni ya ku landzela zvilo zvin’wani zvi nga nyawuliko zva Sathani. A tihosi ti wa ta va khozelisa a zvifananiso. A vakhozeli va zvifananiso va alakanya lezvaku a zvifananiso — kutani vanungungulu va mahilweko hi sinya kutani ribye — zvilo zva lisine ni zvo tsumbeka a ku hundza Jehovha, a Nungungulu a nga wonekiko, loyi a mahileko zvilo zvontlhe. Kanilezvi kota lezvi mupostoli Pawule a wulileko, a zvifananiso “a hi nchumu.” (1 Kor. 8:4) A zvi woni, a zvi ingisi, a zvi wulawuli ge hambu ku tira. U nga zvi wona ni ku zvi henya, kanilezvi loku u wo zvi khozela, hi lisine u wa tava na u landzela a zvilo zvi nga nyawuliko lezvi zvi nga wa ta ku nehela khombo. — Lis. 115:4-8.
14-20 KA MARÇO
TITSHOMBA TI NGA KA MHAKA YA NUNGUNGULU | 1 SAMUELI 14-15
“A ku ingisa i chukwana ku hundza muphahlo”
Sentinela 15/06/07 paj. 26 par. 4
A ku ingisa ka hina ka lisima ka Jehovha
4 Kota Muvangi, Jehovha i sina a hi n’winyi wa zvontlhe lezvi hi nga nazvo. Makunu, a ku ku na ni co kari caku hi nga mu nyika? Ina, hi nga mu nyika nchumu wa lisima nguvhu. I nchumu muni? A hlamulo hi wu kuma ka lezvi a hi kucako ku maha, zvaku: ‘N’wananga, tlhariha u maha a mbilu ya mina yi tsaka; kasi ndza fela ku mu hlamula loyi a ndzi rukako.’ (Mavingu 27:11) Hikwalaho, a nchumu hi nga nyikako Nungungulu ku ingisa ka hina. Kani hi ka ciyimo muni kani hi wundlisilwe kuyini, hi ku ingisa, a mun’we ni mun’wani wa hina a nga kaneta mawunwa ya Sathani yaku a vanhu a va nge zvi koti ku simama va tsumbekile ka Nungungulu loku va kumana ni zvikarato. Hi nga wona thomo lego hi nga nago!
Perspicaz vhol. 2 paj. 500 par. 2
Ku ingisa
A ku na nchumu wu vhaletako a ku ingisa, niku a zvi nge koteki a ku hi amukeleka ka Nungungulu loku hi nga mu ingisi. Lezvo hi zvi wona ka lezvi Samuweli a nga byela Hosi Sawule, zvaku: ‘Xana Jehovha wa tsakiswa hi minyikelo ya kuhiswa ni miphahlelo, ku hundza ku ingisa gezu gakwe ke? Zwisisa! a kuingisa ku chukwana ku hundza miphahlelo, ni ku hlayisa gezu ga Jehovha ku hundza mafura ya tiyivhu.’ (1 Sam. 15:22) A ku tsika ku ingisa zvi wula ku ala lezvi Jehovha a wulako, zvi komba ku a munhu loye a nga na kukholwa, a nga na kutsumba kutani ku a nga kholwi ka Jehovha ni mhaka yakwe. Hikwalaho loku a munhu a nga ingisi, a nga hambani ni munhu wa ku tirisa wudhimoni kutani wa ku khozela zvifananiso. (1 Sam. 15:23; ringanisa ni Rom. 6:16.) A ku vhumela hi nomu basi a ku u ta maha nchumu wo kari, a zvi sizi nchumu loku u guma u nga mahi. A ku kala u nga mahi nchumu wo kari u tsumbisileko, zvi komba ku a wu na kukholwa kutani ku a wu na cichavo hi munhu loye u mu tsumbisileko a nchumu lowo. (Mat. 21:28-32) Lava va tsakisiwako hi kuzwa ni ku vhumela lisine la Nungungulu basi, kanilezvi na va nga hanyi hi lona, vo ti kanganyisa hi maalakanyo ya hava niku a va amukeli makatekwa ya Nungungulu. (Jak. 1:22-25) A N’wana wa Nungungulu i zvi vekile kubaseni aku hambu lava va wonekisako ku khwatsi va maha lezvi Nungungulu a zvi lavako, kanilezvi na va maha hi ndlela ya hava kutani hi zvigelo zva hava, va nga ta nghena Mufun’weni wa Nungungulu ne ni kutsongwani. — Mat. 7:15-23.
Kela titshomba ta moya
Perspicaz vhol. 1 paj. 519
Kuzwela wusiwana
A ku kurumeteka ku zwela wusiwana ka zvilo zvi nga yelaniko ni kurandza ka Nungungulu, zvi ngava ni wuyelo ga hava. Lezvo zva woneka khwatsi ka lezvi zvi nga humelela Hosi Sawule. Ci wa chikele a cikhati caku Nungungulu a lamula vaAmaleki, ku nga vona va nga sangula ku vhukela a vaIzrayeli a cikhati va nga huma hi Gibhite. Sawule i wa byelilwe ku a nga va zweli wusiwana. Kanilezvi, i no vhumela ku kucetelwa hi citshungu, a nga ingisi zvontlhe lezvi Jehovha a nga mu leletele. Hi kota ya lezvo, Jehovha a nga ha lavangi ku Sawule ava hosi. (1 Sam. 15:2-24) Loyi a ti karatelako a ku ingisa zvileletelo zvo lulama zva Jehovha a tlhela a rangisa kutsumbeka Kakwe ka zvontlhe a mahako, a nga potsa ku maha zvihoxo a tlhela a potsa ku nga ha tsakelwi hi Jehovha, a ku fana ni lezvi zvi nga humelela Sawule.
21-27 KA MARÇO
TITSHOMBA TI NGA KA MHAKA YA NUNGUNGULU | 1 SAMUELI 16-17
“Jehovha hi yena a hi lwelako”
Sentinela N.° 5 wa 2016 paj. 11 par. 2-3
“Jehovha hi yena a hi lwelako”
Kasi a tiyisekisa Sawule, Dhavhidha i hlawutele lezvi zvi nga mu humelela a cikhati a nga daya nghala ni urso. A ku i wo ti tlakusa? Ahihi. Dhavhidha i wa zvi tiva ku hikuyini a nga hlula ka makhati lawo. I wulile lezvi: ‘Jehovha loyi a nga ndzi ponisa canjeni ga nghala ni ga urso, hi yaloye a ta nga ndzi ponisa canjeni ga loyi muFilistiya.’ Hi kugumesa Sawule i no vhumela, aku: ‘Famba, Jehovha ave na wena!’ — 1 Samueli 17:37.
A wu zvi lavi a kuva ni kukholwa ko tiya ko fana ni ka Dhavhidha? A kukholwa ka Dhavhidha ku wa nga seketelwi ka zvilo zva ku zvi alakanyela basi. A wutivi legi a nga hi nago ni zvilo lezvi a nga zvi hanyile, zvi mu mahile a kholwa ka Nungungulu wakwe. I wa zvi tiva khwatsi ku Jehovha wa vhikela malandza yakwe niku wa tatisa zvitsumbiso zvakwe. Kasi hiva ni kukholwa ko fana ni loko, hi fanele ku simama hi gondza hi Jehovha lomu ka Mhaka yakwe, a Bhibhiliya. Loku hi hanya hi lezvi hi gondzako, hi tava ni wutomi go tsakisa niku a kukholwa ka hina ku taya ku tiya. — Mahebheru 11:1.
Sentinela N.° 5 ga 2016 paj. 11-12
“Jehovha hi yena a hi lwelako”
A hlamulo wa Dhavhidha cikombiso cinene ka hina mhakeni ya ku kholwa. Hi nga alakanyela a jaha legi na gi hi mahlweni ka Goliyate gi kanyuluka, giku: ‘Wena uta ka mina ni supadho, ni tlhari, ni hubhula, kanilezvi mina ndzita ka wena hi vito ga Jehovha wa tiyimpi, ni ga Nungungulu wa tiyimpi ta ka Izrayeli leti wena u ti tlangamelako.’ A ka Dhavhidha, a ntamu ni matlhari ya Goliyate, zvi wa nga hi zva nchumu. Goliyate i wa nga kombisangi cichavo hi Jehovha Nungungulu, niku Jehovha i wa ta maha co kari hi mhaka leyo. Dhavhidha i zvi vekile kubaseni a cikhati a ngaku: ‘A kulwa ni kuhlula zva Jehovha.’— 1 Samueli 17:45-47.
Lisine ku Dhavhidha i zvi wonile ku Goliyate i wa hi wo zimuka niku i ma wonile a matlhari yakwe. Kanilezvi a nga womangi hi kuchava. A nga mahangi cihoxo leci Sawule ni butho gakwe va nga maha. Dhavhidha a nga ti fananisangi na Goliyate. Wutshan’wini ga lezvo, i yisile kupima ka lezvaku Goliyate mu tsongwani loku a ringanisiwa na Jehovha. Goliyate i wa lehile ku chikela kwalomu ka 3 wa timetro, i wa hundza vontlhe a nga hanya navo ka cikhati leco; kanilezvi a ku wa hombe loku hi mu ringanisa ni Hosi ya wuako gontlhe? Hi lisine a ku fana ni van’wani vanhu, Goliyate a ka Jehovha i wa ku khwatsi cidodwani — niku Jehovha i wa longile ku mu lovisa!
Sentinela N.° 5 ga 2016 paj. 12 par. 4
“Jehovha hi yena a hi lwelako”
Inyamutlha, a malandza ya Nungungulu a malwi tiyimpi. Kanilezvi a kale ma walwa yimpi. (Matewu 26:52) Hambulezvo, hi fanele ku pimanyisa kukholwa ka Dhavhidha. A ku fana na Dhavhidha hi fanele ku wona Jehovha kota munhu wa lisine — a Nungungulu loyi hi faneleko ku mu tirela ni ku mu kombisa cichavo. Ka zvikhati zvin’wani zvi nga wonekisa ku khwatsi a zvikarato zva hina zva hombe nguvhu, kanilezvi zvitsongwani nguvhu loku zvi ringanisiwa ni ntamu wa hombe wa Jehovha. Loku hi hlawula Jehovha kota Nungungulu wa hina hi tlhela hi kholwa ka yena a ku fana na Dhavhidha, a ku na cikarato kutani nchumu cin’wani ci nga hi mahako hi chava. A ntamu wa Jehovha wa hombe ku hundza ni cihi cikarato hi nga lwisanako naco!
Kela titshomba ta moya
Perspicaz vhol. 2 paj. 974
Sawule
Andzhako ka lezvo ni ndzhako ka loku Dhavhidha a totilwe kota loyi a nga wa tava hosi ya Izrayeli, a moya wa Jehovha wu no huma ka Sawule. A kusukela kwalaho i no ‘sala a xaniswa hi moya wo biha wu tileko hi ka Jehovha’. A kuva a susile a moya wakwe ka Sawule, Jehovha i vhumele ku a moya wo biha wu nghena ka Sawule, lezvi zvi nga maha ku Sawule a nga ha hi na kurula, niku a moya lowo wo biha wu wa khumba hi ndlela ya hava lezvi a nga ti zwisa zvona, lezvi a nga zvi pimisa ni lezvi a nga zvi alakanyela. A kuva Sawule a tsandzekile ku ingisa Jehovha zvi wa komba ku a mbilu yakwe ni maalakanyo yakwe zvi wa byekelele ku maha zvo biha niku a moya wa Nungungulu a wu mu vhikelangi kasi lezvo zvi nga maheki. Kanilezvi, kota lezvi Jehovha a nga vhumelela ku a “moya wo biha” wu vhaleta moya wakwe ni ku xanisa Sawule, wu wa ta vitaniwa ku i ‘moya wo biha wu tileko hi ka Jehovha’. Hi cigelo leco a malandza ya Sawule ma nga wu vitana ku i ‘moya wo biha wa Nungungulu’. Sawule i no ingisa wusungukati ga malandza yakwe, a vitanisa Dhavhidha kasi a ya mu bela citende — a mu rulisa loku a xanisiwa hi “moya wo biha”. — 1 Sam. 16:14-23; 17:15.
28 KA MARÇO–3 KA ABRIL
TITSHOMBA TI NGA KA MHAKA YA NUNGUNGULU | 1 SAMUELI 18-19
“Ni loku a zvilo zvi ku fambela khwatsi, simama ku ti koramisa”
Sentinela 01/04/04 paj. 15 par. 4
Tsumba moya wa Nungungulu loku a zviyimo zva wutomi zvi cica
4 Hi cikhati citsongwani, a murisi loyi wa jaha i wa ta tiveka tikweni gontlhe ga Izrayeli. I wa vitanisilwe hi hosi kasi a ya yi bela citende. I dayile Goliyate, loyi a nga chaviwa hambu hi masochwa lawa ma nga sina malwa tiyimpi le Izrayeli. Dhavhidha i no nyikiwa lisima a ku hundza masochwa lawa man’wani niku i hlulile a vaFilistiya. A citshungu ci no mu randza. Ci no yimbelela tisimu ta ku mu dzundza. Na zvi nga se maheka lezvo, a mun’we wa lava va nga nyika wusungukati Hosi Sawule i no tlhamusela ku Dhavhidha i wa nga hi ‘mubi wa citende’ basi, kanilezvi i wa hi ‘wanuna wa nhenha, loyi a zvi kotako ku khoma tlhari, a citlhatlha kuwulawuleni, a munhu a sasekileko’.— 1 Samueli 16:18; 17:23, 24, 45-51; 18:5-7.
Murindzeli 01.18 paj. 28-29 par. 6-7
Wona kuhambana cikari ka vanhu
6 A vokari va telwa hi matshandza hi kota ya ku saseka, ku tiviwa nguvhu, ku tiva ku chaya, kuva ni ntamu, kutani ku hlamaliwa hi van’wani. Dhavhidha i wa hi nazvo zvontlhe lezvo, hambulezvo i simamile a ti koramisa wutomini gakwe gontlhe. Hi cikombiso, a cikhati a nga daya Goliyate, Hosi Sawule i te i ta mu nyika n’wana wakwe lezvaku a chadha naye. Kanilezvi Dhavhidha i te: ‘Ndzi maniwo, na ndzi hi wa ciyimo muni, wona ngango wa dhadhani wo va cini lomu ka Izrayeli ko kala mina ndzi maha mwane wa Sawule?’ (1 Samueli 18:18) Cini ci nga mu vhuna ku simama a ti koramisa? Hi ku i wa zvi tiva ku ni gihi tshamela, wutlhari, kutani thomo a nga hi nago i wova nago hi kota ya lezvi Nungungulu a nga ti koramisa a mu khatalela. (Lisimu 113:5-8) I wa zvi tiva ku ni cihi cilo ca ci nene a nga hi naco ci tile hi ka Jehovha. — Ringanisa ni 1 Va Le Korinte 4:7.
7 A vanhu va Jehovha nyamutlha va ti karatela ku ti koramisa a ku fana na Dhavhidha. Zva hi khumba nguvhu a ku tiva lezvaku hambu Jehovha, Loyi a Hundzeleleko Kutlakuka, wa ti koramisa. Hi cigelo leco, hi ti karatela ku hanya hi magezu lawa ma nge: “Ambalani a mbilu yo zwela wusiwana, ni wunene, ni kutikoramisa, ni kurula, ni lihlazva-mbilu.” (Va Le Kolosi 3:12) Ha zvi tiva kambe ku a lirandzo “a li ti mahisi matshandza, a li ti kukumukisi”. (1 Va Le Korinte 13:4) Loku a van’wani va wona ku ha ti koramisa, va nga xuva ku tiva Jehovha na vonawu. A ku fana ni lezvi a mahanyela ma nene ya sati wa muKristu ma nga kokako nuna a nga kholwiko lezvaku a tshinela ka Jehovha, a vanhu vonawu va nga kokelwa ka Nungungulu hi kutikoramisa ka malandza yakwe. — 1 Pedro 3:1.
Kela titshomba ta moya
Perspicaz vhol. 2 paj. 727
Muphrofeti
Hambu lezvi Jehovha a nga hlawulile vaphrofeti hi ku tirisa moya wakwe, zvi wonekisa ku khwatsi a hi contlhe cikhati va nga wulawula hi ku pimiselwa. Kanilezvi, ka zvikhati zvo kari a moya wa Nungungulu wu wata kabye wu ta va tivisa a mahungu lawa va nga fanele ku kanela. (Eze. 11:4, 5; Mika 3:8) Loku a moya wu nghena kabye va wa hi ni manyawunyawu ya ku wulawula; wu va kuca ku kanela. (1 Sam. 10:10; Jer. 20:9; Am. 3:8) A va nga mahi ntsena a zvilo zvo hlamalisa, kanilezvi lezvi va nga wula ni mahanyela yabye, zvi wa nga siyi ku kanakana a ku va kumile ciavelo co hlawuleka. Lezvo kuzvilava zvi nga tlhamusela lezvi a Bhibhiliya gi wulako loku giku a vokari ‘vonawu va [no] phrofeta’. (1 Sam. 10:6-11; 19:20-24; Jer. 29:24-32; ringanisa na Mitiro 2:4, 12-17; 6:15; 7:55.) Lezvi a vaphrofeti va nga yisa kontlhe kupima ka ciavelo cabye, zvi wa maha van’wani vaku a ti eneli niku va wa va wona na va hi vanhu vo kala ku toloveleka, a ku khwatsi hi lezvi a tinduna ta masochwa ti nga mu wonisa zvona a muphrofeti wo kari a cikhati leci Jehu a nga totiwa kota hosi. Hambulezvo, laha a tinduna leto ti nga zwisisa ku muphrofeti, ti no vhumela mahungu yakwe hi ku chela kota. (2 Tih. 9:1-13; ringanisa na Mitiro 26:24, 25.) A cikhati leci Sawule a nga hlota Dhavhidha, Jehovha i mahile ku Sawule a ku khwatsi muphrofeti, a tlhatlha tinguwo takwe ‘a tshama siku gontlhe ni wusiku gontlhe na . . . a hi cimbyiri’. Zvi wonekisa ku hi ka cikhati caleco Dhavhidha a nga pona. (1 Sam. 19:18–20:1) Lezvo a zvi wuli ku a vaphrofeti vo wo tshama na va nga bohangi nchumu, hakuva a Bhibhiliya gi wula zvo hambana ni lezvo. Ka makhati man’wani ya mambiri lawa a Bhibhiliya gi wulawulako hi ku a vaphrofeti va tshamile na va hi cimbyiri, va mahile lezvo hi kungo go kari gi nga yimela zvilo zvo kari zva wuphrofeti gabye. (Isa. 20:2-4; Mika 1:8-11) A Bhibhiliya a gi wuli a cigelo ca kuva Sawule a tshamile a hi cimbyiri — kani i wa lava ku ti wonekisa ku munhu wa nyalidede a ku fana ni van’wani hi ku ngha a tlhatlhile a tinguwo ta wuhosi, kani zvi wa mahela ku komba ku a hi wa nchumu ka wuhosi ni ntamu wa Jehovha, kani hi cin’wani cigelo — a hi zvi tivi.
4-10 KA ABRIL
TITSHOMBA TI NGA KA MHAKA YA NUNGUNGULU | 1 SAMUELI 20-22
Murindzeli 11.19 paj. 7 par. 18
Wumba wunghana go tiya a kugumesa na ku nga se chikela
18 Inyamutlha, a vamakabye va hina va kumana ni zvikarato zvo hambanahambana. Hi cikombiso, a vokari va xanisiwa hi timhango ta ntumbuluko kutani timhango ti vangiwako hi vanhu. Loku lezvo zvi humulela, a van’wani va hina va zvi kota ku amukela a vamakabye lavo lomu mitini yabye. A van’wani va va vhuna hi mali. Kanilezvi hontlheni hi nga kombela Jehovha lezvaku a vhuna vamakabye va hina. Loku hi tiva lezvaku a makabye wo kari i na ni gome, kuzvilava hi nga vhumala co wula kutani co maha. Kanilezvi hontlheni hi nga maha zvotala kasi ku va vhuna. Hi cikombiso, hi nga ti nyika cikhati ca ku tshama navo. Hi va ingisela khwatsi a cikhati leci va ti phofulako, niku hi nga ha va byela mutsalo wo chavelelako hi wu randzako. (Isa. 50:4) A ca hombe ka zvontlhe kuva laho kasi ku va vhuna loku va lava ku vhuniwa.— Lera Mavingu 17:17.
Sentinela 15/02/08 paj. 8 par. 7
Hi fanele ku famba hi tindlela ta Jehovha
7 Nungungulu i rindzela lezvaku hiva vanghana vo tsumbeka. (Mav. 17:17) Jonatani, a n’wana wa Sawule i vile munghana wa Dhavhidha. A cikhati leci Jonatani a nga tiva lezvaku Dhavhidha i wa dele Goliyate ‘a mbilu ya Jonatani yi no bohana ni mbilu ya Dhavhidha, a mu randza nguvhu khwatsi hi lezvi a randzisako zvona wutsumbu gakwe’. (1 Sam. 18:1, 3) Jonatani i zile a tlharihisa Dhavhidha a cikhati leci Sawule a nga lava ku mu daya. Andzhako ka loku Dhavhidha a tsutsumile, Jonatani i no mu lavetela a maha civhumelwano naye. A kuva Jonatani a wulawulile hi Dhavhidha ka Sawule zvi vekile wutomi gakwe mhangweni, hambulezvo a vanghana lava va vambiri va tlhelile va kumana va tiyisa wunghana gabye. (1 Sam. 20:24-41) Ka khati go gumesa va nga kumana, Jonatani i no “tiyiseta [Dhavhidha] hi ka Nungungulu”. — 1 Sam. 23:16-18.
Sentinela 15/10/09 paj. 19 par. 11
Ndlela ya kuva munghana wa munene tikweni legi go kala lirandzo
11 Tsumbeka. Solomoni i tsalile ku: ‘A lirandzo la munghana la su tsoma contlhe cikhati, ni nakulobye i pswalelwe ku vhunetela kuxanisekeni.’ (Mav. 17:17) A cikhati leci Solomoni a nga tsala a magezu lawa, kuzvilava i wa alakanyela hi wunghana legi a papayi wakwe Dhavhidha a nga hi nago na Jonatani. (1 Sam. 18:1) Hosi Sawule i wa lava ku a n’wana wakwe Jonatani a mu vhaleta kota hosi ya Izrayeli. Kanilezvi, Jonatani i seketele ciboho ca Jehovha ca kuva a hlawulile Dhavhidha kota yena a tova hosi. A ku hambana na Sawule, Jonatani a nga vangi ni ciluse hi Dhavhidha. A nga mu vekelangi civiti Dhavhidha hi kota ya wudzundzo legi a nga nyikwa, ne a nga kholwangi a mawunwa lawa Sawule a nga ma hangalasa hi Dhavhidha. (1 Sam. 20:24-34) Xana ha fana na Jonatani? Loku a vanghana va hina va kuma malungelo, a ku ha tsaka navo? Ha va seketela ni ku va chavelela loku va kumana ni zvikarato? Loku va hi byela zva hava hi munghana wa hina ha tsutsumela ku kholwa? Kutani a ku fana na Jonatani ha tsumbeka hi seketela a munghana wa hina?
Kela titshomba ta moya
Sentinela 15/03/05 paj. 24 par. 4
Timhaka-tshinya ta bhuku ga Samuweli wo sangula
21:12, 13. Jehovha i rindzela lezvaku hi tirisa kupima ni wutlhari ga hina, kasi hi lwisana ni zviyimo zvo bindza wutomini. I hi nyikile Mhaka yakwe yi pimisilweko, leyi yi hi vhunako kuva ni wutlhari, wutivi, ni kupima kunene. (Mavingu 1:4) Ha kuma civhuno kambe hi ka madhota ya bandla.
18-24 KA ABRIL
TITSHOMBA TI NGA KA MHAKA YA NUNGUNGULU | 1 SAMUELI 23-24
“Kombisa lihlazva-mbilu u rindzela Jehovha”
Sentinela 01/04/04 paj. 16 par. 8
Tsumba a moya wa Nungungulu loku a zviyimo zva wutomi zvi cica
8 Dhavhidha a nga vhumelangi ku mu mahela zva hava Sawule. Hi kukholwa ni lihlazva-mbilu, Dhavhidha i tsikile Jehovha a lamula timhaka. Andzhako ka loku a hosi yi humile lomu mhakweni, Dhavhidha i no yi vitana aku: ‘Jehovha a ave mulamuli cikari ka mina na wena, a ndzi photela ka wena; kanilezvi a canja ga mina gi nga ta ku vhukela.’ (1 Samueli 24:12) Hambu lezvi Dhavhidha a nga zvi tiva ku lezvi Sawule a nga maha zvi wa nga hi zvi zvona, a nga ti photelangi, ne a nga wulawulangi kubiha hi yena, ne a nga mu chepetangi. Ka makhati yo tala Dhavhidha a nga vhumelangi ku ti photela. Wutshan’wini ga lezvo i no tsika Jehovha a lulamisa zvilo. — 1 Samueli 25:32-34; 26:10, 11.
Sentinela 01/06/04 paj. 22-23
Loku a wutomi gi bindza wa tsika ku ingisa Jehovha ke?
A nchumu wa wunharu hi gondzako ku hi fanele ku rindzela Jehovha wutshan’wini ga ku lulamisa zvikarato zva hina hi ku tshova milayo ya Bhibhiliya. Mupizani Jakobe i tsalile lezvi: “Tsikani a kutimisela ku mbhetisa a ntiro wa kona kasi mu mbhelela, mu nga hi na cisolo matlhelweni wontlhe mu tlhela mu nga kiyelelwi hi nchumu.” (Jakobe 1:4) A kutimisela ka hina ku fanele “ku mbhetisa a ntiro wa kona” hi kuva hi vhumela ku simama hi timisela kala magumo, hi nga tsutsumeli ku lulamisa cikarato hi ku tshova milayo ya Bhibhiliya. Lezvo zvi ta maha ku a kukholwa ka hina ku ringiwa ku tlhela ku chukwatisiwa, zvi guma zvi woneka lezvi ku hi vhunisako zvona ku timisela zvikarato. Josefa na Dhavhidha va wa hi ni kutimisela ka tshamela legi. A va zamangi ku lulamisa zvikarato zvabye hi ndlela ya ku Jehovha a nga ha va tsakeli. Kanilezvi, va mahile zvontlhe va nga zvi kota ndzeni ka zviyimo zvabye. Va rindzele Jehovha. Niku Jehovha i va katekisile hi kota ya lezvo! Vontlhe i va tirisile kasi ku tlhatlhisa ni ku rangela a vanhu vakwe. — Genesisi 41:39-41; 45:5; 2 Samueli 5:4, 5.
Hinawu hi ngava ka ciyimo hi ringiwako ku ci lulamisa hi ku tshova milayo ya Bhibhiliya. Hi cikombiso: Ku ngava lezvaku u mbhelile ntamu hi ku kala u nga se kuma munhu wa ku chadha naye? Loku u hi ka ciyimo leco, ti wonele ku nga ingisi nayo wa Jehovha wa ku ‘chadha ntsena Hosini’. (1 Va Le Korinte 7:39) U kumana ni zvikarato wukatini ga wena ke? U nga landzeli moya wa tiko wu kucako lava va nga chadha lezvaku va hambana kutani ku tsikana. Lwisanani ni cikarato leco na mu hi zvin’we. (Malaki 2:16; Va Le Efesusi 5:21-33) Zva ku karatela a ku hlayisa a ngango wa wena hi lezvi u vhumalako mali? A ku rindzela Jehovha zvi patsa ku nga mahi zvilo zvo kala zvi nga hi zvi nene kutani zvi tshovako nayo wa mufumo hi ku fela ku kuma mali. (Lisimu 37:25; Mahebheru 13:18) Hontlheni hi fanele ku maha zvontlhe hi zvi kotako ndzeni ka ciyimo ca hina, kasi Jehovha a kuma nchumu wa ku wu katekisa. Laha hi mahako lezvo, a hi ti yimiseleni ku rindzela Jehovha kasi a hi vhuna ku lulamisa zvikarato zva hina hi cikhati cakwe. — Mika 7:7.
Kela titshomba ta moya
Murindzeli 11.17 paj. 29 par. 11
U nga tsiki nchumu wu ku vhalela ku kuma nchachazelo
11 Loku hi ti karatela kuva vanhu va lirandzo ni wunene, hi nga ta hatlisela ku telwa hi ciluse. A Mhaka ya Nungungulu yi ngalo: ‘A lirandzo li na ni lihlazva-mbilu, li nene; a lirandzo a li na makangwa [“ciluse”, Tradução do Novo Mundo].’ (1 Va Le Korinte 13:4) Kasi ku susa ciluse hi ci hoxa kule, hi fanele ku ti karatela ku wona zvilo hi mawonela ya Jehovha. Hi fanele ku alakanya lezvaku hi zviro zva miri wun’we, gi nga bandla. A Bhibhiliya gi ngalo: ‘Loku a ciro cin’we ci dzundziwa, a zviro zvontlhe zvi tsaka zvin’we naco.’ (1 Va Le Korinte 12:16-18, 26) Loku a makabye wo kari a humelelwa hi nchumu wa wu nene, hi fanele ku tsaka naye wutshan’wini ga ku mu lusela. Alakanya a cikombiso ci nene ca Jonatani, n’wana wa Hosi Sawule. Jonatani a nga lusangi a cikhati leci Dhavhidha a nga hlawuliwa kasi kuva hosi wutshan’wini ga yena. I tlhelile a mu vhuna ni ku mu tiyisa. (1 Samueli 23:16-18) Hi nga kombisa wunene ni lirandzo a ku fana na Jonatani ke?
25 KA ABRIL–1 KA MAIO
TITSHOMBA TI NGA KA MHAKA YA NUNGUNGULU | 1 SAMUELI 25-26
“U munhu wa matloti ke?”
Pimanyisa kukholwa kabye paj. 78 par. 10-12
I tirisile wutlhari
10 Xana a masochwa lawa ma va khomisile kuyini a varisi? Zvi wa ta ngha zvi ma olovele a kuta na ma yiva tiyivhu leto, kanilezvi a ma zvi mahangi. A ku hambana ni lezvo, ma wa vhikela a mitlhambi ya Nabhali ni malandza yakwe. (Lera 1 Samueli 25:15, 16.) A tiyivhu ni varisi va wa kumana ni timhango to tala. Ku wa tele zvivandza, niku kota lezvi va nga hi kusuhani ni mbhingano wa le dzongeni wa tiko ga Izrayeli, zvi wa tolovelekile ku va dhumelwa hi vaphangi ni makhamba ya matiko man’wani.
11 Zva koteka ku ngha wu vile ntiro wo karata nguvhu a ku gisa a vavanuna vontlhe lavo lomu ciwuleni. Hikwalaho, ka siku go kari Dhavhidha i lo rumela a vavanuna vo kari lezvaku vaya ka Nabhali va ya kombela civhuno. Dhavhidha i hlawulile cikhati ci nene ca ku va rumela hi cona. Ci wa hi cikhati ca ku kaya a woya ga tiyivhu, niku ka zvikhati lezvo a vanhu va wa tolovela ku maha mibuzo va tlhela va nyikana zvinyikiwo. Dhavhidha i tlhelile a hlawula khwatsi a magezu ma nga kombisa cichavo kasi ku wula cikombelo cakwe ka Nabhali. I zile a tirisa a magezu ‘n’wana wa wena Dhavhidha,’ kuzvilava kota ndlela ya ku mu kombisa cichavo hi lezvi a nga kulile hi tanga. Xana Nabhali i hlamulisile kuyini? — 1 Sam. 25:5-8.
12 I no vhindluka hi zanga! A jaha legi gi nga wuliwa kusanguleni ka cipimo leci gi tlhamusele Abhigayili lezvaku Nabhali i lo va “zangarela [rukatela, NM].” Nyalikungo Nabhali i no sangula ku bhongabhonga hi lezvi va nga mu kombela zvibaba, mati ni nyama. I no tseketsela Dhavhidha a ku khwatsi hi loku a nga hi wa nchumu a tlhela a mu fananisa ni nandza gi tsutsumileko n’winyi wa gona. Zva koteka ku ngha a mawonela ya Nabhali ha Dhavhidha ma fana ni lawa ya loyi a nga venga Dhavhidha — Sawule. I hava ni mun’we wa vavanuna lava a nga hi ni mawonela ya Jehovha. Nungungulu i wa randza Dhavhidha niku i wa nga mu woni kota nandza gi hluwukileko, kanilezvi kota loyi a nga wa tava hosi ya Izrayeli. — 1 Sam. 25:10, 11, 14.
Pimanyisa kukholwa kabye paj. 80 par. 18
I tirisile wutlhari
18 I no vhumela a nandzu wa lezvi zvi nga mahekile a tlhela a kombela ku tsetselelwa hi Dhavhidha. Na a nga hundzeleti, i no vhumela lezvaku a nuna wakwe i wa nga vhuni nchumu kota lezvi a vito gakwe gi wulako, kuzvilava na a nyika a mawonela ya lezvaku zvi wa nga faneli a munhu wo kota Dhavhidha a ku tsayisa wanuna wo kota Nabhali. I no kombisa kutsumba kakwe ka Dhavhidha, kota muyimeli wa Jehovha, a tlhela a vhumela lezvaku Dhavhidha i walwa “a yimpi ya ka Jehovha.” I tlhelile a komba lezvaku i wa ci tiva a citsumbiso ca Jehovha xungetano hi Dhavhidha ni wuhosi, hakuva i te: ‘Jehovha . . . i ta ku yimisa a kuva hosi ya ka Izrayeli.’ I no engeta a khongotela Dhavhidha lezvaku a nga mahi nchumu wu nga wa ta mu maha ava ni nandzu wa nkhata kutani “mhaka ya ku [mu] hlokisa” — na a wula a kuba ka livhalo. (Lera 1 Samueli 25:24-31.) Zwana a magezu lawo ya ma nene ni yo khumba!
Kela titshomba ta moya
Pimanyisa kukholwa kabye paj. 80 par. 16
I tirisile wutlhari
16 Xana lezvo zvi wula lezvaku Abhigayili i wo hluwukela a wuhloko ga nuna wakwe? Ahihi; alakanya lezvaku Nabhali i wa mahele kubiha a nandza ga Jehovha gi totilweko, lezvi zvi nga wa ta dayisa a zviro zvi nga hiko na nandzu zva yindlu ya Nabhali. Loku Abhigayili i wa nga mahangi nchumu, xana yenawu na a rwele nandzu wa lezvi Nabhali a nga maha? Ka khati legi, i wa zvi wona na zvi hi chukwana a ku rangisa a ku ti veka hasi ka Nungungulu ku hundza a ku ti veka hasi ka nuna wakwe.