Timhaka ta mabhuku ma tako ka Cibhukwana ca Mutlhangano

© 2022 Christian Congregation of Jehovah’s Witnesses

2-8 KA JANEIRO

TITSHOMBA TI NGA KA MHAKA YA NUNGUNGULU | 2 TIHOSI 22-23

“Hikuyini hi faneleko ku ti koramisa?”

Sentinela 15/09/00 paj. 29-30

Josiya i wa ti koramisa niku i wa tsakelwa hi Jehovha

Lava va nga kari va tira kuvhuxeteni ka tempeli va wa tira hi mbilu yontlhe kusukela ni mixo nguvhu. Handle ko kanakana, Josiya i wa mu bonga nguvhu Jehovha hi kota ya lezvi a vatiri lavo va nga lungisa lezvi a vokari va vakokwani vakwe vo biha va nga zvi wonhetele lomu ndlwini ya Nungungulu. Laha a ntiro wu nga kari wu famba, Xafani i nota ni mahungu ka Josiya. Kanilezvi cini a nga khomile? I wa khomile a bhuku! I no tlhamusela Josiya lezvaku Hilkiya, a Mupristi wa Hombe, ‘i no thumba a Bhuku ga Nayo wa Jehovha lowu wu nyikilweko hi Mosi’. (2 Kro. 34:12-18) I wa thumbile a nchumu wa lisima — ku nga bhuku legi handle ko kanakana gi nga tsalilwe hi Mosi wutsumbu!

Josiya i wa zvi lava nguvhu a kuzwa a mahungu wontlhe ma nga hi lomu ka bhuku lego. Laha Xafani a nga kari a lera, a hosi yi wa zama ku wona lezvi a nayo wun’we ni wun’wani wu nga tirisa zvona ka yena ni ka vanhu vontlhe. I hlamalisilwe nguvhu hi lezvi a bhuku lego gi nga khanyisisa zvona a wukhozeli ga lisine ni ku tlharihisa vaIzrayeli hi wukhumbi ni makhombo lawa ma nga wa ta wela vanhu loku vo ti patsa ni wukhozeli ga mawunwa. Laha a nga wona lezvaku a hi yontlhe milayo ya Nungungulu yi nga kari yi ingisiwa, Josiya i no handzula a tinguwo takwe, a gumesa a byela Hilkiya na Xafani aku: ‘Fambani mu ya ndzi wutisela ka Jehovha xungetano hi timhaka ta bhuku legi gi thumbilweko, hakuva a zanga ya Jehovha yi vhurako hehla ka hina ya hombe, hakuva a vakokwani va hina a va ingisangi timhaka ta bhuku legi’. —2 Tih. 22:11-13; 2 Kro. 34:19-21.

Sentinela 15/09/00 paj. 30 par. 2

Josiya i wa ti koramisa niku i wa tsakelwa hi Jehovha

Lava va nga rumilwe hi Josiya va noya ka Huldha, a muprofeti wa cisati, le Jerusalema niku va no wuya ni mahungu. Huldha i no phinda a magezu ya Jehovha, a komba lezvaku a makhombo lawa ma nga tsalilwe lomu ka bhuku legi gi thumbilweko, ma wa ta wela a vaIzrayeli lava va nga hluwukele Jehovha. Hambulezvo, kota lezvi Josiya a nga ti koramisile mahlweni ka Jehovha Nungungulu, i wa nga ta ma wona a makhombo lawo. I wa ta lahliwa hi kurula cilahleni ca vakokwani vakwe. — 2 Tih. 22:14-20; 2 Kro. 34:22-28.

Kela titshomba ta moya

Sentinela 15/04/01 paj. 26 par. 3-4

Kani u wundlisilwe kuyini zvi nga ku fambela khwatsi

Hambu lezvi a kumeneko ni zviyimo zvo bindza wun’wananeni gakwe, Josiya i wa maha lezvi zvi nga tsakisa Jehovha. I nova Hosi ya yinene laha ka kuza a Bhibhiliya gi ku: ‘Cima ku wa nga hi kona hi mahlweni kakwe a hosi yo kota yena leyi yi nga hundzulukela ka Jehovha hi mbilu yakwe yontlhe, ni muhefemulo wakwe wontlhe, ni ntamu wakwe wontlhe, a landzela a nayo wa Mosi; ni ndzhako kakwe cima a ku humangi mun’wani wo kota yena.’ — 2 Tih. 23:19-25.

Josiya cikombiso ca cinene ka lava kuzvilava va timiseleko zviyimo zvo bayisa wun’wananeni gabye! Zvini hi nga gondzako ka cikombiso cakwe? Cini ci vhunileko Josiya a ku hlawula ndlela ya yinene a tlhela a famba hi yona?

9-15 KA JANEIRO

TITSHOMBA TI NGA KA MHAKA YA NUNGUNGULU | 2 TIHOSI 24-25

“U nga etleli hi tihlo”

Sentinela 15/02/01 paj. 12 par. 2

A siku ga kulamula ga Jehovha gi laha kusuhani!

² Lezvi Zefaniya a zvi phrofetileko handle ko kanakana zvi mu vhunile nguvhu Josiya a ku wona a cilaveko ca ku fuvisa a wukhozeli ga mawunwa tikweni ga Judha. Kanilezvi, lezvi a hosi yi zvi mahileko zva ku fuvisa wukhozeli ga mawunwa, a zvi mbhetangi a wubihi gontlhe lomu tikweni, ne a zvi mahangi ku a zviwonho zva kokwani wakwe, Hosi Manase, loyi a nga ‘tatile a Jerusalema hi nkhata wu nga hiko na nandzu’, zvi tsetselelwa. (2 Tih. 24:3, 4; 2 Kro. 34:3) Hikwalaho, handle ko kanakana a siku ga Jehovha ga kulamula gi wa tata.

Sentinela 15/03/07 paj. 11 par. 10

Timhaka-tshinya ta bhuku ga Jeremiya

Ku wa hi lembe ka 607 Mahlweni ka Nguva ya Hina, a lembe ga wu 11 ga kufuma ka Zedhekiya. Makunu ku wa hundza a lembe ni khihlanya, Hosi Nebhukadnezare wa le Bhabhuloni na a randzele Jerusalema. Hi siku ga wu 7 ka hweti ya wu ntlhanu ya lembe ga wu 19 ga kufuma ka Nebhukadnezare, Nebhuzaradhani, a nduna ya varindzeli, i no ‘nghena’, kutani ku i no chikela, Jerusalema. (2 Tih. 25:8) Kuzvilava na a hi laha a nga govile kona, le handle ka mimuro ya dhoropa, Nebhuzaradhani i hlolile a ciyimo ca dhoropa a tlhela a maha makungo ya ku gi dhumela. Andzhako ka masiku manharu, hi siku ga wu 10 ga hweti, i no ‘nghena’ Jerusalema, a hisa dhoropa. — Jer. 52:12, 13.

Kela titshomba ta moya

Sentinela 01/08/05 paj. 12 par. 2

Timhaka-tshinya ta bhuku ga Tihosi ta wumbiri

24:3, 4. ‘Jehovha a nga vhumelangi ku tsetselela’ Judha hi kota ya lezvi Manase a nga hi ni nandzu wa nkhata. Jehovha wa kombisa cichavo hi wutomi ga vanhu vo kala nandzu. Hi nga tiyiseka lezvaku Jehovha i ta photela a vanhu lava va dawako na va nga hi na nandzu hi ku lovisa lava va va dayako.— Lis. 37:9-11; 145:20.

16-22 KA JANEIRO

TITSHOMBA TI NGA KA MHAKA YA NUNGUNGULU | 1 KRONEKELE 1-3

“A Bhibhiliya gi wulawula zvilo zva lisine — a hi zvo tsambiwa”

Sentinela 01/09/09 paj. 14 par. 1

Adhamu na Evha hakunene va vile kona ke?

Hi cikombiso, ehleketa hi xaxameto wa mavito ya lixaka la ka Judha wu kumekako ka bhuku ga Kronekele wo sangula cipimo 1 kala 9, ni ka bhuku ga Luka cipimo 3. A mixaxameto leyo yo dlunyateka, a wun’we wu na ni 48 a wun’wani wu na ni 75 wa mavito ya zvizukulwana. A bhuku ga Luka gi na ni xaxameto wa mavito ya lixaka la Jesu Kristu, niku a bhuku ga Kronekele gi na ni xaxameto wa tihosi ni vapristi va tiko ga Izrayeli. A mixaxameto leyo ya yimbiri yi na ni mavito ya vanhu vo tiveka nguvhu, vo kota Solomoni, Dhavhidha, Jakobe, Isaka, Abrahama, Nowa na Adhamu. A mavito wontlhe ma nga lomu ka mixaxameto leyi ya yimbiri ya vanhu va lisine niku Adhamu hi yena nyapandze wa vanhu lavo ka xaxameto wun’we ni wun’wani.

Sentinela 01/06/08 paj. 3 par. 4

Nowa i wa hi munhu wa lisine; a ndambi yi mahekile futsi

A matimu ma nga ka mixaxameto yimbiri ya lixaka ka mabhuku ya Bhibhiliya ma hi tiyisekisa lezvaku Nowa i wa hi munhu wa lisine. (1 Kro. 1:4; Luka 3:36) Ezra na Luka lava va nga tsala matimu lawo, va wa kambisisa hi wukheta. Nowa i kona ka xaxameto wa mavito ya lixaka la Jesu Kristu lowu wu nga tsaliwa hi Luka.

Sentinela 01/09/09 paj. 14-15

Adhamu na Evha va wa hi vanhu va lisine ke?

Hi cikombiso, wona a gondzo yo kari leyi a vakhongeli vo tala va yi randzako — a hakhelo ya kutlhatlhisa. Hi kuya hi gondzo leyi, Jesu i nyikele a wutomi gakwe go mbhelela kota hakhelo ya kutlhatlhisa kasi ku tlhatlhisa vanhu ka zviwonho zvabye. (Mat. 20:28; Joh. 3:16) Kota lezvi hi zvi tivako, a hakhelo ya kutlhatlhisa, i ntsengo wu lavekako kasi ku tekisa kutani ku hakhela nchumu u nga wu luza kutani va nga ku phanga. Hi cigelo leco a Bhibhiliya gi nge Jesu i “hakhelo ya kutlhatlhisa yi enelako”. (1 Tim. 2:6) Kuzvilava hi nga ti wutisa ku: ‘Yi enela ka yini?’ A Bhibhiliya ga hlamula, gi wula lezvi: “Kota lezvi vontlhe va fako hi ka Adhamu, hizvalezvo ni ka Kristu vontlhe va ta hanyisiwa.” (1 Kor. 15:22) A wutomi go mbhelela legi Jesu a nga gi nyikela kasi ku tlhatlhisa a vanhu vo ingisa, ga fana ni wutomi go mbhelela legi Adhamu a gi luzileko hi kota ya ciwonho leci a ci mahileko le Edheni. (Rom. 5:12) Hi lisine, loku Adhamu i wa nga vangi kona, na ku nga lavekangi a hakhelo ya kutlhatlhisa.

Kela titshomba ta moya

Perspicaz vhol. 1 paj. 1040 par. 1-2

Matimu ya lixaka

Mavito ya vavasati. A vavasati va wa tshuka va kumbukiwa lomu ka matimu ya mavito ya tixaka, loku ku hi ni cigelo co kari ci ringanako ku va kumbukiwa. Ka Genesisi 11:29, 30, ku kumbukiwa Sarayi (Sara). Zvi laha kubaseni ku i kumbukiwa hi kota ya lezvi a nga tsumbisilwe ku a pswalo wu wa tata hi laha ka yena, na ku nga hi hi ka sati mun’wani wa Abrahama. Zva koteka ku Milka a kumbukilwe ka matimu lawa hi kota ya lezvi a nga hi kokwani wa Rebheka a sati wa Isaka, zvi kombako ku a lixaka la Rebheka li wa huma ka maxaka ya Abrahama, kota lezvi ka ku Isaka i wa nga faneli ku teka sati wa matiko man’wani. (Gen. 22:20-23; 24:2-4) Ka Genesisi 25:1 ku kumbukiwa Ketura loyi a nga gumesa ava sati wa Abrahama. Lezvo zvi komba ku Abrahama i tlhelile a chadha kambe andzhako ka kufa ka Sara niku i wa ha zvi kota ku pswala vana andzhako ka 40 wa malembe ni kuhundza Jehovha na a mu vhuxisile a ntamu wa ku pswala hi cihlamaliso. (Rom. 4:19; Gen. 24:67; 25:20) A matimu lawa ma tlhela ma komba a wuxaka gi nga hi kona cikari ka vaMidhiyani ni tin’wani tixaka ta vaArabhiya ni vaIzrayeli.

Ku kumbukiwa Leya, Rakeli ni van’wani vasati va Jakobe zvin’we ni vana vabye. (Gen. 35:21-26) Lezvo zvi hi vhuna ku wona ndlela leyi Jehovha a nga gumesa a tirisana hi yona ni vana lavo. Ha kuma mavito ya van’wani vavasati lomu ka matimu ya mavito ya lixaka hi zvigelo zvo fana. Loku a vavasati va nyikiwa tshomba ya lixaka, kuzvilava a mavito yabye ma wa kumbukiwa. (Mitse. 26:33) Tamari, na Rahabi na Rute va tiveka nguvhu. A mun’we ni mun’wani wa vavasati lava va vanharu i mahile nchumu wo kari wu nga maha ku ava kokwani wa Mesiya, Jesu Kristu. (Gen. 38; Rute 1:3-5; 4:13-15; Mat. 1:1-5) Ku na ni zvikombiso zvin’wani zva xaxameto wa mavito ya lixaka ku kumbukiwako mavito ya vavasati zvi kumekako ka 1 Kronekele 2:35, 48, 49; 3:1-3, 5.

23-29 KA JANEIRO

TITSHOMBA TI NGA KA MHAKA YA NUNGUNGULU | 1 KRONEKELE 4-6

“A mikhongelo ya mina yi komba yini hi mina?”

Sentinela 01/10/10 paj. 23 par. 3-7

‘Muzwi wa mikhongelo’

Jabheza i wa zvi randza ku khongela. I sangulile mukhongelo wakwe hi ku kombela Nungungulu ku a mu katekisa. Andzhako ka lezvo, i no kombela zvilo zvinharu zvi nga komba ku i wa hi ni kukholwa ka hombe.

Co sangula: Jabheza i no kombela Nungungulu lezvaku a ‘engetela a mimbhingano ya tiko gakwe’. (Vhesi 10) A wanuna loyi wo randzeka i wa nga hi na makolo; i wa nga naveli matiko ma nga lumba vaakelani vakwe. Kuzvilava i wo kombela ku engetelelwa a vanhu, na ku nga hi matiko. Zva koteka ku a kombele ku engetelelwa a mimbhingano ya tiko gakwe kasi a vakhozeli van’wani va Nungungulu wa lisine va tshama lomo.

Ca wumbiri: Jabheza i no kombela lezvaku a ‘woko’ ga Nungungulu giva na yena. A woko ga Nungungulu go fananisa, i ntamu lowu a wu tirisako kasi ku vhunetela vakhozeli vakwe. (1 Kro. 29:12) Kasi a mixuvo yakwe yi maheka, Jabheza i no kombela civhuno ka Nungungulu loyi a woko gakwe gi nga komangiko kasi ku vhunetela lava va kholwako kakwe. — Isa. 59:1.

Ca wunharu: Jabheza i no khongela aku: ‘Ndzi vhikele ka lezvi zvi bihileko, kasi ndzi nga kumi hlomulo!’ A magezu lawa ya ku ‘kasi ndzi nga kumi hlomulo’, kuzvilava ma komba lezvaku Jabheza i wa nga kombeli ku vhikelwa ka hlomulo wa kona, kanilezvi i wa kombela ku a nga karateki nguvhu kutani ku mbhela ntamu hi kota ya hlomulo.

A mukhongelo wa Jabheza wu kombile lezvi a nga karatekelisa zvona a wukhozeli ga lisine wu tlhela wu komba lezvaku i wa kholwa ka Muzwi wa mikhongelo. Zvini lezvi Jehovha a nga maha? A matimu lawa yo koma ma gumesa hi magezu lawa: ‘Nungungulu i no mu nyika lezvi a zvi kombeleko.’

Kela titshomba ta moya

Sentinela 01/10/05 paj. 9 par. 7

Timhaka-tshinya ta bhuku ga Kronekele wo sangula

5:10, 18-22. Masikwini ya hosi Sawule, a tixaka leti ti nga hi mutsuwuka-gambo wa Jordhani hambu lezvi ti nga hi titsongwani nguvhu ti no hlula vaHagrate. Lezvo zvi kotekile hi lezvi a vavanuna vo tiya hlanha va tixaka leto va nga tsumba Jehovha va tlhela va kombela ku a va vhunetela. Laha hi lwako ni valala va hina — lava va teleko ku hundza hina — a hi tsumbeni Jehovha. — Efe. 6:10-17.

30 KA JANEIRO–5 KA FEVEREIRO

TITSHOMBA TI NGA KA MHAKA YA NUNGUNGULU | 1 KRONEKELE 7-9

“Jehovha a nga ku vhuna ku tatisa zviavelo zvo karata”

Sentinela 01/10/05 paj. 9 par. 8

Timhaka-tshinya ta bhuku ga Kronekele wo sangula

9:26, 27. A vaLevhi lava va nga hi vagadhi va tinyangwa ta tempeli va wa hi vanhu vo tsumbeka hakuva va wa nyikilwe a pfhungulo ya nyangwa ya matshamu yo basa ya tempeli. Va wa tsumba lezvaku siku ni siku va ta vhula a tinyangwa ta tempeli. Hi ku fanana, hi nyikilwe a ntiro wa ku chumayela a vanhu va lomu cipandzeni ca hina ni ku va vhuna lezvaku va khozela Jehovha. Na hinawu hi fanele ku tsumbeka a ku fana ni vaLevhi lava va nga hi ni ntiro wa ku gadha a tinyangwa ta tempeli.

Sentinela 15/09/11 paj. 32 par. 7

U nga mu pimanyisisa kuyini Finiyasi loku u kumana ni zvikarato?

Fineyasi i wa hi ni ntiro wa hombe nguvhu le Izrayeli wa kale. Kanilezvi, hi wutlhari, ni ku tsumba Jehovha ni ku tiya-hlanha i no wu maha khwatsi a ntiro wakwe, hambu lezvi a nga kumana ni zvikarato. Niku a kuhiseka kakwe ku mu mahile ku a tsakelwa hi Jehovha. Andzhako ka cipimo ca 1000 wa malembe, Ezra i no pimiselwa ku tsala lezvi: ‘Finiyasi n’wana Eleyazari, i wa hi hosana yabye kale, Jehovha i wa hi zvin’we naye.’ (1 Kro. 9:20) Hi xuva ku lava va yimisilweko kasi ku rangela a vanhu va Nungungulu nyamutlha ni wontlhe maKristu lawa ma mu tirelako hi kutsumbeka ma pimanyisa cikombiso ca Fineyasi.

Kela titshomba ta moya

Sentinela 15/12/10 paj. 21 par. 6

Yimbelelani ka Jehovha!

⁶ Hi ku tirisa vaphrofeti, Jehovha i no byela vakhozeli vakwe lezvaku va mu dhumisa hi tisimu. A vaLevhi lava va nga hi vayimbeleli va wa nga nyikiwi a mitiro leyi yi nga mahiwa hi vaLevhi van’wani, kasi va kuma cikhati co enela ca ku va tsamba kuzvilava ni ku vhuxeta tisimu. — 1 Kro. 9:33.

6-12 KA FEVEREIRO

TITSHOMBA TI NGA KA MHAKA YA NUNGUNGULU | 1 KRONEKELE 10-12

“Tiyisa kuxuva ka wena kasi u maha kurandza ka Nungungulu”

Murindzeli 15/11/12 paj. 6 par. 12-13

“Ndzi gondzise ku maha kurandza ka wena”

¹² A cikombiso ca Dhavhidha ca ku randza matshinya ya milayo ma kombiswako ka Nayo ni ku ti karatela ku hanya hi wona hakunene hi fanele ku ci pimanyisa. Hi nga ehleketa hi lezvi zvi mahekileko a cikhati leci Dhavhidha a nga navela kunwa “mati ya hlowo ya le nyangweni ya Bhetlehema.” A vavanuna vanharu va Dhavhidha va lo ti boha zviwunu va nghena dhoropeni — legi ka cikhati leco gi nga tekilwe hi vaFilistiya— zvonake va yakha mati va wuya nawo. Kanilezvi, “Dhavhidha i lo ala ku manwa, a ma chulula mahlweni ka Jehovha.” Hikuyini? Dhavhidha i tlhamusela aku: “A zvive kule na mina a ku maha zva kunghahi! Ndzi nganwa a nkhata wa vavanuna lava va nga yisile wutomi gabye mhangweni ke? Hakuva vona va ndzi nehele mati lawa hi ku nyikela wutomi gabye.” — 1 Kro. 11:15-19.

¹³ Hi ku gondza Nayo, Dhavhidha i wa zvi tiva lezvaku a nkhata wu fanele ku halatiwa mahlweni ka Jehovha, a wu faneli ku giwa. I wa zi zwisisa kambe a ku hikuyini zvi nga tano. Dhavhidha i wa zvi tiva lezvaku “a muhefemulo wa nyama wu lomu nkhateni.” Hambulezvo, lawo ma wa hi mati, wu wa nga hi nkhata! Makunu, hikuyini Dhavhidha a nga ala kunwa? I wa nyika nguvhu lisima a tshinya ga nayo lowo. Ka Dhavhidha, a mati lawo ma wa hi ya lisima a ku fana ni nkhata wa vavanuna lavo va vanharu. Hikwalaho, zvi wa hi kule na yena a kunwa mati lawo. Wutshan’wini ga kunwa, i lo zvi wona na zvi hi chukwana a ku ma halata lahasi.— Lev. 17:11; Deut. 12:23, 24.

Murindzeli 18.06 paj. 17 par. 5-6

Tsika milayo ni matshinya ya milayo ya Nungungulu ma gondzisa livhalo la wena

⁵ Kasi ku a milayo ya Nungungulu yi hi vhuna, hi fanele ku maha zvo hundza ku yi lera ntsena kutani ku yi tiva. Hi fanele ku yi randza hi tlhela hi kombisa cichavo hi yona. A Bhibhiliya gi hi byela lezvi: ‘Vengani kubiha, mu randza zvinene.’ (Amosi 5:15) Kanilezvi, hi nga zvi mahisa kuyini lezvo? Hi fanele ku gondza ku wona zvilo hi mawonela ya Jehovha. Ehleketa hi mhaka leyi: Ti alakanyele na u nga etleli khwatsi ni wusiku. A dhokodhela wa wena a ku byela ku u fanele kuga zvakuga zva mavhitamina, u maha mitiro yo tiyisa miri, u tlhela u cica zvin’wani wutomini ga wena. Andzhako ka lezvo, u si landzela wusungukati gakwe, gi guma gi ku vhuna! U wa ta zvi wonisa kuyini zvileletelo zva dhokodhela loye?

⁶ Hi kufanana, a Muvangi wa hina i hi nyikile milayo kasi yi hi vhikela ka wuyelo ga hava ga ciwonho ni ku hi maha hiva ni wutomi gi nene. Hi cikombiso, a Bhibhiliya gi hi gondzisa ku a hi faneli ku hemba, ku kabhulara, ku yiva, ku maha wubhayi, kuva ni tihanyi, kutani ku maha zvilo zvi yelanako ni madhimoni. (Gondza Mavingu 6:16-19; Kuvhululelwa 21:8) A cikhati hi wonako wuyelo gi nene ga ku ingisa Jehovha, a lirandzo la hina hi yena ni milayo yakwe lo kula.

Kela titshomba ta moya

Perspicaz vhol. 1 paj. 556 par. 6-7

Mbilu

Tira hi “mbilu yi mbheleleko.” A mbilu ya civiri kasi yi tira khwatsi yi fanele ku ngha yi hi yona yontlhe, kanilezvi a mbilu yo fananisa yi nga avanyeka. Dhavhidha i khongele aku: “Maha mbilu ya mina yi chava vito ga wena” kutani ku ndzi nyike mbilu yi nga avanyekangiko. Lezvo zvi komba ku a mbilu ya munhu yi nga avanyeka ka lezvi a ti zwisako zvona ni lezvi a zvi chavako. (Lis. 86:11) A munhu loye a ngava ni “timbilu timbiri”, a hola hi tlhelo ga moya. (Lis. 119:113; Kuv. 3:16) A munhu a ngava ni “timbilu timbiri” kambe hi ku zama ku tirela tihosi timbiri kutani hi ku wula zvilo zvo kanganyisa na a ehleketa zvin’wani. (1 Kro. 12:33; Lis. 12:2) Jesu i gi kawukile nguvhu a wukanganyisa ka tshamela lego. — Mat. 15:7, 8.

Lava va lavako ku tsakisa Nungungulu a va faneli kuva ni “timbilu timbiri” kanilezvi va fanele ku mu tirela hi mbilu yi mbheleleko. (1 Kro. 28:9) Lezvo zvi lava kutikarata ka hombe kota lezvi ka ku a mbilu yi khohlakele niku yi byekelela ku maha zvilo zva kubiha. (Jer. 17:9, 10; Gen. 8:21) Lezvi zvi nga hi vhunako kuva ni mbilu yi mbheleleko hi lezvi: Mukhongelo wo huma mbilwini (Lis. 119:145; Miko. 3:41), ku gondza Mhaka ya Nungungulu hi kukhandzakanya (Ezra 7:10; Mav. 15:28), ku chumayela mahungu ya manene hi kuhiseka (fananisa na Jer. 20:9), niku ti patsa ni van’wani lava a timbilu tabye ti mbheleleko ka Jehovha. — Fananisa na 2 Tih. 10:15, 16.

13-19 KA FEVEREIRO

TITSHOMBA TI NGA KA MHAKA YA NUNGUNGULU | 1 KRONEKELE 13-16

“A ku ingisa zvileletelo zvi maha ku zvi hi fambela khwatsi”

Sentinela 01/05/03 paj. 10-11

Wa ti wutisa ku: ‘I kwihi Jehovha’?

¹² Andzhako ka loku a arke ga civhumelwano gi wuyile Izrayeli gi ta tshama Kiriyat-Jeyarime hi malembe yo tala, Hosi Dhavhidha i no lava ku gi rurisa gi ya Jerusalema. I no wutisa a tihosana ta vanhu a tlhela a ti byela lezvaku a arke gi wa ta rurisiwa ‘loku vona va zvi wona na zvi sasekile, ni loku zvita hi ka Jehovha Nungungulu’. Kanilezvi a nga ti karatelangi ku tiva a kurandza ka Jehovha hi mhaka leyo. Loku i wa no maha lezvo, a arke na gi nga pakelwangi lomu ka kareta kanilezvi na gi rwalilwe hi vaLevhi va ka Kohate kota lezvi a nga sina a va layile. Hambu lezvi Dhavhidha a nga tolovela ku wutisa Jehovha, ka khati legi a nga mahangi lezvo hi ndlela yi faneleko. Hikwalaho, i no tshovela kubava. Kanilezvi andzhako ka lezvo Dhavhidha i no vhumela cihoxo cakwe, aku: ‘Jehovha Nungungulu wa hina i mahile cigirimuka cikari ka hina, hi ku kala hi nga mu vitanangi, khwatsi hi lezvi ku leletelweko.’ — 1 Kro. 13:1-3; 15:11-13; Mitse. 4:4-6, 15; 7:1-9.

Sentinela 01/05/03 paj. 11 par. 13

Wa ti wutisa ku: ‘I kwihi Jehovha’?

¹³ A cikhati leci a arke gi nga rwaliwa hi vaLevhi kusukela le kaya ka Obhed-Edhomi gi ya Jerusalema, ku yimbelelwe a lisimu li tsambilweko hi Dhavhidha. A lisimu lelo li wa hi ni cialakanyiso co huma mbilwini caku: ‘Hlotani Jehovha ni ntamu wakwe! Lavisisani a nghohe yakwe contlhe cikhati! Ehleketani hi zvihlamaliso lezvi a nga zvi maha! A zvihlamaliso zvakwe ni kulamula ka nomu wakwe.’ — 1 Kro. 16:11, 12.

Kela titshomba ta moya

Murindzeli 15/01/14 paj. 10 par. 14

Khozela Jehovha, a Hosi ya Pindzukelwa

¹⁴ Dhavhidha i lo neha a nghaxa yo basa ya civhumelwano Jerusalema. Ka cikhati leco co tsaka, a vaLevhi va lo chula lisimu la kudhumisa li nga ni magezu ya lisima, li tsalilweko ka 1 Kronekele 16:31, li nge ngalo: “Ngha va wula cikari ka matiko, vaku: Jehovha wa fuma!” A wokari a nga haku, ‘Lezvi Jehovha a nga Hosi ya pindzukelwa, i mahisile kuyini Hosi ka cikhati leco?’ Jehovha i maha Hosi a cikhati leci a kombisako a ntamu wa wuhosi gakwe kutani ku yimisa a hubye yo mu yimela ka cikhati co kari kutani yo yimisana ni mhaka yo kari. A ku zwisisa lezvi Jehovha a mahisako zvona hosi zva lisima nguvhu. Na Dhavhidha a nga sefa, Jehovha i lo mu tsumbisa lezvaku a wuhosi gakwe gi wa ta simama kala kupindzuka: “Ndzi ta yimisa a n’wana wa wena a ndzhako ka wena, loyi a ta nga huma ciwunwini ca wena, ndzi tiyisa mufumo wakwe.” (2 Sam. 7:12, 13) A citsumbiso leci xungetano hi “n’wana” wa Dhavhidha ci tatisekile andzhako ka cipimo ca 1.000 wa malembe. Ci tatisekile ka mani, niku hi rini laha a nga wa ta maha Hosi ke?

20-26 KA FEVEREIRO

TITSHOMBA TI NGA KA MHAKA YA NUNGUNGULU | 1 KRONEKELE 17-19

“Simama ku tsaka hambu loku u kumana ni zvikarato”

Sentinela 15/07/06 paj. 19 par. 1

Veka kupima ka zvilo zva zvinene zvi mahiwako hi hlengeletano ya Jehovha

DHAVHIDHA, a hanyileko le Izrayeli wa kale, mun’we wa lava ku wulawuliwako nguvhu hi vona lomu ka Mitsalo ya ciHebheru. A murisi loye, ni muyimbeleli, ni muphrofeti tlhelo hosi i wa mu tsumba nguvhu Jehovha Nungungulu. A lirandzo lakwe hi Jehovha li mahile ku a xuva ku mu akela yindlu Nungungulu. A yindlu leyo, kutani tempeli, yi wa tava tsindza ga wukhozeli ga lisine le Izrayeli. Dhavhidha i wa zvi tiva lezvaku a malulamiselo ma yelanako ni tempeli ma wa ta tisa litsako ni makatekwa ka vanhu va Nungungulu. Hikwalaho, Dhavhidha i no yimbelela aku: ‘I katekile a munhu loyi wena [Jehovha] u mu hlawulako, loyi u mu tshinetako ka wena, kasi a fela ku tshama zviluvelweni zva wena. Hina hi ta xura hi malongo ya [“wunene ga,” NWT] yindlu ya wena, le wutshan’wini go basa ga tempeli ya wena. — Lis. 65:4.

Murindzeli 21.08 paj. 22-23 par. 11

Tsaka hi lezvi u zvi kotako ku mahela Jehovha

¹¹ Hinawu hi nga engetela litsako la hina hi ku ti tsitsirita ni ka cihi hi nyikiwako ku maha ntirweni wa Jehovha. Ti ‘tsitsirite nguvhu’ ntirweni wa kuchumayela u tlhela u tira yi nga chayi zvin’we ni bandla. (Miti. 18:5; Mah. 10:24, 25) Longisela khwatsi mitlhangano kasi u hlamula zvilo zvi tiyisako van’wani. Zvi nyike lisima a zviavelo zvontlhe u nyikiwako ku maha ka mutlhangano wa cikari ka vhiki. Loku u kombeliwa ku maha ntiro wo kari laha bandleni, tekela ku wu maha u tlhela u wu maha khwatsi. Ni cihi ciavelo u nyikiwako u nga ci chepeti. Ti nyike cikhati u ci khatalela. Zama ku engetela wutlhari ntirweni wa wena. (Mav. 22:29) Laha u ti tsitsiritako ntirweni wa Jehovha ni ka ciavelo cihi u nyikiwako, u ta hatlisa ku kula u tlhela u engetela litsako la wena. (Gal. 6:4) Zvi ta ku olovela kambe a ku u tsaka loku a van’wani va nyikiwa malungelo lawa u ma navelako. — Rom. 12:15; Gal. 5:26.

Kela titshomba ta moya

Murindzeli 20.02 12, kwadru

Ha mu randza nguvhu Jehovha, a Papayi wa hina

Xana Jehovha wa khatala hi mina?

U tshuka u ti wutisa lezvi: ‘Ka vanhu vontlhe va nga kona laha misaveni, hikuyini Jehovha a nga wa ta khatala hi mina ke?’ Loku zvi hi lezvo, a hi wena wece u ti wutisako. Hosi Dhavhidha i tsalile lezvi: ‘Jehovha, cini munhu lezvaku wena u mu tiva? Ni n’wana wa munhu lezvaku u mu khatalela ke?’ (Lis. 144:3) Dhavhidha i wa hi ni kutsumba ka lezvaku Jehovha wa mu tiva khwatsi. (1 Kro. 17:16-18) Niku hi ku tirisa a Mhaka yakwe ni hlengeletano yakwe, Jehovha wa ku tiyisekisa lezvaku wa li wona a lirandzo leli u li kombisako hi yena. Wona a magezu yo kari ma nga lomu ka Mhaka ya Nungungulu ma nga ku vhunako lezvaku u tiyiseka ku yena wa khatala hi wena:

• Jehovha i ku wonile ne na u nga se pswaliwa. — Lis. 139:16.

• Jehovha wa zvi tiva lezvi zvi nga lomu mbilwini ya wena ni lezvi u zvi pimisako.— 1 Kro. 28:9.

• Jehovha wa ingisela a mikhongelo yontlhe u yi mahako. — Lis. 65:2.

• Lezvi u zvi mahako zvi nga tsakisa Jehovha kutani ku mu khunguvanyisa. — Mav. 27:11.

• Jehovha hi yena a nga ku koka u tshinela kakwe. — Joh. 6:44.

• Jehovha wa ku tiva khwatsi, hikwalaho loku ufa i ta ku vhuxa u hanya. I ta ku nyika a miri wuswa ni mapimo maswa ya ku fana ni yalawa u nga nawo zvezvi. — Joh. 11:21-26, 39-44; Miti. 24:15.

27 KA FEVEREIRO–5 KA MARÇO

TITSHOMBA TI NGA KA MHAKA YA NUNGUNGULU | 1 KRONEKELE 20-22

“Vhuna vaswa lezvaku zvi va fambela khwatsi”

Murindzeli 17.01 paj. 28 par. 8

“Lezvi . . . zvi veke ka vavanuna va tsumbekileko”

⁸ Lera 1 Kronekele 22:5. Kuzvilava Dhavhidha i alakanyile lezvaku Solomoni i wa nga hi na wutlhari ga ku rangela a ntiro lowo wa lisima. A tempeli yi wa fanele ku “saseka nguvhu,” kasi lezvo Solomoni i wa ha hi ‘muswa, niku i wa nga hi na ntamu.’ Kanilezvi Dhavhidha i wa zvi tiva lezvaku Jehovha i ta vhuna Solomoni a ku maha ntiro lowo wo hlawuleka. Hikwalaho i lo maha zvontlhe zvi nga hi ntan’wini wakwe kasi ku mu longiselela a ntiro lowo wa hombe.

Murindzeli 17.01 paj. 27 par. 7

“Lezvi . . . zvi veke ka vavanuna va tsumbekileko”

⁷ Dhavhidha i wa zvi lava nguvhu ku mu akela tempeli Jehovha, hikwalaho kuzvilava i xukuvalile nguvhu a cikhati a ngazwa ku a hi yena a to aka. Hambulezvo i lo simama ku vhunetela ka ntiro wa kuaka lowu wu nga ta rangelwa hi n’wana wakwe Solomoni. Dhavhidha i lo vhunetela ku lava vatiri ni ku hlengeletela tisimbi, ni suku, ni silivha, ni ndzalama ni mapulangu. I wa nga karateki hi loyi a to nyikwa wudzundzo ga ku aka tempeli, leyi hi kugumesa yi nga tiviwa kota tempeli ya Solomoni. Wutshan’wini ga ku karateka hi lezvo, i lo tiyisa Solomoni aku: “N’wananga, ngha Jehovha ava zvin’we na wena, u vhuvhuma, u aka a yindlu ya Jehovha Nungungulu wa wena, khwatsi hi lezvi yena a wulileko xungetano ha wena.” — 1 Kro. 22:11, 14-16.

Murindzeli 18.03 11-12 par. 14-15

Vapswali, ma vhuna vana va n’wina lezvaku vaba mazambo ma yisako kubhabhatisweni ke?

¹⁴ A madhota ma nga vhuna vapswali hi ku wulawula khwatsi hi mixuvo ya moya. A makabye wo kari wa cisati i alakanya khati go kari legi makabye Russell a nga bhula naye na a ha hi ni 6 wa malembe. I ngalo: “I mbhetile 15 minuto na a bhula na mina hi mixuvo ya moya.” Give gihi a wuyelo ga kona? Hi kufamba ka masiku, a makabye loye i tirile kota phayona hi 70 wa malembe ni ku hundza! Zvi te dlunya ku a magezu ya ma nene ni yo tiyisa hlanha ma nga khumba wutomi gontlhe ga munhu. (Mav. 25:11) A madhota ma nga tlhela ma ramba vapswali ni vanana lezvaku va ta va vhunetela ka mitiro yo kari Salawini ya Mufumo. Va nga kombela vanana lezvaku va maha mitiro yi zwananako ni tangana yabye ni wutlharana gabye.

¹⁵ A van’wani lomu bandleni ke, va nga va vhunisa kuyini? Va nga kombisa kukhatala hi vona. Hi cikombiso, u nga zama ku wona zvilo zvi kombako ku a n’wanana loye i kari a tshinela ka Jehovha. A zvokari zvi ngava ku hlamula mitlhanganweni, kutani ku maha cipandze ka mutlhangano wa laha cikari ka vhiki. Zvi nga maha kambe na a nyika wukustumunyu cikoleni, kutani ku yima a tiya loku a ringwa ku maha zvo biha. Loku a n’wanana wo kari a maha zvilo zvo kota lezvo, mu dzundze! Hi nga ti karatela ku bhula ni vanana loku a mutlhangano wu mbhela ni loku wu nga se sangula. Loku hi maha lezvo, a vanana va ta ti wona na va hi va lisima lomu bandleni. — Lis. 35:18.

Kela titshomba ta moya

Sentinela 01/10/05 paj. 11 par. 6

Timhaka-tshinya ta bhuku ga Kronekele wo sangula

21:13-15. Jehovha i no laya ngilozi lezvaku yi nyimisa ntungu hakuva wa va zwela nguvhu wusiwana a vanhu vakwe loku va xaniseka. Kunene, ‘a wuxinji gakwe ga hombe nguvhu’.