Timhaka ta mabhuku ma tako ka Cibhukwana ca Mutlhangano
© 2022 Watch Tower Bible and Tract Society of Pennsylvania
6-12 KA MARÇO
SHOMBA TI NGA KA MHAKA YA NUNGUNGULU | 1 KRONEKELE 23-26
“A zvilo zvi xaxametiwa khwatsi kasi Jehovha a khozelwa lomu tempeleni”
az vhol. 2 paj. 223
Valevhi
A cikhati leci Dhavhidha a nga kari a fuma, a ntiro wa vaLevhi wu wa xaxametilwe khwatsi. I wa yimisile varangeli, tihosana, valamuli, vagadhi va tinyangwa, vahlayisi va tshomba, ni vanhu van’wani vo tala kasi va vhunetela vapristi lomu tempeleni, lomu mitsendzeleni, ni lomu tisaleni to gela ka tona, ku wonelela minyikelo, miphahlo, ntiro wa ku basisa zvilo mahlweni ka Jehovha, wa ku peza zvilo, wa ku pima zvilo ni mitiro yin’wani yi yelanako ni ku gadha. A vaLevhi lava va nga hi ka ntiro wa ku chaya ni ku yimbelela va wa xaxametilwe hi 24 wa mitlawa, a ku fana ni mitlawa ya vapristi, niku va wa tira hi cikala. A mitiro yi wa phakelwa hi ku hlahluva tihlolo. Hambu lava va nga tira ku gadha tinyangwa, ku wa hlahluviwa tihlolo kasi ku tiva a nyangwa leyi a munhu a nga wa ta tirela ka yona. — 1 Kro. 23, 25, 26; 2 Kro. 35:3-5, 10.
Perspicaz vhol. 2 paj. 897
Vapristi
A mitiro ya vapristi lomu tempeleni yi wa xaxametilwe hi kuya hi tihosana ta kona. A mitiro yo kari yi wa phakelwa hi ku hlahluva tihlolo. Ntlawa ni ntlawa ka leyi ya 24, wu wa tira vhiki. Lomu ka lembe va wa tira makhati mambiri. Zvi wonekisa ku a vapristi vontlhe va wa tira hi tinguva ta mibuzo, a cikhati leci a vanhu va nga humesa miphahlo ya talela ga cima, a ku fana ni lezvi zvi nga maheka a cikhati leci a tempeli yi nga kanguliwa. (1 Kro. 24:1-18, 31; 2 Kro. 5:11; wona ni mongo wa 2 Kro. 29:31-35; 30:23- 25; 35:10-19.) Loku a nga colopeti a mitiro ya vapristi lava van’wani va tirako ka cikhati leco, zvi wa koteka ku a mupristi a tira ka tinguva tin’wani. Hi kuya hi mukhuwo wa varabhi masikwini ya Jesu, a vapristi va wa tele nguvhu laha ka ku ka vhiki ga ntlawa lowo a mitiro yabye yi wa avelelwa hi ngango ni ngango, a ngango wun’we wu tira siku gin’we kutani ku hundza.
Perspicaz vhol. 2 paj. 430
Muzka
Laha Dhavhidha a nga longisela zvilo kasi a vanhu va khozela Jehovha lomu tempeleni, i no hlawula 4000 wa vaLevhi kasi va tira ku chaya ni ku yimbelela. (1 Kro. 23:4, 5) Cikari kabye, a 288 wa vona va wa gondzisilwe a tisimu ta Jehovha, va wa hi titlhari ta kuyimbelela. (1 Kro. 25:7) A ntlawa wontlhe wa ku chaya ni ku yimbelela wu wa rangelwa hi vavanuna vanharu va nga hi zvipila zva muzka, Asafa na Hemani na Jedhutuni (loyi zvi wonekisako ku i wa vitaniwa kambe a ku hi Etana). Lezvi a vavanuna lava va nga pswaliwe hi vana vanharu va Levhi, ku nga Gerxoni na Kohati na Merari, zvi komba ku ku wa nga hi na ngango wa tihosana ta ka Levhi wu nga sele ndzhako ka ntlawa lowu wu nga tira ku chaya ni ku yimbelela lomu tempeleni. (1 Kro. 6:16, 31-33, 39-44; 25:1-6) A vana va vavanuna lavo va vanharu va wa chikela 24 wa vona. Vontlhe va wa hi cikari ka 288 wa titlhari ta ku yimbelela, leti hi ti kumbukileko. Mun’we ni mun’we wa lava va 24 i wa hlawuliwa hi ku hlahluva tihlolo kasi a rangela ntlawa wo kari wa vachayi ni vayimbeleli. Ka ntlawa wakwe, a munhu i wa hi ni 11 wa vanhu va hlawulilweko cikari ka vana vakwe ni ka vaLevhi lava van’wani. Hi ndlela leyo, a 288 ([1 + 11] × 24 = 288) wa titlhari ta ku yimbelela ta ka Levhi, ti wa avanyiselwe hi 24 wa mitlawa, a kufana ni vapristi. Loku ku hi lezvaku lava van’wani va nga sala, va 3712 wa ‘zvigondzani’ va wa avelelwe ka mitlawa leyo, zvi komba ku ntlawa ni ntlawa wu wa engetelelwe a 155 va vanhu; zvi wulako ku ka cigava cin’we ni cin’wani ca ku gondzisa muzka ni ku yimbelela, a tlhari yin’we ni yin’wani yi wa hi ni 13 wa vaLevhi. (1 Kro. 25:1-31) Lezvi ka ku a vapristi hi vona va nga chaya mimpundzu, va wa engetelwa ka ntlawa lowu wa vaLevhi lava va nga tira ka muzka. — 2 Kro. 5:12; wona ni mongo wa Mitse. 10:8.
Perspicaz vhol. 2 paj. 683
Vagadhi va tinyangwa
Lomu tempeleni: Na ku kiyela kutsongwani kasi Hosi Dhavhidha afa, i no xaxameta khwatsi vaLevhi ni vatiri va lomu tempeleni, a kupatsa ni vagadhi va tinyangwa, lava va nga hi 4000 wa vona. Khati ni khati, a ntlawa wu wa tira 7 wa masiku. Va wa tira ku gadha yindlu ya Jehovha, ku vhulula ni ku vhala tinyangwa hi cikhati ca kona. (1 Kro. 9:23-27; 23:1-6) Ahandle ka ntiro wa ku gadha, a van’wani va wa amukela minyikelo leyi a vanhu va ngata nayo laha tempeleni. (2 Tih. 12:9; 22:4) Hi ndzhako ka cikhati, laha mupristi wa hombe Jehoyadha a nga tota Jowaxi kota hosi, ku hlawulilwe vagadhi vo hlawuleka va yimisiwa kasi ku gadha tinyangwa ta tempeli kasi va vhikela jaha Jowaxi lezvaku a nga mahiwi zva hava hi Muzindza Ataliya, loyi a nga bangile wuhosi. (2 Tih. 11:4-8) A cikhati leci Hosi Jowaxi a nga fuvisa wukhozeli ga zvifananiso lomu tikweni, a vagadhi va tinyangwa va mu vhunile ku humesela zvibya zvi nga tiriselwa ku khozela Bhaali lomu tempeleni. A zvibya lezvo zvi no guma zvi ya hisiwa le handle ka dhoropa. — 2 Tih. 23:4.
Kela titshomba ta moya
Murindzeli 03.22 paj. 22 par. 10
A wukhozeli ga lisine gi ta engetela litsako la wena
10 Hi khozela Jehovha loku hi yimbelela zvin’we ni vamakabye. (Lis. 28:7) Ka vaIzrayeli, a kuyimbelela ci wa hi cipandze ca lisima ca wukhozeli gabye. Hosi Dhavhidha i wa yimisile 288 wa vaLevhi kasi ku yimbelela tempeleni. (1 Kro. 25:1, 6-8) Ni nyamutlha, hi nga komba ku ha mu randza Nungungulu hi ku yimbelela tisimu ta ku dhumisa. A zvizi zvi lava ku kala hi zvi tiva khwatsi ku yimbelela. Hi nga zvi fananisa hi ndlela leyi: A cikhati hi wulawulako, “hontlheni ha phazama makhati yo tala”, hambulezvo a hi tsiki ku wulawula laha bandleni ni kuchumayeleni. (Jak. 3:2) Hi kufanana, hi nga tsiki ku yimbelela tisimu ta ku dhumisa Jehovha hambu loku hi hi ni madiyo.
13-19 KA MARÇO
TITSHOMBA TI NGA KA MHAKA YA NU- NGUNGULU | 1 KRONEKELE 27-29
“A papayi wa lirandzo wa mu nyika wusungukati a n’wana wakwe”
Sentinela 15/02/05 paj. 19 par. 9
Hlayisa cifungo ca wena kota muKristu
9 Kholwa lezvaku lezvi a Bhibhiliya gi zvi gondzisako lisine. A cifungo ca hina kota malandza ya Jehovha a ci ngevi co tiya loku ci nga seketelwi khwatsi ka wutivi ga Mitsalo. (Filp. 1:9, 10) A muKristu mun’we ni mun’wani — wa hombe ni wa mu tsongwani — i fanele ku tiyiseka khwatsi lezvaku lezvi a zvi kholwako hakunene lisine yi nga lomu ka Bhibhiliya. Pawule i kucile maKristu-kuloni, aku: “Hlolani a zvilo zvontlhe; mu namarela ka lezvi zvi nga zvi nene.” (1 Tes. 5:21) A maKristu lawa ma ha hiko vaswa ma tshamako ni vapswali vabye va khozelako Jehovha ma fanele ku tiva lezvaku a ma ngevi maKristu ya lisine hi kota ya kukholwa ka vapswali vabye. Dhavhidha, i kucile n’wana wakwe Solomoni lezvaku a ‘tiva Nungungulu wa papayi wakwe, a mu khozela hi mbilu’. (1 Kro. 28:9) Zvi wa nga ta enela a ku Solomoni a cuwukela basi lezvi a papayi wakwe a nga tiyisisa zvona a kukholwa kakwe ka Jehovha. I wa fanele ku yena a tiva Jehovha; niku i zvi mahile futsi. I kombele Nungungulu, aku: ‘Ndzi nyike a wutlhari ni kupima, kasi ndza fela ku tiva ku maha murangeli wa lava vanhu.’ — 2 Kro. 1:10.
Murindzeli 01/04/12 paj. 22 par. 13
Simama ku tirela Jehovha hi mbilu yontlhe
13 A cigondzo ci la su dlunya. Kunene, zva dzundzeka loku hi maha a mitiro leyo yo saseka ni yi khesekako yo kota kuya mitlhanganweni ya bandla ni ntirweni wa simu. Kanilezvi a ku tirela Jehovha hi mbilu yontlhe a hi lezvo ntsena. (2 Kro. 25:1, 2, 27) Loku a mbilu ya muKristu ya ha simama ku randza zvilo zva “lendzhako” — ku nga zvilo zvo kari zva tiko zvi nyikako litsako kuhanyeni loku — i le khombyeni ga ku lahlekelwa hi kuzwanana kakwe na Nungungulu. (Luka 17:32) Hi ta ‘fanelwa hi mufumo wa Nungungulu’ ntsena loku hakunene hi ‘venga lezvi zva kubiha; hi namarela ka lezvi zvo saseka.’ (Rom. 12:9; Luka 9:62) Hikwalaho, ngha hina hontlhe hi nga tsiki ni cin’we tikweni legi ga Sathani ci hi tsandzekisa ku maha a kurandza ka Nungungulu hi mbilu yontlhe, hambu loku a nchumu lowo wu tsakisa kutani kuva ni civhuno co kota kwihi. — 2 Kor. 11:14; Lera Va Le Filipi 3:13, 14.
Murindzeli 09.17 paj. 32 par. 20-21
“Tiya hlana,” u khoma ntiro
20 Hosi Dhavhidha i alakanyisile Solomoni lezvaku Jehovha i wa tava zvin’we naye kala a mbheta ku aka tempeli. (1 Kro. 28:20) Handle ko kanakana, Solomoni i ehleketile hi magezu lawo, niku a kuva muswa a zvi mu mahangi a chava ku maha ntiro lowo. I tiyile hlanha a khoma ntiro, niku hi ku vhuniwa hi Jehovha, i akile tempeli yo saseka nguvhu hi 7 wa malembe ni khihlanya.
21 A ku fana ni lezvi a nga vhuna Solomoni, Jehovha a nga hi vhunawu lezvaku hi tiya hlanha hi maha ntiro wa hina, laha kaya ni lomu bandleni. (Isa. 41:10, 13) Loku hi tiya hlanha a cikhati hi tirelako Jehovha, handle ko kanakana i ta hi katekisa zvezvi ni cikhatini ci tako. Hikwalaho, “tiya hlanha,” u khoma ntiro.
Kela titshomba ta moya
Murindzeli 03.17 paj. 29 par. 6-7
Ku kombisa wunghana loku a wunghana gi hi mhangweni
Dhavhidha i wa hi ni munghana mun’wani loyi a mu vhunileko zvikhatini zva zvikarato. A munghana loye hi Huxayi, loyi a Bhibhiliya gi mu vitanako ku ‘munghana wa Dhavhidha.’ (2 Sam. 16:16; 1 Kro. 27:33) Zvi wonekisa ku Huxayi i wa tira wuhosini tlhelo munghana wa Hosi Dhavhidha a nga fambafamba naye, loyi ka zvikhati zvin’wani a nga mu ruma zvilo zva cihundla.
A cikhati leci Absalome, a n’wana wa Dhavhidha, a nga banga wuhosi, a kutala ka vaIzrayeli va no mu seketela; kanilezvi Huxayi a nga mahangi lezvo. A cikhati leci Dhavhidha a nga tsutsuma, Huxayi i no famba naye. Dhavhidha i bayisekile nguvhu hi lezvi a nga jikelwa hi n’wana wakwe ni vokari a nga va tsumba. Kanilezvi, Huxayi a nga mu tsikangi Dhavhidha, i simamile ku tsumbeka ka yena, laha ka kuza a ti yimisela ku kufa a maha zvilo zvi nga wa ta vhuna ku a cikungo ca Absalome ciwa hasi. Huxayi a nga zvi mahangi hi ko ku i ta kuyini. I no komba lezvaku i wa hi munghana wo tsumbeka wa Dhavhidha. — 2 Sam. 15:13-17, 32-37; 16:15–17:16.
20-26 KA MARÇO
TITSHOMBA TI NGA KA MHAKA YA NU- NGUNGULU | 2 KRONEKELE 1-4
“Hosi Solomoni a maha ciboho co kala ci nga hi ci nene”
Perspicaz vhol. 1 paj. 900 par. 2
Butho
A cikhati leci Solomoni a nga sangula ku fuma, ku no sangula nguva yiswa matin’wini ya butho ga Izrayeli. A kufuma kakwe ku wa hi ko rula, hambulezvo i no hlengeletela mahaxi ni tikareta. (Wona laha ka ku: CARRO.) A kutala ka mahaxi lawo ma wa xaviwa Gibhite. Zvi no lava lezvaku ku akiwa madhoropa wontlhe ya lomu cipandzeni kasi ku veketela kona a tikareta ta yimpi, ni vakhileli va kona ni mahaxi. (1 Tih. 4:26; 9:19; 10:26, 29; 2 Kro. 1:14-17) Hambulezvo, Jehovha a nga katekisangi a ntiro lowo wa Solomoni, niku hi kota ya kufa kakwe ni kuavanyeka ka mufumo, a butho ga ka Izrayeli gi no mbhela ntamu. Kota lezvi Isaya a nga gumesa a tsala, aku: ‘Khombo ka vona lava va relelako Gibhite ku ya vhuniwa, lava va tsumbako mahaxi, va tsumba tikareta hakuva tinyingi, va tsumba vakhileli va mahaxi hakuva va nga ni ntamu, kanilezvi a va tsumbi Loyi a Basileko wa ka Izrayeli, ge hambu ku lava Jehovha.’— Isa. 31:1.
Perspicaz vhol. 1 paj. 437
Kareta
Tikweni ga Izrayeli, a ku zangi kuva ni butho ga hombe ga tikareta, ntsena cikhatini ca Solomoni. Lezvo zvi mahekile hi kota ya citlharihiso ca Nungungulu caku a hosi yi wa nga faneli ku hlengeletela mahaxi, a ku khwatsi hi loku a tiko lego gi wo vhikelwa hi mahaxi. A citlharihiso leco ci wa veka mimbhingano ya ku tirisiwa ka tikareta, kota lezvi ka ku ku wa tirisiwa mahaxi kasi ku koka tikareta leto. (Deut. 17:16) A cikhati leci Samuweli a nga tlharihisa vanhu xungetano hi ndzhwalo lowu a tihosi ti nga wa ta va rwexa, i no va byela lezvi: ‘I ta teka a vana va n’wina a va kandzihisa lomu ka tikareta takwe’. (1 Sam. 8:11) A cikhati leci Absalome na Adhonija va nga zama ku wutla wuhosi, hi wumbiri gabye va no mahisa tikareta ku tlhela ku hi ni 50 wa vavanuna va ku tsutsuma mahlweni kabye. (2 Sam. 15:1; 1 Tih. 1:5) A cikhati Dhavhidha leci a nga hlula a hosi ya le Zobha, i no siya 100 wa mahaxi. — 2 Sam. 8:3, 4; 10:18.
A cikhati leci Hosi Solomoni a nga engetela a butho ga Izrayeli, i no engetela a ntsengo wa tikareta wu maha 1400. (1 Tih. 10:26, 29; 2 Kro. 1:14, 17) Ahandle ka Jerusalema, ku wa hi ni man’wani madhoropa ma nga tiviwa kota ma ‘madhoropa ya tikareta’ ma nga hi ni tiyindlu to hlawuleka kasi ku veketela kona zvontlhe lezvi va nga zvi tirisa yimpini.— 1 Tih. 9:19, 22; 2 Kro. 8:6, 9; 9:25.
Kela titshomba ta moya
Sentinela 01/12/05 paj. 19 par. 6
Timhaka-tshinya ta bhuku ga Kronekele wa wumbiri
1:11, 12. A cikombelo ca Solomoni ci kombile Jehovha lezvaku a kuva ni wutlhari ni wutivi zvi wa hi zva lisima ka Solomoni. A mikhongelo ya hina kunene yi komba lezvi zvi nga zva lisima ka hina. Gi wa tava wutlhari a ku alakanyisisa hi lezvi hi zvi wulako ka yona.
27 KA MARÇO–2 KA ABRIL
TITSHOMBA TI NGA KA MHAKA YA NU- NGUNGULU | 2 KRONEKELE 5-7
“A mbilu ya mina yi tava lomo contlhe cikhati”
Sentinela 15/11/02 paj. 5 par. 1
Mu nga tsiki ku tlhangana
Hi ndzhako ka cikhati, laha Dhavhidha a nga hi hosi le Jerusalema, i no wula a kuxuva ka hombe loku a nga hi nako ka ku aka yindlu yi nga wa ta mu nyika wudzundzo Jehovha. Hambulezvo, kota lezvi Dhavhidha a nga hi wanuna wa tiyimpi, Jehovha i no mu byela ku: ‘Cima a ku zvi koti a ku aka a yindlu yi lumbako a vito ga mina’. Wutshan’wini ga lezvo, Jehovha i no hlawula Solomoni, a n’wana wa Dhavhidha, kasi a aka tempeli. (1 Kro. 22:6-10) Solomoni i no kangula tempeli hi 1026 Mahlweni ka Nguva ya Hina, andzhako ka loku yi akilwe hi 7 wa malembe ni khihlanya. Jehovha i no vhumela a tempeli leyo, aku: ‘Mina ndzi basisile a yindlu leyi u yi akileko, a kuva yi lumba a vito ga mina kala kupindzuka; a mahlo ya mina ni mbilu ya mina zvi tava kona kala kupindzuka.’ (1 Tih. 9:3) Ka cikhati leci a vaIzrayeli va nga wa ta simama va tsumbekile, Jehovha i wa ta katekisa a yindlu leyo. Kanilezvi loku va tsika ku ingisa, Jehovha i wa ta susa a makatekwa yakwe ka wutshamu lego, ni ‘yindlu leyo yi wa tava rumbi’. — 1 Tih. 9:4-9; 2 Kro. 7:16, 19, 20.
Perspicaz vhol. 2 paj. 1093
Tempeli
Matimu. A tempeli leyi yi vile kona kala hi 607 Mahlweni ka Nguva ya Hina, a cikhati leyi yi nga lovisiwa hi butho ga Bhabhuloni gi nga rangelwa hi Nebhukadnezare. (2 Tih. 25:9; 2 Kro. 36:19; Jer. 52:13) Hi kota ya lezvi a vaIzrayeli va nga hambuka vaya ka wukhozeli ga mawunwa, Nungungulu i no vhumelela ku a matiko ma xanisa a Judha ni Jerusalema, ka zvikhati zvin’wani ma tlhela ma phanga zvibya zva tempeli. Kuve ni zvikhati kambe lezvi a tempeli yi nga kala yi nga khatalelwi. Masikwini ya hosi Rehobhowamu, a n’wana wa Solomoni, Hosi Xixaka wa Gibhite, i nota phanga tshomba ya lomu tempeleni, (993 Mahlweni ka Nguva ya Hina) andzhako ka 33 wa malembe a tempeli na yi kangulilwe. (1 Tih. 14:25, 26; 2 Kro. 12:9) Hosi Asa (977-937 Mahlweni ka Nguva ya Hina) i wa hi ni cichavo hi yindlu ya Jehovha, kanilezvi i no kombisa wupumbu hi ku xava Hosi ya le Siriya hi titshomba ta lomu tempeleni, na a zama ku vhikela Jerusalema, lezvo na a tshova civhumelwano a nga ci mahile na Bhaaxa, a hosi ya Izrayeli. — 1 Tih. 15:18, 19; 2 Kro. 15:17, 18; 16:2, 3.
Kela titshomba ta moya
Sentinela 01/12/10 paj. 11 par. 7
Jehovha wa ti ‘tiva a timbilu ta vana va vanhu’
A mukhongelo wa Solomoni wu nga hi chavelela. A vanhu va nga tshuka va nga zvi zwisisi khwatsi lezvi hi ti zwisako zvona — a ‘mbanga [ya hina] ni hlomulo [wa hina]’. (Mav. 14:10) Kanilezvi Jehovha wa yi tiva a mbilu ya hina niku wa khatala nguvhu hi hina. Loku hi mu byela zvontlhe zvi hi karatako zvi nga hungula ndzhwalo wa hina. A Bhibhiliya gi wula lezvi: “Vekani a kukarateka ka n’wina kontlhe hehla kakwe hakuva wa mu khatalela.” — 1 Ped. 5:7.
10-16 KA ABRIL
TITSHOMBA TI NGA KA MHAKA YA NU- NGUNGULU | 2 KRONEKELE 8-9
“I wa gi nyika nguvhu lisima a wutlhari”
Sentinela 01/11/99 paj. 20 par. 4
Loku a kuhana ku hi ka hombe
Kunene, a muzindza wa le Xebha yenawu i ti karatile nguvhu hi ku tirisa cikhati cakwe ni ntamu kasi ku ya vhuxela Solomoni. Zvi wonekisa ku khwatsi a tiko ga Xebha gi wa kumeka ka cipandze leci nyamutlha ku nga tiko ga Iêmen; hikwalaho a muzindza ni lava a nga hi navo, va nga khilele makameli, va fambile a pfhuka wa ku hundza 1600 wa tikilometro kala Jerusalema. Kota lezvi Jesu a wulileko, i “tile hi magemeta-musi ya misava”. Hikuyini a muzindza wa le Xebha a ti nyikileko a ntiro lowo wa hombe? Hi ku i wa yela nguvhunguvhu ku ‘yazwa a wutlhari ga Solomoni.’ — Luka 11:31.
Sentinela 01/07/99 paj. 30 par. 4-5
Lipfhumba li nga chachazelwa nguvhu
Kani i chikelisile kuyini, a muzindza i chikele Jerusalema na a ‘hi ni vanhu vo tala nguvhu, na va hi ni makameli ma rweleko mipepo yo nuhela, ni ndzalama yo tala nguvhu, ni maribye’ yo dhura. (1 Tih. 10:2a) A vokari ve ka ‘vanhu vo tala nguvhu’ lava va wuliwako ka vhesi legi ku patseka vagwardha vakwe va nga hlomile khwatsi kasi ku mu vhikela. Lezvo zva zwala, kota lezvi a nga hi hosi ya hombe ni yo chaviseka ni lezvi a nga kari a endza ni titshomba to ringana mali ya talela ga cima.
Hambulezvo, wona lezvaku a muzindza i zwile nduma ya Solomoni ‘xungetano hi vito ga Jehovha.’ Makunu, i wa nga yeli ku ya maha mabhindzu. Zvi wonekisa ku a ca hombe a nga ci yela ku wa hi ku yazwa wutlhari ga Solomoni — kuzvilava hambu ku gondza cokari xungetano hi Jehovha, a Nungungulu wakwe. Kota lezvi a muzindza loyi a nga hi cizukulwana ca Xemi kutani Hamu, va nga khozela Jehovha, kuzvilava i wa lava ku tiva zvokari hi wukhozeli ga vakokwani vakwe.
Sentinela 01/07/99 paj. 30-31
Lipfhumba li nga chachazelwa nguvhu
A muzindza wa le Xebha i no hlamalisiwa nguvhu hi wutlhari ga Solomoni ni kukula ka mufumo wakwe laha ka ku a “mbhela ntamu hi kuhlamala”. (1 Tih. 10:4, 5) A vokari ve a magezu lawa ma wula ku a muzindza i no “mbhela moya”. A tlhari yo kari yi wula lezvaku kuzvilava i titivele! Kani lezvo lisine kutani ahihi, a co tiya ku a muzindza i hlamele nguvhu hi lezvi a nga zvi wona ni ku zvizwa. I te a malandza ya Solomoni ma katekile hi lezvi ma ngazwa a wutlhari ga hosi, a tlhela a dzundza Jehovha hi ku veka Solomoni citshan’wini ca wuhosi. Hi kulandzela, i no nyika hosi a zvinyikiwo zvo dhura nguvhu, laha ka ku a ouro yoce, hi kuya hi ntsengo wa nyamutlha, yi wa hi ya 40 000 000 wa madholari. Solomoni yenawu i no mu nyika zvinyikiwo ‘zvontlhe lezvi [a muzindza] a nga wa zvi randza ni lezvi a nga wa zvi kombela’. — 1 Tih. 10:6-13.
Perspicaz vhol. 2 paj. 917
Solomoni
Andzhako ka loku a muzindza wa le Xebha a wonile kusaseka ka tempeli ni yindlu ya Solomoni, lezvi va nga tirisa zvona laha mezeni yakwe ni lezvi va nga mu nyikisa zvona zvakunwa, ni lezvi va nga bohisa zvona lava va nga tira mezeni yakwe, miphahlo ya kuhiswa leyi yi nga mahiwa hi kukhandzakanya lomu tempeleni, i no “mbhela ntamu”, a hlamala, aku: ‘A va ndzi byelangi a khihlanya ga zvona. A wutlhari ga wena ni titshomba ta wena zva hundza lezvi ndzi zvi zwileko.’ I guma a sangula ku tlhamusela ku va katekile lava va tirelako a hosi leyi. Ka zvontlhe lezvo, i no kuceka ku dhumisa Jehovha, a dzundza Jehovha Nungungulu, loyi a kombisileko lirandzo ka Izrayeli hi ku yimisa Solomoni kota Hosi kasi a xuxa timhaka hi ndlela yo lulama. — 1 Tih. 10:4-9; 2 Kro. 9:3-8.
Kela titshomba ta moya
Perspicaz vhol. 2 paj. 1159-1160
Citshamu ca wuhosi
A citshamu ca wuhosi ca tihosi ta ka Izrayeli ci tlhamuselwako khwatsi lezvi ci nga tshamisile zvona, hi leci ca Solomoni basi. (1 Tih. 10:18-20; 2 Kro. 9:17-19) Zvi wonekisa ku ci wa hi lomu ‘hubyeni ya citshamu ca wuhosi’, yi nga yin’we ya tiyindlu ti nga hi laha Citsungeni ca Moriya, le Jerusalema. (1 Tih. 7:7) Ci wa hi ‘citshamu ca wuhosi ca hombe ci nga mahilwe hi marfim, ci nga totelwe ouro yi hlutilweko khwatsi, ku nga hi ni cikhigetelo ca redhonda le ndzhako ni ka ku tlhateka mawoko.’ Hambu lezvi ku nge khwatsi a matiriyali-tshinya ya citshamu leco ca wuhosi ku wa hi marfim, loku hi wona lezvi a tempeli yi nga akisilwe zvona, zvi wonekisako ku a citshamu leco ca wuhosi ci wa mahilwe hi mapulango, ma nga totelwe a ouro ya ku hlutiwa khwatsi, ci sasekiselwa hi zvilo zvi nga mahilwe hi marfim. Loku a munhu a ci wona, a nga wula ku ci wa mahilwe hi marfim ni ouro. Loku a mitsalo yi kumbukile a 6 wa zvikadha lezvi zvi ngaya le citshan’wini ca wuhosi, yi guma yiku: ‘Ni tinghala timbiri ti wa yimile laha mawokweni mambiri. Ni laha matlhelweni ya zvikandzihelo ya ntlhanu ni cin’we ku wa yimile 12 wa tinghala.’ (2 Kro. 9:17-19) Lezvi a tinghala leto ti yimelako zvona zva zwala khwatsi — ku nga ntamu ni fanelo ya kufuma ya hosi. (Gen. 49:9, 10; Kuv. 5:5) Zvi wonekisa ku a 12 wa tinghala ti wa yelana ni 12 wa tixaka ta ka Izrayeli, zvi kombako ku va wa vhumela ni ku seketela a hosi leyi yi nga hi ka citshamu leco. Ku wa hi ni cikhegetelo ca mikondzo ca ouro kambe, leci hi ndlela yo kari ci nga tlhavinyetene ni citshamu leco ca wuhosi. Hi kuya hi lezvi zvi wonekisako ku ci wa tshamisile zvona, a citshamu leci ca wuhosi — co chaviseka, ci nga foliselwe tinghala ta hombe lomu mareveni hi le phambeni ka cona — ci wa hi co hambana nguvhu ni zvitshamu zvontlhe zva wuhosi zvi nga hi kona cikhatini leco, zvi kumilweko hi titlhari ta ku vhevhulela zvilo zva kale, kutani zvi mahilweko kasi ku kombisa kutani zvi dhezenyarilweko. Zvi yelana khwatsi ni lezvi a mutsali wa bhuku ga Kronekele a nga tsala, zvaku: ‘A ku na hosi yi mahelweko cilo ca ku tano.’ — 2 Kro. 9:19.
17-23 KA ABRIL
TITSHOMBA TI NGA KA MHAKA YA NU- NGUNGULU | 2 KRONEKELE 10-12
“Vhuneka hi wusungukati ga wutlhari”
Murindzeli 06/18 paj. 30 par. 4
Na a mahile yini kasi a tsakelwa hi Nungungulu
Rehobhowamu i wa fanele ku maha ciboho co karata. Loku a maha lezvi a vanhu va nga zvi lava, yena ni ngango wakwe ni lava a nga hi navo laha wuhosini va wa nga ta ha hanya hi mafehlefehle a ku fana ni kale. Kanilezvi, loku a ala cikombelo cabye, va wa ta tsika ku mu ingisa. I wa ta kuyini? I rangile hi ku wulawula ni vanhu va hombe lava va nga vhunile papayi wakwe. Va mu byelile ku i fanele ku ingisa vanhu lavo. Kanilezvi andzhako ka lezvo i wulawulile ni vanhu va tanga yakwe a guma a tirisana ni vanhu hi ndlela yo kala yi nga lulamangi. I byelile vanhu aku: ‘Dhadhani i mu rwexile mikhinyavezo yo bindza, kanilezvi mina ndzi ta engetela ku yi bindzisa, hakuva dhadhani i mu tsayisile hi tshilani, kasike mina ndzi ta mu tsayisa hi tihume.’ — 2 Kro. 10:6-14.
Sentinela 01/09/01 paj. 28-29
Ndlela ya ku maha zviboho zva zvi nene
Jehovha kambe wa hi nyika vanhu va buvhileko lomu bandleni, lava hi nga bhulako navo xungetano hi zviboho zva hina. (Efe. 4:11, 12) Hambulezvo, loku hi bhula ni van’wani, a hi faneli ku tekelela cikombiso ca lava va bhulako ni votala kala va kuma loyi a to va byela lezvi va lavako ku zvizwa, va guma va landzela wusungukati lego. Ahandle ka lezvo, hi fanele ku alakanya citlharihiso hi ci kumako ka matimu ya Rehobhowamu. Laha Rehobhowamu a nga lava ku maha ciboho ca lisima nguvhu, i nyikilwe wusungukati ga gi nene nguvhu hi vanhu va hombe va nga tirele a papayi wakwe. Kanilezvi, wutshan’wini ga ku ingisa wusungukati lego, i no ya bhula ni majaha-kuloni lawa a nga kula nawo. I no ingisa wusungukati gabye a maha ciboho co biha nguvhu. Lezvo zvi mahile ku a luza cipandze co kari ca mufumo wakwe. — 1 Tih. 12:1-17.
Loku u lava wusungukati, bhula ni lava va nga ranga va wora masani, na va yi tiva khwatsi Mitsalo va tlhela vava ni cichavo hi matshinya ya ma nene. (Mav. 1:5; 11:14; 13:20) Loku zvi koteka, ti nyike cikhati ca ku ehleketa hi matshinya wontlhe ma patsekako ni mahungu wontlhe u ma kumileko. Laha u wonako zvilo hi kuya hi Mhaka ya Jehovha, zvi wonekisa ku a ciboho ca ci nene ci ta dlunyateka. — Filp. 4:6, 7.
Perspicaz vhol. 2 paj. 863 par. 3
Rehobhowamu
A matshandza lawa Rehobhowamu a nga ma kombisa ni ku tirisa a wuhosi gakwe hi ndlela ya hava zvi mahile ku a vanhu vo tala va nga ha mu seketeli. I no simama ku seketelwa hi va ka Judha ni va ka Bhenjamini basi. A vapristi ni vaLevhi va mifumo leyi ya yimbiri ni vanhu vo kari ndzeni ka mifumo leyi ya 10 vonawu va wa mu vhunetela. — 1 Tih. 12:16, 17; 2 Kro. 10:16, 17; 11:13, 14, 16.
Kela titshomba ta moya
Murindzeli 06.18 paj. 31 par. 1-3
Na a mahile yini kasi a tsakelwa hi Nungungulu
Zvi mu olovele Rehobhowamu a ku ingisa Jehovha? A vanhu va wa ta alakanya yini hi hosi yabye ya yiswa? I wa va byelile ku i ta va tsayisa hi “tihume”, kanilezvi i wa nga ta maha nchumu hi kungaingisi kabye ko tshisa! (Ringanisa na 2 Kronekele 13:7.) Kani a vanhu va alakanyile yini hi yena, a mhaka ku a hosi ni masochwa ya yona ‘va ingisile a gezu ga Jehovha, va tlhela va famba kota kuwula kakwe’.
Hi gondza yini ka lezvo? Contlhe cikhati wutlhari a ku ingisa Nungungulu hambu loku a vanhu va hi hleka. Contlhe cikhati Jehovha i ta hi katekisa loku hi ingisa. — Deut. 28:2.
Xana Rehobhowamu i katekisilwe hi kuingisa kakwe? I simamile ku fuma tixaka ta Judha ni ta ka Bhenjamini, niku i bohile ku aka madhoropa maswa ka matshamu lawo. I tlhelile a ‘tiyisa nguvhu’ a madhoropa yo kari. (2 Kro. 11:5-12) A ca lisima nguvhu, ku hi cikhati co kari i ingisile milayo ya Jehovha. Hi kota ya lezvi a khume ga tixaka ta mufumo wa Izrayeli ti nga sangula ku khozela zvifananiso, a vanhu vo tala va wata Jerusalema kasi ku ta seketela Rehobhowamu ni wukhozeli ga lisine. (2 Kro. 11:16, 17) Hi kota ya lezvi Rehobhowamu a nga ingisa Jehovha, a mufumo wu no tiyiswa.
24-30 KA ABRIL
TITSHOMBA TI NGA KA MHAKA YA NU- NGUNGULU | 2 KRONEKELE 13-16
“Hi cikhati muni hi faneleko ku tsumba Jehovha?”
Murindzeli 03.21 paj. 5 par. 12
Vaswa, zvini mu nga mahako kasi a van’wani va mu tsumba?
12 A cikhati leci Asa a nga hi jaha, i wa hi munhu wo ti koramisa ni wo tiya hlanha. Hi cikombiso, a cikhati leci a nga vhaleta a papayi wakwe Abhija citshan’wini ca wuhosi, i no sangula tsima ga ku mbheta zvifananiso lomu tikweni ga Judha. I tlhelile a laya vaJudha lezvaku va ‘hlota Jehovha Nungungulu wa vararu vabye, ni ku hlayisa milayo ni zvileletelo zvakwe.’ (2 Kro. 14:1-7) A cikhati leci Zera, a muEtiyopiya, a ngata ni 1000 000 wa masochwa na a lava ku dhumela tiko ga Judha, Asa i no kombisa wutlhari, a tsutsumela ka Jehovha a ya kombela civhuno, aku: ‘Jehovha, ahandle ka wena, cima a nga kona mun’wani a zvi kotako ku vhunetela lava va nga hiko na ntamu, loku va vhukelwa hi lava va nga ni ntamu. Hi vhune wena Jehovha Nungungulu wa hina, hakuva hina hi tsumba ka wena.’ A magezu lawa yo khumba mbilu, ma komba khwatsi lezvaku Asa i wa mu tsumba nguvhu Jehovha lezvaku i na ni ntamu wa ku ponisa a vanhu vakwe. Asa i no tsumba Jehovha, a Papayi wakwe wa le tilweni, ‘Jehovha a hlasela vaEtiyopiya.’ — 2 Kro. 14:8-12.
Murindzeli 03.21 paj. 6 par. 13
Vaswa, zvini mu nga mahako kasi a van’wani va mu tsumba?
13 Handle ko kanakana, a ku vhukelwa hi 1000 000 wa masochwa ci wa hi cikarato ca hombe nguvhu. Kanilezvi, wa zvi tiva khwatsi ku Asa i hlulile cikarato leco hi lezvi a nga tsumba Jehovha. Hambulezvo, a ya hava hi ku a cikhati leci Asa a nga kumana ni cikarato ca citsongwani, a nga kombelangi Jehovha kasi a mu vhuna. Lezvo zvi mahekile a cikhati a nga lava ku dhumelwa hi Bhaaxa, a Hosi ya Izrayeli. Asa i no kombela hosi ya Siriya lezvaku yi mu vhuna. I xanisekile nguvhu hi kota ya ciboho leco. Jehovha i no byela Asa hi ku tirisa muphrofeti Hanani, aku: ‘Lezvi wena u tsumbileko a hosi ya le Siriya, u nga tsumbi Jehovha Nungungulu wa wena, hi kota ya lezvo a mabutho ya hosi ya le Siriya ma pswhutukile canjeni ga wena.’ Kusukela kwalaho, Asa i no tshamela ku dhumelwa hi masochwa. (2 Kro. 16:7, 9; 1 Tih. 15:32) Hi gondza yini?
Murindzeli 03.21 paj. 6 par. 14
Vaswa, zvini mu nga mahako kasi a van’wani va mu tsumba?
14 U nga tshuki u tsika ku ti koramisa ni ku tsumba Jehovha. A cikhati leci u nga bhabhatiswa, u kombisile kukholwa ka hombe niku wa mu tsumba Jehovha. Yenawu i no vhumela hi litsako lezvaku u lumba ngango wakwe. Makunu leci ci nga sala zvezvi, ku simama u mu tsumba. Kuzvilava loku u lava ku maha zviboho zva lisima nguvhu zva olova ku tsumba Jehovha. Hambulezvo, ahati ka zviboho zvin’wani ke? Zva lisima a ku khongela ka Jehovha ni ka cihi ciboho u lavako ku maha, kani ci yelana ni ku hlawula zvihungato, ntiro wa ku ti hanyisa, kutani mixuvo u nga ti vekelako. U nga tsumbi wutlhari ga wena. Kanilezvi, lavetela matshinya ya milayo ma yelanako ni ciboho leci u lavako ku maha, u guma u ma tirisa. (Mav. 3:5, 6) Loku u maha lezvo, u ta tsakisa Jehovha; a vamakabye laha bandleni kambe va ta ku tsumba. — Lera 1 Timote 4:12.
Kela titshomba ta moya
Murindzeli 03.17 paj. 17 par. 7
Tirela Jehovha hi mbilu yi mbheleleko!
7 Hi nga zvi tivisa kuyini lezvaku ha ti nyikela hi mbilu yontlhe ka Jehovha? Hi nga ti wutisa lezvi: ‘Ndzi ta mu ingisa Jehovha hambu loku zvi karata ke? Xana ndzi ti yimisele ku maha zvontlhe kasi a bandla gakwe gi tshama gi basile?’ Ehleketa hi kutiya-hlana ku lavekileko ka Asa kasi a susa mamani wakwe ka cikhundla cakwe ca wuzindza! Wenawu u nga tshuka uva ka ciyimo ci lavako lezvaku u tiya hlanha a ku fana na Asa. Hi cikombiso, u nga kuyini loku a ciro ca ngango wa wena kutani munghana wa wena wa hombe a wonhile, a nga ti soli, a tlhela a susiwa bandleni? U wa ta tiya ku tsika ku hlengela ni munhu loye? Zini lezvi a mbilu ya wena yi nga ku kucako ku maha?