Timhaka ta mabhuku ma tako ka Cibhukwana ca Mutlhangano
© 2023 Watch Tower Bible and Tract Society of Pennsylvania
1-7 KA MAIO
TITSHOMBA TI NGA KA MHAKA YA NUNGUNGULU | 2 KRONEKELE 17-19
“Wona van’wani kota lezvi Jehovha a va wonisako zvona”
Murindzeli 03.17 paj. 23 par. 7
U ta tsika a zvilo zvi tsalilweko zvi khumba mbilu ya wena ke?
7 Zvalezvi a hi wulawuleni hi cikombiso ca Jehoxafati n’wana Asa. I wa hi ni matshamela yo tala lawa Jehovha a nga ma tsakela kakwe. Niku a cikhati leci a nga tsumba Jehovha, i mahile zvilo zvo tala zva zvinene. Kanilezvi i mahile zviboho zva hava kambe. Hi cikombiso, i chadhisile n’wana wakwe ni nhanyana wa Hosi yo biha Ahabhi. Andzhako ka lezvo, Jehoxafati i ti patsile na Ahabhi va yalwa ni vaSiriya, hambu lezvi muphrofeti Mikaya a nga mu tlharihisile lezvaku a ngayi. Yimpini leyo, a vaSiriya va no vhukela Jehoxafati, va zama ku mu daya. (2 Kro. 18:1-32) A cikhati a nga tlhela Jerusalema, muprofeti Jehu i no mu wutisa lezvi: ‘A wa kubiha i fanele ku vhunetelwa ke? U randza lava va vengako Jehovha ke?’ — Lera 2 Kronekele 19:1-3.
Murindzeli 15/08/15 paj. 11-12 par. 8-9
Ehleketa hi lirandzo lo timisela la Jehovha
8 Jehovha i lava lezvaku hi mu tiva kota munhu a hi randzako, loyi a nga cuwukiko a kungambheleli ka hina. I hlota zva zvinene ka hina. (2 Kro. 16:9) Hi cikombiso, i mahile lezvo ka Hosi Jehoxafati wa Judha. Ka khati go kari, Jehoxafati i no maha wupumbu, a vhumela ku famba na Hosi Ahabhi wa Izrayeli kasi ku ya lwela Ramote-Gileyadhe ka vaSiriya. Hambu lezvi a 400 wa vaprofeti va mawunwa va nga tiyisa Ahabhi lezvaku i ta hlula, Mikaya, a muprofeti wa lisine wa Jehovha i no wula lezvaku i wa ta hluliwa. Ahabhi i nofa yimpini leyo, niku Jehoxafati i no pona gi no ha. Laha a nga tlhela Jerusalema, i no kawukiwa hi kuva a mahile wunghana na Ahabhi. Hambulezvo, Jehu, n’wana Hanani a muprofeti, i lo byela Jehoxafati aku: ‘Zvi kona zvilo zvo saseka zvi kumilweko ka wena.’ — 2 Kro. 18:4, 5, 18-22, 33, 34; 19:1-3.
9 Kusanguleni ka kufuma kakwe, Jehoxafati i wa rumile a tinduna, ni vaLevhi, ni vapristi lezvaku va famba va gondzisa Nayo wa Jehovha ka vafumelwi vakwe madhoropeni wontlhe ya Judha. A tsima lego give ni mabhindzu ya hombe laha kaku a matiko ya wuakelwani ma sangula ku chava Jehovha. (2 Kro. 17:3-10) Kunene Jehoxafati i mahile wupumbu, kanilezvi Jehovha i wa nga ti valangi matihlo ka zvilo zva zvi nene lezvi a nga zvi mahile. A matimu lawa ya Bhibhiliya ma hi alakanyisa ku hambu lezvi hi nga mbhelelangiko, Jehovha i ta kombisa lirandzo lo timisela hi hina loku hi mu hlota hi mbilu yontlhe.
Kela titshomba ta moya
Murindzeli 03.17 paj. 17-18 par. 10-11
Tirela Jehovha hi mbilu yi mbheleleko!
10 Jehoxafati n’wana Asa ‘i no landzela ndlela ya papayi wakwe Asa.’ (2 Kro. 20:31, 32) I mahisile kuyini? A ku fana ni papayi wakwe, Jehoxafati i kucile vanhu lezvaku va simama ku khozela Jehovha. I rumele vavanuna lezvaku va ya madhoropeni ya Judha kasi ku ya gondzisa vanhu a ‘bhuku ga Nayo wa Jehovha.’ (2 Kro. 17:7-10) I tlhelile aya ka cipandze ca mufumo wa Israyeli wa le n’walungu, ka vanhu va le zvitsungeni zva Efrayime kasi ku ‘wuyisela a vanhu ka Jehovha Nungungulu.’ (2 Kro. 19:4) Jehoxafati i wa hi hosi yi ‘nga wa randza Jehovha hi mbilu yakwe yontlhe.’— 2 Kro. 22:9.
11 Inyamutlha, Jehovha i lava lezvaku a vanhu misaveni yontlhe va gondzisiwa xungetano hi yena, niku hontlheni hi nga vhunetela kumaheni ka ntiro lowo. Xana wa zvi randza ku hlengela ntirweni lowu hweti ni hweti ke? Wa zvi tsakela ku gondzisa Bhibhiliya van’wani kasi vonawu va sangula ku khozela Jehovha? Xana a zvilo lezvo wa zvi khongelela ke? Loku u ti karata, Jehovha a nga ku vhuna ku sangula cigondzo ca Bhibhiliya. U nga vhumela ku gondza ni munhu hambu loku zvi kombela ku u tirisa a cikhati ca wena ca ku humula? A ku fana na Jehoxafati a zamileko ku vhuna van’wani lezvaku va vhuxeta ku tirela Jehovha, hinawu hi nga zama ku vhuna lava va nyimileko ku tirela Jehovha. A madhota ma nga maha malulamiselo ya ku endzela ni ku vhuna lava va susilweko bandleni cipandzeni cabye lava va tsikileko zviwonho zvabye.
8-14 KA MAIO
TITSHOMBA TI NGA KA MHAKA YA NUNGUNGULU | 2 KRONEKELE 20-21
‘Tsumba Jehovha Nungungulu wa wena’
Murindzeli 15/12/14 paj. 23 par. 8
Ngha hilwa zvin’we ni kugumesa ka tiko legi ga kale
8 Masikwini ya Hosi Jehoxafati, a vanhu va Jehovha va no vhukelwa hi ‘cidlemo ca hombe’ ca valala vo tshisa va matiko ya wuakelwani. (2 Kro. 20:1, 2) Hi wutlhari, a malandza ya Nungungulu a ma zamangi ku hlula a valala lavo hi ntamu wabye wutsumbu. Wutshan’wini ga lezvo, va no kombela civhuno ka Jehovha. (Lera 2 Kronekele 20:3, 4.) A va kombelangi civhuno leco munhu ni munhu na a hi yece, hi kuya hi lezvi a zvi lavisako zvona. A Bhibhiliya gi ngalo: ‘Vontlhe vaJudha va no yima mahlweni ka Jehovha zvin’we ni vanana vabye, ni vasati vabye ni vana vabye.’ (2 Kro. 20:13) A vanhu vontlhe, vaswa ni va hombe, va no bohana hi kukholwa va landzela a wurangeli ga Jehovha, niku Jehovha i no va vhikela ka valala vabye. (2 Kro. 20:20-27) Xana leco a hi cikombiso ci nene ca ndlela ya ku yimisana ni zvikarato kota vanhu va Nungungulu?
Murindzeli 11.21 paj. 16 par. 7
N’wina ma ha hiko ku chadha, rangisani ntiro wa Jehovha wutomini
7 Jehovha i no hlamula Jehoxafati hi ku tirisa muLevhi wa ku hi Jehaziyeli, aku: ‘N’wina humani mu ya yima ntsena. Mu ta wona a kuhanyisa ka Jehovha loyi a nga zvin’we na n’wina.’ (2 Kro. 20:13-17) A zvo ku hlamalisa! Phela leyo yi wa nga hi ndlela yo toloveleka ya kulwa yimpi. Hambulezvo lezvi va nga byeliwa, ma wa nga hi mawonela ya munhu wokari; ku wa hi Jehovha a nga kari a va byela. Jehoxafati i no tsumba Jehovha hi mbilu yontlhe, a maha lezvi va nga mu byela. Laha a nga huma ni vanhu vontlhe a ku ya tlhangana ni valala vakwe, a nga rangisangi masochwa ma nga zvi tiva khwatsi kulwa; kanilezvi i no rangisa vayimbeleli va tisimu! Jehovha a nga mu dhanisangi Jehoxafati. I no hlula valala vabye. — 2 Kro. 20:18-23.
Kela titshomba ta moya
Perspicaz vhol. 2 paj. 35 par. 3-4
Jehoramu
Hi tlhelo gin’wani, hi kota ya kucetelo wa hava wa sati wakwe Ataliya, Jehoramu a nga landzelangi tindlela to lulama ta papayi wakwe Jehoxafati. (2 Tih. 8:18) Jehoramu a nga no daya a 6 wa vamakabye vakwe ni tihosi to kari ta Judha basi, kanilezvi i tlhelile a hambukisa ni lava a nga va rangela lezvaku va fularela Jehovha va khozela vanungungulu va mawunwa. (2 Kro. 21:1-6, 11-14) A mufumo wontlhe wu hohlolilwe hi zvikarato zva laha wuhosini a ku patsa ni tiyimpi ta le handle. A kusangula, Edhomi i no hluwuka, hi kulandzela Libna yenawu i no hluwukela Judha. (2 Tih. 8:20-22) Ka papilo legi muphrofeti Elija a nga rumela Jehoramu, i no mu tlharihisa aku: ‘Jehovha i ta bhoxa a mbanga ya hombe lomu vanhwini va wena; i taba a vana va wena ni vasati va wena, ni zvontlhe lezvi zvi nga zva wena.’ Ahandle ka Lezvo, wena Hosi Jehoramu ‘u ta biwa hi khombo ga hombe ga wubabyi ga marumbu, gi ta nga endzelekelana kala marumbu ya wena ma huma hi kota ya ntamu wa zvilondza.’ — 2 Kro. 21:12-15.
Zvontlhe lezvo zvi mahekile futsi. Jehovha i no vhumelela vaHarabhe ni va Filistiya lezvaku va dhumela a tiko va teka vasati ni vana va Jehoramu va yisiwa wukhumbini. Nungungulu i no vhumelela lezvaku ku sala ntsena a n’wana wa cigumandzeni wa Jehoramu, ku nga Jehoahaza (a vitaniwako kambe ku hi Ahaziya), hambulezvo, i ponile hi kota ya civhumelwano ca Mufumo leci Jehovha a nga mahile na Dhavhidha. ‘Andzhako ka zvontlhe lezvo, Jehovha i no ba [Jehoramu] hi wubabyi ga marumbu legi gi nga holiko.’ Andzhako ka malembe mambiri, a ‘marumbu yakwe ma no huma’ a gumesa afa hi kutsongwani-kutsongwani. Hi zvalezvi a nga fisa zvona a wanuna loyi wo biha, loyi a fileko a vanhu va nga karateki. I no lahliwa Dhoropeni ga Dhavhidha, ‘kanilezvi na ku nga hi lomu cilahleni ca tihosi’. Ahaziya, a n’wana wakwe, i no sala a mu vhaleta kota hosi. — 2 Kro. 21:7, 16-20; 22:1; 1 Kro. 3:10, 11.
15-21 MAIO
TITSHOMBA TI NGA KA MHAKA YA NUNGUNGULU | 2 KRONEKELE 22-24
“Jehovha wa katekisa kutiya-hlanha ka malandza yakwe”
Sentinela 01/04/09 paj. 24 par. 1-2
Jowaxi i no tsika Jehovha hi kota ya vanghana va hava
KU WA hi nguva yo karata nguvhu Jerusalema, a dhoropa legi ku nga tshama a tempele ya Nungungulu. Hosi Ahaziya i wa ha hi ku dawa. Lezvi Ataliya, mamani wakwe, a nga maha andzhako ka lezvo a zvo ku tshisa! I no rumisa lezvaku ku dawa a vana va Ahaziya — a vazukulu vakwe! Wa zvi tiva ku hikuyini? I wa maha lezvo kasi a sala a fumela tiko, wutshan’wini ga vona.
Hambulezvo, Jowaxi, a mun’we wa vazukulu va Ataliya a nga ha hi mutsongwani nguvhu i no pona niku a kokwani wakwe Ataliya i wa nga zvi tivi lezvo. Wa zvi lava ku tiva ku i ponisile kuyini? Jowaxi i wa hi ni titiya wa ku hi Jehoxebha loyi a mu fihlileko lomu tempeleni ya Nungungulu. Zvi wa ringana ku a maha lezvo hakuva a nuna wakwe, Jehoyadha, i wa hi Mupristi wa Hombe. Hikwalaho, hi wumbiri gabye va khatalele a kuvhikeleka ka Jowaxi.
Sentinela 01/04/09 paj. 24 par. 3-5
Jowaxi i no tsika Jehovha hi kota ya vanghana va hava
Jowaxi i no fihliwa lomu tempeleni hi cipimo ca 6 wa malembe. Lomu tempeleni, Jowaxi i gondzile zvontlhe xungetano hi Jehovha Nungungulu ni milayo yakwe. Hi kugumesa, a cikhati leci Jowaxi a nga tlhanganisa a 7 wa malembe, Jehoyadha i no mu yimisa kota hosi. Wa zvi lava ku tiva ku Jehoyadha i zvi mahisile kuyini lezvo niku zvini zvi humeleleko a kokwani wa Jowaxi, a muzindza wo biha Ataliya?
Jehoyadha i no vitana vagwardha vo hlawuleka lava a tihosi ta Jerusalema ti nga hi navo ka cikhati leco. I no va hlawutela lezvi yena ni sati wakwe va nga ponisisile zvona a n’wana wa Hosi Ahaziya. Jehoyadha i no gumesa a kombisa Jowaxi ka vagwardha lavo, va se chikelela magumo ya lezvaku Jowaxi i wa hi ni fanelo ya kuva hosi. Va no gumesa va maha makungo.
Jehoyadha i no humesa Jowaxi, a mu boha cidlodlo. Zvalezvo, a vanhu va no sangula ku “phakatela mandla yabye, vaku: ‘A yi hanye, a hosi!’”. A vagwardha va no randzela Jowaxi kasi ku mu vhikela. Laha Ataliya a ngazwa guwa ga vanhu va nga tsakile, i no huma lahandle hi kutsutsuma a banguleka aku lezvo zvi wa nga hi zvinene. Kanilezvi Jehoyadha i no laya vagwardha lezvaku va mu daya. — 2 Tihosi 11:1-16.
Perspicaz vhol. 1 paj. 818 par. 9
Cilahla, wutshamu ku lahliwako vanhu
Jehoyadha, a Mupristi wa Hombe wo lulama, i kumile thomo ga ku lahliwa ‘mutini wa Dhavhidha zvin’we ni tihosi’. Hi yena yece a kumbukiwako lomu ka Bhibhiliya a nga kala a nga hi wa lixaka la Dhavhidha a kumileko a thomo lego. — 2 Kro. 24:15, 16.
Kela titshomba ta moya:
Perspicaz vhol. 2 paj. 1221 par. 12
Zakariya
12. A n’wana wa Mupristi wa Hombe Jehoyadha. Andzhako ka kufa Jehoyadha, Hosi Jowaxi i no fularela wukhozeli ga lisine, a ingisa wusungukati ga hava, wutshan’wini ga ku ingisa vaprofeti va Jehovha. Zakariya, a primo wa Jowaxi (2 Kro. 22:11) i no tlharihisa vanhu xungetano hi mhaka leyo. Hambulezvo, wutshan’wini ga ku va ti sola, va no mu gandla hi maribye lomu tempeleni. A cikhati leci Zakariya a ngafa i wulile lezvi: ‘Jehovha a cuwukisise, a tlhelisela.’ A cikombelo leci ca muphrofeti Zakariya ci no tatiseka hakuva a vaSiriya va hahlulile Judha, ku guma ku dawa Jowaxi hi malandza yakwe ya mambiri hi kota ya ‘lezvi a nga daya a vana va mupristi Jehoyadha.’ A Septuaginta ga ciGreki ni Vulgata ga ciLatini ma wula lezvaku Jowaxi i delwe kasi ku riha nkhata wa “n’wana” wa Jehoyadha. Hambulezvo, a mitsalo ya Massorético ni Pesito ga ciSiriya, zvi tirisa a gezu “vana”. Kuzvilava zvi tirisa plural kasi ku komba a wukosi ni lisima leli a n’wana wa Jehoyadha, Zakariya, a mupristi wa muprofeti, a nga hi nalo. — 2 Kro. 24:17-22, 25.
22-28 KA MAIO
TITSHOMBA TI NGA KA MHAKA YA NUNGUNGULU | 2 KRONEKELE 25-27
“Jehovha i ta ku nyika zvo tala nguvhu ku hundza lezvo”
Perspicaz vhol. 2 paj. 32 par. 1
Jowaxi
Jowaxi i no tlhela a lugara 100 000 wa masochwa ka hosi ya le Judha kasi malwa ni vaEdhomi. Hambulezvo, hi ku ingisa wusungukati ga “munhu wa Nungungulu”, a masochwa lawo ma no tlhelisiwa kaya. Hambu lezvi va nga sina va nyikilwe a 100 wa titalenta ta prata (660 600 wa madholari), va no zangara, kuzvilava hi lezvi va nga wa ta luza ku avelwa cipandze co kari ca lezvi va nga wa ta zvi kuma kota muphango. Hikwalaho andzhako ka loku va tlhelile N’walungu, va no phanga zvidhoropana zvo kari zva Dzongeni, kusukela Samariya (kuzvilava lomu ku nga hi ni bhazi yabye) kala Bhet-Horoni. — 2 Kro. 25:6-10, 13.
Murindzeli 08.21 paj. 30 par. 16
Ndlela ya ku ‘ringa’ u wona ku Jehovha mu nene
16 Ti yimisele ku ti tsona zvokari kasi u tirela Jehovha. Kasi hi tsakisa Jehovha a zvizi zvi lava ku hi tsika zvontlhe hi hanya wusiwaneni go vhumala ni cipeneti. (Mutsh. 5:19, 20) Kanilezvi, loku hi nga mahi zvotala ntirweni wa Jehovha hi ku kala hi nga lavi ku tsika zvilo zvo kari hi zvi randzako, zva koteka ku na hi maha cihoxo co fana ni leci ci nga mahiwa hi wanuna wa lomu ka mufananiso wa Jesu, loyi a nga zama ku hanya mafureni, a nga hi na mhaka na Nungungulu. (Lera Luka 12:16-21.) A makabye wo kari wa le França wa ku hi Cristóvão, i wula lezvi: “Ka nguva yo kari, a cikhati co tala ndzi wa nga ci mbheti ntirweni wa Jehovha ne ku vhuna ngango wa mina.” Cristóvão ni sati wakwe va no maha ciboho ca kuva maphayona. Kanilezvi kasi va zvi kota, va wa fanele ku tsika mitiro yabye. Kasi va ti hanyisa, va no sangula ntiro wa ku basisa miti ni tihofisa va tlhela va gondza ku hanya hi mali ya yitsongwani. Va ti zwisa kuyini lezvi va nga ti tsona zvokari kasi va teka wuphayona? Cristóvão i wula lezvi: “Zvezvi hi tsaka nguvhu hi ku chumayela. A ho ku tsaka kambe hi ku wona zvigondzani zva hina ni lava hi va mahelako marevhizita na va gondza va tiva Jehovha.”
Kela titshomba ta moya
Sentinela 15/12/07 paj. 10 par. 1-2
U ni makabye wo buvha u kombelako ka yena a wusungukati?
Na ova ni 16 wa malembe basi, Uziya i no yimisiwa kuva hosi ya Dzongeni ya mufumo wa Judha. I no fuma 50 wa malembe ni ku hundza, kusukela kumbheleni ka zana ga malembe ka wu 9 kala kusanguleni ka zana ka malembe ga wu 8 Mahlweni ka Nguva ya Hina. Kusukela wun’wananeni, Uziya i wa ‘maha kululama mahlweni ka Jehovha’. Cini ci mu kucileko ku famba ndleleni yo lulama? A matimu ma wula lezvi: “[Uziya] i no chivirika ku hlota Nungungulu masikwini ya Zakariya loyi a nga wa pimisisa miwoniso ya Nungungulu; a masiku wontlhe lawa a nga wa hlota Jehovha, Nungungulu i no mu katekisa.’ — 2 Kronekele 26:1, 4, 5.
Wutshan’wini ga cipandze leci ca Bhibhiliya, a ku tiviwi zvotala xungetano hi Zakariya, a sungukati ga hosi. Hambulezvo, kota lezvi a nga “pimisisa miwoniso ya Nungungulu”, Zakariya i mahile cipandze ca lisima kasi ku vhuna a hosi leyi ya jaha lezvaku yi maha zva zvinene. A bhuku The Expositor’s Bible gi wula lezvaku Zakariya i wa hi “wanuna a nga yi tiva khwatsi a mitsalo yo basa, a nga hi ni wutlhari ga hombe ntirweni wa Nungungulu a tlhela a zvi kota ku gondzisa van’wani lezvi a nga zvi tiva.” A tlhari yo kari ya Bhibhiliya yi wulile lezvi xungetano hi Zakariya: “I wa hi munhu a nga zvi tiva khwatsi a zviphrofeto . . . wo tiva nguvhu, a nga tirela Nungungulu hi kuhiseka, wa mu nene; niku zvi wonekisa ku i mu vhunile nguvhu Uziya.”
29 KA MAIO–4 KA JUNHO
TITSHOMBA TI NGA KA MHAKA YA NUNGUNGULU | 2 KRONEKELE 28-29
“U nga tirela Jehovha hambu loku a vapswali va wena va nga hi cikombiso cinene”
Murindzeli 02.16 paj. 14 par. 8
Pimanyisa a vanghana va Jehovha
8 A ku hambana na Rute, Hezekiya i pswalilwe ka tiko gi ti hendleletileko ka Jehovha. Kanilezvi, a hi vontlhe vaIzrayeli va nga hanya hi kuyelana ni kutihendleleta loko. A papayi wa Hezekiya, Hosi Ahaza, mun’we wabye. A wanuna loye wo biha i lo peta mufumo wa Judha wukhozelini ga zvifananiso, a tlhela a chakisa a tempeli ya Jehovha le Jerusalema. Zva bayisa a ku alakanya wun’wanana ga Hezekiya, hakuva a vamakabye vakwe va delwe hi ndlela yo tshisa nguvhu. Va hisilwe na va hanya kota muphahlelo ka nungungulu wa mawunwa! — 2 Tih. 16:2-4, 10-17; 2 Kro. 28:1-3.
Murindzeli 02.16 paj. 14 par. 9-11
Pimanyisa a vanghana va Jehovha
9 Zvi wa olova ku Hezekiya a kula na a hi ni civiti na Nungungulu. A vokari a va kumanangi ni zvilo zvo tshisa ku fana na Hezekiya, kanilezvi va alakanya lezvaku va na ni cigelo co zwala ca ku ‘vhukela Jehovha’ kutani ku zangarela hlengeletano yakwe. (Mav. 19:3) A van’wani kambe va alakanya lezvaku a kuva va kulele ngangweni wu nga hanya wutomi go biha zvi va konela ku hanya wutomi go bihawo, va phinda a zvihoxo zva vapswali vabye. (Ezek. 18:2, 3) Maalakanyo ya lisine lawo ke?
10 A matimu ya wutomi ga Hezekiya ma hi nyika hlamulo wo tiya waku: A hi lisine! A ku na cigelo ni cin’we co zwala ca ku zangarela Jehovha, hakuva a hi yena a vangako zvilo zvo biha lezvi zvi humelelako vanhu tikweni legi go biha. (Joba 34:10) Lisine lezvaku a vapswali va ngava ni ntamu wa hombe wa ku vhuna kutani ku wonha vana vabye. (Mav. 22:6; Kol. 3:21) Kanilezvi, lezvo a zvi wuli lezvaku a ciyimo leci a n’wana a nga kulela ka cona laha ngangweni co mu gemela lezvi a faneleko ku hanyisa zvona. Jehovha i hi nyikile cinyikiwo ca lisima hontlheni — ca kuva hi tlhatlheka ku hlawula lezvi hi lavako ku maha ni lezvi hi lavako ku hanyisa zvona. (Deut. 30:19) Hezekiya i ci tirisisile kuyini a cinyikiwo leco?
11 Hambu lezvi Hezekiya a nga hi n’wana wa yin’we ya tihosi to biha nguvhu ta Judha, yena wutsumbu ive yin’we ya tihosi ta ti nene nguvhu. (Gondza 2 Tihosi 18:5, 6.) A papayi wakwe i wa hi cikombiso co biha nguvhu, kanilezvi ku wa hi ni van’wani va nga hi zvikombiso zvi nene. Isaya, na Mika, na Hoseya va wa hi vaprofeti ka masiku lawo. Hi nga ha alakanyela Hosi Hezekiya na a ehleketa hi magezu ma pimisilweko ya vavanuna lavo va kukholwa, a tsika wusungukati ni kukawuka ka Jehovha zvi nghena mbilwini yakwe. Hikwalaho, i no sangula ku lulamisa a zvilo zvo biha lezvi a papayi wakwe a nga zvi mahile. I mahile lezvo hi ku basisa tempeli, a basisa vanhu ka zviwonho zvabye, a tlhela a maha tsima ga hombe nguvhu ga ku fayetela zvifananiso. (2 Kro. 29:1-11, 18-24; 31:1) Laha a nga kumana ni zvikarato zva hombe, zvo kota cikhati leci Senakeribhe, hosi ya Asiriya, a nga mu dzukisela aku i ta lovisa Jerusalema, Hezekiya i no kombisa kutiya-hlana ni kukholwa ka hombe. I no tsumba Nungungulu a tlhela a tiyisa vanhu vakwe hi magezu ni mitiro. (2 Kro. 32:7, 8) Hi kufamba ka masiku, laha ku nga laveka lezvaku a kawukiwa hi kuva a kombisile matshandza, Hezekiya i no ti koramisa a ti sola. (2 Kro. 32:24-26) Zvi te dlunya lezvaku Hezekiya a nga tsikangi a ciyimo leci a kuleleko ka cona ci mu wonhela wutomi gakwe kutani wumandziko gakwe. Wutshan’wini ga lezvo, i no komba lezvaku i wa hi munghana wa Jehovha, niku cikombiso ci nene co ringana ku ci tekelela.
Kela titshomba ta moya
Sentinela 15/02/12 paj. 24-25
Natani i hisekele wukhozeli go basa hi kutsumbeka
Kota mukhozeli wo tsumbeka wa Jehovha, Natani i seketele makungo ya Dhavhidha ya ku aka wutshamu go sangula ni tsindza ga wukhozeli ga lisine laha misaveni, laha Jehovha a nga wa ta khozelwa kona kala rini. Hambulezvo, ka khati lego, zvi wonekisa ku lezvi a nga wula zvi wa hi kutizwa kakwe; zvi wa ngati hi ka Jehovha. Ka wusiku galego, Nungungulu i no byela muphrofeti wakwe lezvaku a ya byela Hosi Dhavhidha a zvilo zvo hambana ni lezvi a nga mu byelile, zvaku: Dhavhidha i wa nga ta aka a tempeli ya Jehovha, yi wa ta akiwa hi n’wana wakwe. Kanilezvi, i tlhelile aku Nungungulu i wa maha civhumelwano na Dhavhidha ca ku a mufumo wakwe wu ta ‘tshama kala kupindzuka.’— 2 Sam. 7:4-16.
A kurandza ka Nungungulu ku wa nga yelani ni mawonela ya Natani xungetano hi ku aka tempeli. Hambulezvo, a muphrofeti loyi wo kala matshandza, i no ti koramisa a ti zwananisa ni kungo ga Nungungulu, a gi seketela. Hi nga wona cikombiso ca ci nene ca ku ci landzela loku Nungungulu a hi kawuka hi ndlela yo kari! Lezvi Natani a nga maha andzhako ka lezvo, zvi komba ku Nungungulu i simamile a mu tsakela. Zvi wonekisa ku Jehovha i kucile Natani na Gadhi, a muwoni, va leletela Dhavhidha lezvaku a yimisa 4000 wa vanhu kasi va khatalela tisimu lomu tempeleni. — 1 Kro. 23:1-5; 2 Kro. 29:25.
5-11 KA JUNHO
TITSHOMBA TI NGA KA MHAKA YA NUNGUNGULU | 2 KRONEKELE 30-31
“A ku tlhangana zva lisima ka hina”
Perspicaz vhol. 1 paj. 920 par. 2
Hezekiya
Kuhiseka kakwe hi wukhozeli ga lisine. Hezekiya i no tekela ku kombisa kuhiseka kakwe hi wukhozeli ga Jehovha hi ku sangula ku fuma na a hi ni 25 wa malembe. A co sangula a nga maha ku vhulula tempeli yi nga vhalilwe, a tlhela a yi lungisa. I no guma a tlhanganisa vapristi ni vaLevhi, a va byela lezvi: ‘Ndzi xuva ku maha civhumelwano na Jehovha, Nungungulu wa ka Israyeli.’ Leco ci wa hi civhumelwano ca ku i ta tsumbeka ka Jehovha, hi kuya hi civhumelwano ca Nayo, leci ci nga ha tira ka cikhati leco, hambu lezvi va nga kala va nga ha cheli kota hi cona. Makunu, va no tlhela va hlambanya kambe le Judha a ku va ta ingisa. I no ti tsitsirita a yimisisa vaLevhi mitirweni yabye a tlhela a vhuxa ntiro wa ku chaya ni ku yimbelela tisimu ta ku dhumisa Jehovha. Yi wa hi hweti ya Nisani, a hweti ya festa ya Phasika, kanilezvi a vaLevhi va wa nga basangi. Hi siku ga wu 16 ka hweti ya Nisani, a tempeli yi no basisiwa va tlhelisela zvibya zva yona. Makunu zvi no lava ku ku mahiwa ntiro wo hlawuleka wa ku basisa vaIzrayeli vontlhe. A ku sangula, a tihosana ti nota ni muphahlo wa kuhiswa, muphahlo wa ciwonho wa le wuhosini, wa vanhu vontlhe, ku landzela vanhu vo tala nguvhu va nyikelawo a miphahlo yabye. — 2 Kro. 29:1-36.
Perspicaz vhol. 1 paj. 920 par. 3
Hezekiya
Lezvi zvi nga kala ku koteka ku a Phasika gi mahiwa hi cikhati ca kona hi kota ya lezvi a vanhu va nga kala va nga basangi, Hezekiya i no londzowota a nayo lowu wu nga vhumela ku loyi a nga basangiko a maha Phasika andzhako ka hweti. I no ramba vanhu va tiko ga Judha ni va tiko ga Izrayeli hi ku rumela mapapilo, va ramba kusukela Bherexebha kala Dhani. Lava va nga heleketa mapapilo lawo, a kun’wani a va tsakelwangi. Kanilezvi, kuve ni vanhu vo kari, nguvhunguvhu va ka Axeri, va ka Manase ni va ka Zebhuloni, va nga ti koramisa va vhumela kuta; a vokari va ka Efrayime ni va ka Isakari vonawu va nota. Ahandle ka lava, ku wa hi ni votala vo kala va nga hi vaIzrayeli va nga khozela Jehovha. Kuzvilava a votala va nga hi mufun’weni wa le n’walungu va nga seketela wukhozeli ga lisine zvi wa ta va karatela kuta. A ku fana ni lava va nga famba va nyikela mapapilo, vonawu va wa ta vhukelwa va tlhela va hlekiwa, hi kota ya lezvi a vanhu va mufumo wa 10 wa tixaka va nga babya hi tlhelo ga moya va tlhela va pela hi hloko ka wukhozeli ga mawunwa, seno na va dzukiselwa hi vaAsiriya. — 2 Kro. 30:1-20; Mitse. 9:10-13.
Perspicaz vhol. 1 paj. 920 par. 4-5
Hezekiya
Andzhako ka Phasika, ku no mahiwa Festa ya Tipawa to kala Livrina hi 7 wa masiku. A vanhu va no tsaka laha ka ku vontlhe va lava ku a festa yi simama hi 7 wa masiku. Hambu ka nguva leyo ya zvikarato, a makatekwa ya Jehovha ma noya hi kuna, laha ka ku kuva ni ‘kutsaka ka hombe lomu Jerusalema, hakuva kusukela masikwini ya Solomoni n’wana Dhavhidha, a hosi ya va ka Israyeli, ku wa nga seva ni zvilo zvo kota lezvo lomu Jerusalema.’ — 2 Kro. 30:21-27.
Lezvi zvi nga maheka hi kulandzela zvi kombile lezvaku hakunene a wukhozeli ga lisine gi wa vhuxilwe; a hi ku khwatsi va wa no tsaka zva cikhatanyana. Loku a festa yi mbhelile, a vanhu va tlhela kaya, va noya tsemelela a tisinya to basa va tlhela va khungumulela a matshamu yo tlakuka ni maalati lomu tikweni gontlhe ga ka Judha ni ga Bhenjamini, a ku patsa ni ga ka Efrayime ni ga ka Manase. (2 Kro. 31:1) Hezekiya i no veka cikombiso hi ku sila a nyoka ya kobre yi nga mahilwe hi Mosi, hakuva a vanhu va wa yi khozela, va tuvikisa a musi wa muphahlo laha ka yona. (2 Tih. 18:4) Loku a festa yi hundzile, Hezekiya i no maha lezvi zvi nga laveka kasi a wukhozeli ga lisine gi simama. I no xaxameta vapristi a maha malulamiselo ya ku ku mahiwa mitiro ya lomu tempeleni. I no kuca vanhu lezvaku va ingisa Nayo, ka zvilo zvo kota ku nyikela zva wukhume ni mihandzu yo sangula ka vaLevhi ni vapristi. A vanhu va no ingisa hi mbilu yontlhe. — 2 Kro. 31:2-12.
Kela titshomba ta moya
Murindzeli 09.18 paj. 6-7 par. 14-15
“Loku mu tiva a timhaka leti, mu ta tsaka loku mu ti maha”
14 A ndlela yin’wani hi kombako hi yona ku ha ti koramisa ku tiva ku ingisela khwatsi van’wani. Jakobe 1:19 i hi byela ku hi fanele ku “hatlisa kuzwa”. Jehovha hi yena a zvi kotako ku ingisela khwatsi van’wani. (Genesisi 18:32; Joxuwa 10:14) Kota cikombiso, lera mabhulo ma nga ka Eksodhusi 32:11-14. (Gondza.) Hambu lezvi ka ku Jehovha i wa nga kurumeteki ku ingisela mawonela ya Mosi, i mu tsikile a ti phofula. U wa ta zvi kota ku kombisa lihlazva-mbilu ka munhu wa ku ka khati go kari ive ni mawonela yo soleka, u mu ingisela khwatsi u gumesa u tirisa mawonela yakwe ke? Hambulezvo, Jehovha i kombisa lihlazva-mbilu, a ingisela vontlhe va khongelako ka yena hi kukholwa.
15 Ti wutise lezvi: ‘Loku Jehovha a ti koramisa laha ka kuza a ingisela vanhu a ku fana ni lezvi a nga mu ingiselisa zvona Abrahama, Rakeli, Mosi, Joxuwa, Manowa, Elija, na Hezekiya minawu a ndzi faneli ku maha lezvo ke? Xana ndzi nga va nyika lisima vamakabye va mina vontlhe hi ku va ingisela ndzi tlhela ndzi tirisa mawonela yabye loku zvi koteka? Ku na ni wokari lomu bandleni kutani laha ngangweni zvi lavako ku ndzi mu ingisela nguvhu ke? Ndzi ta maha yini ka mhaka leyi?’ — Genesisi 30:6; Valamuli 13:9; 1 Tihosi 17:22; 2 Kronekele 30:20.
12-18 KA JUNHO
TITSHOMBA TI NGA KA MHAKA YA NUNGUNGULU | 2 KRONEKELE 32-33
“Tiyisa vamakabye zvikhatini zva zvikarato”
Perspicaz vhol. 1 paj. 241 par. 3
Asiriya
Senakeribhe. Senakeribhe, n’wana wa Sargoni II, i no vhukela mufumo wa Judha ka lembe ga wu 14 ga hosi Hezekiya (732 A.E.C.). (2 Tih. 18:13; Isa. 36:1) Hezekiya i wa tsikile ku maha lezvi a vaAsiriya va nga laya andzhako ka lezvi zvi mahilweko hi papayi wakwe Ahaza. (2 Tih. 18:7) Senakeribhe i no zangara a dhumela tiko ga Judha, aku i tekile 46 wa madhoropa (fananisa na Isa. 36:1, 2). Andzhako ka lezvo, na a hi kwale Lakixe kakwe, i no laya lezvaku Hezekiya a humesa 30 wa titalenta ta ouro (cipimo ca 11 560 000 wa madholari) ni 300 wa titalenta ta silivha (cipimo ca 1 982 000 ta silivha). (2 Tih. 18:14-16; 2 Kro. 32:1; fananisa na Isa. 8:5-8.) Hambu lezvi va nga humesa a zvilo lezvo, Senakeribhe i no rumela vanhu vakwe va ya byela va ka Izrayeli lezvaku va ti nyikela. (2 Tih. 18:17–19:34; 2 Kro. 32:2-20) Jehovha i no guma a lovisa 185 000 wa masochwa ka wusiku gin’we. Ka ciyimo leco, zvi no boha ku a vaAsiriya lavo va matshandza va tlhela Ninivha. (2 Tih. 19:35, 36) Kwaseyo, Senakeribhe i no guma a dawa hi vana vakwe va vambiri, a vhaletiwa citshan’wini ca wuhosi hi n’wana mun’wani, wa ku hi Esar-hadhoni. (2 Tih. 19:37; 2 Kro. 32:21, 22; Isa. 37:36-38) A zvimaho lezvi, ahandle ka leci ca kudawa ka masochwa ya Asiriya, zvi tsalilwe kambe ka prisma ya Senakeribhe ni ya Esar-hadhoni, a n’wana wakwe. — MIFOTA, Vhol. 1, paj. 957.
Murindzeli 15/11/13 paj. 19 par. 12
Ntlhanu wa varisi ni vambiri, ni 8 wa tihosana— zvi wula yini ka hina nyamutlha?
12 Contlhe cikhati Jehovha i ti yimisele ku hi mahela lezvi hina wutsumbu hi nga zvi kotiko ku ti mahela, kanilezvi i rindzela lezvaku hi maha lezvi hi zvi kotako. Hezekiya i no bhulisana ni “tinduna takwe ni tinhenha takwe” zvonake va maha ciboho ca ‘ku ya seletela tihlowo ta mati leti ti nga wa hi lahandle ka muti . . . [Hezekiya] i no tiya a akisa lontlhe ligingisi leli li nga wa khungumulwe, a lehisa makhokhola, a aka lin’wani ligingisi hi lahandle, . . . a maha matlhari ni zvitlhangu zvo tala nguvhu.’ (2 Kro. 32:3-5) Kasi ku vhikela ni ku risa vanhu vakwe ka cikhati leco, Jehovha i lo tirisa vavanuna vo tala va tinhenha — ku nga Hezekiya, tinduna takwe, ni vaprofeti vo tiya hi tlhelo ga moya.
Murindzeli 15/11/13 paj. 19 par. 13
Ntlhanu wa varisi ni vambiri, ni 8 wa tihosana— zvi wula yini ka hina nyamutlha?
13 Lezvi Hezekiya a zvi mahileko hi kulandzela zvi’ve zva hombe nguvhu a ku hundza ku setela tihlowo ta mati kutani ku aketa a tigingisi ta dhoropa ntsena. Kota lezvi a nga hi murisi wo khatala, Hezekiya i no tsombanyisa vanhu a va tiyisa hi tlhelo ga moya hi magezu lawa: ‘Tiyani hlanha! Mu nga chavi mu mbhela ntamu hi kota ya hosi ya le Asiriya . . . , hakuva lava va nga na hina va tele nguvhu ku hundza lava va nga na yena. Yena i na ni woko ga nyama, kanilezvi hina hi na na Jehovha Nungungulu wa hina, a hi vhunetela ni ku hi lwela tiyimpi ta hina.’ Hi nga wona a magezu lawa yo tiyisa kukholwa ya lezvaku Jehovha i wa ta lwela vanhu vakwe! Laha va ngazwa lezvo, a vaJudha ‘va no tiyiswa hi magezu ya Hezekiya hosi ya ka Judha.’ Wona lezvaku ku’ve ‘magezu ya Hezekiya’ ma nga tiyisa a timbilu ta vanhu. Hezekiya ni tinduna takwe ni tinhenha takwe, zvin’we na muprofeti Mika na Isaya, va’ve varisi vo buvha, khwatsi hi lezvi Jehovha a nga zvi wulile na ka ha hi mahlweni hi nomu wa muprofeti wakwe. — 2 Kro. 32:7, 8; gondza Mika 5:5, 6.
Kela titshomba ta moya
Murindzeli 10.21 paj. 4-5 par. 11-12
Cini ci kombako ku hakunene a munhu wa ti sola?
11 Hi kufamba ka cikhati, Jehovha i no hlamula mikhongelo ya Manase. Ka lezvi Manase a nga kari a wula ka mikhongelo yakwe, Jehovha i no wona ku a mbilu yakwe yi cicile; a sezwa mukhongelo wakwe, a mu tlhelisela mufun’weni wakwe. Manase i mahile zvontlhe a nga zvi kota kasi ku komba lezvaku hakunene wa ti sola. I mahile zvilo zvaku Ahabhi ne a nga tshukangi a maha. I no cica mahanyela yakwe. Alwa hi tindlela tontlhe kasi ku fuvisa wukhozeli ga mawunwa a tlhela a kuca vanhu lezvaku va khozela Jehovha. (Lera 2 Kronekele 33:15, 16.) Handle ko kanakana lezvo zvi wa lava kukholwa ni kutiya-hlanha, hakuva hi malembe yo tala i wa kucetele tihosana ta mufumo wakwe, va ngango wakwe ni vanhu vontlhe lezvaku va maha zvobiha. Kanilezvi, ka malembe yakwe yo gumesa i wa zama ku lulamisa zvilo zvo kari zvo biha a nga zvi mahile. Zvi wonekisa ku a zukulu wakwe Josiya, loyi hi ndzhako ka cikhati a ngava hosi ya yi nene, i gondzile zva zvi nene ka yena.— 2 Tih. 22:1, 2.
12 Zvini hi nga gondzako ka cikombiso ca Manase? Manase i ti koramisile, a khongela ka Jehovha kasi a mu mahela wuxinji a tlhela a cica mahanyela yakwe. I tirile yi nga chayi kasi ku lulamisa lezvi a nga wonhile, a ti karatela ku khozela Jehovha a tlhela a kuca vanhu lezvaku vonawu va mu khozela. A cikombiso ca Manase ci vhuna hontlheni, hambu lava va nga maha zviwonho zva hombe nguvhu. Ci hi komba khwatsi lezvaku Jehovha Nungungulu ‘mu nene niku wa tsetselela’. (Lis. 86:5) Lisine futsi, Jehovha i ta va tsetselela lava hakunene va ti solako.
19-25 KA JUNHO
TITSHOMBA TI NGA KA MHAKA YA NUNGUNGULU | 2 KRONEKELE 34-36
“Wa vhuneka khwatsi hi Mhaka ya Nungungulu?”
Perspicaz vhol. 1 paj. 1178 par. 3
Huldha
A cikhati leci va nga kari va lungisa tempeli, Hilkiya, a mupristi wa hombe i no thumba “bhuku ga nayo”. A cikhati leci Josiya a nga gizwa na gi leriwa i no rumela vanhu kasi va ya wutisa Jehovha lezvi va nga fanele ku maha. Va noya ka Huldha, loyi a nga va byela lezvi Jehovha a nga wula, zvi nga komba lezvaku wontlhe a makhombo lawa ma tsalilweko lomu ka “bhuku” ma wa ta wela tiko gontlhe gi nga tsikile ku ingisa Jehovha. Huldha i no engetela aku lezvi Josiya a nga ti sola mahlweni ka Jehovha i wa nga ta gi wona khombo lego, kanilezvi i wa tafa hi kurula a lahliwa ni vakokwani vakwe. — 2 Tih. 22:8-20; 2 Kro. 34:14-28.
Sentinela 15/06/09 paj. 10 par. 20
Hisekela a yindlu ya Jehovha!
20 A cikhati leci va nga kari va vhuxa tempeli, a ntiro lowu Hosi Josiya a nga laya ku wu mahiwa, Hilkiya, a Mupristi wa Hombe, i no ‘thumba a Bhuku ga Nayo wa Jehovha lowu wu nyikilweko hi Mosi.’ I no nyika Xafani, a matsalani wa hosi. Xafani i no guma a ya gi lera mahlweni ka Hosi Josiya. (Lera 2 Kronekele 34:14-18.) Zvi mu khumbisile kuyini Hosi Josiya? I no tekela ku handzula tinguwo hi kukarateka, a ruma vanhu va ya wutisa Jehovha lezvi va faneleko ku maha. Jehovha i no tirisa muphrofeti Huldha, a kona zvilo zvo kari zvi nga mahiwa hi wukhongeli lomu Judha. Hambulezvo, Jehovha i wa zvi wonile lezvi Josiya a nga zama ku maha kasi ku fuvisa wukhozeli ga mawunwa, niku i wa simama ku mu tsakela, hambu lezvi a ngaku a tiko gontlhe gi wa ta welwa hi khombo. (2 Kro. 34:19-28) Zvini hi nga gondzako ka mhaka leyi? Handle ko kanakana, a kuxuva ka hina ku fana ni loku Josiya a nga hi nako. Hi lava ku tekela ku ingisa zvileletelo zva Jehovha; hi gondza ka zvitlharihiso zvi hi kombako lezvi zvi nga humelelako loku a wuhluwuki ni kungatsumbeki zvi nghena ka wukhozeli ga hina. Niku hi nga tiyiseka lezvaku Jehovha i ta ku wona a kuhiseka ka hina wukhozelini ga lisine, a ku fana ni lezvi a nga wona kuhiseka ka Josiya.
Kela titshomba ta moya
Murindzeli 03.17 paj. 25-26 par. 15-17
U ta tsika a zvilo zvi tsalilweko zvi khumba mbilu ya wena ke?
15 Hi kugumesa, hi nga gondza yini ka Josiya? Hambu lezvi Josiya a nga hi hosi ya yi nene, i mahile cihoxo ci mahileko lezvaku afa. (Gondza 2 Kronekele 35:20-22.) Zvini zvi nga humelela? Josiya i no sangula kulwa na Neko, a hosi ya Gibhite, na a nga hi na cigelo ca ku maha lezvo. Hi lisine, Neko i mu byelile Josiya lezvaku i wa nga lavi kulwa naye. A Bhibhiliya gi wula lezvaku a magezu ya Neko ma wa huma ‘non’wini wa Nungungulu.’ Kanilezvi Josiya i noya yimpini a ya dawa. Makunu cini ci mu mahileko alwa na Neko? A Bhibhiliya a gi hi byeli.
16 Josiya i wa fanele kuva a hlotile tindlela ta ku tiva ku lezvi Neko a wulako zvi huma non’wini wa Jehovha hakunene ke. Na a zvi mahisile kuyini? Na a wutisile Jeremiya, loyi a nga hi mun’we wa vaprofeti va Jehovha. (2 Kronekele 35:23, 25) Ahandle ka lezvo, Josiya i wa fanele kuva a nyimile a pimisa. Phela Neko i wa ngayi Jerusalema, i waya Karxemixe a yalwa ni tiko gin’wani. A cin’wani hi ku Neko a nga rukatelangi Jehovha kutani vanhu vakwe. Josiya a nga ehleketangi hi zvontlhe lezvo na a nga se maha ciboho. Hi gondza yini? Loku hi hi ni cikarato na hi lava ku maha ciboho, hi fanele ku ranga hi ku hlola hi tiva ku zvini lezvi Jehovha a lavako lezvaku hi zvi maha.
17 Loku hi lava ku maha ciboho, hi fanele ku ranga hi ku alakanyela a matshinya ya milayo lawa ma nga hi vhunako ni lezvi hi nga ma tirisisako zvona. Ka zvin’wani zviyimo, zvi nga ha lava ku hi hlota mahungu man’wani ya ku ma nga hi vhuna lomu ka mabhuku ya hina kutani ku kombela wusungukati ka dhota go kari. Gi nga hi vhuna ku ehleketa hi man’wani matshinya ya milayo ya lomu ka Bhibhiliya. Ehleketa hi ciyimo leci: A makabye wo kari wa cisati a chadhileko ni wanuna a kalako a nga hi Mboni i lava kuya sin’wini. (Mitiro 4:20) Kanilezvi ka siku lego, a nuna wakwe a nga zvi lavi ku aya sin’wini. I mu byela lezvaku ka hundza cikhati co leha na va nga se tshama zvin’we va bhula kota nuna ni sati niku i lava ku mu teka vaya ka wutshamu go kari. A makabye wa cisati i ehleketa hi mavhesi ya Bhibhiliya ya ku ma nga mu vhuna ku maha ciboho ca wutlhari. Wa zvi tiva lezvaku i fanele ku ingisa Nungungulu niku Jesu i hi leletele ku famba hi maha vapizani. (Matewu 28:19, 20; Mitiro 5:29) Kanilezvi i tlhela a alakanya lezvaku a wasati i fanele ku ti koramisa ka nuna wakwe niku a malandza ya Nungungulu ma fanele kuva ni kuringanisela. (Va Le Efesusi 5:22-24; Va Le Filipi 4:5) Xana a nuna wakwe o zama ku mu tsikisa ku chumayela, kutani o lava ku tshama naye ka siku galego basi? Kota malandza ya Jehovha, hi lava ku maha zviboho zvi kombako lezvaku ha ringanisela zvi tlhela zvi mu tsakisa.
26 KA JUNHO–2 KA JULHO
TITSHOMBA TI NGA KA MHAKA YA NUNGUNGULU | EZRA 1-3
“Vhumela ku tirisiwa hi Jehovha”
Murindzeli 03.22 paj. 14 par. 1
Wa zvi wona lezvi Zakariya a nga zvi wona ke?
A VAJUDHA va wa tsakile nguvhu. Jehovha i wa ‘vhuxile a moya wa Khurusi, a hosi ya le Persia’ lezvaku a tlhatlha vaIzrayeli, andzhako ka malembe yo tala na va hi wukhumbini le Bhabhuloni. A hosi yi no huwelela lezvaku a vaJudha va wa tlhele tikweni gabye ‘va ya vhuxa a yindlu ya Jehovha Nungungulu wa ka Izrayeli.’ (Ezra 1:1, 3) Lawo mave mahungu yo tsakisa nguvhu! Lezvo zvi wa wula ku a wukhozeli ga lisine gi wa ta vhuxetwa tikweni legi a nga nyikile vanhu vakwe.
Murindzeli 10.17 paj. 21 par. 2
Lezvi a tikareta ni cidlodlo zvi ku vhikelisako zvona
2 Zakariya i wa zvi tiva ku a vaJudha lava va wuyileko Jerusalema va wa hi vakhozeli va Jehovha. Hi vona ‘lava a timbilu tabye ti vhuxilweko hi Jehovha’ lezvaku va tsika mimiti yabye ni mabhindzu yabye le Bhabhuloni. (Ezra 1:2, 3, 5) Va tsikile wutshamu va nga gi tiva khwatsi vaya ka wutshamu ga ku a kutala kabye va wa nga se tshuka va gi wona. A vaJudha lavo va wa zvi wona na zvi hi zva lisima nguvhu a ku aketa tempeli laha ka kuza va vhumela ku teka lipfhumba lelo lo karata la kwalomo ka 1600 wa tikilometro.
Kela titshomba ta moya
Sentinela 15/01/06 paj. 19 par. 1
Timhaka-tshinya ta bhuku ga Ezra
1:3-6. A ku fana ni vaIzrayeli vo kari va nga simama Bhabhuloni, a Vakustumunyu va Jehovha vo tala a zvi koteki a ku va nghenela ntiro wa cikhati contlhe kutani ku tira lomu ku nga ni cilaveko. Hambulezvo, va seketela va tlhela va tiyisa lava va nga ntirweni wa cikhati contlhe va tlhela va maha minyikelo kasi ku vhuvhumisa a ntiro wa Mufumo, wa kuchumayela ni ku maha vapizani.