BHIBLIOTEKA YA SAITE ya Watchtower
BHIBLIOTEKA YA SAITE
ya Watchtower
ciTshwa
  • BHIBHILIYA
  • MABHUKU
  • MITLHANGANO
  • mwbr23 Setembro pp. 1-12
  • Timhaka ta mabhuku ma tako ka “Cibhukwana ca Mutlhangano”

Ka cipandze leci a ku na vhidhyu

Hi tsetselele, kuve ni cikarato kasi a vhidhyu leyi yiba.

  • Timhaka ta mabhuku ma tako ka “Cibhukwana ca Mutlhangano”
  • Timhaka ta mabhuku ma tako ka Cibhukwana ca Mutlhangano — 2023
  • Zvihlokwana zva mhaka
  • 4-10 KA SETEMBRO
  • 11-17 KA SETEMBRO
  • 18-24 KA SETEMBRO
  • 25 KA SETEMBRO – 1 KA OUTUBRO
  • 2-8 KA OUTUBRO
  • 9-15 KA OUTUBRO
  • 16-22 KA OUTUBRO
  • 23-29 KA OUTUBRO
  • 30 KA OUTUBRO–5 KA NOVEMBRO
Timhaka ta mabhuku ma tako ka Cibhukwana ca Mutlhangano — 2023
mwbr23 Setembro pp. 1-12

Timhaka ta mabhuku ma tako ka Cibhukwana ca Mutlhangano

© 2023 Watch Tower Bible and Tract Society of Pennsylvania

4-10 KA SETEMBRO

TITSHOMBA TI NGA KA MHAKA YA NUNGUNGULU | ESTERE 1-2

“Ti karatele kuva munhu wa ku ti koramisa a ku fana na Estere”

Murindzeli 01.17 paj. 24 par. 11

Hi nga simama hi ti koramisa hambu loku hi ringiwa

11 Loku a vanhu va hi dzundza nguvhu zvonawu zvi nga ringa kutikoramisa ka hina. Estere i wa dzundziwa nguvhu. I wa hi mun’we wa vavasati vo saseka nguvhu le Persia. I mbhetile lembe na a heniwa hi ku sasekiselwa nguvhu zvin’we ni vanhanyana van’wani vo tala lava vontlhe va nga palisana hi ku lava ku randziwa hi hosi. A hosi yi lo hlawula Estere a kuva muzinza wa yona. Kanilezvi zvontlhe lezvo va nga mu mahela a zvi cicangi matshamela yakwe. Estere a nga vangi ni matshandza. I simamile kuva munhu wa mu nene, wo ti koramisa, ni wa cichavo. — Estere 2:9, 12, 15, 17.

Pimanyisa a kukholwa kabye paj. 130 par. 15

I yimelele a vanhu va Nungungulu

15 Loku ci chikele a cikhati ca lezvaku Estere aya ka hosi, i lo vhumelelwa ku teka ni cihi a nga alakanya lezvaku ca laveka, kuzvilava kasi ku ti sasekisa nguvhu. Kanilezvi, yena a nga kombelangi nchumu ahandle ka lezvi a nga nyikilwe hi Hagayi. (Est. 2:15) Ko khwatsi i wa zvi tiva lezvaku a kusaseka koce ku wa nga ta tsakisa a mbilu ya hosi; Estere i wa zvi tiva lezvaku a kutikoramisa gi wa hi tshamela go kala ka vanhu vo tala va nga hi ndlwini ya hosi. Xana a kualakanya kakwe ku wa lulamile?

Murindzeli 01.17 paj. 24 par. 12

Hi nga simama hi ti koramisa hambu loku hi ringiwa

12 Loku hi ti koramisa, a mabohela ya hina ni lezvi hi mahako zvi ta komba cichavo hi van’wani zvi tlhela zvi komba ku ha ti randza. Wutshan’wini go ti dzundza-dzundza kutani ku zama ku hlamalisa vanwani, hi ti karatela kuva ni “moya wa kurula ni kuolova.” (Gonza 1 Pedro 3:3, 4; Jeremia 9:23, 24) A mawonela lawa hi nga nawo hi hina venyi ma ta gumesa ma woneka ka mawulawulela ya hina ni lezvi hi mahako. Hi cikombiso, hi nga ha zama ku maha van’wani va alakanya lezvaku hi hlawulekile hi kota ya lezvi hi mahako, lezvi hi zvi tivako, kutani lava hi va tivako. Kutani hi nga ha zama ku mahisa ku khwatsi hi mahile nchumu wa lisima ha hoce, hambu loku hi vhunilwe hi van’wani. Kanilezvi ehleketa hi Jesu. Na a zvi kotile ku hlamalisa vanhu hi wutlhari ga hombe legi a nga hi nago. Kanilezvi Jesu i wa tolovela ku tshaha Mhaka ya Nungungulu. I wa nga lavi ku dzundziwa hi vanhu. Contlhe cikhati i wa lava ku a wudzundzo giya ka Jehovha. — Johani 8:28.

Kela titshomba ta moya

Murindzeli 11.22 paj. 31 par. 3-6

U Wa Zvi Tiva?

Va no kuma a mitsalo yi kehlilweko yi tsalilweko hi ciPersiya yi nga kumbuka a vito ga wanuna wo kari wa ku hi Marduka (hi ciTshwa ku nga Mordhekayi). I wa tira kota adhiministradhori, kuzvilava kota muhlayeli wa zvilo le Xuxani. Ka cikhati leci a mitsalo leyo yi nga kumiwa hi cona, Arthur Ungnad, a tlhari yo kari ya matimu ya le Mutsuwuka-gambo, i tsalile lezvaku, ka cikhati leco, a mitsalo leyo hi “yona yoce yo kala yi nga mahi cipandze ca Bhibhiliya yi nga kumbuka Mordhekayi”.

Kusukela loku Ungnad a wulile lezvo, a titlhari ti hundzulusele a mazanazana ya mitsalo yin’wani yi kehlilweko ya ciPersia. Cikari ka mitsalo leyo, ku na ni zvitabwana zva Persépolis, lezvi zvi kumilweko lomu ku nga tshama mali, kusuhani ni muro wa dhoropa. A zvitabwana lezvo zva nguva ya kufuma ka Xerxesi wo Sangula. Zvi tsalilwe hi ciElamite niku zvi na ni mavito yo tala ya vanhu va kumbukiwako lomu ka bhuku ga Estere.

A zvitabwana zvo tala zva Persépolis zvi kumbuka a vito Marduka, loyi a tirileko kota matsalani wa hosi ndlwini ya wuhosi le Xuxani ndzeni ka kufuma ka Xerxesi wo Sangula. A cin’we ca zvitabwana lezvo ci kumbuka Marduka kota muhundzuluseli. Lezvo zva zwanana khwatsi ni lezvi a Bhibhiliya gi zvi wulako hi Mordhekayi. I wa hi hosana yi nga tira le ndlwini ya wuhosi ya Hosi Ahasuwerusi (Xerxesi wo Sangula) niku i wa wulawula tirimi timbiri hi wutsongwani ga kona. Mordhekayi i wa tolovela ku tshama laha nyangweni ya wuhosi le Xuxani. (Estere 2:19, 21; 3:3) A nyangwa leyo yi wa hi yindlu ya hombe nguvhu lomu a tihosana ta yindlu ya wuhosi ti nga tira kona.

Ha zvi wona lezvaku ku na ni zvilo zvo tala zvo fana xungetano hi Marduka, loyi a kumbukiwako lomu ka zvitabwana, na Mordhekayi, loyi a kumbukiwako lomu ka Bhibhiliya. Va hanyile ka cikhati caleci ca cin’we, ni ka wutshamu galegi ga gin’we va tlhela va tira kota tihosana ka wutshamu galegi ga gin’we. Zvontlhe lezvo zvi komba ku Marduka na Mordhekayi munhu yaloyi wa mun’we.

11-17 KA SETEMBRO

TITSHOMBA TI NGA KA MHAKA YA NUNGUNGULU | ESTERE 3-5

“Vhuna van’wani lezvaku va maha zvontlhe zvi nga ntan’wini wabye”

Perspicaz vhol. 2 paj. 412 par. 3

Mordhekayi

A ala ku khizamela Hamani. Hi kulandzela, Ahasuwerusi i no veka Hamani, a muAgagi, ka citshamu co tlakuka. I no laya ku vontlhe va nga hi nyangweni ya hosi va khizamela Hamani hi kota ya lezvi a nga ha hi ku vekiwa citshan’wini co tlakuka. Mordhekayi i no ala ku maha lezvo na aku a cigelo hi ku muJudha. (Est. 3:1-4) A kuva Mordhekayi a seketele a ciboho cakwe ka cigelo leco zvi wa yelana ni wunghana gakwe na Jehovha, kota muJudha a ti nyikeleko kakwe. I wa zvi tiva ku a ku khizamela Hamani zvi wa patsa zvo hundza ku ti hoxa lahasi mahlweni ka munhu kutani nchumu ci yimisilweko, a ku fana ni lezvi a vaizrayeli va nga mahile cikhatini ci nga hundza, na va alakanyela ku a nchumu leco kutani munhu loye i hosi. (2 Sam. 14:4; 18:28; 1 Tih. 1:16) Mhakeni ya Hamani ku wahi ni cigelo co zwala caku Mordhekayi a nga mu khizameli. Kuzvilava Hamani i wahi muAmaleki niku Jehovha i wa wulile ku i wa talwa ni Vaamaleki ‘ka zvizukulwana zva zvizukulwana.’ (Ekso. 17:16; wona HAMANI.) Ka Mordhekayi yi wahi mhaka ya ku tsumbeka ka Nungungulu na ku nga hi ya politika.

Perspicaz vhol. 2  paj. 412 par. 5

Mordhekayi

I tirisilwe kasi ku tlhatlhisa Izrayeli. Kota lezvi ku nga yimisilwe nayo wa ku ku fuvisiwa a vaJudha vontlhe mufun’weni, Mordhekayi i wa tsumba ku Estere i wa hlawulilwe kuva muzindza kasi a tlhatlhisa a vaJudha. I vhunile Estere a ku wona a wutihlamuleli go bindza a nga hi nago a tlhela a mu kuca ku a kombela a wuxinji ni civhuno ca hosi. Hambu lezvi lezvo zvi nga veka mhangweni a wutomi gakwe, Estere i no maha lezvo. — Est. 4:7–5:2.

Pimanyisa a kukholwa kabye paj. 133 par. 22-23

I yimelele a vanhu va Nungungulu

22 Kuzilava Estere i karatekile nguvu a xikhati lexi a ngazwa a mahungu ya Mordhekayi. Lezo zi wa hi xiringo xa hombe nguvu xa kukholwa. I wa chava, kota lezi zi kombiswako ka hlamulo lowu a wu tlhelisileko ka Mordekai. I lo alakanyisa Mordekai lezi a nayo wa hosi wu wulako. Loyi a ngaya ka hosi na a nga vitaniwangi i wa fanele ku dawa. Ntsena loku a hosi yi tlakusela a munhu loye a nhonga ya yona ya wuhosi ya nzalama. Xana Estere i wa rinzela ku mahelwa a wuxinji lego, nguvunguvu loku hi alakanya lezi zi humeleleko Vaxti a xikhati lexi a nga ala kuya ka hosi? Estere i lo byela Mordekai lezaku ku wa hunza a 30 wa masiku na a nga se vitaniwa hi hosi! Kota lezi ku nga hunza xikhati xo leha na a nga vitaniwi, Estere i wa ti wutisa ku kani a hosi yo kala yi nga ha mu ranzi ke. — Est. 4:9-11.

23 Mordekai i lo hlamula Estere hi kutiya kasi ku tiyisa a kukholwa kakwe. I lo mu tiyisekisa lezaku loku a nga mahi nchumu, a kuponiswa ka vaJuda ku wa tata hi ka ginwani wutshamu. Kanilezi xana yena i wa ta pona loku a nga mahi nchumu kasi ku tsanzekisa a xikungo xa valala vabye? Hi magezu lawa, Mordekai i kombisile lezaku i wa hi ni kukholwa ko tiya nguvu ka Jehova, a Nungungulu loyi a nga wa ta vikela a vanhu Vakwe lezaku va nga hihiritwi kasi a zitsumbiso zakwe zi tatiseka. (Jox. 23:14) Zonake Mordekai i lo wutisa Estere aku: “Kona zi tibyiwa himani a ku kutani u tile laha wukosini hi kota ya mhaka leyi ke?” (Est. 4:12-14) Xana a wu vumeli lezaku Mordekai xikombiso xi nene xa ku xi pimanyisa? I lo tsumba Jehova, a Nungungulu wakwe hi kumbhelela. Xana hinawu ha mu tsumba Jehova hi ndlela leyo? — Mav. 3:5, 6.

Kela titshomba ta moya

A Mufumo wa Nungungulu wa fuma! paj. 160 par. 14

Va lwela ku vumelelwa ku khozela hi kutlhatlheka

14 A ku fana na Estere na Mordekai va masikwini ya kale, a vanhu va Jehova inyamutlha va lwela a ku khozela Jehova hi kutlhatlheka kota lezi a layisileko zona. (Est. 4:13-16) Xana u nga maha xokari mhakeni leyi? Ina. Hi kukhanzakanya, u nga khongelela vamakabye va wena va xanisiwako hi mifumo yi yimisako milayo yi beletelako a ntiro wa hina. A mikhongelo leyo yi nga vuna nguvu a vamakabye va hina va nga zikaratweni lezo. (Gonza Jakobe 5:16.) Xana Jehova wa hlamula a mikhongelo leyo? A kuhlula ka hina tihubyeni ta wulamuli ku komba lezaku hakunene wa hlamula! — Maheb. 13:18, 19.

18-24 KA SETEMBRO

TITSHOMBA TI NGA KA MHAKA YA NUNGUNGULU | ESTERE 6-8

“Lezvi hi nga gondzako ka mawulela ya manene”

Pimanyisa a kukholwa kabye paj. 140 par. 15-16

I lo maha zilo hi wutlhari, hi kutiya, na a karatekela vanwani

15 Kota lezi Estere a nga kombisa lihlaza-mbilu, a rinzela siku ginwani kasi ku maha xikombelo xakwe ka hosi, Hamani i lo longisela a kuhlulwa kakwe ha yece. Niku, xana a hi Jehova a nga maha lezaku a hosi yi nga kumi wurongo? (Mav. 21:1) A zi hlamalisi lezi a Mhaka ya Nungungulu yi hi kucako a ku kombisa a “moya wa kurinzela”! (Gonza Mika 7:7.) Loku hi rinzela Nungungulu; hi ta wona lezaku i lulamisa a zikarato za hina hi ndlela ya yi nene nguvu ya ku cima hi wa nga ta yi alakanyela.

I lo wulawula hi kutiya

16 Estere a nga tiyangi ku ringa kambe a lihlaza-mbilu la hosi; mubuzweni wa wumbiri i wa fanele ku wula zontlhe. Kanilezi, i wa ta zi mahisa kuyini? A hosi yi lo tlhela yi mu wutisa a xikombelo xakwe. (Est. 7:2) A xikhati xa lezaku Estere a wulawula xi wa chikele makunu.

Pimanyisa a kukholwa kabye paj. 140 par. 17

I lo maha zilo hi wutlhari, hi kutiya, na a karatekela vanwani

17 Hi nga alakanyela Estere na a khongela ka Nungungulu lomu mbilwini mahlweni ka ku wula a magezu lawa: “Hosi, loku u xalala ha mina, ni loku u vumela, nzi kombela lezaku a wutomi ga mina gi nga lobyiswi, ni wutomi ga va ka hina.” (Est. 7:3) Wona lezaku i tiyisekisile hosi ku i wa kombisa xichawo hi malamulela ya yona. Hi nga wona lezi Estere a nga hambanisile zona na Vaxti, a kale ka sati wa hosi, loyi a nga kanyisa a nuna wakwe ha womu! (Est. 1:10-12) Tlhatakumbiri, Estere a nga solasolangi hosi hi lezi yi nga mahile wupumbu ga ku tsumba Hamani. Wutshanwini ga lezo, i lo khongotela hosi lezaku yi mu vikela kasi a nga dawi.

Pimanyisa a kukholwa kabye paj. 141 par. 18-19

I lo maha zilo hi wutlhari, hi kutiya, na a karatekela vanwani

18 Handle ko kanakana a xikombelo lexo xi hlamalisile hosi xi tlhela xi yi karata. Himani yaloye a nga wa ta xinyata a daya muzinza wakwe? Estere i lo engeta aku: “Mina ni va ka hina hi xabyisilwe, kasi kuva hi hihiritwa hi ku bhi. Kanilezi loku ku wa hi ku xaviselwa kuva hi maha tikhumbi, ngha nzi nga wuli nchumu, hambu lezi a nala a nga te ngha a tsanzekile ku ringanisa a kulahlekelwa ka hosi.” (Est. 7:4) Wona lezaku Estere i paluxile a xikarato xakwe hi kukongoma, a tlhela a wula lezaku loku ku wo khwatsi va xaviselwe kuva tikhumbi na a miyele nazo. Kanilezi, a kuhihiritwa loko ku wa ta khumba ni hosi kambe.

19 A xikombiso xa Estere xi hi gonzisa zotala xungetano hi mawulawulela ma kholwisako. Loku u tshuka u lava ku paluxa xikarato xo kari ka munhu u mu ranzako kutani ka murangeli wo kari, ngha uva ni lihlaza-mbilu, xichawo u tlhela u wulawula lisine. — Mav. 16:21, 23.

Kela titshomba ta moya

Sentinela 01/03/06 paj. 11 par. 1

Timhaka-tshinya ta bhuku ga Estere

7:4 — Hi ndlela muni a kuhihiritiwa ka vaJudha ku nga wa ta tisa “kulahlekelwa ka hosi”? Na a tlhamusela khwatsanyana a ku a vaJudha va nga tshuka va xavisiwa kota tikhumbi, Estere i tlhamusele hosi lezvi zvi wa nga ta wonheka hi ku lovisiwa ka vaJudha. A 10 000 wa titalenta ta prata leti Hamani a nga ti tsumbisile ti wa nga tava ni bhindzu ga hombe ka tshomba ya hosi loku ti fananisiwa ni tshomba leyi yi wa to kumeka loku Hamani i wa no maha makungo ya ku xavisa a vaJudha kota tikhumbi. A makungo lawo kambe, loku ma wo no tatiseka ma wa ta wula a ku luza muzindza.

25 KA SETEMBRO – 1 KA OUTUBRO

TITSHOMBA TI NGA KA MHAKA YA NUNGUNGULU | ESTERE 9–10

“I tirisile a ntamu wakwe kasi ku rangisa zvilaveko zva van’wani”

Perspicaz vhol. 2 paj. 412 par. 7

Mordhekayi

Mordhekayi i no vhaleta Hamani ka citshamu ca le hehla, a tlhela a amukela a phera ya ku chela zvifungo kasi a chela hi yona zvifungo ka maphepha ya wuhosi. Estere i no nyika Mordhekayi a wutihlamuleli ga muti lowu Hamani a nga nyikilwe hi hosi. Na a vhumelelwa hi hosi, Mordhekayi i no yimisa nayo wu nga nyika a vaJudha a lungelo ga kutilwela. Ka vaJudha leyo yi wahi ndlela ya ku va tlhatlhisiwa ni ya litsako. A votala ka mufumo wa vaPersiya va no ti patsa ni vaJudha, laha ku nga chikela dhiya 13 ka Adhare, ku nga siku legi a milayo yi nga sangula ku tira hi yona, a vaJudha va wa longile. A tihosana ti no va seketela hi kota ya lezvi Mordhekayi a nga hi citshan’wini co tlakuka. Le xuxani a yimpi yi no simama kala ka siku gi nga landzela. Niku a 75 000 wa valala va vaJudha ka mufumo wa Persia va no dawa, a ku patsa ni 10 wa vana va Hamani. (Est. 8:1–9:18) Na a vhumelelwa hi Estere, Mordhekayi i no laya lezvaku ku mahiwa a mubuzo wa lembe ni lembe wa masiku ya 14 ni 15 ka Adhare, ma nga masiku ya “Purime”, lawa va nga tsaka va tlhela va nyikana zvinyikiwo mun’we ni mun’wani ni ka zvisiwana. A vaJudha va no vhumelelana nawo va tlhela va wu yimisa ka zvizukulwana zvabye ni ka vontlhe va nga ti patsile navo. Kota munhu wa wumbiri wo tlakuka mufun’weni, Mordhekayi i wa kombisiwa cichavo hi vaJudha, a vanhu va ti nyikeleko ka Nungungulu, a tlhela a simama ku tira kasi va tshamiseka.— Est. 9:19-22, 27-32; 10:2, 3.

Perspicaz vhol. 2 paj. 760 par. 5

Purime

Kungo. Hambulezvi a vatlhamuseli vokari va wulako ku a mubuzo wa Purime lowu wa ha simamako wu mahiwa hi vaJudha va masikwini ya hina, a wu taleli ka wukhongeli niku ku mahiwa zvilo zvo hundzeleta ka wona, hi lisine, lezvo zvi wa nga maheki a cikhati wu nga yimisiwa ne ka mibuzo yo sangula. Mordhekayi na Estere ma wa hi malandza ya Nungungulu wa lisine Jehovha, niku a mubuzo lowu wu wa yimisilwe kasi wu mu nyika wudzundzo Jehovha. Hi nga wula ku a ku tlhatlhisiwa ka vaJudha ku wata hi ka Jehovha Nungungulu, hakuva zvi sukele laha Mardhekayi a nga tsumbeka a khozela Jehovha yece. Zvi wonekisa ku khwatsi Hamani i wa hi muAmaleki, a vanhu lava Jehovha a nga va rukatele a tlhela a va konela kuloviswa. Mordhekayi i wa hi ni cichavo hi nayo wa Nungungulu, hi cigelo leco a nga ala ku khizamela Hamani. (Est. 3:2, 5; Ekso. 17:14-16) Niku a magezu lawa Mordhekayi a nga byela Estere, (Est. 4:14) ma komba ku i wa rindzela ku vhuniwa hi Nungungulu kasi a zvi kota kutlhatlhisa vajudha, niku a kuva Estere yenawu a rangile hi ku hlambanya ku tshama a ngagi nchumu, na a nga seya maha cikombelo cakwe co sangula ka hosi, zvi komba ku i wa khongotela civhuno ca Nungungulu. — Est. 4:16.

Achegue-se a Jeová paj. 101-102 par. 12-13

“Mahani vapimanyisi va Nungungulu” laha mu tirisako a ntamu

12 Jehovha i nyikile a vawoneleli a wutihlamuleli ga ku rangela a bandla ga wukristu. (Mahebheru 13:17) A vamakabye lavo va ringanelwako va fanele ku tirisa a wutihlamuleli va nyikilweko hi Nungungulu kasi va nyika civhuno ci lavekako ni ku khatalela a ntlhambi. A ku hi kota ya wutihlamuleli legi a madhota ma nga nago zvi lava ku wula ku ma ni fanelo ya ku fumela a makholwa-kuloni? Ne ni kutsongwani! A vavanuna lavo va fanele kuva ni mawonela yo ringanisela ni kutikoramisa xungetano hi wutihlamuleli va nga nago bandleni. (1 Pedro 5:2, 3) A Bhibhiliya gi hi byela lezvi xungetano hi vawoneleli: ‘Risani a bandla ga Nungungulu legi a gi xavileko hi nkhata wa N’wana wakwe.’ (Mitiro 20:28) A magezu yo gumesa ya vhesi legi ma komba a cigelo ca lisima ci faneleko ku va maha va khoma mun’we ni mun’wani lomu ntlhambini hi wunene.

13 Kasi ku fananisa, hi nga ha zvi veka laha kaku a munghana wa wena wa hombe i ku kombela ku u hlayisa a nchumu ca lisima nguvhu ka yena. Niku wa zvi tiva ku a munghana wa wena i humesile a mali yo tala nguvhu kasi ku xava a nchumu lowo. A ku u wa nga ta wu hlayisa hi wukheta ga hombe nguvhu? Hi ndlela yo fana, Jehovha i nyikile a madhota a wutihlamuleli ga ku hlayisa nchumu wo hlawuleka nguvhu: a bandla gi nga ni vanhu va fananisiwako ni tiyivhu. (Johani 21:16, 17) A tiyivhu ta Jehovha ta lisima ka yena — ta lisima nguvhu laha kaku i zile a ti xava hi nkhata wa n’wana wakwe a pswalilweko yece, Jesu Kristu, wu nga ntsengo wa hombe nguvhu a nga wa ta ti xava hi wona. A madhota ya kutikoramisa a ma tshuki ma zvi rivala lezvo niku ma hlayisa a tiyivhu ta Jehovha hi ndlela ya yinene.

Kela titshomba ta moya

Sentinela 01/03/06 paj. 11 par. 4

Timhaka-tshinya ta bhuku ga Estere

9:10, 15, 16 — Hambu lezvi a nayo wu nga vhumelela ku a vaJudha va teka muphango ka valala, hikuyini va nga kala ku maha lezvo? A zvi kanakanisi ku va mahile lezvo hakuva a kungo gabye ku wa hi ku vhikela a wutomi gabye na ku nga hi ku ganya.

2-8 KA OUTUBRO

TITSHOMBA TI NGA KA MHAKA YA NUNGUNGULU JOBA 1-3

“Simama ku kombisa kueta ka lirandzo la wena hi Jehovha”

Murindzeli 02.18 paj. 6 par. 16-17

Pimanyisa a kukholwa ni kuingisa ka Nowa na Dhaniyeli na Joba

16 Zvikarato muni lezvi Joba a nga kumana nazvo? Joba i kumene ni kucica ka hombe wutomini gakwe. Kusanguleni, i wa hi munhu wo ganya. A vanhu vo tala va wa mu tiva va tlhela va mu komba cichavo ca hombe. (Joba 29:7-16) A Bhibhiliya gi li “i wa hi wa hombe ka vontlhe vanhu va le tikweni ga Mutsuwuka-gambo”. (Joba 1:3) Hambulezvo, Joba i wa nga ti woni na a hi chukwana ku hundza vanghana kutani ku ti byela ku Nungungulu a hi wa nchumu. Hi zvi tivisa kuyini? Hi ku Jehovha i mu wulile lezvaku i ‘nandza gakwe’ a tlhela aku munhu “a mbheleleko kululameni, loyi a chavako Nungungulu, a nyenya kubiha”. — Joba 1:8.

17 Kanilezvi, a zvilo zvi no cica hi kutsopeta ka tihlo. I luzile zvontlhe a nga hi nazvo, a mbhela ntamu laha ka kuza a navela kufa. Hina nyamutlha ha zvi tiva ku a zvikarato lezvo zvi wa vangiwa hi Sathani, na aku Joba i tirela Nungungulu hi ku lava makatekwa basi. (Gondza Joba 1:9, 10.) Ka Jehovha, leyo yi wa nga hi mhaka yo hlakana. Makunu, i wa ta maha yini kasi ku komba Sathani lezvaku muhembi? I tsikile Joba a kombisa kutsumbeka kakwe ka Nungungulu ni ku komba lezvaku i mu tirela hi ku mu randza.

Murindzeli 02.19 paj. 5 par. 10

Simama ku tsumbeka!

10 Xungetano hi kutsumbeka ka mun’we ni mun’wani wa hina, Sathani i wula zvalezvi a nga wula hi Joba. Maku wena ke, u nghenisa kuyini ka mhaka leyi? Hi lisine, Sathani i ngalo: Phela wena, Jehovha a wu mu randzi hi mbilu yontlhe; u ta nyima ku mu tirela loku u wona ku u lava kufa. A kutsumbeka loku u ku kombisako, wo farisa! (Joba 2:4, 5; Kuv. 12:10) U ti zwisa kuyini hi magezu lawa ya Sathani? Zva ku pandza mbilu, a hi zvo? Hambulezvo, tiva lezvi: Jehovha wa ku tsumba nguvhu laha ka kuza a ku nyika thomo ga ku Sathani a ringa kutsumbeka ka wena. A nga kanakani lezvaku u nga zvi kota ku simama u tsumbeka u tlhela u komba ku Sathani o hemba. Jehovha i tsumbisa ku i ta ku vhuna. (Mah. 13:6) I thomo ga hombe nguvhu a ku tsumbiwa hi Jehovha, a Hosi ya Hombe misaveni ni le tilweni! Makunu, wa zvi wona a ku hikuyini zvi nga zva lisima a ku u tsumbeka ke? A ku tsumbeka zvi hi vhuna ku kaneta mawunwa ya Sathani, hi basisa vito ga Papayi wa hina wa le tilweni, hi tlhela hi seketela a mafumela yakwe. Zvini hi nga mahako kasi hi simama hi tsumbeka?

Kela titshomba ta moya

Murindzeli 04.21 paj. 11 par. 9

Lezvi hi gondzako ka magezu yo gumesa ya Jesu

9 Lezvi Jesu a nga wula: Zvalezvi Jesu a nga lava kufa, i no tlakusa gezu, aku: “Nungungulu wa mina, Nungungulu wa mina, u ndzi tsikele yini?” (Mat. 27:46) A Bhibhiliya a gi wuli ku hikuyini a ngaza a wula magezu lawa. Hambulezvo, hi nga ehleketa hi lezvi hi gondzako ka magezu lawa. Ha zvi tiva ku hi magezu lawa, Jesu i wo tatisa lezvi zvi nga phrofetilwe ka Lisimu 22:1. Ahandle ka lezvo, zvi kombile lezvaku Jehovha i wa nga ‘mu vhikeli’ a N’wana wakwe. (Joba 1:10) Jesu i wa zvi zwisisa lezvaku a Papayi wakwe i wa tsikile valala vakwe kasi va mu ringa kala magumo — a ringiwa hi ndlela ya ku a ku na munhu a nga tshuka a ringiswa lezvo. A magezu lawa kambe ma komba ku i wa zvi tiva lezvaku o dayelwa tshoho, i wa nga wonhangi nchumu.

9-15 KA OUTUBRO

TITSHOMBA TI NGA KA MHAKA YA NUNGUNGULU JOBA 4-5

“Ti wonele ka mahungu ya hava”

Perspicaz vhol. 1 paj. 713 par. 2

Elifaze

2. Mun’we wa vanghana va vanharu va Joba. (Joba 2:11) Kota muTemane, zva koteka ku ngha na ku hi ku i wahi wa lixaka lo sangula, hi ndlela leyo, i wahi wa pswalo wa Abrahama, a tlhela ava ni wuxaka ga kuya hi ku lavetela, na Joba. Yena ni lava va hanyileko ndzhako kakwe va wa ti byela hi kota ya wutivi ga vona. (Jer. 49:7) Ka “vachaveleli” va vanharu va Joba, zvi wonekisa ku khwatsi Elifaze i wahi wa lisima niku hi yena a nga hi ni kucetelo ka lava van’wani, zvi kombako ku i wahi wa hombe hi tanga ka vontlhe. Hi yena wo ranga ku wulawula ka makhati wontlhe ya manharu niku i wulawulile zvo tala.

Murindzeli 15/09/05 paj. 26 par. 2

Potsa maalakanyo ya hava!

Na a alakanya zvilo zvo kala ku toloveleka zvi tshukileko zvi mu humelela, Elifaze i te: ‘Zvonake a moya wu lo hundza hi mahlweni ka mina, ni misisi ya mina yi lo yima. Wu lo yima, kanilezvi ndzi wa nga zvi koti ku pima ciyimo ca wona: A ciruti ci wa hi mahlweni ka mina, ku wa la su cuwe! Zvonake ndzi lozwa a gezu.’ (Joba 4:15, 16) I moya muni wu nga nghenile kupimeni ka Elifaze? A mawulawulela ya kusolasola ma nga ka magezu ma nga landzela ma komba lezvaku a moya lowo wu wa nga hi ngilozi yo tsumbeka ya Nungungulu. (Joba 4:17, 18) Ci wahi civangwa ca moya co biha. Loku yi wahi ngilozi ya yinene, hikuyini Jehovha a nga kawuka Elifaze ni vanghana vakwe va vambiri hi ku ngha na va wulawulile mawunwa? (Joba 42:7) Handle ko kanakana, Elifaze i wa nghenilwe hi dhimoni. A magezu yakwe ma wa komba ku i wa pimisa hi ndlela ya hava.

Murindzeli 15/02/10 paj. 19 par. 5-6

Potsa a kucetelo wa Sathani

Sathani I tirisile Elifaze, a mun’we wa vanghana va Joba va nga ya mu vhuxela, kasi a wula ku a vanhu a hi va nchumu. Na a va fananisa ni “lava va tshamako lomu tindlwini ta wumba,” i mu byelile lezvi Joba: ‘Lava a ciseketelo cabye ci nga laha tshurini, va hetiswa kukotisa ciwungwani. Va lobyiswa kusukela ni mixo kala gambyeni: va lova kala kupindzuka na va nga khatalelwi.’ — Joba 4:19, 20.

Ka cin’wani cipandze ca Mitsalo, ha fananisiwa ni “zvibya zva wumba” — a tifuko ta wukheta to mahiwa hi wumba (2 Kor. 4:7) A hi tiyangi hakuva hi pswalilwe ni ciwonho ni kungambheleli. (Rom. 5:12) Hina ha hoce a hi na ntamu wa kulwa na Sathani. Kanilezvi kota maKristu, a hi vhumali civhuno. Hambu lezvi hi nga ni gome, hi va lisima mahlweni ka Nungungulu. (Isa. 43:4) A ku tsika lezvo, Jehovha wa nyika moya wa ku basa ka lava va mu kombelako. (Luka 11:13) A moya wakwe wu nga hi nyika a “ntamu wa hombe wo hundza wa munhu”, wu nga hi vhunako ku lwisana ni cihi cikarato ci tako hi ka Sathani. (2 Kor. 4:7; Filp. 4:13) Loku hi kaneta Sathani, hi “tiya kukholweni” Nungungulu i ta hi tiyisa a tlhela a hi nyika ntamu. (1 Ped. 5:8-10) Hikwalaho, a hi fanelangi ku chava Sathani.

Mais Assuntos 32 par. 13-17

“Ti wonele ka mahungu ya hava”

● Hlola a mahungu ya kona ni lomu ma sukelako kona

Lezvi a Bhibhiliya gi wulako: “Hlolani a zvilo zvontlhe.” — 1 Va Le Tesalonika 5:21.

Na u nga se kholwa ka mahungu yokari kutani ku ma rumela ka van’wani, zama ku pola ku wona lisine ke, hambu loku ma dhumile ma tlhela ma haxiwa hi zvihaxa-mahungu zvotala. U ta zvi mahisa kuyini?

Hlola a kutsumbeka ka lomu a mahungu ma tako hi kona. A tikoponi ta ku bika mahungu ni tihlengeletano tin’wani ti nga cica a mahungu kasi ku seketela a mabhindzu ya tona kutani mawonela ya tona ya politika. Fananisa mahungu ya cihaxa-mahungu cokari ni ya zvin’wani. Ka zvikhati zvin’wani, hi ku tirisa a tiemail ni maredhe sociais a vanghana va nga hi rumelela a mahungu ya mawunwa na va nga zvi tivi. Hikwalaho, u nga tsumbi a mahungu yokari na u nga ku tivi lomu ma tako hi kona.

Tiyiseka lezvaku a mahungu ya kona a ma hundzelwangi niku lisine. Cuwuka a masiku ya wona ni zvontlhe lezvi zvi to komba ku a mahungu lawo lisine. Ti wonele nguvhu loku a mahungu yo bindza ma tlhamuselwa hi ndlela yo vevuka nguvhu, kutani loku a mahungu ma mahilwe hi ndlela ya ku lava ku tlhotlha a kutizwa ka vanhu.

Kela titshomba ta moya

Murindzeli 15/05/03 paj. 22 par. 5-6

Simama kutikarata kasi u ganya a mapalisana ya wutomi

A kuva cipandze ca hlengeletano ya misava yontlhe ya vakhozeli va lisine zvi nga hi maha hi tiya. Makatekwa ya hombe a kuva cikari ka wumakabye ga hina ga lirandzo, ga misava yontlhe. (1 Pedro 2:17) Niku hinawu hi nga tiyisa a makholwa-kuloni.

Wona lezvi a zvimaho zva wanuna wo lulama, Joba, zvi nga vhunisa zvona. Hambu a muchaveleli wa mawunwa Elifaze i kurumetekile ku wula ku: ‘A timhaka ta wena ti vhuxile lava va nga mbhelile ntamu, u tiyisetile madzolo ma rerekileko.’ (Joba 4:4) Hi nga mahisa kuyini ka mhaka leyi? Hi na ni wutihlamuleli ga ku vhuna a vamakabye va hina va moya ku va timisela ntirweni wa Nungungulu. Laha hi hanyisanako navo, hi fanele ku va khoma hi ndlela yi yelanako ni magezu lawa yaku: ‘Tiyisani a mandla ma rerekileko, mu tiyiseta a madzolo ma hohoveleko.’ (Isaya 35:3) Zvi ngo yini loku wo maha kungo ga ku tiyisa a muKristu mun’we kutani vambiri khati ni khati mu tlhanganako? (Mahebheru 10:24, 25) Hi lisine, a magezu ya manene ya kubonga ni kudzundza a kutikarata va ku mahako kasi va tsakisa Jehovha, ma nga va vhuna ku simama va tiyile kasi va ganya a mapalisana ya wutomi.

16-22 KA OUTUBRO

TITSHOMBA TI NGA KA MHAKA YA NUNGUNGULU JOBA 6-7

“Loku a wutomi gi bindza”

Sentinela 15/03/06 paj. 14 par. 10

Timhaka-tshinya ta bhuku ga Joba

7:1; 14:14 — Ma wula yini a magezu lawa yaku ‘cikhati ca kulwa’ kutani “ntiro wa cikurumeta” [NWT]? A kukarateka ka Joba ku wa hi ka hombe laha ka kuza a fananisa a wutomi ni cikhati ca kulwa kutani ntiro wa cikurumeta. (Joba 10:17) Hi ndlela yo fana, kota lezvi a cikhati leci a munhu a mbhetako loku ahi xeyole — ku nga cikhati ca kufa kakwe kala a vhuxiwa — ci nga cikhati caku zvo boha ku ci mbheta, Joba i fananisile a cikhati leco ni ntiro wa cikurumeta.

Murindzeli 12.20 paj. 16 par. 1

“Jehovha wa tiyisa lava va mbhelileko ntamu”

KA ZVIKHATI zvin’wani ha tshuka hi nyima hi ku tse, hi alakanyela lezvi a wutomi ga hina gi nga komisa zvona ni lezvi gi nga talisa zvona “hi zvikarato”. (Joba 14:1) Hikwalaho, zva zwisiseka loku hi tshuka hi mbhela ntamu. Ku ni malandza yo tala ya Jehovha ya cikhatini ci nga hundza ma ti zwisileko lezvo. A vokari va zile va navela ni kufa. (1 Tih. 19:2-4; Joba 3:1-3, 11; 7:15, 16) Kanilezvi Jehovha — a Nungungulu loyi va nga kari va mu tsumba — i va chavelele a tlhela a va tiyisa hi kuphindaphinda. A matimu yabye ma tsalelwe ku hi chavelela ni ku hi tiyisa. — Rom. 15:4.

Despertai! 01.12 paj. 16-17

Wa tshuka u bindzelwa hi wutomi u navela kufa ke?

Kuzvilava u alakanya ku a ku na ndlela ya ku hlula a cikarato ca wena, kanilezvi tiva ku a hi wena wece, a vanhu vontlhe va kumana ni cikarato co kari. A Bhibhiliya gi: “a zvivangwa zvontlhe zva ha keta ni ku xaniseka”. (Va Le Roma 8:22) Lisine ku u nga tshuka u nga yi woni a ndlela ya ku lulamisa a cikarato ca wena kwalaho ni kwalaho, kanilezvi a zvilo zvi tolovela ku chukwata hi ku famba ka cikhati. Na wa ha rindzela ku lezvo zvi maheka cini ci nga ku vhunako?

Phofula a kutizwa ka wena ka munghana wo tsumbeka ni wo buvha. A Bhibhiliya gi wula lezvi: ‘A lirandzo la munghana la su tsoma contlhe cikhati, Ni nakulobye i pswalelwe ku vhunetela kuxanisekeni.’ (Mavingu 17:17) Lomu ka Bhibhiliya, a wanuna wa ku lulama Joba i tlhamuselwa na a ti tlhatlha ka van’wani ndzeni ka zvikhati zvakwe zva zvikarato. A cikhati leci a nga ku: “A muhefemulo wa mina wu karele hi kuhanya”; i tlhelile aku “Ndzi ta nyika cikhati ka kutsanwa ka mina, Ndzi ta wulawula hi kubayiseka ka muhefemulo wa mina.” (Joba 10:1) A ku bhulela van’wani lezvi u ti zwisako zvona, zvi nga hungula a ku karateka ka wena zvi tlhela zvi ku vhuna ku wona a zvikarato hi ndlela yin’wani.

Mu tlhatlhele cifuva Nungungulu hi mukhongelo. A vokari va alakanya ku a mabhindzu ya mukhongelo zvilo zva lomu hlokweni, hambulezvo a Bhibhiliya gi wula zvo hambana. Lisimu 65:2 i wula lezvaku Jehovha Nungungulu hi ‘loyi a zwako mikhongelo,’ niku 1 Pedro 5:7 i wula ku Jehovha wa ku “khatalela.” A Bhibhiliya hi kuphindaphinda gi khanyisa a lisima la ku tsumba Nungungulu. Hi cikombiso:

“Tsumba Jehovha hi mbilu ya wena yontlhe, u nga tsumbi kupimisisa ka wena wutsumbu. U ta mu ingisa tindleleni tontlhe ta wena, yena i ta lulamisa a tisoko ta wena.” — MAVINGU 3:5, 6.

“Lava va mu chavako va nyikwa lezvi va zvi randzako, I tazwa kurila kabye, a va ponisa.”— LISIMU 145:19.

“A kutsumba loku hi nga nako mahlweni kakwe hi loku ka ku i ta hizwa loku hi kombela ni wihi nchumu wu yelanako ni kurandza kakwe.”— 1 JOHANI 5:14.

‘Jehovha i le kule ni va kubiha; kanilezvi wazwa mikombelo ya valulamileko.’ — MAVINGU 15:29.

Loku wo byela Nungungulu a zvikarato u kumanako nazvo, i ta ku vhuna. A hi halahala a Bhibhiliya gi hi kucako ku “tsumbani yena masiku wontlhe; chululani timbilu ta n’wina mahlweni kakwe.” — Lisimu 62:8.

Kela titshomba ta moya

Murindzeli 04.20 paj. 16 par. 10

A hi kombiseni kukhatala ni zwela wusiwana

10 Hi nga pimanyisa Jehovha hi ku zama a kuzwisisa vamakabye va hina. Va tive khwatsi vamakabye va wena. Bhula navo mahlweni ni ndzhako ka mitlhangano, tira navo kuchumayeleni niku loku zvi koteka va rambe lezvaku u taga navo zvakuga. Loku u maha lezvo, kuzvilava u nga pola lezvaku a makabye wa cisati loyi a wonekisako ku khwatsi a nga na cinghana ova ni tingana, a makabye wa cinuna loyi u alakanyako lezvaku i randza titshomba i randza ku amukela vapfhumba, kutani ku a mupswali loyi contlhe cikhati a celwako mitlhanganweni ni vana vakwe va yimisana ni kuvhukelwa le kaya. (Joba 6:29) Lisine ku a hi faneli ku “nghenela zva vambe”. (1 Tim. 5:13) Hambulezvo, zvi nene a ku tiva zvokari hi vamakabye va hina ni lezvi va kumanako nazvo wutomini.

23-29 KA OUTUBRO

TITSHOMBA TI NGA KA MHAKA YA NUNGUNGULU | JOBA 8-10

“A lirandzo li nga mbheliko la Nungungulu li hi vhikela mawunwa ya Sathani”

Murindzeli 01/07/15 paj. 12 par. 3

Hi nga zvi kota ku mu tsakisa Nungungulu futsi?

Joba i kumene ni tixanisa to tala ti nga woneka na ti nga lulamangi. I no telwa hi maalakanyo ya hava, hi ku chikelela magumo ya ku Nungungulu a nga na mhaka ni lezvaku Joba wa simama a kholwa Kakwe kutani a nga simami. (Joba 9:20-22) Joba i wa tiyiseka nguvhu hi kululama kakwe laha ka kuza a van’wani va zvi zwisa ku khwatsi hi loku a ti byela lezvaku i wa lulamile ku hundza Nungungulu. — Joba 32:1, 2; 35:1, 2.

Murindzeli 11.21 paj. 6 par 14

U vhunekisa kuyini hi lirandzo li nga mbheliko la Jehovha?

14 A lirandzo li nga mbheliko la Jehovha la hi vhikela hi tlhelo ga moya. Dhavhidha i khongele ka Jehovha, aku: ‘Wena u wuchavelo ga mina, wa ndzi londzowota zvikaratweni; u ta ndzi randzela hi tisimu ta kuponisiwa. . . . Loyi a tsumbako Jehovha i ta mahelwa wuxinji.’ (Lis. 32:7, 10) Zvikhatini zva kutsaliwa ka Bhibhiliya, va wa aka mimuro yi randzela dhoropa kasi ku vhikela vanhu lezvaku va nga dhumelwi hi valala. A lirandzo li nga mbheliko la Jehovha li nga fana ni muro wu hi vhikelako ni ka cihi ci nga wa ta wonha a wunghana ga hina naye. Ahandle ka lezvo, a lirandzo li nga mbheliko la Jehovha li mu kuca ku a maha wunghana na hina. — Jer. 31:3.

Kela titshomba ta moya

Sentinela 15/10/10 paj. 6-7 par. 19-20

“Himani a ku tivileko a kupima ka Jehovha?”

19 Zvini hi nga gondzako xungetano hi “kupima ka Jehovha”? Hi fanele ku vhumela ku a mhaka ya Nungungulu yi rangela lezvi hi zvi zwisisako hi kupima ka Nungungulu. A hi faneli ku lamula Jehovha hi kuya hi maalakanyo ya hina yo kala ku mbhelela. Joba i te: “[Nungungulu] a hi munhu wo kota mina, wa kuva ndzi nga angulanako naye; ni ku yisana naye hubyeni.” (Joba 9:32) A ku fana na Joba, laha hi zwisisako a kupima ka Jehovha a hi faneli ku tsika ku hlamala hiku: ‘Languta, leci hi cipandze ca mitiro yakwe ntsena, hi zwile cipandze citsongwani ca nduma yakwe ntsena, kanilezvi himani a nga pimako a kudzindza ka ntamu wakwe ke?’ — Joba 26:14.

20 A cikhati hi lerako Mitsalo, zvini hi nga mahako loku hi tshuka hi kumana ni vhesi go kari go karata ku gi zwisisa, nguvhunguvhu loku gi yelana ni ndlela leyi Jehovha a pimisako hi yona? Loku hi hlolile a mhaka hi gumesa hi nga kumi hlamulo wo dlunyateka, hi nga wona lezvo kota ciringo ca kutsumbeka ka hina ka Jehovha. Ka zvikhati zvin’wani, a magezu yokari ma hi nyika lungelo ga ku kombisa a kukholwa ka hina ka matshamela ya Jehovha. A hi vhumeleni hi kutikoramisa lezvaku a hi zvi zwisisi zvontlhe lezvi a mahako. (Mutsh. 11:5) Hi ta kuceka ku vhumela a magezu ya mupostoli Pawule yaku: “Hi nga wona a kutala ka makatekwa, ni kueta ka wutlhari ni wutivi ga Nungungulu! A kulamula kakwe ku etile nguvhu, ni tindlela takwe a ti na ku tiviwa hi munhu! Hakuva “himani a ma tivako a maalakanyo ya Jehovha? Kona himani a tshukileko a mu nyika wusungukati ke?” “Himani a rangileko a mu nyika nchumu kasi Yena a fela ku mu tlhelisela ke?” Hakuva a zvilo zvontlhe zvita hi ka yena, zvi mahilwe hi yena na zvi mahelwa yena. A wudzundzo a give ka yena kala kupindzuka. Amen.”— Rom. 11:33-36.

30 KA OUTUBRO–5 KA NOVEMBRO

TITSHOMBA TI NGA KA MHAKA YA NUNGUNGULU | JOBA 11-12

“Tindlela tinharu ta ku kuma wutlhari ni ku vhuneka hi gona”

Sentinela 15/04/09 paj. 6 par. 17

Joba i gi nyikile wudzundzo a vito ga Jehovha

17 Zvini zvi vhunileko Joba a ku simama a tsumbekile? Handle ko kanakana, na a nga se kumana ni zvikarato, Joba i wa sina ahi ni wunghana ga laha kusuhani na Jehovha. Hambulezvi ku kalako ku nga hi na cikombiso caku Joba i wa zvi tiva ku Sathani i wa phikizile Jehovha, Joba i wa ti yimisele ku simama a tsumbekile. Joba i wulile lezvi: ‘Kala ndzifa ndzi ta ti wula loyi a nga hiko na nandzu.’ (Joba 27:5) Joba i zvi kotisile kuyini ku wumba a wunghana go tiya na Jehovha? A zvi kanakanisi a ku Joba i wa zvi nyika nguvhu a lisima lezvi a nga zvi zwile xungetano hi lezvi Nungungulu a nga tirisanisa zvona na Abrahama na Isaka na Jakobe, a maxaka yakwe ya le kule. Niku hi ku cuwukisela a zvivangwa, zvi wa koteka ku Joba a tiva a matshamela yo tala ya Jehovha. — Lera Joba 12:7-9, 13, 16.

Murindzeli 06.21 paj. 10 par. 10-12

A wu wece — contlhe cikhati Jehovha i na wena

10 Chata wunghana ni maKristu yo tsumbeka. Hlota vanghana lomu bandleni lava u nga gondzako ka vona, hambu lava mu hambeneko hi tanga ni mudhawuko. A Bhibhiliya gi hi alakanyisa lezvaku “a vakale va na ni wutlhari”. (Joba 12:12) Hambu lava vahombe va nga gondza zvotala ka vaswa vo tsumbeka. Hambu lezvi Dhavhidha a nga hi n’wanana ka Jonatani, vave vanghana va hombe. (1 Sam. 18:1) Dhavhidha na Jonatani va vhunene ku tirela Jehovha hambu lezvi va nga lwisana ni zvikarato. (1 Sam. 23:16-18) A makabye wo kari wa ku hi Irina, loyi a nga yece Kustumunyu laha kaya kabye, i wula lezvi: “A vamakabye laha bandleni va ngava vapapayi ni vamakabye va hina. Jehovha a nga va tirisa kasi ku hi vhuna loku zvi laveka.”

11 A ku chata vanghana vaswa zvi nga tshuka zvi karata, nguvhunguvhu loku u hi munhu wa tingana. Rita, a nga munhu wa tingana a gondzileko lisine hambu lezvi a nga vhukelwa, i tlhamusela lezvi: “Zvi lavile ku ndzi ti karata kasi ndzi vhumela ku zvi lava ku ndzi vhuniwa futsi hi vamakabye laha bandleni.” Zvi nga tshuka zvi ku karatela ku bhulela wokari lezvi u ti zwisako zvona. Kanilezvi, a ku ti karata u ti tlhatlha cifuva ka makabye wo kari, i zambo ga lisima kasi ku chata wunghana go tiya. A vamakabye va zvi lava ku ku tiyisa ni ku ku vhuna, kanilezvi zvi lava ku va tiva zvikarato u lwisanako nazvo hi kona va to tiva ndlela ya ku ku vhuna.

12 A yin’we ya tindlela ta ti nene ta ku chata wunghana ku chumayela ni vamakabye van’wani. Katarina, hi mu kumbukileko, i wula lezvi: “Ndzi kumile vanghana vo tala va va nene hi ku mbheta cikhati na ndzi chumayela ni vamakabye ni ku maha mitiro yin’wani ya moya. Ka malembe wontlhe lawa, Jehovha i kari a ndzi vhuna hi ku tirisa vamakabye lava.” Hakunene, zva vhuna nguvhu a ku ti karatela ku chata wunghana ni maKristu yo tsumbeka. Jehovha i tirisa vanghana lavo kasi ku ku vhuna kulwa ni kutizwa ka hava, ko kota ciwundza. — Mav. 17:17.

Perspicaz vhol. 2 paj. 886 par. 4

Wutlhari

Wutlhari ga le hehla. A wutlhari go mbelela gi na na Jehovha ku nga “Nungungulu loyi a nga yena yece a tlharihileko”. (Rom. 16:27; Kuv. 7:12) A wutivi gi yelana ni ku tiva a lisine la zvilo, niku kota lezvi Jehovha muvangi a nga kona “kusukela kupindzukeni kala kupindzuka” (Lis. 90:1, 2), yena wa zvi tiva zvontlhe lezvi zvi faneleko ku tiviwa xungetano hi wuako, matshamela ya gona, matimu ya gona ya kale ni ya zvezvi. A vanhu na va nga zvi koti ku vanga zvilo kutani ku maha mikambisiso loku va wa nga ti seketeli ka maciclo ni milayo ya ntumbuluko, zvi nga zvilo zvi vangilweko hi Jehovha. (Joba 38:34-38; Lis. 104:24; Mav. 3:19; Jer. 10:12, 13) Zva zwisiseka lezvi a milayo yakwe ya mahanyela yi vhunako nguvhu kasi a munhu a tshamiseka, ava ni kupima kunene a tlhela a humelela. (Dhewu. 32:4-6 wona JEHOVHA [A Nungungulu wa milayo ya mahanyela].) A ci kona ci hundzako kuzwisisa kakwe. (Isa. 40:13, 14) Hambulezvi a vhumelelako ku a zvilo zvi nga yelaniko ni milayo yakwe yo lulama zvi humelela kuzvilava zvi vhuvhuma hi cikhati cokari, a wumandziko gi lumba yena niku gi ta yelana ni kurandza kakwe, niku a mhaka yakwe yi ta ‘hetisa lezvi a yi rumeleko zvona.’ — Isa. 55:8-11; 46:9-11.

Kela titshomba ta moya

Sentinela 01/08/08 paj. 11 par. 5

Kubhulisana ni vaswa

▪ ‘Ndza zvi kota ku zwisisa a mongo wu nga ka magezu ya kona?’ Joba 12:11 i ngalo: “Kasi a ndleve a yi hloli magezu, kota lezvi a lirimi li ringako zvakuga ke?” Zvezvi u fanele ku ti karata nguvhu u ‘hlola’ lezvi a n’wana wa wena a wulako. A vaswa va tolovela ku wula zvilo zvo hundzeleta. Hi cikombiso, a n’wana wa wena kuzvilava a ngaku: “Wena contlhe cikhati u randza ku ndzi maha n’wanana!” kutani ku “wena a wu tshuki u ndzi ingisela!”. Wutshan’wini ga ku veka kupima ka magezu “contlhe cikhati” ni “a wu tshuki”, tiva lezvaku a hi zvona a n’wana wa wena a lavako ku wula hakunene. Hi cikombiso, a magezu “Wena contlhe cikhati u randza ku ndzi maha n’wanana” ma nga wula ku “Ndzi zvi wonisa ku khwatsi wena a wu ndzi tsumbi,” niku lawa yaku “wena a wu tshuki u ndzi ingisela!” ma nga wula ku “leci ndzi ci lavako ku ku byela lezvi ndzi ti zwisako zvona basi.” Zama ku zwisisa a mongo wu nga ka magezu ya kona.

    Mabhuku ya ciTshwa (2000-2025)
    Huma
    Nghena
    • ciTshwa
    • Rumela
    • Ti hlawulele
    • Copyright © 2025 Watch Tower Bible and Tract Society of Pennsylvania
    • Nayo wa matirisela
    • Nayo wa cihundla
    • Privacy Settings
    • JW.ORG
    • Nghena
    Rumela