Timhaka ta mabhuku ma tako ka Cibhukwana ca Mutlhangano
© 2023 Watch Tower Bible and Tract Society of Pennsylvania
4-10 KA MARÇO
TITSHOMBA TI NGA KA MHAKA YA NUNGUNGULU | TISIMU 16-17
Jehovha, a Cibuka ca mina ca wunene
Murindzeli 12.18 paj. 23 par. 11
Vaswa, phela mu nga hanya wutomi go nandziha nguvhu!
HLAWULA VANGHANA VA VA NENE
11 Lera Lisimu 16:3. Dhavhidha i wa yi tiva ndlela ya ku kuma vanghana va va nene. I wa hlawula lava va nga randza Jehovha niku lezvo zvi mu ‘xalalisile’ nguvhu. I wulawulile hi vanghana vakwe kota lava ‘va basileko’, hakuva va wa zama ku hanya hi milayo ya Jehovha. A mutsali mun’wani wa tisimu i ti zwisile zvezvo mhakeni ya ku hlawula vanghana, a se tsala lezvi: ‘Ndzi [munghana wa] vontlhe lava va ku chavako, ni lava va hlayisako zvileletelo zva wena.’ (Lisimu 119:63) Kota lezvi hi wulawulileko hi zvona ka ndzima yi hundzileko, wenawu u nga kuma vanghana vo tala va va nene cikari ka lava va randzako Jehovha ni ku mu ingisa. Hi lisine, a zvizi zvi lava ku a vanghana lavo vava va tanga ya wena.
Murindzeli 15/02/14 paj. 29 par. 4
“Wona a kusaseka ka Jehovha”
Dhavhidha i lo yimbelela aku: ‘Jehovha hi ciavelo ca mina ni gombe ga mina; hi wena u gongolako a tshomba ya mina. Ndzi pandzelwe ciavelo matshan’wini ma ndzi tsakisako.’ (Lis. 16:5, 6) Dhavhidha i wa bonga ‘ciavelo’ cakwe, ku nga kuzwanana ku nene na Jehovha ni lungelo ga ku mu tirela. A ku fana na Dhavhidha, hi nga tshuka hi kumana ni zvikarato, kanilezvi hi na ni makatekwa yo tala ya moya! Hikwalaho, ngha hiya mahlweni hi kuma litsako wukhozelini ga lisine, hi tlhela hi tsakiswa hi tempeli ya Jehovha ya moya contlhe cikhati.
Sentinela 15/02/08 paj. 3 par. 2-3
Veka Jehovha mahlweni ka wena contlhe cikhati
2 Hontlheni hi nga gondza zvotala ka matimu ya vanhu va tivekako nguvhu va kumbukiwako lomu ka Bhibhiliya — Abrahama, Sara, Mosi, Rute, Estere, Dhavhidha, mupostoli Pawule, ni van’wani. Hambulezvo, a matimu ya vanhu va kalako va nga tiveki nguvhu wonawu ma nga hi vhuna. A ku ehleketa hi matimu ya vanhu va kumbukiwako lomu ka Bhibhiliya zvi nga hi vhuna a ku hanya hi ku yelana ni magezu ya mutsali wa tisimu, yaku: ‘Ndzi na na Jehovha mahlweni ka mina contlhe cikhati; cima ndzi nga ta tsekatsekiswa hakuva i le reveni ga mina ga cinene.’ (Lis. 16:8) Hi ma zwisisa hi ndlela muni a magezu lawa?
3 Hi tolovelo a musochwa i wa tirisa a tlhari hi woko gakwe ga cinene, lezvi zvi nga maha ku a tlhelo lego gi nga vhikelwe hi citlhangu leci a nga khomile hi woko ga cibaba. Hambulezvo, i tizwa a vhikelekile loku a munghana wakwe alwa laha kusuhani kakwe hi tlhelo ga cinene. Loku hi ehleketa hi Jehovha hi tlhela hi maha kurandza kakwe, i ta hi vhikela. A hi woneni lezvi a ku gondza matimu ya Bhibhiliya zvi nga tiyisisako zvona a kukholwa ka hina kasi hi ‘veka Jehovha mahlweni ka [hina] contlhe cikhati’. — Byington.
Titshomba ta moya
Perspicaz vhol. 2 paj. 350
Ndzololwani ya tihlo
A gezu ga ciHebheru gaku ʼi·shohnʹ (Deu. 32:10), loku gi tirisiwa zvin’we ni ʽaʹyin (tihlo), hi ku kongoma gi wula ku “cifanyana ca tihlo”; hi kufanana, ka Mikosi 2:18 ku tirisiwa a gezu bath (nhanyana) na zvi nyika a mongo wa “nhanyana wa tihlo”, hi wumbiri ga zvona na zvi wula ku ndzololwani ya tihlo. A magezu lawa ya mambiri ma patsiwa kasi ku khanyisa Lisimu 17:8 (ʼi·shohnʹ bath-ʽaʹyin), hi ku kongoma na ma wula “cifanyana ca tihlo, nhanyana wa tihlo”, ni (“ndzololwani ya tihlo”). Zvi wonekisa ku khwatsi lezvo zvi wula cifananiso ca citsongwani ca hina leci hi ci wonako ka cipandze ca tihlo ga mun’wani.
A tihlo gi olovile nguvhu niku gi na ni wukheta, hambu a siyi yin’we ya yitsongwani kutani citoti loku ci nghena lomu ka tihlo hi tekela ku zvi pola. A cipandze leci ca ku wonekela (a córnea) ci fenengetako a ndzololwani ya tihlo ci fanele ku vhikelwa ni ku hlayisiwa, hakuva loku a cipandze leco ci bayisiwa kutani ci phuma hi kota ya wubabyi go kari, zvi nga maha ku a tihlo gi nga ha woni khwatsi kutani gifa. A Bhibhiliya gi tirisa hi ntamu zvin’we ni wukheta a magezu ‘ndzololo ya tihlo’ loku gi wulawula hi nchumu wu lavako ku vhikelwa nguvhu. A nayo wa Nungungulu wu fanele ku khomisiwa lezvo. (Mav. 7:2) Na gi wulawula hi kukhatala ka Nungungulu kota Papayi ka vaIzrayeli a bhuku ga Deuteronome 32:10, gi wula lezvaku i wa hlayisa khwatsi a tiko legi kota ‘ndzololo ya tihlo gakwe’. Dhavhidha i khongele na a kombela ku vhikelwa ni ku khatalelwa hi Nungungulu ku khwatsi i “ndzololo ya tihlo”. (Lis. 17:8) I wa lava ku Jehovha a maha co kari hi kuhatlisa loku a vhukelwa hi valala. (Fananisa na Zak. 2:8; laha ku tirisiwako a gezu ga ciHebheru gaku ba·vathʹ ʽaʹyin.) — Wona OLHO.
11-17 KA MARÇO
TITSHOMBA TI NGA KA MHAKA YA NUNGUNGULU | Lisimu 18
‘Jehovha . . . muponisi wa mina!’
Sentinela 01/05/09 paj. 14 par. 4-5
Magezu yo fananisa ya lomu ka Bhibhiliya— Wa ma zwisisa ke?
A Bhibhiliya ga fananisa Jehovha kambe ni zvilo zvi nga hanyiko. Yena i tlhamuselwa kota ‘Ribye ga ka Izrayeli’, “ribye” ni “khokhola” (2 Samuweli 23:3; Lisimu 18:2; Deuteronome 32:4) Hi kwihi kuyelana ku nga kona? A ku khwatsi hi lezvi a ribye ga hombe gi tiyileko gi tlhela gi nga tsekatseki, Jehovha Nungungulu a ngava Cibuka co tiya ca wuvhikeli ga wena.
5 A bhuku ga Tisimu, gi tele hi magezu yo fananisa ma tlhamuselako hi matlhelo yo hambanahambana a matshamela ya Jehovha. Hi cikombiso, a bhuku ga Lisimu 84:11 gi wula ku Jehovha ‘i gambo ni citlhangu’ hakuva yena Cibuka ca kuwonekela, wutomi, ntamu ni ca kuvhikela. Hi tlhelo gin’wani, Lisimu 121:5 i wula ku ‘Jehovha hi ndzhuti wa wena reveni ga wena ga cinene.’ A ku khwatsi hi lezvi a ndzhuti wu vhikelako ka kuhisa ka gambo, Jehovha a nga vhikela a malandza yakwe ka kuhisa ka mhango, hi ku va nyika ndzhuti kutani ku va vhikela hasi ka “canja” gakwe kutani ka “tipapa” takwe.— Isaya 51:16; Lisimu 17:8; 36:7.
Perspicaz vhol. 2 paj. 1219 par. 5
Gezu
Nungungulu wazwa a gezu ga malandza yakwe. Lava va khozelako Nungungulu hi moya ni lisine, va nga vitana Nungungulu na va tiyiseka lezvaku wazwa a gezu gabye, na ku nga khataliseki a lirimi leli va mu vitanako hi lona. A ku hundza lezvo, hambu loku ku nga tirisiwi a gezu go kongoma, ku mahiwa cikombelo ca lomu mbilwini ka Nungungulu, Yena, loyi a tivako timbilu ta vanhu, wa ‘zvizwa’ kutani ku chela kota. (Lis. 66:19; 86:6; 116:1; 1 Sam. 1:13; Neh. 2:4) Nungungulu wazwa a kukarateka ka lava va rilako kakwe va lava civhuno, niku a tlhela azwa a gezu ni ku tiva a makungo ya vanhu lava va mu vhukelako ni cikungo cabye ca ku lava ku ma mahela zvilo zva ku biha a malandza yakwe. — Gen. 21:17; Lis. 55:18, 19; 69:33; 94:9-11; Jer. 23:25.
Murindzeli 04.22 paj. 3 par. 1
Zvini u nga mahako kasi u lwisana ni kukarateka?
2. Ehleketa. Loku u cuwuka ndzhako wutomini ga wena, ku ni cikarato u ci hlulileko ntsena hi ku vhuniwa hi Jehovha? A cikhati leci hi ehleketako hi lezvi Jehovha a hi vhunisako zvona ni lezvi a vhunisileko zvona a malandza yakwe cikhatini ci hundzileko, zva hi tiyisa zvi tlhela zvi maha ku hi mu tsumba nguvhu. (Lis. 18:17-19) A dhota go kari gaku hi Joshua, gi te: “Ndzi na ni lista ya mihlamulo ya mikhongelo ya mina. Lezvo zvi ndzi vhuna ku ndzi alakanya a makhati lawa ndzi kombelileko a nchumu wo kari wo kongoma ka Jehovha a tlhela a ndzi nyika walowo futsi.” Ina, a cikhati leci hi ehleketako hi lezvi Jehovha a hi vhunisako zvona zvi hi nyika ntamu wa ku lwisana ni kukarateka.
Titshomba ta moya
Perspicaz vhol. 2 paj. 768 par. 3
Kerubhima
A makerubhima lawo ma wa nga hi zvifananiso zva cihlekiso, zvo fana ni zvifananiso zvo chavisa lezvi zvi nga khozelwa hi matiko ya wudheni lawa va nga gamekene nawo, kota lezvi a vanwani va wulako. Hi kuya hi wustumunyu go hambanahambana, hambulezvo na gi zwana, ga mukhuwu wa kale wa ciJudha, (a Bhibhiliya a gi wuli nchumu hi mhaka leyi), a makerubhima lawo ma wa tshamisile ku khwatsi vanhu. Zvi wa hi zvikhelekedhani zvo saseka zvi nga yimela a zvivangwa zva moya zvo ngangamela ni zvo saseka, niku lezvi zvi nga tshamisile zvona zvi wa mahilwe hi kuya hi “mufananiso lowu” Mosi a nga nyikilwe hi Jehovha wutsumbu. (Ekso. 25:9) Mupostoli Pawule i zvi tlhamusela kota “makerubhima yo ngangamela ma nga sirela a tapa ya nghaxa”. (Mah. 9:5) A makerubhima lawo ma wa yelana ni kuva kona ka Jehovha, ‘ndzi ta ti wonekisa ka wena kwalomo hi le citshan’wini ca wuxinji, cikari ka makerubhima lawa ma nga hehla ka nghaxa ya civhumelwano’. (Ekso. 25:22; Mitse. 7:89) Hikwalaho, ku wa wuliwa ku Jehovha i wa ‘tshama cikari ka makerubhima’. (1 Sam. 4:4; 2 Sam. 6:2; 2 Tih. 19:15; 1 Kro. 13:6; Lis. 80:1; 99:1; Isa. 37:16) Hi ndlela yo fananisa a makerubhima ma wa tira kota ‘cikombiso ca kareta’ ya Jehovha, leyi a nga famba hi yona (1 Kro. 28:18), niku a tipapa ta makerubhima ti wa tirela ku vhikela ni ku hatlisisa liyendzo. Hikwalaho, Dhavhidha, ka lisimu lo kari i tlhamusele lezvi Jehovha a nga hatlisisa zvona kuta a ta mu vhuna, a ku ‘i no khilela hehla ka kerubhima a puruma’ hambu hi “tipapeni ta moya.” — 2 Sam. 22:11; Lis. 18:10.
18-24 KA MARÇO
TITSHOMBA TI NGA KA MHAKA YA NUNGUNGULU | TISIMU 19-21
“A matilo ma kanela a kungangamela ka Nungungulu”
Sentinela 01/01/04 paj. 8 par. 1-2
Ngha zvontlhe zvi kanela a kungangamela ka Jehovha
DHAVHIDHA, a n’wana wa Jese, i kulile kota murisi kusuhani ni Bhetlehema. A hi kutala ka makhati lawa kuzvilava a cuwukileko matilo ya hombe ma teleko hi tinyeleti ni wusiku, na a khatalela mitlhambi ya papayi wakwe ka wuriselo lego ga tiyivhu ga ciwula! A zvi kanakanisi lezvaku a zvihlamaliso lezvo zvo hanya zvi tile maalakanyweni yakwe, a cikhati leci hi ku pimiselwa hi moya wo basa wa Nungungulu, a tsalileko a tlhela a yimbelela a magezu yo saseka ma nga ka Lisimu 19, yaku: ‘A matilo ma kanela a kungangamela ka Nungungulu; ni ndengelenge yi kombisa a ntiro wa mandla yakwe. A mhaka ya zvona yi humele misaveni yontlhe, ni magezu ya zvona ma chikele magemeta-musi.’ — Lisimu 19:1, 4.
2 Na ma nga tirise lirimi ni magezu, a matilo yo hlamalisa ma vangilweko hi Jehovha, ma kanela a kungangamela kakwe, siku ni siku, wusiku ni wusiku. A zvivangwa a zvi tshuki zvi tsika ku kanela a kungangamela ka Nungungulu, niku lezvo zvi hi maha hi ehleketa hi ciyimo ca hina ca nyalidede laha hi wonako a wukustumunyu gi nyikelwako “misaveni yontlhe” ka vontlhe va hanyako ka yona. Kanilezvi, a wukustumunyu ga zvivangwa basi a gi eneli. A vanhu vo tsumbeka va kuciwa ku hlengela ka kudhumisa loko hi gezu go zwala. A muyimbeleli wo kari wa tisimu, i byelile a vakhozeli vo tsumbeka a magezu lawa ma pimiselweko: ‘Hlayelani Jehovha a wudzundzo ni ntamu. Hlayelani Jehovha a wudzundzo legi gi faneleko a vito gakwe’. (Lisimu 96:7, 8) Lava va nga ni wunghana ga laha kusuhani na Jehovha, va tsaka hi ku ingisa a magezu lawo yo kuca. Kanilezvi zvini zvi patsekako laha ka ku mu nyika wudzundzo Nungungulu?
Sentinela 01/06/04 paj. 11 par. 8-10
A zvivangwa zvi kanela a kungangamela ka Nungungulu
8 Hi kulandzela, Dhavhidha i tlhamusela a kusaseka ka civangwa cin’wani ca Jehovha: ‘I akele gambo a tenda cikari ka wona [a matilo ma wonekako]. Gona gi fanana ni muyeni a humako nhangeni yakwe, gi tsaka khwatsi i nhenha yi tsutsumako kupalisaneni. Gi suka le magun’weni ya tilo, gi rendzeleka giya ka man’wani magumo; a ku na cilo ci zvi kotako ku ti sirela a kuhisa ka gona.’ — Lisimu 19:4-6.
9 Loku gi fananisiwa ni tinyeleti tin’wani, a gambo a hi ga hombe nguvhu ne a hi gi tsongwani. Hambulezvo, i nyeleti yo hlamalisa, ya hombe nguvhu a ku hundza a maplaneta ma gi randzeleko. A mubiko wo kari wu wula lezvaku a gambo gi bindza “2 octilhões wa matonelada” — ku nga 99.9% ya kubindza ka sistema solar ya hina! A ntamu wa kukoka ka gambo wu maha ku a misava yi gi rendzelekela na yi hi ka pfhuka wa 150 wa timiliyoni ta tikilometro, na yi nga tshineli kusuhani ne ndzhako. Laha misaveni ko chikela khihlanya ga bhiliyoni ya kuhisa ka gambo basi, kanilezvi ka enela kasi ku a zvivangwa zvi hanya.
10 A muyimbeleli wa tisimu i wulawulile hi gambo hi mawulawulela yo fananisa, a gi fananisa ni “nhenha”, loyi a tsutsumako kusukela mutsuwuka-gambo kala mupela-gambo ndzeni ka siku niku ni wusiku i humula lomu ka “tenda”. A cikhati leci a nyeleti leyo ya ntamu yi chikelako mupela-gambo, loku yi woniwa hi laha misaveni yo khwatsi yo nghena ka “tenda” go kari, a ku khwatsi yo lava ku humula. Ni mixo, ko khwatsi go tsuwuka, na gi wonekela “gi fanana ni muyeni a humako nhangeni yakwe.” Dhavhidha, kota murisi, i wa zvi tiva ku ni wusiku ku wa titimela nguvhu. (Genesisi 31:40) I wa alakanya lezvi a kuhisa ka gambo ku nga mu maha azwa ku kufumela hi kuhatlisa yena ni zvivangwa zvin’wani. Zvi woneka khwatsi lezvaku a gambo gi wa nga karali hi “lipfhumba” la gona la mutsuwuka-gambo kala mupela-gambo, kanilezvi gi fana ni “nhenha”, na gi longile ku phinda lipfhumba.
Despertai! 08/11/95 paj. 7 par. 2
Tlhari ya kuvanga yi kanyisiwako nguvhu masikwini ya hina
A ku engetela kubonga ka hina hi ntumbuluko, zvi nga hi vhuna ku tiva Muvangi wa hina, loyi a mitiro yakwe yi hi randzeleko. Ka khati go kari, Jesu i byelile a vapizani vakwe a ku va cuwukisa zvitsangi lezvi zvi nga kula le Galileya. I te: “Gondzani ka lezvi a zvitsangi zva khwati zvi kulisako zvona; a zvi tiri, ne a zvi swuli; kanilezvi ndza mu byela ndziku: Hambu Solomoni ni titshomba tontlhe leti a nga hi nato a nga zangi a bohisa a ku khwatsi hi cin’we ca zvona.” (Matewu 6:28, 29) A kusaseka ka zvitsangi zvo kala ku vhuna nchumu ku nga hi maha hi alakanya ku Nungungulu wa khatala khwatsi hi zvilaveko zva vanhu.
Titshomba ta moya
Murindzeli 02.17 paj. 4 Par. 5
A kungo ga Jehovha gi ta tatiseka!
5 Hi wutlhari, Jehovha i vekele mimbhingano a zvivangwa zvakwe zvontlhe. I mahile a milayo ya ntumbuluko, a tlhela a yimisa milayo ya mahanyela. I vekile milayo leyo kasi a zvilo zvontlhe zvi nga kona zvi tirisana khwatsi. (Lisimu 19:7-9) A zvilo zvontlhe zvi nga kona wuakweni zvi na ni wutshamu ga zvona ni ntiro wa zvona. Hi cikombiso, a nayo wa gravidade (wu mahako ku a zvilo zvi nga tshami laha ndengelengeni) wu maha lezvaku ku simama kuva ni moya wu nene laha misaveni, wu tlhela wu wonelela a mati ya bimbi lezvaku ma nga tali ku hundza mpimo. Loku ku wa nga hi na gravidade, zvi wa nga ta koteka ku hanya misaveni. A mimbhingano leyi Jehovha a yi vekileko ka zvivangwa zvakwe yi maha lezvaku kuva ni kuxaxameteka ko mbhelela ka zvilo wuakweni. Lezvo zvi komba ku i na ni kungo hi misava leyi ni vanhu. A cikhati hi chumayelako, hi nga vhuna van’wani lezvaku va tiva a Muvangi wa wuako legi go hlamalisa.— Kuvhululelwa 4:11.
25-31 KA MARÇO
TITSHOMBA TI NGA KA MHAKA YA NUNGUNGULU | Lisimu 22
A Bhibhiliya gi phrofetile zvilo xungetano hi kufa ka Jesu
Murindzeli 01/08/11 paj. 17 par. 16
Va Mu Kumile Messia!
16 Zvi wa ta wonekisa ku khwatsi Messia i tsikilwe hi Nungungulu. (Gondza Tisimu 22:1.) Hi kuwula ka ciphrofeto leci, “cikhatini ca wuntlhanu ni mune [ku nga 15 hora], Jesu i lo vitana hi gezu ga hombe, aku: Eloi, Eloi, lama sabaktani? Lezo na ku tlhamusela ku ngalo: Nungungulu wa mina, Nungungulu wa mina, u nzi tsikele yini?” (Mar. 15:34) Jesu i wa nga mbhelelwangi hi kukholwa kakwe ka Dadani wakwe wa le tilweni. I wulile lezvaku Nungungulu i mu tsikile hakuva a nga mu vhikelangi ka valala vakwe; hi ndlela leyo, i lo vhumelela lezvaku Kristu a ringiwa hi kumbhelela. A cikhati leci Jesu a nga keta, ku lo tatiseka a Lisimu 22:1.
Murindzeli 01/08/11 paj. 17 par. 13
Va Mu Kumile Messia!
13 Dhavhidha i phrofetile lezvaku Messia i wa ta rukatelwa. (Gondza Tisimu 22:7, 8.) A cikhati leci Jesu a nga kari a xaniseka laha mhandzeni i lo rukatelwa hakuva Matewu i bika lezvi: ‘Lava va nga hundza laho va lo mu rukatela, va mu chepeta hi tihloko tabye, vaku: Wena loyi u khungumulako tempeli, u yi aketa hi masiku manharu, hi nga ti hanyisa ka! Loku u hi N’wana wa Nungungulu, chika mhandzeni.’ Zvinghaho, a vapristi va hombe va lo mu tseketsela, zvin’we ni vatsali ni masingalakati, vaku: ‘I hanyisile van’wani, kanilezvi a nga zvi koti ku ti hanyisa! Loku a hi hosi ya vaIsrayeli, a chike mhandzeni, hina hi ta kholwa ka yena. I tsumbile Nungungulu; a mu tlhatlhise makunu, loku a kari a mu randza; hakuva i te ngalo: Ndzi N’wana wa Nungungulu.’ (Mat. 27:39-43) Hambulezvo, Jesu a nga alangi a kuxaniseka loko kontlhe. Hakunene cikombiso ca ci nene nguvhu ka hina!
Murindzeli 01/08/11 paj. 17 par. 14
Va Mu Kumile Messia!
14 Va wa taba tihlolo kasi ku avelana a tinguwo ta Messia. A mutsali wa tisimu i te ngalo: “Va avana tinguwo ta mina, va hlahluveta a bhaji ga mina.” (Tis. 22:18) Kunene lezvo zvi mahekile, hakuva ‘laha [a masochwa ya Roma] ma nga mu belele, ma lo avelana a tinguwo takwe hi ku hlahluva tihlolo.’ — Mat. 27:35; gondza Johani 19:23, 24.
Titshomba ta moya
Sentinela 01/11/06 paj. 29 par. 7
A hi kombiseni cichavo hi mitlhangano ya hina yo basa
7 Hi nga kombisa cichavo hi mitlhangano hi tindlela to kongoma. A yin’we ya tona kuva kona mitlhanganweni kasi hi yimbelela tisimu ta Mufumo. A kutala ka tona ti tsalilwe hi ndlela ya mukhongelo, hikwalaho ti fanele ku yimbelelwa hi ndlela ya cichavo. Na a tshaha a Lisimu 22, mupostoli Pawule i tsalile lezvi xungetano hi Jesu: “Ndzi ta kanela a vito ga wena ka vamakabye va mina; ndzi ta yimbelela tisimu ndzi ku dhumisa lomu bandleni.” (Mahebheru 2:12) Hikwalaho, hi fanele a kuva ka matshamu ya hina a mukhomi wa citshamu na a nga se wula lisimu, andzhako ka lezvo hi fanele ku chela kota hi tlhamuselo wa magezu ya lisimu laha hi yimbelelako. Lezvi hi yimbelelisako zvona zvi fanele ku komba a kutizwa ka muyimbeleli wa tisimu, loyi a tsalileko lezvi: ‘Ndzi ta bonga Jehovha hi mbilu ya mina yontlhe lomu tlhanganweni wa valulamileko ni le hlengeletanweni.’ (Lisimu 111:1) A zvi kanakanisi lezvaku a ku yimbelela tisimu ta ku dhumisa Jehovha cigelo ca cinene ca ku hatlisa hi chikela mitlhanganweni hi tlhela hi simama ka yona kala yi gumesa.
Sentinela 01/09/03 paj. 20 par. 1
Dhumisa Jehovha ‘cikari ka hlengeletano’
Inyamutlha, a ku khwatsi hi zvikhatini zvi hundzileko, ku mahiwa malulamiselo ya lezvaku lava va nga ni kukholwa va kombisa kukholwa kabye ‘cikari ka hlengeletano’. A gin’we ga malungelo gi nga kona ka vontlhe ku nyikela mihlamulo ya zviwutiso zvi mahiwako vaingiseli ka mitlhangano ya bandla. U nga tshuki u zvi wonela hasi lezvo. Hi cikombiso, a mihlamulo yi kombako lezvi hi nga timiselisako zvona zvikarato kutani ku zvi potsa yi tiyisa a kutiyimisela ka vamakabye va hina ka ku tirisa a matshinya ya milayo ya Bhibhiliya. A mihlamulo leyi yi tlhamuselako a mitsalo ya Bhibhiliya yi kumbukilweko, kanilezvi yi nga kala ku tshahiwa kutani maalakanyo ma kumilweko ka kambisiso wo kari wa munhu wutsumbu, ma nga kuca van’wani a kuva ni ma mahela manene ya cigondzo.
1-7 KA ABRIL
TITSHOMBA TI NGA KA MHAKA YA NUNGUNGULU | Tisimu 23-25
‘Jehovha hi murisi wa mina’
Sentinela 01/05/11 paj. 31 par. 3
‘Jehovha hi murisi wa mina’
Jehovha wa rangela tiyivhu takwe. Hi tolovelo, loku a tiyivhu ti nga hi na murisi ta lahleka. Hi ndlela yo fana, hi lava civhuno kasi hi kuma ndlela ya yinene ya wutomi. (Jeremia 10:23) Kota lezvi Dhavhidha a tlhamuselako, Jehovha wa rangela vanhu vakwe a “mikoveni yo nyuka” ni le “matini ya malenga.” Wa va rangela “tindleleni to lulama”. (Mavhesi 2, 3) A mifananiso leyo ya wurisi yi hi tiyisekisa lezvaku hi nga mu tsumba Nungungulu. Hi ku landzela zvileletelo zva moya wakwe, zvi nga lomu ka Bhibhiliya, hi ngava ni wutomi go tsakisa, ga ginene ni go vhikeleka.
Sentinela 01/05/11 paj. 31 par. 4
‘Jehovha hi murisi wa mina’
Jehovha wa vhikela tiyivhu takwe. Loku a murisi a nga hi laha kusuhani, a tiyivhu ta chava ti tlhela ti nga tivi ni co maha. Jehovha i byela a malandza yakwe a ku ma nga chavi, hambu loku ma ‘tsemakanya a ndzhelelo wa ndzhuti wa kufa’ — ndzeni ka zvikhati zvo bayisa nguvhu wutomini gabye. (Vhesi 4) Jehovha wa va khatalela; i tshama a longile ku va vhuna. A nga va nyika wutlhari a vakhozeli vakwe ni ntamu va wu lavako kasi va lwisana ni zvikarato. — Va Le Filipi 4:13; Jakobe 1:2-5.
Sentinela 01/05/11 paj. 31 par. 5
‘Jehovha hi murisi wa mina’
Jehovha wa gisa tiyivhu takwe. A tiyivhu ti tsumba a murisi wa tona kasi tiga. Hi na ni cilaveko ca moya leci hi nga zvi kotako ku ci khatalela hi civhuno ca Nungungulu. (Matewu 5:3) A ya manene hi ku Jehovha i nyika na a nga feleli. I longisela a meza yo tala ka malandza yakwe. (Vhesi 5) A Bhibhiliya, ni man’wani mabhuku ma tirisiwako kasi ku gondza Bhibhiliya, a ku khwatsi i revhista legi u lerako, cibuka ca zvakuga zva moya zvi tatisako a cilaveko ca hina ca ku lava ku tiva ku hi hanyela yini ni kungo ga Nungungulu xungetano hi hina.
Titshomba ta moya
Sentinela 15/02/11 paj. 24 par. 1-3
Randza kululama hi mbilu yontlhe
HI KU tirisa a Mhaka yakwe ni moya wakwe wo basa, Jehovha i rangela a vanhu vakwe “tindleleni to lulama”. (Lisimu 23:3) Kanilezvi kota lezvi hi nga kala ku mbhelela, hi na ni ku byekelela ka ku hambuka ndleleni leyo. Kasi ku wuya hi ta maha lezvi zvi lulamileko zvi lava kutikarata ka hombe. Zvini zvi to hi vhuna kasi hi humelela? A ku fana na Jesu, hi fanele ku randza ku maha zvo lulama.— Lera Lisimu 45:7.
2 Zvini a “tindleleni to lulama”? Ku wuliwa a ndlela yo hlonga kutani lisoko. A ‘tindlela’ leto ti yimisilwe hi matshinya yo lulama ya Jehovha. Hi ciHebheru ni ciGreki, a ku “lulama” ku wuliwa lezvi zva “nongameto”, na zvi komba ku khomelela ko tiya ka milayo ya mahanyela. Kota lezvi Jehovha a nga “wutshamu ga nongameto” a vakhozeli vakwe va tsaka hi ku mu tsika a va komba a ndlela yo lulama ya mahanyela leyi va faneleko ku famba hi yona. — Jer. 50:7.
3 Zvi koteka ku tsakisa Nungungulu hi kumbhelela ntsena loku hi ti karata hi mbilu yontlhe a ku hanya hi matshinya yakwe ya mahanyela. (Deut. 32:4) Kasi ku sangula, zvi lava ku hi gondza zvontlhe hi zvi kotako xungetano hi Jehovha Nungungulu lomu ka Mhaka yakwe, a Bhibhiliya. Laha hi yako hi gondza nguvhu xungetano hi Jehovha, hi tshinela nguvhu kakwe, hi taya hi ku randza nguvhu a kululama kakwe. (Jak. 4:8) Hi fanele ku tlhela hi vhumela a wurangeli ga Mhaka yi pimiselweko hi Nungungulu laha mi mahako zviboho zva lisima wutomini.
8-14 KA ABRIL
TITSHOMBA TI NGA KA MHAKA YA NUNGUNGULU | Tisimu 26-28
Lezvi Dhavhidha a nga ku tiyisisa zvona kutsumbeka kakwe
Sentinela 01/12/04 paj. 14 par. 8-9
A hi fambeni ndleleni yo tsumbeka
8 Dhavhidha i khongelile aku: ‘Jehovha, ndzi hlole, u ndzi kamba, u ringa tiswa ta mina ni mbilu ya mina.’ (Lisimu 26:2) A tiswa ti tshama lomu ndzeni ka miri. Ti yimela a maalakanyo ni kutizwa ko eta ka munhu. Niku a mbilu yo fananisa munhu wa le ndzeni— lezvi zvi mu kucako, kutizwa kakwe ni maalakanyo yakwe. A cikhati leci Dhavhidha a nga kombela Jehovha a ku a mu hlola, i wa lava ku a maalakanyo yakwe ni kutizwa kakwe ka le ndzeni zvi woniwa zvi tlhela zvi kambisisiwa khwatsi.
9 Dhavhidha i kombelile lezvaku ku hloliwa a tiswa takwe ni mbilu yakwe. Jehovha i hi hlolisa kuyini hi le ndzeni? Dhavhidha i yimbeleli aku: ‘Ndzi ta bonga Jehovha, hakuva wa ndzi nyika wusungukati, ina, a mbilu ya mina ya ndzi luleka ni laha wusikwini.’ Zvi wula yini lezvo? Zvi wula ku a wusungukati gi tako hi ka Nungungulu gi khumbile a zvipandze zva le ndzeni zva Dhavhidha gi tlhela gi tshama lomo, gi lulamisa a kutizwa kakwe ni maalakanyo yakwe ya le ndzeni. Ku nga maheka zvo fana ka hina, loku hi ehleketa hi wusungukati ga Mhaka ya Nungungulu, ga lava va mu yimelako ni ga hlengeletano yakwe, hi tlhela hi vhumela ku a wusungukati lego gi tshama timbilwini ta hina. Loku hi khongela hi kukhandzakanya ka Jehovha hi kombela ku a hi hlola, hi ndlela leyo zvi ta hi vhuna a ku famba hi kutsumbeka.
Sentinela 01/12/04 paj. 15-16 par. 12-13
A hi fambeni ndleleni yo tsumbeka
12 Na a wulawula hi mhaka yin’wani yi nga tiyisa a kutsumbeka kakwe, Dhavhidha i te: ‘A ndzi tshami ni vanhu vo hemba wunwa, hambu ni ku hlengela ni vaxengeteli. Ndza venga a hlengeletano wa vawonhi, a ndzi tshami zvin’we ni vakubiha.’ (Lisimu 26:4, 5) Dhavhidha i wa ala hi kumbhelela a ku tshama ni vanhu vo biha. I wa venga vanghana vakubiha.
13 Ahanti hina ke? A ku ha ala a ku tshama ni vanhu vakubiha hi ku tirisa maprograma ya televhizawu, tivhidhio, mafilmi, internet kutani zvin’wani zvo fana ni lezvo? Hi fambela kule ni lava va fihlako lezvi va nga zvona? A vokari cikoleni kutani lomu hi tirako kona va nga hemba vaku vanghana va hina hi kungo go kari. Aku hi lava ku wumba wunghana ga ginene ni lava va kalako va nga fambi lisineni la Nungungulu? Hi ndzhako ka magezu ma wonekisako ku khwatsi ya lisine, a vadhuki kuzvilava va nga fihla kungo gabye ga ku lava ku hi tsikisa ku tirela Jehovha. Ahanti loku lomu bandleni ga wuKristu ku hi ni vokari va hanyako wutomi gimbiri? Lavo vonawu va fihla lezvi va nga zvona hi lisine. Jayson, loyi zvezvi a nga nandza go vhunetela, i wa hi ni vanghana va tshamela lego a cikhati a nga hi muswa. I wula lezvi: “Ka siku go kari, a mun’we wa vanghana va mina i ndzi byelile lezvi: ‘Hi nga maha ni cihi hi ci lavako zvezvi, hakuva loku a misava yiswa yi ta chikela, hi ta ngha na hi file. Ne hi nga ta zvi tiva ku hi luzile zvokari.’ A mabhulo ya tshamela lego ma vile citlharihiso ka mina. Ndzi lava ku a misava yiswa yi chikela na ndza ha hanya.” Hi wutlhari, Jayson i no tsema wunghana navo. Mupostoli Pawule i hi tlharihisile aku: “Mu nga kalavelwi. A ku tolovelana ni vakubiha zva bihisa a mahanyela ma nene.” (1 Va Le Korinte 15:33) Zva lisima nguvhu a ku potsa a vanghana vakubiha!
Sentinela 01/12/04 paj. 16 par. 17-18
A hi fambeni ndleleni yo tsumbeka
17 A tabhernakeli ni alati ga ku mahela miphahlo, ku wa hi wutshamu ga ku khozela Jehovha le Izrayeli. Na a wula lezvi a nga ti zwisa zvona hi wutshamu legiyani, Dhavhidha i khongelile aku: ‘Jehovha, ndza randza a wuakelo ga yindlu ya wena, ni wutshamu legi gi nga ni kungangamela ka wena.’ — Lisimu 26:8.
18 A ku ha zvi randza a ku tlhangana ka wutshamu legi hi gondzako xungetano hi Jehovha? A Salawu yin’we ni yin’wani ya Mufumo, ni gondziselelo ya kona ya moya, yi tira kota laha a wukhozeli ga lisine gi tlhanganako kota lomu cipandzeni. Ahandle ka lezvo, lembe ni lembe hi na ni gotsovanyano, mutlhangano wa cipandze ni mutlhangano wo hlawuleka. A ‘zvikhumbuxeto’, kutani gondziselelo zvi kambisisiwa ka mitlhangano leyo. Loku hi gondza ku ‘zvi randza ku hundza mpimo’, hi ta zvi tsakela nguvhu a ku wona mitlhangano leyo hi tlhela hi demba khwatsi ndleve ka lezvi zvi wuliwako. (Lisimu 119:167) A zvo ku tsakisa a ku tlhangana ni makholwa-kuloni, lawa ma khatalako hi kutshamiseka ka mun’we ni mun’wani wa hina va tlhela va hi vhuna ku simama hi tsumbekile! — Mahebheru 10:24, 25.
Titshomba ta moya
Sentinela 15/7/06 paj. 28 par. 15
Jehovha wa tlhatlhisa loyi a karatekileko
15 A muyimbeleli wa tisimu Dhavhidha, i yimbeleli aku: ‘Hambu loku [papayi] na mamani va ndzi tsika, Jehovha i ta ndzi rola.’ (Lisimu 27:10) A zvo ku tiyisa a ku tiva lezvaku a lirandzo la Jehovha li hundza a lirandzo la ni wihi papayi kutani mamani wa nyama! Hambu loku zvi bayisisa kuyini a ku nga tsakelwi, ku xanisiwa kutani ku tsikiwa hi papayi kutani mamani, a ku na nchumu ci hungulako a kukhatala ka Jehovha hi wena. (Va Le Roma 8:38, 39) Alakanya ku Jehovha i koka lava a va randzako. (Johani 3:16; 6:44) Na ku nga khataliseki lezvi a vanhu va ku khomisileko zvona, wa randziwa hi Papayi wa wena wa le tilweni!
15-21 KA ABRIL
TITSHOMBA TI NGA KA MHAKA YA NUNGUNGULU | Tisimu 29-31
A kukawukiwa — cikombiso ca lirandzo la Nungungulu
Perspicaz vhol. 1 paj. 929 par. 12
Nghohe
A ku ‘fihla nghohe’ zvi nga ha wula zvilo zvo hambanahambana hi kuya hi ciyimo. A ku fihlala ka nghohe ya Jehovha Nungungulu, a kutala ka zvikhati zvi wula ku kala a nga ha tsakeli a munhu wo kari kutani ku susa a ntamu wa yena wo tiyisa. Lezvo zvi nga tshuka zvi humelela hi kungaingisi ka munhu wo kari kutani ka ntlawa wo kari wa vanhu, a ku khwatsi i tiko ga Izrayeli. (Joba 34:29; Lis. 30:5-8; Isa. 54:8; 59:2) Ka zviyimo zvin’wani zvi nga wonekisa ku khwatsi Jehovha o potsa ku ti kombisa hi mitiro kutani hi hlamulo, na a rindzela a cikhati a ci yimisileko. (Lis. 13:1-3) Dhavhidha i kombelile lezvi: ‘U nga ha cuwuki a zviwonho zva mina,’ i wa kombela kutsetselelwa hi Nungungulu kutani ku vhinya a zvihoxo lezvo.— Lis. 51:9; fananisa na Lis. 10:11.
Sentinela 01/02/07 paj. 19 par. 1
Va tsaka hi ku rindzela Jehovha
A ndlela leyi a kukawuka ka Jehovha ku hi vhunako hi yona ku nga fananisiwa ni ndlela leyi a handzu wu kulako hi yona kala wu buvha. Xungetano hi kukawuka ka Nungungulu, a Bhibhiliya gi ngalo: “Hi ndzhako ka cikhati ku pswala handzu wa kurula ni wa kululama ka lava va gondzisiwako hi kona.” (Mahebheru 12:11) A ku khwatsi hi lezvi a mihandzu yi lavako cikhati kasi yi kula, ku laveka cikhati kasi hi cica mawonela hi kuya hi gondziselelo leyi Jehovha a hi nyikako. Hi cikombiso, loku hi kota ya mahanyela ya hina ya hava hi luza malungelo yo kari lomu bandleni, a kutiyimisela ka ku rindzela Nungungulu ku ta hi vhalela ku hi nga mbheli ntamu ni ku tlhelela ndzhako. Ka zviyimo lezvo, a magezu ma pimiselweko ya Dhavhidha ma tiyisa, lawa ma nge: ‘A zanga [ya Nungungulu] nja cikhatanyana ntsena, kanilezvi a thomo gakwe gi enela kuhanya kontlhe. A kurila ku ngava kona laha gambyeni, kanilezvi laha mixweni kuva kona litsako.’ (Lisimu 30:5) Loku hi hlakulela a tshamela ga ku rindzela ni ku tirisa wusungukati legi hi gi kumako ka Mhaka ya Nungungulu ni ka hlengeletano yakwe, a cikhati ca hina ca ‘kuva kona litsako’ ci ta chikela.
Murindzeli 10.21 paj. 6 par. 18
Cini ci kombako ku hakunene a munhu wa ti sola?
18 Kasi loyi a nga susiwa bandleni a komba lezvaku hakunene wa ti sola, zvi lava ku ata mitlhanganweni hi kukhandzakanya, a ingisa wusungukati ga madhota ga ku a khongela a tlhela a gondza hi kukhandzakanya. Zvi lava ku a fambela kule kambe ni zviyimo lezvi zvi nga mu maha a wonha. Loku a kulula a n’watseka kasi ku vhuxa wunghana gakwe na Jehovha, handle ko kanakana Jehovha i ta mu tsetselela, a madhota wonawu ma ta mu wuyisela bandleni. A lisine hi ku loku a madhota ma xuxa mhaka ya wo kari a nga wonha, ma zvi tiva khwatsi ku a vanhu va hambana, ni zviyimo zvonawu zva hambana. Hikwalaho, ma hlola khwatsi a munhu loye ni ciyimo leco. A ma tsutsumeli ku maha ciboho.
Titshomba ta moya
Sentinela 15/05/05 paj. 19 par. 13
Timhaka-tshinya ta bhuku go sangula ga Tisimu
31:23 — A munhu wa ku ti kulisa i tlheliselwa hi ndlela yo hundzeleta hi ndlela muni? A ku tlheliselwa loku ku wuliwako laha, ku tsayisiwa. A munhu wo lulama i tlheliselwa hi kota ya kuphazama kakwe hi ndlela yo kawukiwa ku tako hi ka Jehovha. Kanilezvi kota lezvi a munhu wa matshandza a kalako a nga ti layi hi kota ya mahanyela yakwe ya kubiha, i tlheliselwa hi ndlela yo hundzeleta kota tsayiselelo wi bayisa. — Mavingu 11:31; 1 Pedro 4:18.
22-28 KA ABRIL
TITSHOMBA TI NGA KA MHAKA YA NUNGUNGULU | Tisimu 32-33
Hikuyini hi faneleko ku wula ciwonho ca hombe?
Sentinela 15/03/93 paj. 9 par. 7
A wuxinji ga Jehovha ga hi tlhatlhisa ka kukarateka
7 Loku hi hambunyeta nayo wa Nungungulu hi ku maha zviwonho zva hombe, zvi nga tshuka zvi karatela ku wula a zviwonho zva hina, hambu ni ka Jehovha. Zvini zvi nga humelelako ka zviyimo lezvo? Ka Lisimu 32, Dhavhidha i wulile lezvi: ‘Laha ndzi nga miyela [wutshan’wini ga ku wulela] a marambu ya mina ma lo gutlagutla hi kuketa ka mina gontlhe siku. Hakuva a mumu ni wusiku a canja ga [Jehovha] gi wa bindzile hehla ka mina; a ndzhongo wa mina wu lo womiswa ku fana ni kuvalela ka cimumu.’ (Mavhesi 3, 4) A ku zama ku fihla a ciwonho cakwe ni ku zama ku maha ku khwatsi a nga na livhalo lo bindza zvi mahile ku Dhavhidha a mbhela ntamu. A kukarateka ka hombe ku mu mbhetile ntamu laha ka ku a ku khwatsi i sinya yi womileko, yi nga laha ko kala ndzhongo kasi yi hanya. Hi lisine, kuzvilava lezvo zvi mu mahile azwa kubayisa ka maalakanyo ni ka miri. A lisine hi ku, i luzile litsako. Loku a mun’we wa hina a hi ka ciyimo leco, zvini a faneleko ku maha?
Achegue-se a Jeová paj. 262 par. 8
Nungungulu a longileko ku “tsetselela”
8 Dhavhidha loyi a nga ti sola i te: ‘Ndzi ku tivisile a kuwonha ka mina, a kugoha ka mina a ndzi ku fihlangi. . . . Zvonake u tsetselele a nandzu wa kuwonha ka mina.’ A gezu u “tsetselele” gi hundzulusela a gezu ga ciHebheru gi wulako ku “ku tlakusa” kutani “kuteka”. Lezvi gi tirisiswako zvona laha gi wula a ku susa ‘minandzu, zvigoho ni zvihambuko’. Hi ndlela ya ku Jehovha i no tlakusa a tlhela a teka a zviwonho zva Dhavhidha. Handle ko kanakana, i mu humutile ka kutizwa nandzu loku a nga hi nako. (Lisimu 32:3) Hinawu hi ngava ni kutsumba ko mbhelela ka Nungungulu, hakuva yena wa teka a zviwonho zva lava va lavako ku tsetselelwa hi yena hi kukholwa loku va nga nako ka hakhelo yo tlhatlhisa ya Jesu. — Matewu 20:28.
Sentinela 01/06/01 paj. 30 par. 1
Ku wulela ku hanyisako
Andzhako ka ku wulela nandzu wakwe, Dhavhidha a nga ti nyikelangi ka kutizwa na a nga vhuni nchumu. A magezu yakwe ka tisimu leti a tsalileko xungetano hi ku wulela ma komba a kupepa loku a ku zwileko ni ku ti yimisela ka ku tirela Nungungulu hi kutsumbeka. Hi cikombiso, wona Lisimu 32. Ka vhesi 1, hi lera lezvi: ‘I katekile yena loyi a cihambuko cakwe ci tsetselelweko, loyi a ciwonho cakwe ci fenengetilweko.’ Hambu loku a ciwonho ci no kulisa kuyini, zva koteka ku zvi mbhela hi litsako loku a munhu a ti sola hi lisine. A yin’we ya tindlela ta ku komba a kutisola loko ku vhumela lezvi u nga zvi maha, a ku khwatsi hi lezvi Dhavhidha a mahileko. (2 Samuweli 12:13) A nga zamangi ku ti yimelela ka Jehovha kutani ku rwexa nandzu van’wani. A vhesi 5 gi li: ‘Ndzi ku tivisile a kuwonha ka mina, a kugoha ka mina a ndzi ku fihlangi. Ndzi te ngalo: Ndzi ta vhumela a zvihambuko zva mina ka Jehovha; zvonake u tsetselele a nandzu wa kuwonha ka mina.’ A ku wulela hi kumbhelela zvi tisa kurula, hi ndlela ya ku zvi nga ha lavi ku a munhu a karatiwa hi livhalo hi zviwonho zva kale.
Titshomba ta moya
Murindzeli 11.21 paj. 6 par. 14
U vhunekisa kuyini hi lirandzo li nga mbheliko la Jehovha?
14 A lirandzo li nga mbheliko la Jehovha la hi vhikela hi tlhelo ga moya. Dhavhidha i khongele ka Jehovha, aku: ‘Wena u wuchavelo ga mina, wa ndzi londzowota zvikaratweni; u ta ndzi randzela hi tisimu ta kuponisiwa. . . . Loyi a tsumbako Jehovha i ta mahelwa wuxinji.’ (Lis. 32:7, 10) Zvikhatini zva kutsaliwa ka Bhibhiliya, va wa aka mimuro yi randzela dhoropa kasi ku vhikela vanhu lezvaku va nga dhumelwi hi valala. A lirandzo li nga mbheliko la Jehovha li nga fana ni muro wu hi vhikelako ni ka cihi ci nga wa ta wonha a wunghana ga hina naye. Ahandle ka lezvo, a lirandzo li nga mbheliko la Jehovha li mu kuca ku a maha wunghana na hina. — Jer. 31:3.
29 KA ABRIL–5 KA MAIO
TITSHOMBA TI NGA KA MHAKA YA NUNGUNGULU | Tisimu 34-35
‘Dhumisa Jehovha wontlhe masiku’
Sentinela 01/03/07 paj. 22 par. 11
A hi kuliseni zvin’we a vito ga Jehovha
11 ‘Ndzi ta dhumisa Jehovha wontlhe masiku; ndzi ta mu bonga hi nomu wa mina contlhe cikhati.’ (Lisimu 34:1) Kota lezvi a nga hanya hi ku tsutsuma, kuzvilava Dhavhidha i wa karateka hi zva ku ti hanyisa, kanilezvi kota lezvi ma kombako a magezu lawa, a zvilaveko zvakwe zva siku ni siku a zvi vangi zva lisima nguvhu a ku hundza kutiyimisela kakwe ka ku dhumisa Jehovha. Cikombiso cinene ka hina loku hi kumana ni zvikarato! Kani hi kwihi hi nga kona, cikoleni, ntirweni, na hi hi ni makholwa-kuloni kutani kuchumayeleni, a kuxuva ka hina ko ranga ku fanele kuva ka ku dhumisa Jehovha. Hi nga ehleketa hi zvigelo zva talela ga cima hi nga nazvo zva ku maha lezvo! Hi cikombiso, a ku na magumo ya lezvi hi nga zvi polako ni lezvi hi nga ti buzako hi zvona ka zvivangwa zvo hlamalisa zva Jehovha. Niku wona lezvi a zvi tatisako hi ku tirisa a hlengeletano yakwe ya laha misaveni. Hambu lezvi hi nga kala ku mbhelela, Jehovha i kari tirisa vanhu vo tsumbeka ka masiku lawa. Hi nga fananisa kuyini a mitiro ya Jehovha ni leyi ya vanhu lava va khozelwako lomu tikweni? Kuzvilava wa vhumelelana na Dhavhidha, loyi a nga tsala lezvi: ‘Cikari ka vanungungulu a nga kona a fananako na wena, Hosi, a yi kona mitiro yi fananako ni ya wena.’ — Lisimu 86:8.
Sentinela 01/03/07 paj. 22 par. 13
A hi kuliseni zvin’we a vito ga Jehovha
13 ‘A muhefemulo wa mina wu ta ti kulisa ha Jehovha; lava va koramileko va ta zvizwa va tsaka.’ (Lisimu 34:2) Laha, Dhavhidha i wa nga ti dzundzi hi mitiro yakwe wutsumbu. Hi cikombiso, a nga ti dzundzangi hi ndlela leyi a nga yi kalavela hi yona a hosi ya Gati. I wa zvi tiva ku Jehovha i mu vhikeli a cikhati a nga hi Gati niku i ponile hi kota ya civhuno ca Jehovha. (Mavingu 21:1) Hi ndlela leyo, Dhavhidha a nga ti kulisangi, kanilezvi i zvi tivile ku a wudzundzo gi wa hi ga Jehovha. Hi kota ya lezvo, lava vo rula va kokiwa ka Jehovha. Hi ndlela yo fana, Jesu i wa kulisa a vito ga Nungungulu niku lezvo zvi wa koka a vanhu vo ti koramisa ka Jehovha, va nga longile ku gondza. Inyamutlha, a vanhu vo rula va matiko wontlhe va kokiwa ka bandla ga misava yontlhe ga maKristu ma totilweko, legi Jesu a nga Hloko. (Va Le Kolosi 1:18) A vanhu lavo vo rula va khumbiwa timbilu laha va zwako a vito ga Nungungulu na gi dhumisiwa hi malandza yakwe yo ti koramisa ni kuzwa a mahungu ya Bhibhiliya lawa a moya wo basa wa Nungungulu wu mahako va ma zwisisa.— Johani 6:44; Mitiro 16:14.
Murindzeli 01/03/07 paj. 23 par. 15
A hi kuliseni zvin’we a vito ga Jehovha
15 ‘Ndzi lo hlota Jehovha, i lo ndzi hlamula; i lo ndzi tlhatlhisa kuchaveni ka mina kontlhe.’ (Lisimu 34:4) A ciyimo leco ci vile ca lisima ka Dhavhidha. Hikwalaho, i simamile aku: ‘A munhu loyi wa cisiwana i no kombela, na Jehovha i no ingisa, a mu ponisa zvikaratweni zvakwe zvontlhe.’ (Lisimu 34:6) Laha hi tlhanganako ni vamakabye va hina hi na ni lungelo ga ku hlawutela matshango yo tiyisa xungetano hi lezvi Jehovha a hi vhunisako zvona a ku timisela zvikarato. Lezvo zva tiyisa a kukholwa ka vamakabye va hina, a ku khwatsi hi lezvi a magezu ya Dhavhidha ma nga tiyisa kukholwa ka lava va nga mu seketela. Ka ciyimo ca Dhavhidha, lava va nga mu seketela ‘va no cuwuka ka [Jehovha] va n’wayitana hi litsako, ni tinghohe tabye a ti na tingana.’ (Lisimu 34:5) Hambu lezvi va nga tsutsuma Hosi Sawule, va wa nga hi na tingana. Va wa tsumba lezvaku Nungungulu i wa seketela Dhavhidha, niku a tinghohe tabye ti wa n’wayitela hi litsako. Hi ndlela yo fana, lava va sangulako ku tsakela ni lava va nga maKristu hi cikhati co leha, va tsutsumela ka Jehovha na va lava civhuno. Kota lezvi va ci zwileko ha voce a civhuno cakwe, a tinghohe tabye to n’wayitela ti komba a kutiyimisela ka ku simama va tsumbekile.
Titshomba ta moya
Murindzeli 01/08/11 paj. 16 par. 9
Va Wa Rindzela Messia
9 A vakustumunyu va wa ta hemba wunwa xungetano hi Messia. Dhavhidha i te ngalo: “Ku humele a vakustumunyu va mawunwa, va ndzi wutisa a timhaka ndzi nga ti tiviko.” (Lis. 35:11) Kota kutatiseka ka ciprofeto leci, “a vapristi va hombe ni hubye yontlhe va no lava a wukustumunyu ga mawunwa ha Jesu, kasi va fela ku mu daya.” (Mat. 26:59) Hakunene, a “vanyingi va no maha wukustumunyu ga mawunwa ha yena, kanilezi a wukustumunyu gabye a gi vumelanangi.” (Mar. 14:56) A vanhu lavo va wa nga hi na mhaka na Jesu. Leci va nga ci lava ntsena ku wa hi ku mu daya.