Timhaka ta mabhuku ma tako ka Cibhukwana ca Mutlhangano

© 2024 Watch Tower Bible and Tract Society of Pennsylvania

4-10 KA NOVEMBRO

TITSHOMBA TI NGA KA MHAKA YA NUNGUNGULU LISIMU 105

Jehovha “wa alakanya a civhumelwano cakwe kala kupindzuka”

Murindzeli 04.23 paj. 28 par. 11-12

Tiyisa kukholwa u nga nako hi citsumbiso ca Jehovha ca misava yiswa

¹¹ Ehleketa hi zvilo zvo kari lezvi Jehovha a nga tsumbisa vanhu vakwe cikhatini ci hundzileko zvi nga wonekisa ku khwatsi a zvi koteki. I byelile Abrahama na Sara lezvaku va wa ta pswala n’wana wukhosaneni gabye. (Gen. 17:15-17) I tlhelile a byela Abrahama lezvaku a pswalo wakwe wu wa ta nyikiwa a tiko ga Khanani. Ka malembe yo tala lawa a pswalo wa Abrahama, a vaIzrayeli, wu nga hi wukhumbini le Gibhite, zvi wa wonekisa ku khwatsi a citsumbiso leco ci nga ta tatiseka. Kanilezvi lezvo zvi tatisekile. Hi ndzhako ka cikhati, Jehovha i no wula lezvaku Elizabheti i wa tava ni n’wana wukhosaneni gakwe. I tlhelile a byela a nhwana Mariya lezvaku i wa ta pswala N’wana Wakwe, lezvo zvi wa ta tatisa citsumbiso leci Jehovha a nga sina a ci mahile hi malembe yo tala le Edheni. Lezvo zvonawu zvi tatisekile! — Gen. 3:15.

¹² Loku hi ehleketa hi zvitsumbiso zvontlhe lezvi Jehovha a zvi mahileko, ni lezvi a nga zvi tatisisa zvona, hi wona ku i na ni ntamu wa hombe nguvhu. Lezvo zvi tiyisa kukholwa ka hina hi zvitsumbiso zvakwe xungetano hi misava yiswa. (Lera Joxuwa 23:14; Isaya 55:10, 11.) Zvi maha ku hi ti longisela khwatsi kambe kasi hi vhuna van’wani a ku zwisisa lezvaku a citsumbiso ca misava yiswa a hi noro — zvi ta maheka futsi. Xungetano hi ku neha a matilo maswa ni misava yiswa, Jehovha i wulile ha yece, aku: “A timhaka leti ti tsumbekile niku lisine.” — Kuv. 21:1, 5.

Perspicaz vhol. 2 paj. 563 par. 3

Mhaka

A zvivangwa zvi hanyako ni lezvi zvi nga hanyiko zva ingisa mhaka ya Nungungulu niku a nga zvi tirisa kasi ku tatisa makungo yakwe. (Lis. 103:20; 148:8) A mhaka yakwe yi tsumbekile; lezvi Nungungulu a tsumbisako wa tlhela a alakanya ku zvi tatisa. (Dhewu. 9:5; Lis. 105:42-45) Kota lezvi a wulileko, a mhaka yakwe “yi simama kala kupindzuka”; yi nga ta tlhelela kakwe na yi nga tatisangi a kungo gakwe. — Isa. 40:8; 55:10, 11; 1 Ped. 1:25.

Titshomba ta moya

Sentinela 01/11/86 paj. 19 par. 15

Vaswa, mu na ni cipandze ca lisima kasi a ngango wa n’wina wu tsaka wu tlhela wu bohana

¹⁵ “Va no boha a mikondzo yakwe [Josefa] hi machini, va fasa a nhamu yakwe hi tisimbi; kala cikhati leci a gezu gakwe gi nga tatiseka, a mhaka ya Jehovha hi yona yi nga mu basisa.” (Lis. 105:17-19) Josefa i no xaniseka kota khumbi ni cibochwa hi 13 wa malembe kala ku tatiseka a citsumbiso ca Jehovha. A kuxaniseka loko ku mu vhunile ku ava munhu wa munene. Hambu lezvi ka ku a hi Jehovha a nga vanga zvikarato lezvo, i zvi vhumelele hi kungo go kari. Xana Josefa i wa ta simama a tsumba “mhaka ya Jehovha” hambu lezvi a nga kumana ni zvikarato zva hombe? Xana i wa ta chukwatisa matshamela yakwe ya manene a tlhela a hlakulela lihlazva-mbilu, ni kutikoramisa, ni wumoya, ni kutiyimisela kakwe ka ku tatisa zviavelo zvo karata? Hi lisine, Josefa i humele ka zvikarato lezvo na a ku khwatsi i ouro yi hlutilweko — na a basile a tlhela a randzeka nguvhu ka Nungungulu, loyi a gumesileko a mu tirisa hi ndlela yo hlamalisa. — Gen. 41:14, 38-41, 46; 42:6, 9.

11-17 KA NOVEMBRO

TITSHOMBA TI NGA KA MHAKA YA NUNGUNGULU LISIMU 106

“Va rivele Nungungulu, a Muhanyisi wabye”

Murindzeli 07.18 paj. 18 par. 13

‘Himani a yimako na Jehovha?’

¹³ A cikhati a vaIzrayeli va nga wona refu ni kuhatima ni musi a ku patsa ni zvikombiso lezvi zvin’wani zva ntamu wa Jehovha va no chava, hikwalaho Mosi i noya Citsungeni ca Sinayi a ya va wulawulela mahlweni ka Jehovha. (Ekso. 20:18-21) Kanilezvi Mosi i no hlwela le citsungeni. Zvi wa wonekisa ku khwatsi a vaIzrayeli va wa nga hi na ndlela ya ku pona le ciwuleni na va nga hi na murangeli wabye. Va wa ta kuyini? Zvi nga maha kambe na va tsumbile nguvhu Mosi, a murangeli wabye wa nyama. Va sangulile ku vilela va byela Aroni vaku: ‘Hi mahele vanungungulu lava va ta nga hi rangela mahlweni, hakuva Mosi loyi a hi humesileko le tikweni ga Gibhite, a hi zvi tivi lezvi zvi mu humeleleko.’ — Ekso. 32:1, 2.

Titshomba ta moya

Sentinela 15/07/06 paj. 13 par. 9

Timhaka-tshinya ta bhuku ga wunharu ni ga wumune ga Tisimu

106:36, 37. A mavhesi lawa ma yelanisa a ku khozela zvifananiso ni miphahlo yi mahelwako madhimoni. Lezvo zvi komba ku a munhu loyi a khozelako zvifananiso a nga gumesa a fumelwa hi madhimoni. A Bhibhiliya gi hi tlharihisa giku: “Ti woneleni ka zvifananiso”. — 1 Joh. 5:21.

18-24 KA NOVEMBRO

TITSHOMBA TI NGA KA MHAKA YA NUNGUNGULU TISIMU 107-108

“Bongani Jehovha hakuva mu nene”

Sentinela 15/04/07 paj. 20 par. 2

A bandla gi dhumisa Jehovha

² A bandla a hi ntlawa wu tlhanganako zvin’we basi. A hi hlengeletano ya lomu mugangeni, ne a hi ntlawa wa vanhu va mudhawuko wo fana kutani va randzako zvalezvi zva zvin’we, zvo kota bhola ni zvin’wani zvihungato. Wutshan’wini ga lezvo, a bandla gi dhumisa Jehovha. Kusukela kale zvi tshamisile zvezvo, kota lezvi a bhuku ga Tisimu gi zvi khanyisako. Lomu ka Lisimu 35:18 hi lera lezvi: “Ndzi ta ku bonga lomu bandleni ga hombe, ndzi ku dhumisa cikari ka citshungu ca hombe”. Niku a Lisimu 107:31, 32 li hi kuca lezvi: “Ngha a vanhu va bonga Jehovha hi kota ya lirandzo lakwe li nga mbheliko ni mitiro yakwe yo hlamalisa leyi a yi mahelako a vana va vanhu. Va wa mu tlakuse lomu hlengeletanweni ya vanhu, va mu dhumisa hubyeni ya madhota.”

Murindzeli 15/01/15 paj. 9 par. 4

Bonga Jehovha u katekiswa

⁴ Loku hi lava kuva ni mbilu yo bonga hi tlhela hi yi hlayisa, hi fanele ku chela kota ni ku bonga a makatekwa lawa Jehovha a hi nyikako hi tlhela hi ehleketa khwatsi hi mitiro yakwe ya lirandzo. Laha a mutsali wa tisimu a nga maha lezvo, i lo tala hi ku hlamala hi ku wona zvilo zvo tala zvo hlamalisa lezvi Jehovha a nga zvi mahile. — Lera Lisimu 40:5; 107:43.

Titshomba ta moya

Perspicaz vhol 2 paj. 396 par. 4

Mowabhi

Hi ndzhako ka cikhati, laha Dhavhidha wutsumbu a nga kari a fuma, ku wa hi ni yimpi cikari ka vaIzrayeli ni vaMowabhi. A vaMowabhi va no khozisiwa hi kumbhelela va tlhela va sindzisiwa ku hakhela a ndzuvo ka Dhavhidha. Zvi wonekisa ku khwatsi magumo ka yimpi, ku delwe a masochwa ya vaMowabhi ma ringanako tingoti timbiri. Zvo khwatsi Dhavhidha i no va etlelisa lahasi hi bhixa, a gumesa a va pima hi lingoti kasi ku wona ku hi vahi lava va tingoti timbiri va nga fanele ku dawa ni lava va lingoti lin’we va nga fanele ku tsikiwa na va hanya. (2 Sam. 8:2, 11, 12; 1 Kro. 18:2, 11) Zvo khwatsi hi kwalaha ka yimpi leyi, laha ‘Bhenaya, a n’wana wa Jehoyadha, . . . a nga daya vana vambiri va Ariyeli, wa le Mowabhi’. (2 Sam. 23:20; 1 Kro. 11:22) Lezvi Dhavhidha a hlulisileko zvona vaMowabhi hi ndlela yo hlamalisa zvi wa tatisa a ciphrofeto ca Bhalami ci nga prhrofetilwe ka 400 wa malembe ni ku hundza, caku: “Ku ta huma nyeleti hi ka Jakobe, ni nhonga ya wuhosi yi ta huma hi ka Izrayeli. I ta pandza a cikandza ca Mowabhi ni cirwarwa ca vontlhe a vafana va vhilinganya.” (Mitse. 24:17) Kuzvilava ku vile hi kota ya kuhlula loko a muyimbeleli wa tisimu a nga wula lezvaku “Mowabhi i basiya . . . yo hlambela” ya Nungungulu. — Lis. 60:8; 108:9.

25 KA NOVEMBRO–1 KA DEZEMBRO

TITSHOMBA TI NGA KA MHAKA YA NUNGUNGULU TISIMU 109-112

Seketela Jesu, a Hosi!

Sentinela 01/09/06 paj. 13 par. 6

Timhaka-tshinya ta bhuku ga wutlhanu ga Tisimu

110:1, 2 — Zvini lezvi a “Hosi ya [Dhavhidha]”, Jesu Kristu, yi nga maha a cikhati leci yi nga tshamile reveni ga cinene ga Nungungulu? Andzhako ka ku vhuxiwa hi ka vafileko, Jesu i no tlakukela tilweni a ya rindzela reveni ga cinene ga Nungungulu kala 1914 kasi a sangula ku fuma. Ndzeni ka cikhati leco, Jesu i wa fumela a valandzeli vakwe va totilweko, a va rangela ntirweni wa kuchumayela ni ku maha vapizani a tlhela a va longisela ku fuma naye Mufun’weni wakwe. — Mat. 24:14; 28:18-20; Luka 22:28-30.

Sentinela 01/04/00 paj. 18 par. 3

Lava va lwako na Nungungulu va nga ta hlula!

³ A vanhu va Jehovha va kari va vhukelwa kusukela ka zana ga malembe ga wu 20. Ka matiko yo tala, a vanhu va nga ni makungo ya hava va kari va zama ku betela kutani ku nyimisa a kuhangalasiwa ka mahungu ya manene ya Mufumo wa Nungungulu. A vanhu lavo va kucetelwa hi nala wa hina wa hombe, Sathani, loyi a ‘fambafambako a ku khwatsi i nghala yi bhongako, na a hlota wa ku mu khadamula’. (1 Ped. 5:8) Andzhako ka kumbhela ka “cikhati ci yimisilweko ca matiko”, hi 1914, Nungungulu i no yimisa a N’wana wakwe lezvaku ava Hosi yiswa ya misava, na a hi ni cileletelo leci: “Fuma cikari ka valala va wena.” (Luka 21:24; Lis. 110:2) Na a tirisa a ntamu wakwe, Kristu i no hlongola Sathani le tilweni a mu hoxa kusuhani ni misava. Kota lezvi a zvi tivako lezvaku a cikhati ci nga mu salela citsongwani, Dhiyabho i vhurisa a zanga yakwe ka maKristu ma totilweko ni vanghana vabye. (Kuv. 12:9, 17) I wuyelo muni gi vileko kona hi kuvhukelwa loko ko phindaphinda ka lava va lwako na Nungungulu?

Beneficie-se paj. 76 par. 2

Simama ku kula hi tlhelo ga moya!

A wusungukati ga ku tirisa a zvinyikiwo lezvi u nga nazvo gi patsa ku ranga hi wena u maha cokari. Wa tolovela ku ranga hi wena u ramba van’wani lezvaku mu tira zvin’we kuchumayeleni? Wa hlota tindlela ta ku vhuna lava va nga vaswa lomu bandleni a ku patsa ni vaswa ni lava va babyako? Wa ti nyiketela kasi ku basisa Salawu ya Mufumo kutani ku vhunetela migotsovanyanweni ni ka mitlhangano ya cipandze? Wa tolovela ku teka wuphayona go vhunetela? U ka ciyimo ca ku u nga tira kota phayona ga cikhati contlhe kutani ca ku u nga tira ka bandla gi nga ni cilaveko ca hombe? Wa ti karatela ku ingisa milayo ya Bhibhiliya ya lava va xuvako kuva malandza yo vhunetela ni madhota? A kutiyimisela ka wena ka ku vhuna van’wani ni ku vhumela wutihlamuleli zvi komba lezvaku wa kula hi tlhelo ga moya. — Lis. 110:3.

Titshomba ta moya

Perspicaz vhol. 2 paj. 559 par. 4

Civhumelwano

Civhumelwano ca kuva mupristi wo fana na Melkizedheki. A civhumelwano leci ci tsalilwe ka Lisimu 110:4, niku a mutsali wa bhuku ga Mahebheru i tirisile magezu lawo ka Kristu, ka Mahebheru 7:1-3, 15-17. A civhumelwano leci ci mahilwe hi Jehovha na Jesu Kristu basi. Kuzvilava Jesu i wa wula civhumelwano leci a cikhati leci a nga maha civhumelwano ca Mufumo ni valandzeli vakwe. (Luka 22:29) Jehovha i hlambanyile lezvaku Jesu Kristu, a N’wana wa le tilweni wa Nungungulu, i wa tava mupristi wo fana na Melkizedheki. Melkizedheki i vile hosi ni mupristi wa Nungungulu laha misaveni. Jesu Kristu i wa tava Mupristi wa Hombe ni Hosi le tilweni na ku nga hi laha misaveni. Jesu i nyikilwe zvikhundla lezvo zva ku a nga ta vhaletiwa hi mun’wani munhu, andzhako ka loku a tlhelile tilweni. (Mah. 6:20; 7:26, 28; 8:1) A civhumelwano leco ca kala kupindzuka, kota lezvi ka ku Jesu i ta maha zvontlhe na a rangelwa hi Jehovha kota Hosi ni Mupristi wa Hombe kala kupindzuka. — Mah. 7:3.

2-8 KA DEZEMBRO

TITSHOMBA TI NGA KA MHAKA YA NUNGUNGULU TISIMU 113-118

Hi nga mu tlhelisela yini Jehovha?

Sentinela 01/01/01 paj. 11 par. 13

Akiwa hi lirandzo

¹³ A magezu ya Jesu ma zvi veka laha kubaseni lezvaku a ku ranga hi fanele ku randza Jehovha. Hambulezvo, a hi pswaliwi na hi mu randza nguvhu Jehovha. Hi fanele ku ti karatela ku hlakulela lirandzo lelo. A cikhati leci hi sangulako ku gondza xungetano hi Jehovha, hi kokiwa hi lezvi hi zvi zwako. Hi kutsongwani-kutsongwani, hi gondza lezvi a nga longiselisa zvona misava kasi hi hanya ka yona. (Gen. 2:5-23) Hi gondza kambe lezvi Jehovha a tirisanisako zvona ni vanhu — a nga va tsukuli hambu a cikhati leci a ciwonho ci nga nghena ngangweni wa vanhu — kanilezvi a maha zvokari kasi ku hi tlhatlhisa. (Gen. 3:1-5, 15) I no va khoma hi ndlela ya yinene lava va nga hi vanhu vo tsumbeka, hi kugumesa a nyikela N’wana wakwe a pswalilweko yece kasi hi tsetselelwa zviwonho zva hina. (Joh. 3:16, 36) A kuengeteleka ka wutivi lego ku maha lezvaku hi mu bonga nguvhu Jehovha. (Isa. 25:1) Hosi Dhavhidha i wulile lezvaku i wa mu randza nguvhu Jehovha hi kota ya kukhatala kakwe ka lirandzo. (Lis. 116:1-9) Nyamutlha, Jehovha wa hi khatalela, a hi rangela, a hi tiyisa ni ku hi chavelela. Laha hi gondzako nguvhu xungetano hi yena, a lirandzo la hina hi yena yi kula nguvhu. — Lis. 31:23; Zef. 3:17; Rom. 8:28.

Sentinela 15/07/09 paj. 29 par. 4-5

Amukela hi matsenya — u nyika hi mbilu yontlhe

A muyimbeleli wa tisimu i wutisile lezvi: “Ndzi ta mu tlhelisela yini Jehovha hi kota ya wunene gontlhe legi a ndzi mahelako?” (Lis. 116:12) Zvini lezvi a nga mahelwe? Jehovha i wa mu vhunile ‘kukaratekeni ni kubayisekeni’ a tlhela a ‘tlhatlhisa muhefemulo [wakwe] kufeni’. Makunu, a muyimbeleli wa tisimu i wa lava ku tlhelisela Jehovha. Zvini a nga wa ta maha? I wulile lezvi: “Ndzi ta tatisa a zvifungo zva mina ka Jehovha”. (Lis. 116:3, 4, 8, 10-14) I no boha ku a nga cici a zvitsumbiso zvontlhe lezvi a nga mahele Jehovha ni ku tatisa kutani ku maha zvontlhe lezvi Jehovha a nga zvi lava kakwe.

Wenawu u nga maha zvo fana. Hi ndlela muni? U nga maha lezvo hi ku contlhe cikhati u hanya hi ndlela yi yelanako ni milayo ni matshinya ya milayo ya Nungungulu. Hikwalaho, ti karatele ku a ku khozela Jehovha zvi simama kuva nchumu wo ranga wutomini ga wena u tlhela u vhumela ku a moya wo basa wa Nungungulu wu ku rangela ka zvontlhe u mahako. (Mutsh. 12:13; Gal. 5:16-18) Hi lisine, u nga ta tshuka u zvi kota ku tlhelisela Jehovha zvontlhe lezvi a ku mahelako. Hambulezvo, loku Jehovha a wona lezvaku u maha zvontlhe zvi nga ntan’wini wa wena ntirweni wakwe zvi “maha a mbilu [yakwe] yi tsaka”. (Mav. 27:11) I thomo ga hombe a ku tsakisa Jehovha hi ndlela leyo!

Murindzeli 11.19 paj. 22-23 par. 9-11

Lezvi hi zvi gondzako ka bhuku ga Levhi

⁹ Cigondzo ca wumbiri: Hi tirela Jehovha hakuva hi bonga lezvi a hi mahelako. Kasi ku khanyisa a mhaka leyi, a hi kambisiseni a miphahlo ya kurula leyi yi nga mahiwa le Izrayeli wa kale. Lomu ka bhuku ga Levhi hi gondza lezvaku a muIzrayeli i wa maha a muphahlo wa kurula “kota munyikelo wa kubonga”. (Lev. 7:11-13, 16-18) A munyikelo lowo i wa wu maha hi ku zvi randza kakwe na ku nga hi cikurumeta. Hikwalaho, lowu ku wa hi munyikelo wa ku zvi randza lowu a munhu a nga wu maha hi kota ya ku randza Nungungulu wakwe, Jehovha. A nyama ya cihari leci va nga maha hi cona muphahlo wa kurula yi wa giwa hi munhu loyi a mahileko munyikelo, ni ngango wakwe, ni vapristi. Kanilezvi ku wa hi ni zvipandze zvo kari zva cihari leco zvi nga hi zva Jehovha basi. Hi zvihi zva kona?

¹⁰ Cigondzo ca wunharu: A lirandzo li hi kuca ku mahela Jehovha zvontlhe zvi nga ntan’wini wa hina. Jehovha i wa wona a mafura kota cona cipandze ca ci nene laha ka cihari. I tlhelile a wula lezvaku a zvipandze zvo kari, a ku patsa ni tiswa zvi wa hi zva lisima nguvhu. (Lera Levhi 3:6, 12, 14-16.) Hikwalaho Jehovha i wa tsaka nguvhu loku a muIzrayeli a maha munyikelo hi zviro lezvo zva lisima ni mafura hi kuzvirandza. Hi ndlela yo fana, Jesu Kristu hi kuzvirandza i mahele Jehovha hi muhefemulo wakwe wontlhe zvontlhe zvi nga hi ntan’wini wakwe hakuva i wa mu randza. (Joh. 14:31) Jesu i wa tsaka hi ku maha kurandza ka Nungungulu; i wa randza nguvhu a milayo ya Nungungulu. (Lis. 40:8) Jehovha i tsakile nguvhu hi ku wona Jesu na a mu tirela hi kuzvirandza!

¹¹ A ku fana ni miphahlo leyo ya kurula, hi tirela Jehovha hi kuzvirandza hakuva hi komba lezvi hi ti zwisako zvona hi yena. Hi mahela Jehovha zvontlhe zvi nga ntan’wini wa hina niku hi maha lezvo hakuva ha mu randza hi timbilu ta hina tontlhe. Jehovha a ngo ku tsaka hi ku wona a vakhozeli vakwe vo tala nguvhu na va mu tirela hi kuzvirandza na va kuciwa hi ku mu randza ni ku randza tindlela takwe. Jehovha a nga woni basi ni ku nyika lisima lezvi hi zvi mahako kanilezvi i tlhela a wona ni ku zvi nyika lisima lezvi zvi hi kucako. A ku alakanya lezvo zva hi chavelela nguvhu. Hi cikombiso, loku u khosahele u tlhela u nga ha zvi koti a ku maha lezvi u nga wa ta zvi lava ku maha tiyiseka lezvaku Jehovha wa ci zwisisa a ciyimo ca wena. Kuzvilava u nga ti wona na u nga zvi koti a ku mu mahela zvotala Jehovha, kanilezvi yena wa li wona a lirandzo leli li ku kucako ku mu mahela lezvi u zvi kotako. Wa tsaka hi ku amukela lezvi zvi nga ntan’wini wa wena.

Titshomba ta moya

Sentinela 15/05/12 paj. 22 par. 1-2

Zviwutiso zva vagondzi

A muyimbeleli wa tisimu i pimiselwe ku yimbelela, aku: “Ka lisima mahlweni ka Jehovha a kufa ka vatsumbekileko vakwe.” (Lis. 116:15) A wutomi ga mukhozeli mun’we ni mun’we wa lisine ga lisima nguvhu ka Jehovha. Hambulezvo, a magezu lawa ma nga ka Lisimu 116 a ma wuli a kufa ka munhu mun’we.

Hikwalaho, a zvi dzundzeki a ku tirisa a magezu ya Lisimu 116:15 ka kanelo ya marilo ya muKristu, hambu loku a file na a tsumbekile ka Jehovha. Hikuyini? Hi ku a magezu ya muyimbeleli wa tisimu ma na ni tlhamuselo wo eta. Ma wula lezvaku ka Nungungulu, a kufa ka ntlawa wontlhe wa vanhu va tsumbekileko kakwe ku bayisa nguvhu kakwe laha ka ku a nga ku vhumeleli lezvaku ku maheka. — Wona Lisimu 72:14; 116:8.

9-15 KA DEZEMBRO

TITSHOMBA TI NGA KA MHAKA YA NUNGUNGULU LISIMU 119:1-56

“A jaha gi nga yi basisisa kuyini a ndlela ya gona?”

Sentinela 01/11/87 paj. 18 par. 10

Xana u basile hi matlhelo wontlhe?

¹⁰ Ka Va Le Efesusi 5:5 Pawule i hi tlharihisile, aku: “Hakuva n’wina ma zvi tiva ni ku zvi zwisisa lezvaku a zvibhayi, ni vanhu va nga hlazvekangiko, ni lava va makangwa — ku nga ku khozela zvifananiso — va nga tava ni tshomba Mufun’weni wa Kristu ni wa Nungungulu.” Hambulezvo, lembe ni lembe a vanhu vo tala va kawukiwa kutani ku susiwa bandleni hi kota ya wubhayi — va “wonhela a miri [wabye]”. (1 Kor. 6:18) A kutala ka zvikhati, lezvo zvi maheka ntsena hi ku ngha a munhu a nga ‘ti woneli ni ku hlayisa a mhaka ya [Nungungulu]’. (Lis. 119:9) Hi cikombiso, a vamakabye vo tala va tsika ku ti wonela hi tlhelo ga mahanyela loku va hi ka maferiya. A va cheli kota hi ku tlhangana ni vamakabye niku va maha wunghana ni vanhu van’wani va nga ka maferiya va kalako va nga hi Vakustumunyu. Na va alakanya lezvaku ‘vanhu va vanene’, a maKristu yo kari ma ti patsa navo ka mitiro yo kari yo kala ku dzundzeka ka maKristu. Hi kufanana, a vokari va maha wunghana ga hombe ni vatiri-kuloni. A dhota go kari ga muKristu gi nova ni wunghana ga hombe nguvhu ni mutiri wakwe wa cisati laha kuza a bhangula ngango wakwe a ya tshama ni wasati loye! Lezvo zvi mahile ku a susiwa bandleni. Kunene, a Bhibhiliya gi wula lisine loku giku: “A ku tolovelana ni vakubiha zva bihisa a mahanyela ma nene”! — 1 Kor. 15:33.

Sentinela 15/06/06 paj. 25 par. 1

“Ndza zvi randza a zvikhumbuxeto zva wena”

JEHOVHA i ma nyika zvikhumbuxeto a malandza yakwe kasi ku ma vhuna ku yimisana ni zvikarato zva masiku lawa yo gumesa. A zvikhumbuxeto zvo kari, kutani zvitlharihiso, hi zvi kuma cikhati leci hi lerako Bhibhiliya a zvin’wani hi zvi kuma ka mihlamulo ya vamakabye kutani ka lezvi zvi gondziwako mitlhanganweni ya bandla. A kutala ka lezvi hi lerako ni ku zvizwa ka mitlhangano leyo a hi zva zviswa ka hina. Kuzvilava hi nghana hi gondzile zvo fana ka masiku ma hundzileko. Kanilezvi, kota lezvi hi tolovelako ku rivakelwa, zvi lava ku contlhe cikhati hi tshama hi ku alakanyisiwa a makungo, ni milayo, ni zvileletelo zva Jehovha. Hi fanele ku tsakela a zvikhumbuxeto zva Jehovha. A zvikhumbuxeto lezvo zvi maha ku hi tsaka zvi tlhela zvi hi vhuna ku veka kupima ka zvigelo lezvi zvi hi kucileko ku hi hanya wutomi gi kombako lezvaku ha chava Nungungulu. Hikwalaho, a muyimbeleli wa tisimu i yimbelele ka Jehovha, aku: “Ndza zvi randza a zvikhumbuxeto zva wena”. — Lis. 119:24.

Sentinela 15/04/10 paj. 20 par. 2

Jikisa matihlo ya wena ka zvilo zvi nga vhuniko nchumu!

² Hambulezvo, a zvilo lezvi hi zvi cuwukako zvonawu zvi nga hi vangela zvikarato. A kuzwanana loku ku nga kona cikari ka matihlo ni maalakanyo ka hombe nguvhu laha ka ku lezvi hi zvi wonako zvi nga tshuka zvi vhuxa kutani ku engetela a kunavela ni kuxuva ka mbilu ya hina. Hi hanya ka tiko gi nga ni mahanyela yo biha nguvhu gi tlhela gi chela kota hi kutitsakisa — a tiko gi fumiwako hi Sathani Dhiyabho. Hikwalaho, ku na ni mifota yo tala ni mahungu ya mawunwa ya ku hambu loku hi zvi wona hi cikhatanyana basi zvi nga olova ku zvi hi hambukisa ka lezvi zvi nga zvinene. (1 Joh. 5:19) Hikwalaho, zva zwisiseka lezvi a muyimbeleli wa tisimu a nga kombela Nungungulu, aku: “Jikisa matihlo ya mina kasi ma nga woni zvilo zvi nga vhuniko nchumu; ndzi hlayise ndzi hanya ndleleni ya wena.” — Lis. 119:37.

Titshomba ta moya

Sentinela 15/04/05 paj. 10 par. 2

Tsumba Mhaka ya Nungungulu

² A hloko ya mhaka ya Lisimu 119 lisima la mhaka kutani mahungu ya Nungungulu. A mutsali wa Lisimu 119 i tsalile a mavhesi lawa ya 176 wa wona hi ku landza a mabhesedhi ya ciHebheru, kuzvilava kasi zvi olova ku khoma lisimu leli hi hloko. Hi ciHebheru, ka 22 wa maestrofe ya lisimu 119, a estrofe yin’we ni yin’wani yi na ni 8 wa tilinya ti sangulako hi letra go fana. A lisimu leli li wulawula hi Nungungulu, ni mhaka yakwe, ni nayo, ni zvikhumbuxeto, ni lezvi hi nga mahisako zvona zvilo, ni zvileletelo, ni nongameto, ni zviboho zva kulamula, ni zvin’wani. Ka ndzima leyi ni leyi yi landzelako, hi ta kambisisa a Lisimu 119 na hi tirisa a wuhundzuluseli go tsumbeka ga Bhibhiliya. A ku ehleketa hi lezvi zvi humeleleko malandza ya Jehovha cikhatini ci hundzileko ni masikwini ya hina zvi nga engetela lezvi hi li bongisako zvona a lisimu leli li pimiselweko hi Nungungulu ni lezvi hi yi bongisako zvona a Mhaka ya Nungungulu, a Bhibhiliya.

16-22 KA DEZEMBRO

TITSHOMBA TI NGA KA MHAKA YA NUNGUNGULU LISIMU 119:57-120

Hi nga timiselisa kuyini a zvikarato?

Sentinela 15/06/06 paj. 20 par. 2

“A ndzo ku wu randza a nayo wa wena!”

² Kuzvilava wa ti wutisa ku: “A nayo wa Nungungulu wu wa mu chavelelisa kuyini a muyimbeleli wa tisimu?” Leci ci nga mu chavelela ku wa hi kutsumba loku a nga hi nako ka Jehovha. A ku tiva malulamiselo ya lirandzo ya nayo lowo zvi wa mu tsakisa hambu lezvi a nga vangelwa zvikarato hi valala. I wa zvi tiva ku Jehovha i wa mu mahele kululama. A ku tsika lezvo, a ku landzela a zvileletelo zva nayo wa Nungungulu zvi mahile a muyimbeleli wa tisimu ava wo tlhariha nguvhu ku hundza valala vakwe zvi tlhela zvi ponisa a wutomi gakwe. A ku ingisa nayo zvi wa mu nyika kurula ni livhalo li basileko. — Lis. 119:1, 9, 65, 93, 98, 165.

Sentinela 01/12/00 paj. 14 par. 3

Xana wa zvi randza nguvhu a zvikhumbuxeto zva Jehovha?

³ A muyimbeleli wa tisimu i wa zvi randza nguvhu a zvikhumbuxeto zva Jehovha laha ka kuza a yimbelela, aku: “Ndza hatlisa niku a ndzi hlweli ku hlayisa a zvileletelo zva wena. A tingoti ta vakubiha ti ndzi tsondzele kanilezvi a ndzi rivali a nayo wa wena.” (Lis. 119:60, 61) A zvikhumbuxeto zva Jehovha zvi hi vhuna ku timisela ku vhukelwa, hakuva ha tsumba lezvaku a Papayi wa hina wa le tilweni wa zvi kota ku tsema tingoti ta vhukelwa leti a valala va hina va hi bohako hi tona. Hi cikhati ca kona, Jehovha i ta hi tlhatlhisa ka zvikarato lezvo kasi hi chumayela Mufumo. — Mar. 13:10.

Sentinela 01/09/06 paj. 14 par. 4

Timhaka-tshinya ta bhuku ga wutlhanu ga Tisimu

119:71 — I wuyelo muni ga ginene gi nga vako kona loku hi xaniseka? A zvikarato zvi nga hi gondzisa ku hi mu tsumba nguvhu Jehovha, ni ku khongela kakwe hi mbilu yontlhe, ni ku gondza nguvhu Bhibhiliya hi tlhela hi hanya hi lezvi hi gondzako. Ahandle ka lezvo, lezvi hi mahako a cikhati leci hi xanisekako zvi nga komba a matshamela yo kari ya hava zvi lavako ku hi ma tsika. A kuxaniseka ku nga ta maha ku hi zangara loku hi vhumela lezvaku ku hi gondzisa.

Murindzeli 07.17 paj. 10 par. 3, 5

“Rila ni lava va rilako”

³ A Papayi wa hina wo zwela wusiwana, Jehovha, hi yena muchaveleli wa hina wa hombe loku hi kari hi rila. (Lera 2 Va Le Korinte 1:3, 4.) Hi yena a ku zwisisako khwatsi a kubayiseka ka hina a ku hundza vontlhe, niku i tsumbisa vanhu vakwe aku: ‘Hi mina wutsumbu ndzi mu chavelelako.’ — Isa. 51:12; Lis. 119:50, 52, 76.

⁵ Ha tiyiseka hi kumbhelela lezvaku Jehovha i ta hi vhuna. Hikwalaho contlhe cikhati hi tlhatlhekile ku khongela ka yena, hi mu tlhatlhela kontlhe a kubayisa loku hi ku zwako. A zvo ku hi chavelela a ku tiva lezvaku Jehovha wa ku zwisisa a kurila ka hina a tlhela a hi nyika kuchavelelwa loku hi ku lavako! Kanilezvi i zvi mahisa kuyini?

Titshomba ta moya

Sentinela 01/09/01 paj. 14 par. 5

Timhaka-tshinya ta bhuku ga wutlhanu ga Tisimu

119:96 — Ma wula yini a magezu lawa yaku: “Zvontlhe zvi mbheleleko zvi na ni magumo”? A muyimbeleli wa tisimu i wa wulawula hi kumbhelela hi kuya hi mawonela ya hina vanhu. Kuzvilava i wa alakanya lezvaku lezvi a vanhu va zvi pimisako xungetano hi kumbhelela zvi na ni magumo. A kuhambana ni lezvo, a zvileletelo zva Nungungulu a zvi nawo magumo lawo. A milayo yakwe ya tira ka zviyimo zvontlhe wutomini. A Nova Versão Internacional gi wula lezvi: “Ndzi wonile lezvaku a kumbhelela kontlhe ku na ni magumo, kanilezvi a ku na magumo ya cileletelo ca wena.”

23-29 KA DEZEMBRO

TITSHOMBA TI NGA KA MHAKA YA NUNGUNGULU LISIMU 119:121-176

Zvini u nga mahako kasi u nga swireki ahandle ka cigelo?

Murindzeli 06.18 paj. 16 par. 5-6

Tsika milayo ni matshinya ya milayo ya Nungungulu ma gondzisa livhalo la wena

⁵ Kasi ku a milayo ya Nungungulu yi hi vhuna, hi fanele ku maha zvo hundza ku yi lera ntsena kutani ku yi tiva. Hi fanele ku yi randza hi tlhela hi kombisa cichavo hi yona. A Bhibhiliya gi hi byela lezvi: ‘Vengani kubiha, mu randza zvinene.’ (Amosi 5:15) Kanilezvi, hi nga zvi mahisa kuyini lezvo? Hi fanele ku gondza ku wona zvilo hi mawonela ya Jehovha. Ehleketa hi mhaka leyi: Ti alakanyele na u nga etleli khwatsi ni wusiku. A dhokodhela wa wena a ku byela ku u fanele kuga zvakuga zva mavhitamina, u maha mitiro yo tiyisa miri, u tlhela u cica zvin’wani wutomini ga wena. Andzhako ka lezvo, u si landzela wusungukati gakwe, gi guma gi ku vhuna! U wa ta zvi wonisa kuyini zvileletelo zva dhokodhela loye?

⁶ Hi kufanana, a Muvangi wa hina i hi nyikile milayo kasi yi hi vhikela ka wuyelo ga hava ga ciwonho ni ku hi maha hiva ni wutomi gi nene. Hi cikombiso, a Bhibhiliya gi hi gondzisa ku a hi faneli ku hemba, ku kabhulara, ku yiva, ku maha wubhayi, kuva ni tihanyi, kutani ku maha zvilo zvi yelanako ni madhimoni. (Lera Mavingu 6:16-19; Kuv. 21:8) A cikhati hi wonako wuyelo gi nene ga ku ingisa Jehovha, a lirandzo la hina hi yena ni milayo yakwe lo kula.

Sentinela 15/04/93 paj. 17 par. 12

Vaswa, mu ti karatela ku maha yini?

¹² Ahandle ka zvontlhe lezvo, u ta gondza ku venga niku nyenya zvakubiha. (Lis. 97:10) U nga zvi vengisa kuyini a zvilo lezvi kusanguleni zvi nga wonekisako ku khwatsi zva tsakisa niku a zvi bihangi? U nga zvi venga hi ku ehleketa hi wuyelo ga zvilo lezvo! “Mu nga ti kanganyisi: Nungungulu a nga kalavelwi. Hakuva leci a munhu a ci byalako, i ta tshovela caleco; hakuva loyi a byalelako nyama yakwe, hi ka nyama yakwe i ta tshovela kubola, kanilezvi loyi a byalelako moya, hi ka moya i ta tshovela wutomi ga pindzukelwa.” (Gal. 6:7, 8) Loku u ringiwa ku maha wubhayi, ehleketa hi lezvi zvi nga zva lisima nguvhu, ku nga lezvi zvi to mu pandzisa zvona mbilu Jehovha Nungungulu. (Wona Lisimu 78:41.) Ehleketa kambe hi ku u kuma nyimba yo kala u nga yi lavi kutani ku kuma mababyi yo kota SIDA. Ehleketa hi lezvi u nga wa ta karatekisa zvona ni lezvi u nga wa ta luzisa zvona lirandzo leli u nga nalo hi wena n’winyi. Ku na ni mawuyawuya ma nga tekako cikhati co leha. A makabye wo kari wa cisati i wulile lezvi: “Mina ni nuna wa mina hi wa hlengela masango ni vanhu van’wani na hi nga se tivana. Hambu lezvi makunu hi nga maKristu lezvi hi zvi mahileko kale zvi vanga ciluse ni ku wulawulisana wukatini ga hina.” A cin’wani kambe, a hi faneli ku rivala lezvaku hi nga luza malungelo lomu hlengeletanweni kutani ku hi susiwa bandleni! (1 Kor. 5:9-13) Xana hi nga luza zvontlhe lezvo hi kota ya ku ti tsakisa zva cikhatanyana?

Titshomba ta moya

Murindzeli 01.23 paj. 2 par. 2

Tiyiseka lezvaku a Mhaka ya Nungungulu lisine

² Kota malandza ya Jehovha, ha tiyiseka lezvaku Jehovha i “Nungungulu wa lisine” niku contlhe cikhati i hi xuvela zva zvinene. (Lis. 31:5; Isa. 48:17) Ha zvi tiva lezvaku hi nga zvi tsumba lezvi hi lerako lomu ka Bhibhiliya. Ha kholwa lezvaku ‘a lisine ciseketelo ca mhaka ya [Nungungulu].’ (Lera Lisimu 119:160.) Ha vhumelelana ni lezvi a tlhari yo kari ya Bhibhiliya yi nga tsala. Yi tsalile lezvi: “A ku na nchumu lowu Nungungulu a wu wulileko wu nga mawunwa kutani wu to kala ku tatiseka. A vanhu va Nungungulu va nga zvi tsumba lezvi a zvi wulileko hakuva va tsumba mu Nungungulu loyi a zvi wulileko.”

30 KA DEZEMBRO–5 KA JANEIRO

TITSHOMBA TI NGA KA MHAKA YA NUNGUNGULU TISIMU 120-126

Va byalile na va rila, kanilezvi va tshovele na va tsakile

Sentinela 01/06/04 paj. 16 par. 10

Lava va dhumisako Nungungulu va katekisiwa

¹⁰ A cikhati leci hi vhumelako a kanga wa kuva vapizani, hilwa na Sathani. Jakobe 4:7 i hi tsumbisa lezvi: “Kanetani Dhiyabho, yena i ta mu tsutsuma”. Lezvo a zvi wuli lezvaku zva olova ku zvi maha. A ku tirela Nungungulu zvi lava a kutikarata ka hombe. (Luka 13:24) Kanilezvi ka Lisimu 126:5, a Bhibhiliya gi hi tsumbisa lezvi: “Lava va byalako timbewu na va kari va rila va ta tshovela na va kulungela hi kutsaka.” Kunene, a hi khozeli Nungungulu a nga kombisiko kubonga. Jehovha “muchachazeli wa lava va mu hlotako hi mbilu yontlhe” niku wa katekisa lava va mu dhumisako. — Mah. 11:6.

Murindzeli 11.21 paj. 24 par. 17

A kukholwa ka wena ku ta tiya kala magumo ke?

¹⁷ U felwe hi munhu u nga mu randza ke? Ti nyike cikhati ca ku tiyisa kukholwa ka wena hi ku lera matimu ya Bhibhiliya ya lava va nga vhuxiwa hi ka vafileko. Wa karateka hi lezvi a xaka go kari gi nga susiwa bandleni? Gondza nguvhu kasi u ti tiyisekisa lezvaku contlhe cikhati Jehovha i tsayisa hi ndlela ya yi nene. Ni wihi ndzhingo u kumanako nawo, londzowota ku tiyisa kukholwa ka wena. Khongela ka Jehovha u mu byela lezvi u ti zwisako zvona. U nga fambeli kule ni vamakabye; randza ku ti tlhanganisa navo. (Mav. 18:1) Maha mitiro yi to ku vhuna ku timisela, hambu loku wa ha rila loku u alakanyela lezvi zvi nga maheka. (Lis. 126:5, 6) Simama kuya mitlhanganweni, kuchumayeleni, ni ku lera Bhibhiliya. Tshama hi ku alakanya makatekwa lawa Jehovha a to ku nyika cikhatini ci tako. Laha u to wona lezvi Jehovha a ku vhunisako zvona, u taya u mu tsumba nguvhu u tlhela u kholwa ka yena.

Sentinela 15/07/01 paj. 18-19 par. 13-14

A hi simameni kutshovela!

¹³ A magezu ya Lisimu 126:5, 6 ma chavelela lava va tirako kutshoveleni ka Nungungulu, nguvhunguvhu lava va vhukelwako. Ma wula lezvi: “Lava va byalako timbewu na va kari va rila va ta tshovela na va kulungela hi kutsaka. Loyi a humako, hambu loku a huma na a rila, na a rwele a timbewu takwe, handle ko kanakana i ta wuya na a kulungela hi kutsaka na a rwele a minumbi yakwe.” A magezu ya muyimbeleli wa tisimu xungetano hi kubyala ni kutshovela ma komba lezvi Jehovha a nga va khatalelisa zvona ni ku va katekisa lava va wuyileko hi wukhumbini Bhabhuloni. A vaIzrayeli va tsakisilwe nguvhu hi kutlhatlhiswa kabye, kanilezvi kuzvilava va byalile timbewu na va rila ka masimu lawa ma nga tshamile 70 wa malembe na ma nga rimiwi. Hambulezvo, lava va nga simama ku byala ni ku aka va vile ni mihandzu ya yinene ya ntiro wabye.

¹⁴ Kuzvilava hi nga huma mihloti loku hi kumana ni zviringo kutani loku a vamakabye va xaniseka hi kota ya kungalulami. (1 Ped. 3:14) Ntirweni wa hina wa kutshovela, kuzvilava kusanguleni zvi nga hi karatela hi kuva zvi wonekisa ku khwatsi a hi na nchumu hi nga kombisako hi wona a kutikarata loku hi ku mahako kuchumayeleni. Kanilezvi, loku hi simama ku byala ni ku chetela mati, Nungungulu i ta kulisa, a kutala ka zvikhati hi ndlela yo hundza leyi hi nga yi rindzele. (1 Kor. 3:6) Lezvo zvi woneka khwatsi ka mihandzu leyi hi yi kumako hi ku avela maBhibhiliya ni mabhuku lawa ma seketelwako ka Bhibhiliya.

Titshomba ta moya

Achegue-se paj. 73 par. 15

Ntamu wo vhikela — “Nungungulu wuchavelo ga hina”

¹⁵ A kusangula ehleketa xungetano hi mhaka ya kuvhikelwa hi tlhelo ga miri. Hina vakhozeli va Jehovha ha zvi tiva lezvaku i ta hi vhikela kota ntlawa. Loku Jehovha i wa nga mahi lezvo zvi wa ta olova ku Sathani a hi fuvisa. Ehleketa hi lezvi: Sathani, a “hosana ya tiko legi”, zvi wa ta mu tsakisa nguvhu a ku lovisa a wukhozeli ga lisine. (Joh. 12:31; Kuv. 12:17) A tihosi to kari ta ntamu nguvhu ta laha misaveni ti betele ntiro wa hina wa kuchumayela ti tlhela ti zama ku hi fuvisa. Hambulezvo, a vanhu va Jehovha va simama va tiyile va tlhela va simama ku chumayela va nga karali! Hikuyini a mifumo ya ntamu yi nga tsandzeka ku nyimisa a ntiro wa ntlawa lowo wa wutsongwani wa maKristu, wa ku khwatsi a wu na muvhikeli? Hi lezvi Jehovha a hi vhikelako hi tipapa takwe ta ntamu! — Lis. 17:7, 8.