CIGONDZO 04

Himani Nungungulu?

Ka bhuku go gandliwa

Kusukela kale, a vanhu va khozela a vanungungulu vo tala. Hambulezvo, a Bhibhiliya gi wula ku kova ni Nungungulu mun’we “wa hombe nguvhu a ku hundza vontlhe a vanungungulu lava van’wani.” (2 Kronekele 2:5) Himani a Nungungulu loye? Kona cini ci mu mahako ava wa hombe a kuhundza vontlhe vanungungulu van’wani lava a vanhu va va khozelako? Ka cigondzo leci, u ta gondza u tiva lezvi Nungungulu a ti tivekisisako zvona ka wena.

1. Hi gihi a vito ga Nungungulu niku hi zvi tivisa kuyini ku i lava ku hi gi tiva?

Lomu ka Bhibhiliya, Nungungulu wa hi byela ku hi yena mani. I wula lezvi: “Hi mina Jehovha. Lego hi gona a vito ga mina.” (Lera Isaya 42:5, 8.) A vito “Jehovha” gi hundzuluselwa ka vito ga ciHebheru gi wulako ku: “I maha lezvaku zvi humelela”. Jehovha i lava ku hi tiva a vito gakwe. (Eksodhusi 3:15) Hi zvi tivisa kuyini lezvo? Hi ku lomu ka Bhibhiliya a vito gakwe gi kumeka 7000 wa makhati ni ku hundza!a A vito legi gaku Jehovha ga “Nungungulu wa lisine le hehla matilweni ni lahasi misaveni”. — Dhewuteronome 4:39.

2. Zvini lezvi a Bhibhiliya gi hi byelako hi Jehovha?

A Bhibhiliya gi wula lezvaku ka vanungungulu vontlhe va khozelwako hi vanhu, Jehovha hi yena yece Nungungulu wa lisine. Hikuyini? Hi zvigelo zvo tala. Jehovha wa hombe nguvhu niku hi yena yece a “Tlakukileko ku Hundza Vontlhe misaveni yontlhe”. (Lera Lisimu 83:18.) Hi yena “wa Ntamu Wontlhe”, lezvi zvi wulako ku i na ni ntamu wa ku maha ni cihi a ci lavako. I “vangile zvilo zvontlhe” — le tilweni ni laha misaveni. (Kuvhululelwa 4:8, 11) A kuhambana ni van’wani vanhu, Jehovha i kona kusukela kupindzukeni niku i tava kona kala kupindzuka. — Lisimu 90:2.

GONDZA ZVI ETA

Wona a kuhambana ku nga kona cikari ka zvikhundla zva Nungungulu ni vito gakwe go hambana ni wontlhe. U ta wona kambe lezvi Nungungulu a nga gi tivekisisa zvona a vito gakwe niku hikuyini a mahileko lezvo.

Wanuna a cuwukako tilweni ni wusiku. Ku tsalilwe a vito ga Jehovha kwalaho.

3. Nungungulu i na ni zvikhundla zvo tala, kanilezvi ova ni vito gin’we

Kasi ku tiva a kuhambana ku nga kona cikari ka cikhundla ca munhu ni vito gakwe, bisani VHIDHIO, mu gumesa mu bhula hi zviwutiso zvi landzelako.

VHIDHIO: I na ni zvikhundla zvo tala, kanilezvi ova ni vito gin’we (0:41)

Hi kwihi a kuhambana ka cikhundla, co kota ku “Hosi”, ni vito?

A Bhibhiliya gi wula lezvaku a vanhu va khozela vanungungulu vo tala ni tihosi to tala. Lerani Lisimu 136:1-3, mu gumesa mu bhula hi ciwutiso leci:

Himani a “Nungungulu wa vanungungulu” ni “Hosi ya tihosi”?

4. Jehovha i lava ku u tiva vito gakwe u tlhela u gi tirisa

Cini ci kombako ku Jehovha i lava ku u tiva a vito gakwe? Bisani VHIDHIO, mu gumesa mu bhula hi ciwutiso ci landzelako.

VHIDHIO: Nungungulu i na ni vito? — Cipandzana (3:11)

Mufota wa lomu ka vhidhio ‘Nungungulu i na ni vito? — Cipandzana.’ Wanuna a cuwukako vito ga Nungungulu, gaku Jehovha, ka Lisimu 83:18 lomu ka Bhibhiliya ga ‘Versão Rei Jaime’ ga 1611, hi ciNgiza.

Hi mawonela ya wena, hikuyini Jehovha a lavako lezvaku hi tiva a vito gakwe?

Jehovha i lava ku a vanhu va tirisa vito gakwe. Lerani Va Le Roma 10:13, mu gumesa mu bhula hi zviwutiso lezvi:

Hikuyini zvi nga zva lisima a ku tirisa vito ga Nungungulu gaku Jehovha?
U ti zwisa kuyini loku a wokari a alakanya a vito ga wena a tlhela a gi tirisa?
U alakanya ku Jehovha i ti zwisa kuyini loku u tirisa a vito gakwe?

5. Jehovha i lava ku u maha munghana wakwe

A wasati wo kari wa le Camboja waku hi Soten i wula lezvaku a ku tiva vito ga Nungungulu zvi mu vhunile ku ava ni “litsako la hombe nguvhu”. Bisani VHIDHIO, mu gumesa mu bhula hi ciwutiso ci landzelako.

VHIDHIO: Ndzi lavetele a Nungungulu wa lisine (8:18)

Mifota: Mifota ya vhidhio ‘Ndzi lavetele a Nungungulu wa lisine.’ 1. Hi Soten a tshamileko lahasi ka sinya lomu khwatini a cuwuka tilweni, a khongela ka Nungungulu wa lisine. 2. Hi Herold a gondzisako Soten lezvaku a vito ga Nungungulu hi Jehovha.

A ku tiva a vito ga Nungungulu zvi mu khumbisile kuyini Soten?

Kasi u chata wunghana ni munhu, u ranga hi ku tiva vito gakwe. Lerani Jakobe 4:8a, mu gumesa mu bhula hi zviwutiso lezvi:

Jehovha i ku kuca ku u maha yini?
A ku tiva vito ga Nungungulu ni ku gi tirisa zvi ku vhunisa kuyini a kuva munghana wakwe?

A VOKARI VE: “Nungungulu mun’we, hikwalaho a zvizi zvi lava ku hi mu vitana hi vito.”

Wa kholwa ku a vito ga Nungungulu hi Jehovha?
U nga mu tlhamuselisa kuyini munhu lezvaku Jehovha i lava ku hi tirisa a vito gakwe?

LEZVI HI NGA GONDZA

A vito ga Nungungulu mun’we wa lisine hi Jehovha. Yena i lava lezvaku hi tiva a vito lego hi tlhela hi gi tirisa kasi hi maha vanghana vakwe.

Zviwutiso zva kuvhuxeta

Cini ci mahako ku Jehovha a hambana ni vanungungulu vontlhe lava van’wani va khozelwako hi vanhu?
Hikuyini hi faneleko ku tirisa a vito ga Nungungulu?
Zvini zvi kombako ku Jehovha i lava ku uva munghana wakwe?

Ndzi mbhetile a cigondzo leci hi dhiya:

Zama ku maha lezvi

Loku u wulawula hi Nungungulu, tirisa a vito gakwe gaku Jehovha.

Zvin’wani:

Your other goal

GONDZA ZVIN’WANI

Wona ntlhanu wa zvigelo zvo zwala zvi kombako ku Nungungulu i kona.

“Xana Nungungulu i kona?” (Ndzima yi nga ka jw.org)

Wona ku hikuyini zvi zwalako a ku kholwa ku Nungungulu i kona kusukela kale ni kale.

“Nungungulu i vangilwe hi mani?” (A Murindzeli, 1 ka Agosto wa 2014)

Wona ku hikuyini hi faneleko ku tirisa a vito ga Nungungulu, hambu lezvi zvi kalako zvi nga tiveki lezvi gi nga vitanisiwa zvona kale.

“Hi mani Jehovha?” (Ndzima yi nga ka jw.org)

Xana Nungungulu a nga na mhaka ni lezvi hi mu vitanisako zvona? Wona ku hikuyini hi nga wulako lezvaku ova ni vito gin’we basi.

“Nungungulu i na ni mavito mangani?” (Ndzima yi nga ka jw.org)

a Kasi ku tiva zvin’wani xungetano hi tlhamuselo wa vito ga Nungungulu ni leci ci nga maha ku a vahundzuluseli vo kari va gi susa ka maBhibhiliya yabye, wona a Apendise A4 ka Wuhundzuluseli ga Misava Yiswa ga Bhibhiliya go Basa.