CIGONDZO 42
Zvini lezvi a Bhibhiliya gi zvi wulako xungetano hi wugwendza ni ku chadha?
Ka midhawuko yo kari, a vanhu va alakanya ku a munhu a nge kumi litsako loku a nga chadhi. Hambulezvo, a hi vontlhe vanhu va chadhileko va nga ni litsako ne a hi vontlhe vanhu va kalako va nga chadhangi va kalako va nga hi na litsako. A lisine ku a Bhibhiliya gi wula ku a wugwendza ni ku chadha zvontlhe cinyikiwo ca Jehovha.
1. Hi wahi mabhindzu yo kari ya kuva gwendza?
A Bhibhiliya gi wula lezvi: ‘Loyi a chadhako i maha khwatsi, kanilezvi loyi a nga chadhiko i maha khwatsi nguvhu.’ (Lera 1 Va Le Korinte 7:32, 33, 38.) Loyi a kalako a nga chadhi “i maha khwatsi nguvhu” hi ndlela muni? A maKristu ma nga magwendza a ma na cilaveko ca ku khatalela a nuna kutani sati. Hikwalaho, a kutala ka cikhati ma na ni kutlhatlheka ka hombe. Hi cikombiso, a vokari va zvi kota ku andzisa a ntiro wabye ka Jehovha hi tindlela to tsakisa, to kota ku endza vaya ka tiko gin’wani kasi va ya chumayela a mahungu ya manene. A ca lisima ka zvontlhe, va ngava ni cikhati co tala ca ku tiyisa a wunghana gabye na Jehovha.
2. Hi wahi mabhindzu yo kari ya ku chadha hi nayo?
A kuchadha ni ku nga chadhi zvontlhe zvi na ni mabhindzu ya zvona. A Bhibhiliya gi wula ku “a vambiri va chukwana a ku hundza mun’we”. (Mutshawuteli 4:9) Lezvo lisine, nguvhunguvhu ka maKristu lawa ma tirisako a wusungukati legi a Bhibhiliya gi nyikako xungetano hi wukati. A nuna ni sati lava va chadhako hi nayo va tsumbisana lezvaku contlhe cikhati va ta randzana, va kombisana cichavo va tlhela va hlayisana. Kota wuyelo ga kona, a kutala ka zvikhati va tizwa a wukati gabye na gi tiyile a ku hundza lava va nge halahala va hanya zvin’we na va nga chadhangi hi nayo. Niku a vana vabye va ta tizwa na va vhikelekile.
3. Jehovha i gi wonisa kuyini a wukati?
A cikhati leci Jehovha a nga chadhisa vanhu vo sangula, i te: “A wanuna i ta siya papayi wakwe ni mamani wakwe a namarela ka sati wakwe.” (Genesisi 2:24) Jehovha i lava lezvaku a nuna ni sati va randzana va tlhela va tshama zvin’we a wutomi gabye gontlhe. O vhumela ku va tlhatlha wukati ntsena loku a nuna kutani sati a maha wubhayi. Ka ciyimo leco, Jehovha i nyika loyi a nga gohelwa a kutlhatlheka ka ku boha ku i ta tlhatlha wukati kutani ahihi.a (Matewu 19:9) Jehovha a nga vhumeli ku a maKristu mava ni sati kutani nuna wo hundza mun’we. — 1 Timote 3:2.
GONDZA ZVI ETA
Wona lezvi u nga li kumisako zvona a litsako ni lezvi u nga mu tsakisisako zvona Jehovha, kani u gwendza kutani u chadhile.
4. Ci tirise khwatsi a cinyikiwo ca wena ca wugwendza
Jesu i wa wona a wugwendza na ci hi cinyikiwo. (Matewu 19:11, 12) Lerani Matewu 4:23, mu gumesa mu bhula hi ciwutiso leci:
Jesu i ci tirisisile kuyini a cinyikiwo cakwe ca wugwendza kasi ku tirela Papayi wakwe ni ku vhuna van’wani?
A maKristu ma nga kala ku chadha ma nga kuma litsako hi ku tirisa khwatsi a wugwendza gabye a ku khwatsi hi lezvi Jesu a mahileko. Bisani VHIDHIO, mu gumesa mu bhula hi ciwutiso ci landzelako.
A maKristu ma nga gi tirisisa kuyini a wugwendza ga wona hi ndlela ya yinene ntirweni wa Jehovha?
U wa zvi tiva?
A Bhibhiliya a gi wuli ku a munhu i fanele ku chadha na a hi ni malembe mangani. Kanilezvi, gi kuca munhu lezvaku a rindzela kala a hundza “ka tanga ya wun’wanana”, ku nga cikhati leci a kunavela ka masango ku nga ka hombe nguvhu laha ka ku ku nga maha a munhu muswa a maha ciboho co kala ci nga hi cinene. — 1 Va Le Korinte 7:36.
5. Hlawula khwatsi a munhu wo chadha naye
A ku hlawula nuna kutani sati cin’we ca zviboho zva lisima wutomini. Lerani Matewu 19:4-6, 9, mu gumesa mu bhula hi ciwutiso leci:
Hikuyini a muKristu a nga faneliko ku tsutsumela ku chadha?
A Bhibhiliya gi nga ku vhuna a ku tiva a matshamela lawa u faneleko ku ma lavetela ka loyi u to chadha naye. A ca lisima ka zvontlhe, lava a munhu loyi a randzako Jehovha.b Lerani 1 Va Le Korinte 7:39 na 2 Va Le Korinte 6:14. Hi kulandzela, bhulani hi zviwutiso lezvi:
Hikuyini hi faneleko ku chadha ntsena ni muKristu-kulori?
U alakanya ku Jehovha i ta ti zwisa kuyini loku u hlawula ku chadha ni munhu a kalako a nga mu randzi?
Loku a zvihari zvimbiri zvo hambana nguvhu zvi bohiwa kanga wun’we zvi ta xaniseka. Hi kufanana, loku a muKristu a chadha ni munhu a nga khozeliko Jehovha i tava ni zvikarato zvo tala
6. Wona wukati a ku fana ni lezvi Jehovha a gi wonisako zvona
Le Izrayeli wa kale, a vavanuna vo kari va wa tlhatlha wukati ni vasati vabye hi zvigelo zva makangwa. Lerani Malaki 2:13, 14, 16, mu gumesa mu bhula hi ciwutiso leci:
Hikuyini Jehovha a zvi vengako a ku tlhatlha wukati na ku nga hi na cigelo co zwala?
A wubhayi ni kutlhatlha wukati zvi mu nehela kuxaniseka ka hombe a nuna kutani sati a wonhelweko ni vanana
Bisani VHIDHIO, mu gumesa mu bhula hi ciwutiso ci landzelako.
Loku u chadhile ni munhu a nga khozeliko Jehovha, zvini u nga mahako kasi a wukati ga wena giva ni litsako?
7. Landzela a milayo ya Jehovha ya wukati
Zvi nga lava ku a munhu a ti karata nguvhu kasi ku hanya hi milayo ya Jehovha ya wukati.c Kanilezvi Jehovha wa va katekisa lava va hanyako hi yona. Bisani VHIDHIO.
Lerani Mahebheru 13:4, mu gumesa mu bhula hi zviwutiso lezvi:
U alakanya ku a milayo ya Jehovha ya wukati ya olova? Hikuyini?
Ka matiko yo tala, a mufumo wu lava ku a vanhu va tsalisa a muchadho wabye ni ku tlhela va tsalisa loku va tlhatlha wukati. Jehovha i lava ku a maKristu ma ingisa a milayo leyo. Lerani Titusi 3:1, mu gumesa mu bhula hi ciwutiso leci:
Loku u chadhile, wa tiyiseka ku a muchadho wa wena wa tiviwa wuhosini?
A WOKARI A NGA HA WUTISA KU: “Hikuyini ndzi faneleko ku tsalisa a muchadho wa mina? A nuna ni sati a ve nge hanyi zvin’we na va nga tsalisangi?”
U wa ta mu hlamulisa kuyini?
LEZVI HI NGA GONDZA
A wugwendza ni ku chadha zvinyikiwo zva Jehovha. A magwendza ni lava va chadhileko va nga kuma litsako wutomini gabye loku va hanya hi kuya hi kurandza ka Jehovha.
Zviwutiso zva kuvhuxeta
A munhu a nga gi tirisisa kuyini khwatsi a wugwendza gakwe?
Hikuyini a Bhibhiliya gi wulako ku hi fanele ku chadha ntsena ni munhu a tirelako Jehovha?
Hi cihi a cigelo ca cin’we ca Bhibhiliya ci nga mahako ku a vanhu va tlhatlha wukati?
GONDZA ZVIN’WANI
Zvi wula yini a ku ‘chadha ntsena Hosini’?
“Zviwutiso zva vagondzi” (A Murindzeli wa 1 ka Julho wa 2004)
Sixtira a tivhidhio timbiri to koma ti nga ku vhunako a ku maha a zviboho zvinene xungetano hi kugangisana ni kuchadha.
Wona ku hikuyini a makabye wo kari a alakanyako a ku lezvi Jehovha a mu nyikileko zva lisima nguvhu a ku hundza ni wihi nchumu a wu tsikileko.
Zvini lezvi a munhu a faneleko ku ehleketa hi zvona loku a lava ku tlhatlha wukati kutani ku hambana ni nuna wakwe kutani sati wakwe?
“Maha zvontlhe u zvi kotako kasi a wukati ga wena gi dzundzeka” (A Murindzeli, Dezembro wa 2018)
a Wona Tlhamuselo wa wu 4 wu wulawulako hi kuhambana loku ku nga mahiwangi wubhayi.
b Ka midhawuko yo kari, a vapswali hi vona va hlawulako a munhu a faneleko ku chadha ni n’wana wabye. Loku zvi tshamisile lezvo ka wena, a vapswali lava va nga ni lirandzo, va cuwuka ku a munhu wa kona wa mu randza Jehovha; a va cuwuki ku i na ni mali kutani i gondzile nguvhu.
c Loku u kari u hanya ni munhu u kalako u nga chadhangi naye hi nayo, a ku mu tsika kutani ku chadha naye ciboho ca wena.