“Va wa lava lezaku nzi kuma a lisine hi nzoce”

KALE KA MINA:

Nzi pswalilwe Santo Domingo, le República Dominicana, na nzi hi xigumanzeni laha ka mune wa vana. A vapswali va mina va wa gonzile nguvu, hikwalawo va wa lava ku wundla vana vabye xikari ka vanhu va va nene ni vo tsumbeka. Mune wa malembe mahlweni ka kuva nzi pswalilwe, a vapswali va mina va lo kumana ni murumiwa wa muMórmon. Lezi va nga mu wona kuva jaha go ambala khwatsi ni go rula, va lo boha ku a ngango wa hina wuva wona wo ranga xihlaleni lexo a ku nghena ka Igreja de Jesus Cristo dos Santos dos Últimos Dias, kutani Chechi ya vaMórmon.

Laha nzi ngaya nzi kula, nzi wa xalaliswa nguvu hi mitiro leyi yi nga mahiwa chechini nzi tlhela nziva ni xichawo hi lezi a vaMórmon va nga wulawula nguvu hi wutomi ga ngango ni mahanyela ma nene. Nzi wa tizwa matshanza hi kuva muMórmon, hikwalaho nzi wa xuva kuva murumiwa.

A xikhati nzi nga tlhanganyisa a 18 wa malembe, a ngango wa hina wu lo rura wuya Estados Unidos na wu lava lezaku nzi engetela a zigonzo za mina. Loku ku hunzile a xipimo xa lembe, hi enzelwe hi titiya wa mina ni nuna wakwe le Florida, lava va nga hi Timboni ta Jehova. Va lo hi ramba lezaku hi famba navo ka gotsovanyano wu seketelwako ka Biblia. Nzi hlamalisilwe nguvu hi ku wona vanhu vontlhe matlhelweni ya mina na va vulula mitsalo va tlhela va tsala zo kari kasi ku zi alakanya. Hikwalaho nzi lo kombela lapizera ni phepha, nzi sangula ku maha zalezo na minawu.

Anzhako ka gotsovanyano, titiya na tio va wulile lezaku lezi nzi nga lava ku maha murumiwa, va wa ta nzi vuna ku gonza zokari xungetano hi Biblia. Nzi alakanyile ku lawo ma wa hi mawonela ma nene hakuva ka xikhati lexo nzi wa tiva nguvu a Bhuku ga Mórmon ku hunza a Biblia.

LEZI A BIBLIA GI NGA CICISA ZONA A WUTOMI GA MINA:

Ka mabhulo lawa hi nga hi nawo hi telefone xungetano hi Biblia, titia na tio va wa tshama hi ku nzi kuca ku ecanyisa lezi nzi zi kholwako ni lezi a Biblia gi zi gonzisako. Va wa lava lezaku nzi kuma a lisine hi nzoce.

Nzi wa kholwa zilo zo tala xungetano hi kukholwa ka vaMórmon, kanilezi nzi wa nga tiyiseki ku lezo za zwanana ni Mitsalo ke. Titiya i nzi rumelele a revista Despertai! ga 8 ka Novembro wa 1995, gi humesiwako hi Timboni ta Jehova, legi gi nga hi ni tinzima ti nga wulawula hi kukholwa ka vaMórmon. Nzi hlamalile hi ku wona lezaku nzi wa nga ti tivi a tigonzo to tala ta vaMórmon. Lezo zi nzi mahile nzi nghena ka Web site ya vaMórmon kasi nzi tiyiseka lezaku lezi nzi nga zi gonza ka Despertai! zi wa hi lisine ke. Zi wa hi lisine, niku a zilo lezo zi dlunyatekile nguvu kambe a xikhati lexi nzi nga enzela a muzeu wa vaMórmon le Utah.

Nzi wata na nzi kholwa lezaku a Bhuku ga Mórmon ni Biblia za zwanana. Kanilezi a xikhati nzi nga sangula ku gonza a Biblia hi mbilu yontlhe, nzi wonile kuhambana xikari ka tigonzo ta vaMórmon ni lezi a Biblia gi zi wulako. Hi xikombiso, ka Ezekieli 18:4, a Biblia gi wula lezaku a muhefumulo wafa. Kanilezi, a Bhuku ga Mórmon, ka Alma 42:9 gi ngalo: “A muhefumulo a wu ngefi.”

Ahandle ka kulwisana ka tigonzo, nzi wa djudjiwa kupima kambe hi xihlawulela xa tixaka lexi xi gonzisiwako hi vaMórmon. Hi xikombiso, a vaMórmon va gonziswa lezaku a simu ga Edeni gi wa hi Condado de Jackson, Missouri, le Estados Unidos. Niku a varangeli va chechi ve ngalo a xikhati lexi “a Mufumo wa Nungungulu wu to sangula ku fuma, a mujeke wa Estados Unidos wu ta ku pelupelu woce wu tlhatlhisa vanhu wu tlhela wu ecanyisa a tifanelo tabye.”

Nzi wa ti wutisa ku a tiko ga mina ga mabeleko — kutani ni gihi ginwani tiko — gi wa taku yini ke. Nzi lo kumbuka a mhaka leyi ka bhulo nzi ngava nago ka wusikwana go kari nzi nga fonelwa hi jaha ga muMórmon gi nga kari gi gonziswa a wurumiwa. Nzi lo gi wutisa hi kukongoma a ku xana gi wa ta vumela kulwa ni vaMórmon-kulobye loku ku wo tshuka ku vuka yimpi xikari ka tiko gakwe ni legi gabye ke. Nzi hlamalile nguvu a xikhati gi ngaku ina! Nzi lo hlola hi kuetisa a tigonzo ta kukholwa ka mina nzi tlhela nzi wutisa a vahombe va Chechi ya Mórmon. Va lo nzi byela lezaku a mihlamulo ya ziwutiso za mina yi yelana ni mifihlakalo leyi yi to tiveka hi kufamba ka xikhati loku a ku wonekela ku woninga.

Hi ku khunguvuvanyisiwa hi mitlhamuselo yabye, nzi lo ti cuwuka khwatsi nzi tlhela nzi hlola a zigelo za mina za ku lava ku maha murumiwa wa muMórmon. Nzi polile lezaku lexi xi nga nzi maha nzi lava kuva murumiwa hi ku nzi wa lava ku vuna vanhu. A xinwani xigelo xi nga nzi maha nzi lava kuva murumiwa hi ku nzi wa lava lezaku a vanhu va nzi kombisa xichawo. Kanilezi xungetano hi Nungungulu nzi wa nga tivi nchumu. Hambu lezi nzi nga lerile Biblia zikhati zo tala, hi lisine nzi wa nga gi nyiki lisima. Nzi wa nga tivi nchumu mayelano ni kungo ga Nungungulu xungetano hi misava kutani vanhu.

LEZI NZI NGA VUNEKISA ZONA:

Ka xigonzo xa mina xa Biblia ni Timboni ta Jehova, nzi gonzile zilo zo tala, zo kota vito ga Nungungulu, lezi zi humelelako hi hina loku hifa, ni xipanze lexi Jesu a nga naxo kutatisekeni ka kungo ga Nungungulu. Makunu nzi wa sangulile a ku gi tiva khwatsi a bhuku legi, niku zi wa nzi tsakisa nguvu a ku bhulela vanwani a lisine leli nzi nga li gonza. Nzi wa zi tiva hi kale ku Nungungulu i kona, kanilezi zalezi hi kona nzi nga zi kota ku bhula naye hi mukhongelo kota Munghana wa mina wa hombe. Nzi lo bapatizwa kota Mboni ya Jehova hi 12 ka Julho wa 2004. Loku ku hunzile ntlhanu wa tihweti ni yinwe nzi lo sangula ku tira kota mutireli wa wuKristu wa xikhati xontlhe.

Hi ntlhanu wa malembe, nzi tirile tsinza ga misava yontlhe ga Timboni ta Jehova le Brooklyn, Nova York. Zi nzi xalalisile nguvu a kuva nzi vunetela ka kumahiwa ka maBiblia ni mabhuku ma seketelwako ka Biblia lezaku ma vuna timiliyoni ta vanhu misaveni yontlhe, niku nza ha simama nzi xalala hi ku vuna vanwani a ku gonza xungetano hi Nungungulu.