“Nzi lo sangula ku ti wutisa ku kasi a wutomi legi gi nzi yisa kwihi ke”

KALE KA MINA:

Nzi kulele Warialda, ku nga xidoropana le tikweni ga Nova Gales do Sul. Tikweni legi ga Warialda ku fuyiwa zihari zo hambanahambana zo kota tiyivu ni tihomu; ku tlhela ku rimiwa mavele. A doropa ga Warialda gi na ni basiselelo, niku a gi na wugevenga nguvu.

Hi khume ga vana. Mina kota nhonzo, laha nzi nga hi ni 13 wa malembe, nzi lo sangula ku tira kasi nzi vunetela ku hlayisa ngango wa hina. Kota lezi nzi nga gonzangiko nguvu, nzi wa maha mitiro ya lomu mafusini. A xikhati lexi nzi nga tlhanganyisa a 15 wa malembe, nzi wa tira kota murisi, nzi hlayisa ni ku gonzisa mahaxi.

A ku tira lomu mafusini hi tlhelo go kari ku wa hi makatekwa, kanilezi ku wa hi xikarato kambe. Nzi wa xalala nguvu hi ntiro wa mina ni wutshamu ga kona. Nzi wa tshama nzi wora nzilo ni wusiku na nzi kari nzi wona a hweti ni tinyeleti nzi tlhela nzizwa kunuhela ka tisinya ku nga nehiwa hi zimoyana za wusiku. Nza alakanya a siku go kari nzi nga ti byela lezaku a zilo zontlhe lezi zo saseka zi fanele ku ngha zi vangilwe hi Munhu wokari. Hambulezo, nzi wa hi xikari ka vanhu va nga hi ni mahanyela ya hava. Nzi wa tolovela kuzwa vanhu na va rukatela, niku zi wa nga karati ku kuma masigari. A kudzaha ni kurukatela zi lo tekela kuva zakuga za siku ni siku wutomini ga mina.

Laha nzi nga hi ni 18 wa malembe nzi lo rura nziya Sydney. Nzi lo zama ku nghena wusochweni. Hambulezo, kota lezi nzi nga gonzangiko a va vumelangi. Nzi lo kuma ntiro zonake nzi tshama lembe ginwe. Ku’ve ka xikhati xalexo nzi nga tlhangana ni Timboni ta Jehova hi khati go sangula. Nzi lo rambiwa kuya wona mutlhangano wabye niku zalezo nzi lo tekela ku zi wona lezaku va wa gonzisa lisine.

Hambulezo, loku ku hunzile xikhatana nzi lo tlhela mafusini, nzi gumesa nziya doropeni ga Goondiwindi, le Queensland. Nzi lo kuma ntiro, nzi gumesa nzi chada. A ya ku biha hi ku tlhela nzi sangula kunwa.

Mina ni sati wa mina hi lo pswala vana vambiri. Loku ku pswalilwe vana lavo, nzi lo sangula ku ti wutisa ku kasi a wutomi legi gi nzi yisa kwihi ke. Nzi lo alakanya lezi nzi nga zi zwile mitlhanganweni ya Timboni ta Jehova le Sydney, zonake nzi tekela ku zi wona na zi hi chukwana ku maha xokari.

Nzi lo kuma a revista ga kale ga Murinzeli, gi nga hi ni makhero ya tsinza ka Timboni ta Jehova ta le Austrália. Nzi lo va tsalela palilo. Va lo hlamula hi ku rumela a Mboni yinwe ya liranzo ni wunene. Zalezo hi lo tekela ku sangula ku gonza a Biblia.

LEZI A BIBLIA GI NGA CICISA ZONA A WUTOMI GA MINA:

Laha nzi ngaya nzi gonza Biblia, nzi lo wona lezaku nzi wa fanele ku cica mahanyela ya mina. A vesi ga Biblia gi nzi khumbileko nguvu i 2 Va Le Korinte 7:1. A vesi legi gi hi kuca lezaku ‘hi ti hlaza kunyenyezeni kontlhe ka nyama.’

Nzi lo ti mahela xiboho xa ku tsika ku dzhaha ni ku nyima ku kunwa nguvu. Kota lezi nzi nga kari nzinwa ni ku dzaha hi malembe yo tala, a zi nzi olovelangi ku tsika. Kanilezi, nzi wa ti yimisele kuva ni mahanyela ma tsakisako Nungungulu. A xivuno xa hombe ka zontlhe ku’ve ku tirisa a tshinya ga nayo gi kumekako ka Va Le Roma 12:2. Gi ngalo: “Mu nga pimanyisi a tiko ga nguva leyi; kanilezi ngha mu hunzuluswa hi ku mahiwa luswa a kupima ka nwina.” Nzi wonile lezaku kasi nzi zi kota ku tsika kudzaha ni kunwa, nzi wa fanele ku cica kupima ka mina nzi tlhela nzi wona tolovelo lowu kota lezi Nungungulu a wu wonisako zona — wa hohlota. Hi ku vuniwa hi yena, nzi zi kotile ku tsika kudzaha ni kunwa nguvu.

Hambulezo, a xikarato xa hombe ku’ve ku tsika tihlamba. Nzi wa gi tiva a wusungukati ga Biblia gi nga ka Va Le Efesusi 4:29, gi nge ngalo: “A kuwulawula ko nyenyeza ngha ku nga humi milonwini ya nwina.” Hambulezo, a nzi hatlangi nzi zi kota kuva ni mawulawulela ma basileko. Nzi vunilwe hi ku ehlekela hi magezu ma kumekako ka Isaya 40:26. Xungetano hi matilo ma teleko hi tinyeleti, a vesi legi gi ngalo: “Tlakusani mahlo ya nwina le hehla, mu languta, himani a vangileko lezi zilo? Hi yena a rangelako a mabandla ya zona hi ku ma xaxameta, Loyi a vitanako zontlhe hi mavito. Hi kota ya ntamu wakwe wa hombe ni wukulu gakwe ku hava ni xinwe xi vumalekako.” Nzi lo ehleketa nziku: Loku Nungungulu a hi ni ntamu wa ku vanga a wuako gontlhe legi ga hombe — legi nzi nga zi ranza nguvu a ku gi cuwuka — handle ko kanakana, i ta nzi nyika ntamu wa ku cica mahanyela ya mina kasi nzi mu tsakisa. Nzi lo ti karata nzi tlhela nzi khongela nguvu. Hi kugumesa, nzi lo zi kota ku boha matomu nonwini wa mina hi kutsongwani-kutshongwani.

LEZI NZI NGA VUNEKISA ZONA:

Kota muhlayisi wa mahaxi, a nzi kumangi lungelo ga ku bhula ni vanhu hakuva lomu mafusini nzi nga tira kona ku wa nga hi na vanhu vo tala. Hambulezo, hi kota ya gonziselelo nzi yi kumileko mitlhanganweni ya Timboni ta Jehova, nza zi kota ku bhula. Ka zilo lezi a gonziselelo leyo yi nzi vunileko, a xinwe xa zona ku bhulela vanwani a mahungu yo saseka ya Mufumo wa Nungungulu. — Mateu 6:9, 10; 24:14.

Zalezi nzi kari nzi tira hi malembe yo hlala kota dota lomu bandleni. Nzi zi wona kota lungelo ku maha ni xihi nzi xi kotako kasi ku vuna a makholwa-kulori. Kanilezi, a makatekwa ya hombe nguvu nzi nga nawo, kuva mina ni sati wa mina wo tsumbeka ni wa liranzo zinwe ni vana va hina hi tirela Jehova hi kuzwanana.

Nzi bonga Jehova hi ku nzi vumelela ku gonzisiwa hi yena hambu lezi nzi nga kala ku gonza nguvu xikola. (Isaya 54:13) Nzi li wona khwatsi a lisine la magezu ya Mavingu 10:20, ma nge: “A zikatekiso za Jehova za fumisa munhu; cima a nga engeteli wusiwana ha zona.” Mina ni ngango wa mina hi rinzela hi mahlo yo pswhuka a ku gonza zo tala nguvu xungetano hi Jehova ni ku mu tirela kala kupinzuka.