Nungungulu i maha malulamiselo kasi ku tlhatlhisa vanhu

Nungungulu i tsumbisile Abrahama lezaku a “pswalo” lowu wu profetilweko wu wa tata hi ka vana vakwe. Hi pswalo lowo, a vanhu va “matiko wontlhe” va wa ta kuma makatekwa. (Genesisi 22:18) Hi kufamba ka xikhati, Jakobe a zukulu wa Abrahama i lo ya tshama Gipite laha a ngango wakwe wu nga ya kula wuva tiko ga Israeli.

Hi nzhako ka xikhati, le Gipite ku lo humelela hosi ya tihanyi, leyi yi nga xanisa vaIsraeli kala a xikhati lexi Nungungulu a nga yimisa Mosi lezaku a rangela vaIsraeli va huma Gipite hi ku maha xihlamaliso xa ku avanyisa a mati ya Bimbi go Pswhuka. Anzhako ka lezo, Nungungulu i lo nyika vaIsraeli a zileletelo zi nga patsa Milayo ya Khume kasi ku va rangela ni ku va vikela. A milayo leyo yi wa patsa minyikelo ya ku tsetselelwa zionho. Hi ku tiriswa hi Nungungulu, Mosi i lo byela vaIsraeli lezaku Nungungulu i wa ta rumela muprofeti munwani. A muprofeti loye hi yena a nga wa tava “pswalo.”

Loku ku hunzile xipimo xa 500 wa malembe, Nungungulu i lo tsumbisa Hosi Davida lezaku a munhu loye a nga hata, ku nga “pswalo” lowu wu nga profetilwe le Edeni, i wa tava hosi ya mufumo wa kala kupinzuka. A munhu loye hi Messia, loyi a yimisilweko hi Nungungulu kasi ku ponisa vanhu ni ku neha Paradise laha misaveni.

Hi kufamba ka xikhati, Nungungulu i lo tirisa Davida ni vaprofeti vanwani lezaku va tlhamusela zilo zinwani xungetano hi Messia. Va lo profeta lezaku i wa tava munhu wo ti koramisa, a nga ni wunene; ni lezaku hasi ka mufumo wakwe, a ndlala, wubihi, ni tiyimpi zi wa nga tava kona. A vanhu vontlhe va wa ta hanya hi kurula ni vanwani zinwe ni zihari. A mababyi, kuxaniseka, ni kufa — zilo zi nga tshukangiko ziva xipanze xa kungo ga Nungungulu go sangula — zi wa ta fuva, niku a vanhu lava va fileko va wa ta vuxiwa lezaku va hanya laha misaveni.

Hi ku tirisa muprofeti Mika, Nungungulu i lo wula na ka ha hi mahlweni lezaku Messia i wa ta pswaliwa Betlehema; a wula hi ku tirisa muprofeti Danieli lezaku Messia i wa ta dawa. Kanilezi, Nungungulu i wa ta mu vuxa hi ka vafileko a tlhela a mu yimisa kota Hosi le tilweni. Danieli i profetile kambe lezaku hi kugumesa a Mufumo wa Messia wu wa ta valeta a mifumo yontlhe le’yinwani kala kupinzuka. Xana Messia hakunene i tile kota lezi zi nga profetilwe?

 — Ma seketelwe ka Genesisi zipimo 22-50, Eksodusi, Deuteronome, 2 Samueli, Tisimu, Isaya, Danieli, Mika, na Zakaria 9:9.